¿Mi chapalot ta sventa li skʼakʼalil Jeovae?
«¡Nopol xa scʼan sta li smucʼta cʼacʼalil [Jeovae], poʼot xa, jutuc xa scʼan!» (SOFONÍAS 1:14.)
1-3. 1) ¿Kʼusi chal Vivlia ta sventa li skʼakʼalil Jeovae? 2) ¿Kʼusi «li smucʼta cʼacʼalil Mucʼul [Dios]» ti xnachʼet xa tale?
LI SMUKʼTA kʼakʼalil Jeovae maʼuk noʼox jun kʼakʼal ti 24 ora sjalile. Moʼoj, yuʼun oy kʼuk sjalil sventa chichʼik chapanel yuʼun Dios li chopol krixchanoetike. Taje oy srasonal yuʼunik ti chiʼtaike, yuʼun ti kʼakʼal taje ta x-ikʼub osil, tstsan xchiʼuk chtil skʼakʼal yoʼonton li Diose, jaʼ skʼakʼalil vokolil xchiʼuk ti lilijem chkom li kʼusitike (Isaías 13:9; Amós 5:18-20; Sofonías 1:15). «¡Ay —xi tsots chal li j-alkʼop Joele—, jutuc xa scʼan sta scʼacʼalil chtal yacʼbot atoj amul li Mucʼul Diose! Pero toj xiʼbal sba li scʼacʼalil leʼe, jaʼ jun mucʼta lajel chamel chtal yacʼ li Bochʼo toj echʼem svuʼele», xi (Joel 1:15). Pe li vaʼ yelan mukʼta kʼakʼal taje li Diose «tscolta li bochʼo tucʼ yoʼntone» (Salmo 7:10).
2 «Li smucʼta cʼacʼalil Mucʼul [Dios]» chal Vivliae jaʼ chalbe skʼoplal li jeltos chapanel spasoj Diose. Jech kʼuchaʼal liʼe, kʼalal ochik ta skʼob jbabiloniaetik ta sjabilal 607 kʼalal maʼuk toʼox jkʼakʼaliltik li jnaklejetik ta Jerusalene, laj yilbeik «li smucʼta cʼacʼalil Mucʼul Diose» (Sofonías 1:4-7). Jaʼ jechtik ichapanvan xtok ta sjabilal 70 ta jkʼakʼaliltik li Diose, la stunes soltaroetik ta Roma sventa chakʼbe stoj smul li slumal Judá ti la spʼajbeik li xNichʼone (Daniel 9:24-27; Juan 19:15). Pe li Vivliae chalbe skʼoplal ti oy to la yan «smucʼta cʼacʼalil Mucʼul Diose», jaʼo ti kʼalal «chlic stsac ta cʼop [skotol] li lumeti[ke]» (Zacarías 14:1-3). Li jtakbol Pabloe akʼbat snaʼ yuʼun Dios ti skʼakʼalil Jeovae te la tsakal skʼoplal xchiʼuk li skʼakʼalil kʼalal liʼ xaʼox oy li Cristoe, ti jaʼo lik kʼalal och ta Ajvalil ta 1914 ta vinajele (2 Tesalonicenses 2:1, 2). Ta sventa ti xkiltik xnachʼet xa tal li skʼakʼalil Jeovae, solel staʼo ta jyalel li teksto ta sjabilal 2007 ti te laj yichʼ lokʼesel ta Sofonías 1:14 ti xi chale: «¡Nopol xa scʼan sta li smucʼta cʼacʼalil [Jeovae]».
3 Ta sventa ti poʼot xa li kʼakʼal taje, jaʼ xa me yorail sventa xavakʼ ta ilel ti chapalote. ¿Kʼuxi xuʼ xa chapan aba ta sventa li kʼakʼal taje? ¿Mi oy van bu skʼan xa lekubtas atalelal?
Akʼo ta ilel ti chapalote
4. ¿Kʼusi mukʼta prevail la snuptan Jesús ti baʼyel la xchapan-o sbae?
