Li kʼusi chal Apokalipsis ti chkʼot ta atojolale

1. ¿Kʼusi tsots skʼoplal skʼan jnoptik jkotoltik?

LI AVIE, jkotoltik oy kʼusi tsots skʼoplal skʼan jnoptik, yuʼun jaʼ te chvinaj mi chijkuxi sbatel osil: mi jaʼ chkakʼ jbatik ta ventainel yuʼun Jeova ti jaʼ oy sderecho ch˗ajvalilaj ta sjunul vinajel balumile o mi jaʼ chkakʼtik akʼo sventainutik Satanas ti jaʼ yajkontra Diose. Jtos noʼox kʼusi xuʼ jtʼujtik (Mat. 25:31-33, 46). Kʼalal jaʼo yakal li «mukʼta tsatsal vokolile», li yajtuneltak Dios ti tukʼ chakʼ sbaike chichʼ smarkailik sventa kuxul xkomik (Apok. 7:14; Esek. 9:4, 6). Pe chichʼik lajesel li buchʼutik yichʼojbeik smarkail li jtiʼvanej chonbolome (Apok. 14:9-11).

2. 1) ¿Kʼusi tstij koʼontontik spasel li kʼusi chal ta Ebreos 10:35 kʼalal ta 39? 2) ¿Kʼuxi tskoltautik li slivroal Apokalipsise?

² (Kʼelo Ebreos 10:35-39). Mi avakʼoj xa aba ta stojolal li Ajvalilal yuʼun Diose, toj lek ti jech la anope. Oy van ta avoʼonton ti xakolta yantik sventa jechuk spasik eke. Xuʼ xatunes li kʼusi chal ta slivroal Apokalipsise. Te chal kʼusi chkʼot ta stojolalik li buchʼutik tskontrainik Jeovae xchiʼuk li kʼusi lek tstaik li buchʼutik tukʼ chakʼ sbaik ta stojolal li Ajvalilal yuʼune. Mi ta jkʼelbetik lek skʼoplal li kʼusi chale, tskoltautik sventa jpʼeluk ta koʼontontik xijtun˗o batel ta stojolal Jeova. Jech xtok, xuʼ jkoltatik˗o yantik sventa xtunik ta stojolal Jeova xchiʼuk ti mu xiktaike.

3. ¿Kʼusi ta jtakʼtik li ta xchanobil liʼe?

³ Li ta xchanobil liʼe, ta jtakʼtik liʼe: ¿kʼusi chkʼot ta stojolalik li buchʼutik chakʼ sbaik ta ventainel yuʼun li Ajvalilal yuʼun Diose? xchiʼuk ¿kʼusi chkʼot ta stojolalik li buchʼutik chakʼ sbaik ta ventainel yuʼun li jtiʼvanej chonbolom ti kuxul tsoj skoloral chal ta Apokalipsise?

LI KʼUSI CHKʼOT TA STOJOLAL LI BUCHʼU TUKʼ CHAKʼ SBAE

4. ¿Buchʼutik ti te xchiʼukik Jesus ta vinajel laj yil li jtakbol Juane?

⁴ Li Juane akʼbat yil yuʼun Dios chaʼtsop krixchanoetik ti chakʼ sbaik ta ventainel yuʼun li Ajvalilal yuʼun Jeovae xchiʼuk ti tstaik li kuxlejal sbatel osile. Li jtsope 144 mil yepalik (Apok. 7:4). Ta balumil toʼox oyik, vaʼun chmuyik batel ta vinajel sventa jmoj sventainik talel balumil xchiʼuk li Jesuse (Apok. 5:9, 10; 14:3, 4). Li Juane laj yil ti te vaʼalik xchiʼuk Jesus li ta vits Sion ta vinajele (Apok. 14:1).

5. ¿Kʼusi poʼot xa xkʼot ta stojolal li buchʼutik tʼujbil chbatik ta vinajel ti liʼ to oyik ta balumile?

