Oyuk lek smuil kʼalal chkaltik batel li kʼusi melele

1. ¿Kʼuxi xuʼ teuk jkʼoplaltik li ta yutsʼ yalal Jeovae?

KʼALAL chkojtikintik junuk ermanoe, oy van xi jakʼbetike: «¿Kʼuxi la avojtikin li kʼusi melele o li mantale?». Xuʼ van xi tstakʼe: «Te xa onoʼox lichʼi talel» o «achʼun to», xiik. Jech chkaltik ta skoj ti tsots skʼoplal chkiltik li kʼusi melel chal ta Skʼop Diose xchiʼuk ti jaʼ tsbeiltasutike. Ta melel, sventa teuk jkʼoplaltik li ta yutsʼ yalal Jeovae skʼan xkakʼtik ta ilel ti jkʼanojtik xchiʼuk ti ta jkuxlebintik li kʼusi melele, ti te skʼoplal ti jamaluk kʼusi chkaltike xchiʼuk ti lekuk kʼusitik ta jpastike (Sal. 15:​1-3).

2. 1) ¿Kʼu yelan laj yichʼ ojtikinel li Jesuse? 2) ¿Kʼusi kʼot ta pasel ta skoj ti laj yakʼ ta chanel li kʼusi melele?

² Li Jesuse melel snaʼ xkʼopoj, yuʼun kʼalal ta yajkontratak laj yakʼik venta ti jaʼ jeche, manchuk mi mu skʼupinik li kʼusitik chale (Mat. 22:16). Ta sventa li kʼusi melel laj yakʼ ta chanele, xi laj yale: «Yuʼun lital ta chʼakvanej, jech oxal tskontrain stot li vinike, tskontrain smeʼ li tsebe xchiʼuk tskontrain smeʼalib li alibale» (Mat. 10:35). Li Jesus xchiʼuk yajchankʼoptake maʼuk ox jech oy ta yoʼontonik ti jech xkʼot ta pasel ta skoj li melele, pe jamal laj yal ti jech chkʼot ta pasele (Mat. 23:37). Akʼo mi jaʼ chakʼ ta chanel li kʼusi melele, snaʼoj ti tspas ta chaʼvokʼ li krixchanoetike, yuʼun chvinaj li buchʼu skʼanoj li kʼusi melele xchiʼuk li buchʼu muʼyuke (2 Tes. 2:​9-11).

3. ¿Kʼusi ta jchantik li ta xchanobil liʼe?

³ Jech kʼuchaʼal la spas Jesuse, chkakʼtik persa sventa jamal xijkʼopoj, ti xkaltik batel li kʼusi melel kʼalal ta jcholtik mantale xchiʼuk kʼalal chijchanubtasvan akʼo mi muʼyuk lek chaʼiik li kʼusi chkaltike. Pe ¿mi jaʼ skʼan xal ti mu ventauk bakʼin o ti kʼu yelan chkaltik li kʼusi melele? Moʼoj. Li ta xchanobil liʼe, baʼyel ta jkʼeltik bu xuʼ jtatik li kʼusi melele. Laje, ta jkʼeltik kʼu yuʼun skʼan xkaltik li kʼusi melele, kʼuxi xuʼ xkaltik batel xchiʼuk bakʼin chkaltik batel. Taje jaʼ tskoltautik sventa oyuk lek smuil xkaltik batel li kʼusi melele.

¿BU XUʼ JTATIK LI KʼUSI MELELE?

4. ¿Kʼuchaʼal chkaltik ti te chlik talel ta stojolal Jeova li kʼusi melele?

⁴ Te chlik talel ta stojolal Jeova li kʼusi melele. Yuʼun melel skotol li kʼusitik chale. Jech kʼuchaʼal liʼe, yuʼun jaʼ noʼox stuk snaʼoj li kʼusi lek xchiʼuk kʼusi chopole (Sal. 19:9; 119:​142, 151). Li kʼusi yaloj tspas ta jelavele ta onoʼox xkʼot ta pasel (Is. 55:​10, 11). Mu xchʼay ta be li kʼusi chlokʼ ta yee (Num. 23:19). Jech xtok, mi jaʼuk snaʼ sjut kʼop li Jeovae (Ebr. 6:18). Jaʼ yuʼun, li Vivliae chal ti jaʼ jun Dios ti melel snaʼ xkʼopoje (Sal. 31:5).