4 Li ta albil kʼop laj yal Jesucristo ta sventa li slajebal kʼusitike, xi laj yalbe mantal li yajtsʼaklomtake: «Tscʼan ti lec chapaloxuque», xi (Mateo 24:44). Kʼalal jech laj yal li Jesuse, laj onoʼox yakʼ ta ilel stuk ek ti lek chapal ta sventa jun tsatsal prevae: jaʼ ti laj yakʼ xkuxlejal ta jtojolaltike (Mateo 20:28). ¿Kʼuxi la xchapan sba li Jesuse, xchiʼuk kʼusi chchanubtasutik li stalelale?
5, 6. 1) ¿Kʼuxi tskoltautik ti jkʼanojtik Dios xchiʼuk jchiʼiltaktik sventa chapalukutik ta sventa li skʼakʼalil Jeovae? 2) ¿Kʼusi stalelal Jesús toj lek ta chanbel ta sventa skʼanel li jchiʼiltaktike?
5 Li Jesuse skʼanoj ta sjunul yoʼonton li Jeovae xchiʼuk li stukʼil mantaltake. Ta Hebreos 1:9 xi chal ta sventa li Jesuse: «Jaʼ chacʼan li cʼusitic tuqʼue; jaʼ chacontrain li cʼusi chopole. Jaʼ yuʼun li Dios avuʼune la stʼujot, jech vocʼbil lacom ta sventa yabtel. Laj yacʼbot ep xcuxetel avoʼnton. Jaʼ mu sta jech acʼbilic li yantic achiʼiltaque», xi. Skʼanoj tajmek sTot ta vinajel li Jesuse, jaʼ yuʼun tukʼ laj yakʼ-o sba ta stojolal. Mi jech jkʼanojtik ek li Diose xchiʼuk mi kakʼoj ta jkuxlejaltik li smantaltake, ta me xchabiutik (Salmo 31:23). Ti jkʼanojtik xchiʼuk ti ta jchʼunbetik smantale jaʼ me chchapanutik ta sventa li smukʼta kʼakʼalil Jeovae.
6 Jtos stalelal Jesús ti lek ivinaje, jaʼ ti la skʼan li krixchanoetike. Jech ta melel, «toj abul sbaic laj yil. Yuʼun jatsa bu tanpuquic jech chac cʼu chaʼal chijetic ti muʼyuc xchabiele» (Mateo 9:36). Jech oxal, la xcholbe yaʼyik li lekil aʼyeje. Jaʼ jech li voʼotik eke, jaʼ tstij koʼontontik ta xcholbelik yaʼyejal Ajvalilal yuʼun Dios li kʼanelale. Ti jkʼanojtik Dios xchiʼuk li jchiʼiltaktike, jaʼ me tskoltautik sventa mu xkikta jbatik li ta chol mantale xchiʼuk ti jchapan jbatik ta sventa li smukʼta kʼakʼalil Jeovae (Mateo 22:37-39).
7. ¿Kʼu yuʼun xuʼ xi jmuyubaj yoʼ to jmalatik li skʼakʼalil Jeovae?
7 La skʼupin xchʼunbel smantal Jeova li Jesuse (Salmo 40:8). Mi jech ta jkʼan ta jchʼuntik mantale xchiʼuk ti chkakʼtik ta ilel slekil koʼontontike, xi jmuyubaj me chi jtun ta stojolal Dios (Hechos 20:35). Jech ta melel, «li xcuxetel coʼntontic chacʼ Mucʼul Diose jaʼ stsatsal coʼntontic» ti chchabiutike xchiʼuk ti jaʼ chchapanutik lek ta sventa li smukʼta kʼakʼalil Jeovae (Nehemías 8:10).
8. ¿Kʼu yuʼun skʼan xi jnopaj ta stojolal Jeova ta orasion?
