Achʼ kʼejojetik sventa smuyubtaobil Jeova
1 Li ta tsobajel sventa jujun jabil tspas li Watch Tower Bible and Tract Society of Pennsylvania ti kʼot ta pasel ta 4 yuʼun oktuvre ta 2014, laj yichʼ alel ti chichʼ achʼubtasel li svunal kʼejoje. Taje jaʼ jun aʼyej ti toj kʼupil sbae. Jech xtok, skotol li buchʼutik te oyik ta tsobajele laj yichʼik vulesbel ta sjolik ti tsots skʼoplal sventa xkichʼtik-o ta mukʼ Jeova li kʼejojetike (Sal. 96:2).
2 ¿Kʼu yuʼun skʼan xichʼ achʼubtasel li svunal kʼejoje? Oy ep srasonal. Li baʼyele, jaʼ ti laj xa yichʼ aʼibel mas smelolal junantik teksto ta Vivliae, jaʼ yuʼun xuʼ van skʼan xichʼ jelel jpʼelantik sletrail li kʼejojetike (Prov. 4:18). Li xchibale, ta skoj ti yakal chichʼ achʼubtasel li Traducción del Nuevo Mundo ta jayibuk kʼopetike, xuʼ van tskʼan jelel jpʼelantik kʼop li ta svunal kʼejoj ti te toʼox lokʼesbil li ta pokoʼ Vivliae. Jech xtok, ta skoj ti xuʼ van oy jaytos kʼusitik chichʼ jelel li ta kʼejoje, laj yichʼ nopel ti xichʼ pasel yan achʼ kʼejojetike.
3 ¿Mi persa van skʼan jmalatik yan svunal kʼejoj sventa xlik jtunestik? Moʼoj, yuʼun li ta uetik chtale chichʼ muyesel junantik ta jw.org. Kʼalal mi laj yichʼ muyesel ta Internet junuk achʼ kʼejoje, mu jaluk ch-echʼ sventa xichʼ kʼejintael ta jun Tsobajel sventa Tunelal. Li kʼusitik ch-echʼ li ta xemana taje te chichʼ talel sbi li kʼejoje xchiʼuk te chvinaj jpʼel kʼop ti «achʼ kʼejoj» xie.
4 Kʼuxi xuʼ xkom ta joltik li achʼ kʼejojetike. Mu kʼunuk ta chanel li jun kʼejoje. Akʼo mi jech, oy ta koʼontontik xchanbel li jtsʼibajom yuʼun salmo ti xi laj yale: «Jaʼ yuʼun ta jqʼuejinta o alequilal ta scotol coʼnton; muʼyuc bu ta jpajes jba o ta sqʼuejintael» (Sal. 30:12). Li kʼusitik chichʼ alel batel liʼe tskoltautik sventa xkom ta joltik li achʼ kʼejojetike xchiʼuk ti ta sjunuluk koʼontontik xijkʼejine.
Sventa mas anil xkom ta joltik li achʼ kʼejoje, epuk me ta velta jchikintatik li sonetike, ti xuʼ te jtatik ta jw.org.
Jchanilantik li kʼusi chale xchiʼuk kakʼtik persa skomesel ta joltik.
Jchanilantik li ta Akʼobal sventa Yichʼel ta Mukʼ Jeova yoʼ sjunuluk koʼontontik xijkʼejin xchiʼuk li kutsʼ kalaltike.
5 Li ta uetik chtale, kʼalal chichʼ talel achʼ kʼejoj sventa stsutseb li Tsobajel sventa Tunelale, li tsobobbaile chchikinta baʼyel li sone. Ta tsʼakale komon chijkʼejin jech kʼuchaʼal onoʼox ta jpastike.
6 Ta melel, toj tsots skʼoplal ti chijkʼejinutik li ta tsobajele, yuʼun ta jtsob yechʼomal ketik ta smuyubtael Jeova. Jech oxal, mu me kʼusi yan jpastik kʼalal mi kʼot yorail chijkʼejin li ta jtsobajeltike.
7 Oy to kʼusi yan xuʼ jpastik yoʼ chkakʼtik ta ilel ti jaʼ sventa yichʼobil ta mukʼ Dios li kʼejojetike. Jech kʼuchaʼal li ta jujun asambleaetike, chakʼik kaʼitik son kʼalal skʼan toʼox xlik li mantaletike. Li sonetik ta jtunestik sventa chkichʼtik-o ta mukʼ Diose, tspasik gravar ermanoetik ti likemik ta spʼejel Balumile. Chakʼik persa sventa xtalik chib velta ta jabil ta Patterson (Nueva York) xchiʼuk tstoj stuk spasajeik. Jaʼ yuʼun, bat noʼox me chotlukutik kʼalal mi jech laj yal li buchʼu tslikes asambleae xchiʼuk ti jchikintatik li sone. Taje tskoltautik sventa jchapan koʼontontik ta xchikintael li kʼusitik ch-echʼe (Esd. 7:10, TNM).
8 Li tsobajel avie ta jtsutsestik ta jun achʼ kʼejoj ti xi sbie «¡Akʼo taluk li Ajvalilal yuʼun Diose!». Li kʼejoj taje, ti laj yichʼ kʼejintael li ta tsobajel sventa jujun jabile, laj yichʼ pasel ta skoj ti lokʼ sien jabil tspas mantal li Ajvalilal yuʼun Diose.
9 Li achʼ kʼejojetike jaʼ te stsakojbe skʼoplal li ‹kʼusitik lek› yakʼojbutik Jeovae (Mat. 12:35 sbavokʼal). Kakʼtik persa xchanel sventa sjunuluk koʼontontik xijkʼejin. Vaʼun jech ta jmuyubtatik-o li Diose xchiʼuk ta xkichʼtik-o ta mukʼ (Sal. 147:1).