5. ¿Kʼu yuʼun xuʼ xkojtikintik noʼox li Dios ti melel snaʼ xkʼopoje? (Echos 17:27).

⁵ Junantik krixchanoetike chalik ti mu kʼunuk ta ojtikinel li Jeova ti jaʼ li Dios ti melel snaʼ xkʼopoje. Pe mu jechuk, yuʼun oy ep sprevailtak ti chakʼ ta ilel ti oy ta melel li Diose xchiʼuk ti kʼu yelan stalelaltake (Rom. 1:20). Jun veltae, kʼalal jaʼo te oy ta Atenas li jtakbol Pabloe la xchiʼin ta loʼil li jgresiaetik ti lek chanemike, te laj yalanbe ti oy ta yoʼonton Dios ti akʼo jsaʼtike xchiʼuk laj yalanbe ti «muʼyuk onoʼox bu nom oy ta jtojolaltik» ta jujuntale (kʼelo Echos 17:27). Pe maʼuk noʼox, yuʼun li Jeovae chikʼ talel li krixchanoetik ti bikʼit yakʼoj sbaike xchiʼuk li buchʼutik yakal tsaʼik li kʼusi melele (Juan 6:44).

6. ¿Kʼusitik melel chal li Vivliae xchiʼuk kʼu yuʼun ti ep sbalil chavile?

⁶ Jtos kʼusi xuʼ jpastik sventa xkojtikintik li Jeovae jaʼo kʼalal ta jchantik li Vivliae. Yuʼun li viniketik la stsʼibaik Vivliae beiltasatik yuʼun li xchʼul espiritu Diose (2 Ped. 1:​20, 21). Jaʼ yuʼun, melel skotol li kʼusi te chale xchiʼuk xuʼ jpat koʼontontik yuʼun. Jech kʼuchaʼal liʼe, xuʼ jpat koʼontontik ti melel kʼusi chal ta sventa ti kʼu yelan lik talel li vinajel balumile xchiʼuk li kuxlejal ta balumile (Jen. 1:​1, 26). Ti kʼu yelan chchapbe smelolal kʼuxi lik talel li mulile, ti kʼu yuʼun chkil jvokoltike xchiʼuk ti chijchamutike (Rom. 5:12; 6:23). Ti jaʼ tstunes Xnichʼon Jeova sventa smeltsan skotol li kʼusi sokesoj Satanase, ti jaʼ li «totil yuʼun li jutbil kʼope» (Juan 8:44; Rom. 16:20). Jech xtok, xuʼ jchʼuntik ta melel ti tslajesbe skʼoplal buchʼutik chopol li Jesuse, ti chchaʼkuxes li animaetike, ti tspas ta Paraiso li balumile xchiʼuk ti tskoltautik sventa xijpas ta tukʼil krixchanoe (Juan 11:​25, 26; 1 Juan 3:8). Li Jeovae laj yakʼ kojtikintik li kʼusi melele xchiʼuk oy ta yoʼonton ti xkalbetik batel yantike (Mat. 28:​19, 20). ¡Taje jaʼ jun mukʼta matanal!

¿KʼU YUʼUN SKʼAN XKALTIK LI KʼUSI MELELE?

7, 8. ¿Kʼu yuʼun tsots skʼoplal li kʼusi oy ta koʼontontik kʼalal chkaltik batel li kʼusi melele? Albo junuk skʼelobil (Markos 3:​11, 12; kʼelo xtok li lokʼoletike).