8 Li orasionetik la spas ta sjunul yoʼonton Jesuse, jaʼ chapanat-o li ta prevaetik tsnuptan ta sventa li xchʼunel yoʼontone. Kʼalal akʼbat yichʼ voʼ yuʼun li Juane yakal tspas orasion xchiʼuk kʼalal mu toʼox bu stʼujoj li yajtakboltake sjunul akʼobal la skʼopon li sTote (Lucas 6:12-16). ¿Mi mu tauk xkʼot ta koʼontontik kʼalal ta jkʼeltik ta Vivlia li s-orasiontak Jesús ti ta sjunul yoʼonton la spas kʼalal jvoy xa noʼox kuxul liʼ ta Balumile? (Marcos 14:32-42; Juan 17:1-26.) ¿Mi tsots skʼoplal chavaʼi ek li orasione? Nopolik noʼox me xa kʼopon li Jeovae xchiʼuk jaʼ ti kʼu sjalil xa kʼane. Kʼano akʼo sbeiltasot li chʼul espiritue, mi la avakʼ venta ti tsbeiltasot une, chʼamo me. Li avi ti toj tsots ta ichʼel batel li kuxlejal ti poʼot xa ta jyalel li smukʼta kʼakʼalil Jeovae, toj tsots me skʼoplal ti lekuk tajmek xkil jbatik xchiʼuk li jTotik ta vinajele. Jech oxal chaʼa, yantikuk me xi jnopaj mas ta stojolal Jeova ta sventa li orasione (Santiago 4:8).
9. ¿Kʼu yuʼun skʼan oyuk ta koʼontontik xchʼultajesbel li sbi Jeovae?
9 Li Jesuse oy ta yoʼonton ti xichʼ ichʼbel ta mukʼ xchʼul bi li Jeovae, taje jaʼ chapanat-o lek xtok sventa li prevaetik tsnuptane. Xi onoʼox la xchanubtas ta spasel orasion li yajtsʼaklomtake: «Ichʼbiluc ta mucʼ [o chʼultajesbiluk] abi», xi (Mateo 6:9). Mi ta jkʼantik ta melel ti xichʼ chʼultajesbel sbi li Diose, ta me xkakʼbetik yipal ti mu xichʼ chopol kʼoptabele. Vaʼun, jaʼ jech lek chapalutik ta sventa li smukʼta kʼakʼalil Jeovae.
¿Mi skʼan xa tukʼibtas atalelal?
10. ¿Kʼu yuʼun lek ti jkʼeltik kʼu yelan li jkuxlejaltike?
10 Ti xvuluk okʼom li skʼakʼalil Jeovae, ¿mi chapalot xa ta melel? Jkotoltik skʼan jkʼeltik kʼuyelan li jkuxlejaltike, vaʼun kakʼtik venta mi skʼan jtukʼibtastik li kʼusi oy ta koʼontontike o li jtalelaltike. Ta skoj ti komkom li kuxlejale xchiʼuk ti mu nabajuke, skotol me kʼakʼal skʼan xkakʼbetik yipal ti xi jnopaj ta stojolal li Jeovae (Eclesiastés 9:11, 12; Santiago 4:13-15). Ta sventa taje, jchanbetik skʼoplal jaytosuk ti kʼusi van skʼan jtsʼetanbetik lek xchikinale.
11. Ta sventa li xchanel Vivliae, ¿kʼusi avakʼoj ta avoʼonton spasel li voʼote?
11 Jtos ti kʼusi tsots skʼoplale, jaʼ ti skʼan jkʼel jVivliatik kʼuchaʼal yaloj li «jʼabtel ti jun [«tukʼ», NM] yoʼnton[e]» (Mateo 24:45). Xuʼ van xavakʼ ta avoʼonton xchanel ta jun jabil sliklej li Vivliae xchiʼuk ti xa chʼakbe yorail ta snopbel smelolal xtoke. Mi cha kʼel chanibuk kapitulo jujun kʼakʼale, ta me xlaj avuʼun skʼelel ta jun jabil li 1,189 skapituloale. Li ajvaliletik ta Israele skʼan «acʼo sqʼuel[ik] scotol cʼacʼal ti cʼu sjalil cuxul[ik]» li smantal Jeovae, jech van la spas ta melel ek li Josuee (Deuteronomio 17:14-20; Josué 1:7, 8). ¡Toj tsots me skʼoplal ti skʼelbeik sKʼop Dios jujun kʼakʼal li jchabi chijetik ta mantale! Taje jpʼel skʼoplal chkoltaatik-o ta yakʼel li «lequil chanubtasele» (Tito 2:1).