⁵ Kʼalal kuxulik toʼox li jtakboletike, lik yichʼ tʼujel talel li buchʼutik te skʼoplal li ta 144 mile (Luk. 12:32; Rom. 8:17). Pe li Juane laj yichʼ albel ti jayvoʼ xa noʼox kuxulik liʼ ta balumil li ta slajebal kʼakʼale. Kʼalal skʼan to xlik li mukʼta tsatsal vokolile, «li skomenal» li buchʼutik chbatik ta vinajele chichʼ li slajeb seyoalike, jaʼ xkaltik, ti jpʼel skʼoplal chbatik ta vinajele (Apok. 7:2, 3; 12:17). Kʼalal jaʼo yakal li mukʼta tsatsal vokolile, chichʼik ikʼel batel ta vinajel sventa xbat xchiʼinik li yan xchiʼiltakik ti te xa oyik ta vinajel ta skoj ti tukʼ laj yakʼ sbaik ta stojolal Jeova ti kʼu sjalil liʼ kuxiike. Jmoj ch˗ajvalilajik xchiʼuk Jesus li ta Ajvalilal yuʼun Diose (Mat. 24:31; Apok. 5:9, 10).

6, 7. 1) ¿Buchʼutik yan laj yil li Juane, xchiʼuk kʼusi jnaʼojtik ta stojolalik? 2) ¿Kʼu yuʼun skʼan skʼelik lek li kʼusi chal Apokalipsis kapitulo 7 li epal krixchanoetik xchiʼuk li buchʼutik chbatik ta vinajele?

⁶ Kʼalal laj xa ox yil Juan li jtsop krixchanoetik ti te oyik ta vinajele, laj yil xtok «epal krixchanoetik». Pe li jtsop krixchanoetik liʼe muʼyuk buchʼu xchap yuʼun (Apok. 7:9, 10). Xi to chalbe skʼoplalik li Juane: «Jaʼ li buchʼutik kuxul chkomik li ta mukʼta tsatsal vokolile, ti laj xa xchukʼ li snatil kʼuʼike xchiʼuk ti laj xa sakubtasik ta xchʼichʼel li Chʼiom Chije» (Apok. 7:14). Li buchʼutik kuxul chkomik li ta mukʼta tsatsal vokolile chkuxiik li ta balumile xchiʼuk ep kʼusitik tskʼupinik (Sal. 37:9-11, 27-29; Prov. 2:21, 22; Apok. 7:16, 17).

⁷ Mu ventauk mi tʼujbil chijbat ta vinajel o mi liʼ chijkuxi ta balumile, jkotoltik skʼan teuk jkʼoplal chkaʼitik li kʼusi chal li albil kʼop ta Apokalipsis kapitulo 7. Li vaʼ orae, toj labal sba kʼusitik ta jkʼupintik jkotoltik. Chijmuyubaj tajek ti jaʼ laj kakʼ jbatik ta ventainel yuʼun li Ajvalilal yuʼun Jeovae. ¿Kʼusi to chal ta Apokalipsis ta sventa li mukʼta tsatsal vokolile? (Mat. 24:21).

LI KʼUSI CHKʼOT TA STOJOLAL LI BUCHʼU TSKONTRAIN DIOSE

8. ¿Kʼuxi chlik li mukʼta tsatsal vokolile, xchiʼuk kʼusi tspas jutuk mu skotoluk li krixchanoetike?

⁸ Li ta xchanobil echʼe, la jchantik ti ajvaliletike poʼot xa stsakik ta kʼop li Mukʼta Babilonia ti jaʼ skotol li jecheʼ relijionetik oy ta spʼejel balumile (Apok. 17:16, 17). Vaʼun, jaʼ te chlik˗o li mukʼta tsatsal vokolile. ¿Mi chichʼik˗o ta mukʼ Jeova epal krixchanoetik? Moʼoj. Li ta kapitulo 6 ta Apokalipsise, chal ti buchʼutik muʼyuk chtunik ta stojolal Jeovae tsaʼ spojobbailik li ta vitstike, jaʼ xkaltik, ta stojolal li ajvaliletik xchiʼuk li pʼolmajebaletik ta balumile. Ta skoj ti muʼyuk chakʼ sbaik ta stojolal Ajvalilal yuʼun Dios li krixchanoetik taje, chkʼotik ta yajkontra Jeova (Luk. 11:23; Apok. 6:15-17).

9. ¿Kʼu yuʼun jelel ch˗ilatik li steklumal Jeova li ta mukʼta tsatsal vokolile, xchiʼuk kʼusi chkʼot ta pasel?

