«¡Toj kʼupil xa noʼox sba li lokʼoletike!»

¿Jayib velta jech avalojbe aba xchiʼuk avalojbe yantik kʼalal chlik akʼel li revista liʼe? Mu me jecheʼuk noʼox te chtal li kʼupilik sba divujoetik xchiʼuk lokʼoletik ti yakʼoj yipalik ta spasele. Jaʼ sventa chchanubtasutik ti oy kʼusi chakʼ jnoptik xchiʼuk ti tstij koʼontontike. Toj jtunel me kuʼuntik kʼalal ta jchapan jbatik li ta Xchanel Li Jkʼel osil ta toyole sventa xkakʼ jloʼiltik li ta tsobajele.

Chʼakbo yorail jlikeluk sventa xanopbe lek skʼoplal kʼu yuʼun jaʼ la stikʼik tal li lokʼol ta slikebal li jujun xchanobile. ¿Kʼusi skʼan xal? ¿Kʼuxi snitoj sba xchiʼuk li sbi xchanobile xchiʼuk li teksto ta slikebale? Vaʼun kʼelo li yan lokʼoletike, mi laje jakʼbo aba kʼuxi snitoj sba xchiʼuk li kʼusi chal xchanobile xchiʼuk kʼuxi xuʼ xavakʼ ta akuxlejal.

Li buchʼu chetʼes li Xchanel Li Jkʼel osil ta toyole chakʼ akʼo xkalbetik sloʼilal jujun lokʼol, chal kʼuxi snitoj sba xchiʼuk li kʼusi yakalutik xchanele xchiʼuk ti kʼuxi xuʼ xkakʼ ta jkuxlejaltike. Bakʼintike te chal ta yolon lokʼol bu parafoal koʼol skʼoplal xchiʼuk. Pe oy jlom ti jaʼ chal li buchʼu chetʼes li xchanobil ti kʼusi ora xuʼ xichʼ albel skʼoplal li lokʼoletike. Jkotoltik ta jtabetik lek sbalil li lokʼoletik ti chakʼbeik yipal ta spasele, yuʼun jaʼ sventa xkʼot lek ta yoʼontonik Skʼop Dios li buchʼutik tskʼelik li lokʼoletike.

Xi laj yal jun ermanoe: «Kʼalal chlaj koʼonton ta skʼelel junuk mantal ti lek tsʼibabile, mas to chkʼot ta koʼonton kʼalal ta jkʼel li kʼupilik sba lokʼoletike».