12. ¿Kʼusi van skʼan xa pas jechuk ta skoj ti toj poʼot xa li skʼakʼalil Jeovae?
12 Ti toj poʼot xa li skʼakʼalil Jeovae, jaʼ me skʼan stij koʼontontik jechuk ti xi jkʼot skotol velta li ta tsobajele xchiʼuk ti jcholtik mantal bu kʼalal xuʼ kuʼuntike (Hebreos 10:24, 25). Jaʼ me jech chlekub batel li jpʼijiltik ta xcholbel skʼoplal li Ajvalilal yuʼun Dios ti yakalutik ta saʼel krixchanoetik ti lek yoʼontonik sventa jkoltatike (Hechos 13:48). Yikʼaluk van cha kʼan cha pas yan abtelaletik ta tsobobbail, jech kʼuchaʼal skoltael li mol-meʼeletik xchiʼuk spatbel yoʼonton li kerem-tsebetike. ¡Xa muyubaj me tajmek mi jech cha pase!
Ti kʼuyelan chavil aba xchiʼuk li yantike
13. ¿Kʼusi skʼan jakʼbe jbatik ta sventa li slapel achʼ talelalile?
13 Ta sventa ti jpʼel nopol xa tajmek li skʼakʼalil Jeovae, yikʼaluk van mas to tsots skʼan xavakʼbe yipal sventa «jaʼ xa [lapbe] stalel li achʼ cristiano ti pasbil jech chac cʼu chaʼal stuc li Diose, ti tuqʼue ti me jutuc muʼyuc smule» (Efesios 4:20-24). Ti kʼalal cha tukʼibtas batel li atalelal kʼuchaʼal jun yajtsʼaklom Cristoe, yikʼaluk van xakʼik venta yantik ti yakal «[cha pas] cʼusi tscʼan li Chʼul Espiritue» xchiʼuk ti chavakʼ ta akuxlejal li yabtele (Gálatas 5:16, 22-25). ¿Mi xuʼ jamal xaval kaʼitik kʼusi svinajeb ti jaʼ xa alapojbeik stalelal yajtsʼaklom Cristo li voʼot xchiʼuk avutsʼ avalale? (Colosenses 3:9, 10.) Jech kʼuchaʼal liʼe, ¿mi ojtikinbilot ti lek kʼusitik cha pas ta tsobobbaile xchiʼuk li ta butikuk noʼoxe? (Gálatas 6:10.) Ti nopajtik noʼox cha chan li Vivliae jaʼ me tskoltaot ti jechuk atalelal kʼuchaʼal taje xchiʼuk jaʼ me chchapanot xtok ta sventa li skʼakʼalil Jeovae.
14. ¿Kʼu yuʼun skʼan jkʼantik chʼul espiritu mi ta jkʼan ta jchʼiestik pajesejbaile?
14 ¿Kʼusi skʼan xa pas mi toj echʼem xa iline xchiʼuk ti skʼan xa pajes aba mas chavile? Li pajesejbail taje, jaʼ me jtos yabtel chʼul espiritu ti xuʼ chakʼ oyuk ta atojolale. Jech oxal chaʼa, kʼanbo xchʼul espiritu li Jeovae. Xi me laj yal Jesús chavaʼie: «Cʼanic, chaʼacʼbatic; saʼic, chataic; tijic, chajambatic. Yuʼun li bochʼo ta scʼanilane, ta xʼacʼbat; li bochʼo ta saʼilane, ta sta; li bochʼo ta stijilane, ta xjambat. [...] Voʼoxuc ti chopoloxuc onoʼoxe, xanaʼic cʼusi lec chavacʼbeic li anichʼnabique. ¡Buuc xa li Atotic te oy ta vinajele Chʼul Espíritu chacʼbe li bochʼotic ta scʼanique!», xi (Lucas 11:9-13).