⁹ Kʼalal jaʼo yakal li mukʼta tsatsal vokolile, jelel ch˗ilatik li yajtuneltak Jeova ti tukʼ yakʼoj sbaike. Yuʼun jaʼ noʼox stukik ti chtunik˗o ta stojolal Jeova ta balumile xchiʼuk ti muʼyuk tskoltaik «li jtiʼvanej chonbolome» (Apok. 13:14-17). Ch˗ilinik˗o tajek li yajkontratak Jeovae. Jaʼ yuʼun, li steklumal Dios ta spʼejel balumile chichʼik tsakel ta kʼop yuʼun jtsop jteklumetik. Li kʼusi chkʼot ta pasel taje jaʼ skʼoplal kʼalal tstsakvan ta kʼop li Gog ta Magog chal ta Vivliae (Esek. 38:14-16).

10. Jech kʼuchaʼal chal ta Apokalipsis 19:19 kʼalal ta 21, ¿kʼusi tspas Jeova kʼalal ch˗ilbajinbat li steklumale?

¹⁰ ¿Kʼusi tspas Jeova kʼalal chil ti chichʼ ilbajinel li steklumale? Xi chalbutike: «Chlik tsanuk li skʼakʼal koʼontone» (Esek. 38:18, 21-23). Li ta kapitulo 19 ta Apokalipsise, chal ti Jeovae tstak talel Xnichʼon sventa spoj li steklumale xchiʼuk ti slajesbe skʼoplal li yajkontratake. Li Jesuse chtal xchiʼuk «li soltaroetik ta vinajele», jaʼ xkaltik, li anjeletik ti tukʼ yakʼoj sbaike xchiʼuk li 144 mile (Apok. 17:14; 19:11-15). ¿Kʼusi chkʼot ta pasel yuʼun taje? Jaʼ ti chlaj skʼoplal skotol li krixchanoetik xchiʼuk li organisasionetik ti tskontrainik Jeovae (kʼelo Apokalipsis 19:19-21).

OY NUPUNEL MI NEL LI PASKʼOPE

11. ¿Kʼusi ti mas lek chkʼot ta pasel chal ta Apokalipsise?

¹¹ ¿Kʼu yelan chaʼi sbaik li yajtuneltak Jeova ta balumil ti kuxul chkomik mi laj yichʼ lajesbel skʼoplal li yajkontratak Diose? ¡Toj echʼ xa noʼox ta xmuyubajik! Akʼo mi xmuyubajik tajek li buchʼutik te oyik ta vinajel kʼalal chlaj skʼoplal li Mukʼta Babiloniae, oy to kʼusi ti mas chakʼ muyubajele (Apok. 19:1-3). Jaʼ li kʼusi mas lek chkʼot ta pasel chal ta slivroal Apokalipsise: jaʼ ti «chnupun li Chʼiom Chije» (Apok. 19:6-9).

12. ¿Bakʼin chichʼ pasel li snupunel Chʼiom Chije? (Apokalipsis 21:1, 2).

¹² ¿Bakʼin chichʼ pasel li nupunele? Akʼo mi te xa ox oyik ta vinajel skotol li 144 mil kʼalal jutuk xa ox skʼan xlik li Armajedone, maʼuk to yorail sventa xichʼ pasel li snupunel Chʼiom Chije (kʼelo Apokalipsis 21:1, 2). Jaʼ to chichʼ pasel mi echʼ xa ox li Armajedone, jaʼ xkaltik, mi laj xa ox skʼoplal li yajkontratak Diose (Sal. 45:3, 4, 13-17).

13. ¿Kʼusi chkʼot ta pasel li ta snupunel Chʼiom Chije?

¹³ ¿Kʼusi chkʼot ta pasel li ta snupunel Chʼiom Chije? Kʼalal chnupun li jun vinik xchiʼuk jun antse, tspasik ta jun. Jaʼ noʼox jech ek, li ta snupunel Chʼiom Chije, tspasik ta jun li Ajvalil Jesukristo xchiʼuk li 144 mil ti jaʼ li jnupunel tsebe. Vaʼun, li Jesus xchiʼuk li 144 mile chlik sventainik balumil ta jmil jabil (Apok. 20:6).

