Junchib slikeb jloʼiltik
Kʼu yelan xuʼ jlikestik chanubtasel ta Vivlia li ta baʼyel sabado yuʼun oktuvree
«Yakal ta jvulaʼankutik uni jlikeluk jlakʼnakutik sventa chkalbekutik skʼoplal jun lekil ajvalil. ¿Mi oy junuk ajvalil xanaʼ ti xuʼ slajesbe skʼoplal li vokoliletik ti toj tsotsike, jech kʼuchaʼal li majbail xchiʼuk ti muʼyuk tukʼilale?» Akʼo stakʼ. Vulesbo ta sjol li ta orasion sventa padrenuestroe, li Jesuse la xchanubtas yajtsʼaklomtak sventa spasik orasion yoʼ xtal jun ajvalil ti tslajes li vokolile, li Ajvalilal yuʼun Diose. Mi laje akʼbo yil li pajina 16 li ta revista Li Jkʼel osil ta toyole, ti jaʼ sventa 1 yuʼun oktuvre xchiʼuk koʼol xachanik li mantal ti te talem ta yolon li baʼyel sjakʼobile xchiʼuk kʼelik junuk li teksto yichʼoj tale. Akʼbo li revistaetike, vaʼun albo ti chasut yan velta sventa xachanik li yan sjakʼobile.
Li Jkʼel osil ta toyole 1 yuʼun oktuvre
«Yakal ta jchiʼinkutik ta loʼil jlikeluk krixchanoetik ta sventa jun orasion ti lek ojtikinbil ti la xchanubtas yajtsʼaklomtak li Jesuse. [Kʼelo Mateo 6:9, 10.] ¿Mi oy yalojboxuk smelolal kʼusi jaʼ li Ajvalilal yuʼun Diose xchiʼuk kʼu yuʼun toj tsots skʼoplal laj yaʼi li Jesuse? [Akʼo stakʼ.] Li revista liʼe chakʼ ta ilel kʼusi chal Vivlia ta sventa li Ajvalilal yuʼun Diose xchiʼuk li kʼusitik kʼupilik sba tspas ta sventa li Balumile.»
¡Despertad! Oktuvre
«Ta jkoltakutik uni jlikel krixchanoetik ta stakʼel sjakʼobil liʼe. [Akʼbo yil li baʼyel pajinae.] ¿Mi skʼan van jkʼulejutik sventa lek xbat li jkuxlejaltike? [Akʼo stakʼ.] Li Vivliae chalbutik kʼu yelan skʼan xkiltik li kʼusitik oy kuʼuntike. [Kʼelo Lucas 12:15.] Chalbutik xtok ti jkotoltik xuʼ lek xbat li jkuxlejaltike. Li revista liʼe chalbe mas skʼoplal ta sventa taje.»