15. ¿Kʼusi skʼan jpastik jechuk mi oy jkʼoptik xchiʼuk junuk ermanoe?
15 Jnoptik avaʼi ti oy akʼop xchiʼuk junuk ermanoe. Mi jeche, skʼan noʼox me xavakʼbe yipal xchapanel, yuʼun jaʼ me jech oy lekilal xchiʼuk jmoj me oy li tsobobbaile (Salmo 133:1-3). Paso li kʼusi chal Jesús ta Mateo 5:23, 24 o jaʼ li kʼusi chal Mateo 18:15-17, jaʼ ti kʼuyelan ti akʼopike. Mi mal xa batel Kʼakʼal xchiʼuk ti yokel to cha iline, mu me xavakʼ echʼuk mas ora ta xchapanel li akʼope. Ti kʼusi onoʼox skʼan oyuk ta koʼontontike chaʼa jaʼ ti xi jpasvan ta pertone. Xi laj yal Pablo ta sventa taje: «Lec xavil abaic, cʼux xavaʼay abaic ta jujuntal. Talbat xapasbeic abaic perdón jech chac cʼu chaʼal la spasboxuc perdón Dios ta sventa li Cristoe», xi (Efesios 4:25, 26, 32).
16. ¿Kʼusi smakoj batel ti «cʼux [xaʼi sbaik] ta jujuntal» li buchʼutik oy snup xchiʼilike?
16 Li buchʼutik oy snup xchiʼilike skʼan «cʼux [xaʼi sbaik] ta jujuntal» xchiʼuk ti xakʼbe sbaik perton ta jujuntale. Mi skʼan oyuk mas xkʼuxul xchiʼuk slekil avoʼonton ta stojolal li anup achiʼile, akʼbo me yipal ta yakʼel ta ilel kʼalal cha saʼ batel li beiltasel chakʼ Dios xchiʼuk li sKʼope. Sventa xkuxet noʼox xchiʼuk ti tukʼuk avoʼonton ta stojolal li anup achiʼile, ¿mi oy kʼusi skʼan xa pas sventa xkʼot ta pasel avuʼun li kʼusi chal 1 Corintios 7:1-5? Jech ta melel, ta sventa liʼe skʼan me «cʼux [xaʼi sbaik] ta jujuntal» li buchʼutik oy snup xchiʼilike.
17. ¿Kʼusitik skʼan spas batel li buchʼu tsots saʼoj smule?
17 ¿Pe mi oy buchʼu spasoj tsots smul une? Mi jaʼ jech kʼotem ta atojolale, oy me kʼusi anil noʼox skʼan xa pas. Mu me teuk noʼox chʼan xa chi, bat me kʼanbo koltael li moletike, yuʼun li s-orasionik xchiʼuk li tojobtasel chakʼike jaʼ me tskoltaot ek sventa cha lekub ta mantal (Santiago 5:13-16). Suteso avoʼonton, vaʼun kʼopon Jeova, mi moʼoje, toj chopol me chavaʼi aba xchiʼuk muʼyuk me jun avoʼonton. Jaʼ jech laj yaʼi sba li Davide; pe ¡toj jun noʼox slekil laj yaʼi kʼalal la xchapbe Jeova li smule! Xi la stsʼibae: «Xcuxet noʼox yoʼnton li bochʼo jʼechʼel ichʼaybat, ti jʼechʼel ipasbat o perdón yuʼun smule. Xcuxet noʼox yoʼnton li bochʼo muʼyuc loʼlavanej ta yoʼntone, xchiʼuc ti mu xʼacʼbat xcuch smul yuʼun li Mucʼul Diose», xi (Salmo 32:1-5). Jaʼ jech, li Jeovae chchʼaybe smul li buchʼu tsutes yoʼonton ta melele (Salmo 103:8-14; Proverbios 28:13).
Jechuk me nom oyan ta stojolal li balumile
18. ¿Kʼu yelan skʼan xavil li balumile?