JUN KʼUPIL SBA JTEKLUM XCHIʼUK LI JKUXLEJALTIK TA TSʼAKALE

14, 15. Li kapitulo 21 ta Apokalipsise, ¿kʼusi tskoʼoltajes˗o li 144 mile? (Kʼelo li lokʼol ta pajina 1).

¹⁴ Li kapitulo 21 ta Apokalipsise tskoʼoltajes li 144 mil kʼuchaʼal jun kʼupil sba jteklum ti jaʼ sbi «Achʼ Jerusalen» (Apok. 21:2, 9). Li jteklum taje «oy 12 ta pʼej stanal sventa snakleb yok» ti te tsʼibabil «sbiik li 12 ta voʼ yajtakboltak Chʼiom Chije». Labal van sba laj yil li Juane, yuʼun te tsʼibabil laj yil sbi ek. ¡Taje jaʼ jun mukʼta matanal! (Apok. 21:10-14; Efes. 2:20).

¹⁵ Stuk noʼox jech li jteklume. Li smukʼta kayeale «ta batsʼi oro pasbil», «li 12 ta chʼoj tiʼ nae jaʼ 12 ta pʼej perla ton», li smuroal xchiʼuk li snakleb smuroale kʼupiltasbil ta tonetik ti toj kʼupilik sbae xchiʼuk «kuadrado pasbil li jteklume, ti kʼu snatile jaʼ jech sjamlej ek» (Apok. 21:15-21). Pe li Juane chakʼ venta ti oy to kʼusi skʼane. ¿Kʼusi jaʼ? Xi chale: «Muʼyuk bu xkil templo te, yuʼun li Jeova Dios ti jaʼ li Buchʼu skotol xuʼ yuʼune xchiʼuk li Chʼiom Chije jaʼ templo kʼotemik. Muʼyuk chtun yuʼun xojobal kʼakʼal xchiʼuk xojobal luna li jteklume, yuʼun xojobinaj smukʼulal Dios ta stojolal xchiʼuk jaʼ kʼotem ta kantil yuʼun jteklum li Chʼiom Chije» (Apok. 21:22, 23). Li buchʼutik te tsakal skʼoplalik li ta Achʼ Jerusalene chchiʼinik li Jeovae (Ebr. 7:27; Apok. 22:3, 4). Jaʼ yuʼun, jaʼ stemploal jteklum kʼotemik li Jeova xchiʼuk Jesuse.

16. ¿Kʼusitik tskʼupinik li krixchanoetik kʼalal jaʼo ch˗ajvalilaj ta Jmil Jabil li Ajvalilal yuʼun Diose?

¹⁶ Li buchʼutik tʼujbil chbatik ta vinajele xmuyubajik tajek kʼalal tsnopbeik skʼoplal li jteklum taje. Pe skʼan tsotsuk skʼoplal xaʼiik ek li buchʼutik smalaoj chkuxiik ta balumile. Kʼalal jaʼo yakal ch˗ajvalilaj ta Jmil Jabil li Ajvalilal yuʼun Diose, li Achʼ Jerusalene chakʼ talel epal bendision li ta balumile. Li Juane laj yil ti bendisionetik taje xkoʼolaj kʼuchaʼal jun «ukʼum sventa kuxlejal [...]. Li ta jujujot ukʼume oy teʼetik sventa kuxlejal» ti «jaʼ sventa xpoxtaobil lumetik li yanaltake» (Apok. 22:1, 2). Li buchʼutik kuxulik vaʼ orae tskʼupinik taje. Ta kʼunkʼun chtukʼibik batel li buchʼutik chchʼunik mantale, muʼyuk xa chameletik, muʼyuk xa kʼusi kʼux chkaʼitik mi jaʼuk chij˗okʼ ta skoj ti chkat koʼontontike (Apok. 21:3-5).

17. ¿Buchʼutik tskʼupinik li matanaletik chakʼ talel li Ajvalilal ta Jmil Jabile? (Apokalipsis 20:11-13).

¹⁷ ¿Buchʼutik tskʼupinik li matanaletik taje? Jaʼ li epal krixchanoetik ti kuxul chkomik li ta Armajedone xchiʼuk li ololetik ti xuʼ van jaʼ to te chvokʼik li ta achʼ balumile. Pe maʼuk noʼox stukik tskʼupinik, yuʼun li kapitulo 20 ta Apokalipsise jamal chal ti chchaʼkuxiik talel li buchʼutik chamemike (kʼelo Apokalipsis 20:11-13). ¿Buchʼutik chchaʼkuxiik talel li ta balumile? Jaʼ «li buchʼutik tukʼike», jaʼ xkaltik, li yajtuneltak Jeova ti tukʼ laj yakʼ sbaike; xchiʼuk «li buchʼutik muʼyuk tukʼike», jaʼ xkaltik, li buchʼutik muʼyuk laj yojtikinik Jeovae (Ech. 24:15; Juan 5:28, 29). ¿Mi jaʼ skʼan xal ti chchaʼkuxiik skotol li krixchanoetik kʼalal jaʼo ch˗ajvalilaj ta Jmil Jabil li Ajvalilal yuʼun Diose? Moʼoj. Li buchʼutik muʼyuk skʼan xtunik ta stojolal Jeova kʼalal kuxulik toʼoxe muʼyuk xa chchaʼkuxiik tal. Xuʼ ox xtunik ta stojolal Jeova ti lajuk skʼanike, pe laj yakʼik ta ilel ti mu sta˗o xkuxiik ta Paraisoe (Mat. 25:46; 2 Tes. 1:9; Apok. 17:8; 20:15).

LI STSUTSEBALE

18. ¿Kʼusi chkʼot ta pasel mi tsuts xa ox li Jmil Jabile?

¹⁸ Mi tsuts xa ox li Jmil Jabile, tukʼ xa ox skotol li buchʼutik kuxulik ta balumile. Muʼyuk xa buchʼu chil svokol ta skoj li mulil laj yiktabutik Adane, yuʼun chchʼay˗o skʼoplal ta j˗echʼel (Rom. 5:12). Jaʼ yuʼun, mi tsuts li Jmil Jabile, jaʼ to chkuxiik ta melel xkaltik li buchʼutik kuxulik ta balumile, yuʼun tukʼil krixchanoetik xa ox (Apok. 20:5).

19. ¿Kʼu yuʼun chichʼik to akʼel ta preva li krixchanoetike?

¹⁹ Li Jesus ti jaʼ jun tukʼil vinik echʼe tukʼ laj yakʼ˗o sba ta stojolal Dios akʼo mi laj yichʼ akʼel ta preva yuʼun li Satanase. ¿Mi jech van tukʼ chakʼ sbaik ek li krixchanoetik mi laj yichʼik akʼel ta preva yuʼun li Satanase? Ta jujuntal skʼan xakʼik ta ilel mi tukʼ chakʼ sbaik ta stojolal Jeova mi tsuts xa ox li Jmil Jabile xchiʼuk mi laj yichʼ xa ox lokʼesel ta xab li Satanase (Apok. 20:7). Li buchʼutik tukʼ chakʼ sbaik ta stojolal Jeova li ta slajeb prevae tstaik kuxlejal sbatel osil xchiʼuk tskʼupinik li melel kolebale (Rom. 8:21). Pe li buchʼutik tskontrainik li Jeovae chlaj˗o skʼoplalik ta sbatel osil, jech kʼuchaʼal chkʼot ta stojolal li Diablo xchiʼuk li spukujtake (Apok. 20:8-10).

20. ¿Kʼu yelan chavaʼi aba ti laj xa jkʼeltik li albil kʼopetik chal ta Apokalipsise?

²⁰ ¿Kʼu yelan chavaʼi aba ti laj xa jkʼeltik jutuk li kʼusi chal ta slivroal Apokalipsise? ¿Mi xamuyubaj kʼalal chanopbe skʼoplal ti chavil chkʼot ta pasel skotol li albil kʼopetik liʼe? ¿Mi oy xa mas ta avoʼonton chakolta yantik sventa jechuk xichʼik ta mukʼ Dios kʼuchaʼal tskʼane? (Apok. 22:17). Ta skoj ti laj xa jkʼeltik li kʼusi lekik tajek chkʼot ta pasel ta jelavele, oy xa van ta koʼontontik ti xi xkaltik kʼuchaʼal laj yal li jtakbol Juane: «¡Jechuk! Laʼ, Kajval Jesus» (Apok. 22:20).