18 Ta melel, oy van ta avoʼonton ta jyalel li kʼupil sba achʼ balumil ti yaloj chakʼbutik li jTotik ta vinajele. Pe ¿kʼusi cha nop ta sventa li balumil liʼe, jaʼ xkaltik, li chopol krixchanoetik ti nom oyik ta stojolal Diose? Li Satanás ti jaʼ «banquilal jpasmantal liʼ ta banamile», muʼyuk xuʼ yuʼun ta stojolal li Jesucristoe (Juan 12:31; 14:30). Jamal ta aʼyel ti mu xa kʼan spasot ta mantal li Diablo xchiʼuk li sbalumile. Jaʼ yuʼun chaʼa, tsako lek ta mukʼ li kʼusi xi la stsʼiba jtakbol Juane: «Mu me xbat avoʼntonic yuʼun li cʼusi sventa banamile xchiʼuc li cʼusitic chopol oy ta banamile», xi. Liʼe jaʼ me li kʼusi toj lek xuʼ xa pase, yuʼun «li banamile xchiʼuc li cʼusi chacʼ batuc coʼntontic yuʼune, ta onoʼox xlaj; yan li bochʼo jaʼ tspasilan cʼusi tscʼan yoʼnton Diose jaʼ ta xcuxi sbatel osil» (1 Juan 2:15-17).
19. ¿Kʼusitik ta sventa mantal chkalbetik kerem-tsebetik ti akʼo oyuk ta yoʼontonik staele?
19 Totil-meʼiletik, ¿mi yakal cha kolta avalab anichʼnabik sventa «mu soques sba[ik] ta sventa li cʼusitic chopol liʼ ta banamile»? (Santiago 1:27.) Jech kʼuchaʼal li jtsakchoy ti chjochbe yakʼil li stsakobil xchoye, li Satanás eke oy ta yoʼonton chjoch batel li avalab anichʼnabike, ta sventa taje ep kʼusitik tstunes. Oy kʼusitik vaʼanbil xchiʼuk oy yan organisasionetik sventa li kerem-tsebetike, vaʼun jaʼ jech lek xkʼotik-o li ta slumal Satanase. Pe li yajtunelutik Jeovae te kaviltik li ta jun noʼox organisasion ti chkuch yuʼun kʼalal to ta slajebal li kʼusitik chopol avie. Jech oxal chaʼa, skʼan xkakʼbetik ta yoʼonton kerem-tsebetik ti «scotoluc ora [x-abtejik] o yuʼun li Cajvaltique» (1 Corintios 15:58). Mas ta stojolalik li totil-meʼiletike, yuʼun skʼan skolta yalab xnichʼnabik sventa oyuk ta yoʼontonik stael li kʼusitik ta mantal yoʼ jech lek chapalik ta sventa li skʼakʼalil Jeovae. Mi jech tspasike, ta me skʼupinik li kuxlejal ti chakʼ muyubajele xchiʼuk ti chakʼ spatobil oʼontonal ti tskʼupil kʼopta Diose.
Kʼelo to me batel mas li ta skʼakʼalil Jeovae
20. ¿Kʼu yuʼun skʼan kuxuluk ta joltik li spatobil koʼontontik ta sventa li kuxlejal sbatel osile?
20 Muʼyuk me cha lubtsaj ta smalabel skʼakʼalil Jeova mi lek kuxul ta ajol li spatobil oʼontonal ta sventa li kuxlejal sbatel osil ta Paraisoe (Judas 20, 21). Ta melel, cha kʼan xa van teuk oyan avaʼi, ti cha kʼupin li atsatsal ta akeremal o ta atsebale xchiʼuk ti sbatel xa me osil oy avuʼun sventa cha ta batel li skʼupil kʼoptaobil Jeova xchiʼuk ti cha chan mas ta stojolale. Jech, xuʼ me jchantik-o sbatel osil ta sventa Dios, yuʼun li avie ta «stiʼtiʼ noʼox yabtel chcaʼibetic» smelolal (Job 26:14). ¡Toj kʼupil sba li kʼusi chtal ta tsʼakale!
21, 22. ¿Kʼusi ta jchantik ta stojolal li buchʼutik chichʼik chaʼkuxesele, xchiʼuk kʼusi chkakʼbetik xchanik?
21 Li buchʼutik chichʼik chaʼkuxesel ta Paraisoe xuʼ me xalbutik li kʼusi mu to xkojtikintike. Te me chkiltik Enoc, ti chalbutik kʼuxi la sta stsatsal yoʼonton ta yalbel chopol krixchanoetik li kʼusi yaloj Jeova ta sventaike (Judas 14, 15). Ta melel, li Noé eke chalbutik skotol li kʼusitik la spas sventa svaʼanel li arkae. Li Abraham xchiʼuk Sarae ta xchapbutik kʼuyelan laj yaʼi sbaik kʼalal laj yiktaik Ur sventa chbat nakiikuk ta karpanaetike. Nopo xa noʼox avaʼi ta stojolal Ester kʼalal lek tajmek xchapet chalbutik kʼuxi la spoj li steklumale xchiʼuk ti la smakbe ta be li kʼusi la snop tspas Amane (Ester 7:1-6). Xchiʼuk ti kʼalal tsvules ta sjol Jonás ti oxib kʼakʼal te tikʼil ta yut xchʼut mukʼta choye, o li Juan J-akʼvanej ta voʼ ti chal kaʼitik kʼuyelan laj yaʼi sba kʼalal laj yakʼbe yichʼ voʼ li Jesuse (Lucas 3:21, 22; 7:28). ¡Toj ep kʼusitik labalik sba ta jnaʼtik!
22 Li ta Ajvalilal ta Jmil Jabil yuʼun Cristoe, yikʼal van cha ta amoton ta xchanubtasel jlomuk li buchʼutik chchaʼkuxiike, ti chavakʼbe «[yojtikinik] batel cʼusi tscʼan li Diose» (Proverbios 2:1-6). Li avie, kʼupil sba chkiltik kʼalal chlik xchanik ta stojolal Jeova Dios li krixchanoetike xchiʼuk ti chakʼ ta xkuxlejalik li kʼusi chchanike. Jech oxal chaʼa, nopo xa noʼox avaʼi li muyubajel cha ta kʼalal chavil ti chakʼbot sbendision Jeova ta skoj ti chavakʼbe yipal xchanubtasel krixchanoetik ti voʼne xa echʼik ta Balumile xchiʼuk ti oy tajmek ta yoʼontonik stojel ta vokol li chanubtasel chichʼike.
23. ¿Kʼusi skʼan jpʼeluk oy ta koʼontontik?
23 Li bendisionetik ti yakal xa ta jkʼupintik li yajtunelutik Jeovae toj ep tajmek, mu xchap kuʼuntik mi jaʼuk xkaʼibetik smelolal skotol ta skoj ti muʼyuk tukʼ li jnopbentike (Salmo 40:5). Mas oy tajmek ta koʼontontik stojbel ta vokol Jeova li matanaletik ta mantal yakʼojbutike (Isaías 48:17, 18). Jaʼ yuʼun chaʼa, kʼuk yelan ti kʼusitik ta jnuptantik ta jkuxlejaltike, ta sjunuluk me koʼontontik tunkutik ta stojolal Jeova yoʼ to ta jmalabetik li smukʼta kʼakʼalile.
[Lokʼol ta pajina 14]
Laj yakʼ ta ilel ti chapal ta sventa prevaetik li Jesuse
[Lokʼol ta pajina 17]
Toj kʼupil me sba ti jkoltatik ta yojtikinel Jeova li buchʼutik chchaʼkuxiike
[Lokʼol ta pajina 16]
¿Kʼusi cha takʼ?
• ¿Kʼusi «li smucʼta cʼacʼalil [Jeovae]»?
• ¿Kʼuxi xuʼ xavakʼ ta ilel ti chapalot ta sventa li skʼakʼalil Jeovae?
• ¿Kʼusi van skʼan jel ta jkuxlejaltik ta skoj ti nopol xa tajmek li smukʼta kʼakʼalil Diose?
• ¿Kʼusi oy ta avoʼonton cha pas kʼalal echʼem xaʼox li skʼakʼalil Jeovae?