⁷ Jech kʼuchaʼal laj xa kiltik tale, skʼan ti meleluk xijkʼopoj mi ta jkʼantik teuk jkʼoplaltik li ta yutsʼ yalal Jeovae. Pe sventa lek xilutik li Jeovae mu baluk noʼox ti jech jpastike, yuʼun toj tsots skʼoplal chil xtok ti kʼu yuʼun jech ta jpastike. Kalbetik skʼoplal kʼusi kʼot ta pasel kʼalal ay xchol mantal ta balumil li Jesuse (kʼelo Markos 3:​11, 12). Kʼalal jaʼo te chchol mantal ta stsʼel nab Galileae, te kʼot epal krixchanoetik xchiʼuk te kʼotik ek li buchʼutik uʼuninbilik yuʼun pukujetike. Vaʼun, la skejan sbaik ta stojolal Jesus xchiʼuk xi laj yalbeike: «Voʼot Xnichʼonot li Diose». ¿Kʼu yuʼun jech laj yalik li pukujetike? Jaʼ van sventa lek x-ilatik yuʼun li krixchanoetik ti te oyike xchiʼuk ti xnamaj yuʼunik ta stojolal Jeova ta tsʼakale. Akʼo mi melel li kʼusi laj yalike, maʼuk ta slekil yoʼonton la spasik. Pe li Jesuse snaʼoj lek li kʼusi oy ta yoʼontonike, jech oxal muʼyuk laj ta loʼlael. Muʼyuk lek laj yaʼi li kʼusi laj yalike, jaʼ yuʼun laj yalanbe ti mu xa x-albat batel skʼoplale.

⁸ ¿Kʼusi chakʼ jchantik li loʼil liʼe? Li Jeovae toj tsots tajek skʼoplal chil li kʼusi oy ta koʼontontik kʼalal chkaltik batel li kʼusi melele. Kʼalal jech ta jpastike, jaʼuk ta skoj ti jkʼanojtik li Jeovae xchiʼuk ti jaʼuk xkakʼtik ta ichʼel ta mukʼ mi oy buchʼu la skʼupil kʼoptautike (Mat. 5:16; koʼoltaso xchiʼuk Echos 14:​12-15).

9. ¿Kʼusi ti mu stakʼ jpastike, xchiʼuk kʼu yuʼun?

⁹ Kalbetik yan skʼoplal ti bu xuʼ van voʼotik ta jkʼantik kʼupil kʼoptaele. Jnoptik noʼox ti oy kʼusi laj yalbutik jun mol ta tsobobbail ti mu stakʼ xkaltik batele, pe chkalbetik batel li yantike. Mi laj yaʼiik ta tsʼakal ti melel onoʼox li kʼusi laj kaltike, labal to van chaʼiik xchiʼuk xuʼ van snopik ti ep kʼusi jnaʼojtike. Xuʼ van labal to sba chaʼiik li kʼusi laj kaltike, pe li Jeovae muʼyuk (Prov. 11:13). ¿Kʼu yuʼun? Yuʼun maʼuk oy ta jbatik ta yalel xchiʼuk xuʼ van jaʼ noʼox ta jkʼantik kʼupil kʼoptael akʼo mi melel onoʼox li kʼusi laj kaltike.

¿KʼUXI XUʼ XKALTIK LI KʼUSI MELELE?

10. Jech kʼuchaʼal chal ta Kolosenses 4:​6, ¿kʼusi smelolal ti «oyuk lek smuil» skʼopojelik li yajtsʼaklomtak Kristoe?

¹⁰ (Kʼelo Kolosenses 4:6). Li jtakbol Pabloe la svulesbe ta sjol li yajtsʼaklomtak Kristo ta Kolosas ti skʼan oyuk smuil li skʼopojelike. Li ta griego kʼope, chakʼ ta aʼiel ti maʼuk noʼox skʼan stabeik sbalil yantik li kʼusi chkaltike, yuʼun skʼan ta slekiluk koʼontontik xijkʼopoj xchiʼuk ti kʼupiluk sba ta aʼiele.

11, 12. ¿Kʼu yuʼun skʼan xkichʼ jpʼijiltik kʼalal chkaltik batel li kʼusi melele? Albo junuk skʼelobil (kʼelo xtok li lokʼoletike).

¹¹ Jech kʼuchaʼal laj yal li jtakbol Pabloe skʼan ti oyuk smuil li jkʼopojeltik kʼalal chkalbetik batel yantik li kʼusi melel ta Vivliae. Li ta Ebreos 4:​12, chal ti xkoʼolaj ta espada ti tsʼubtsʼub sniʼ li kʼusitik melel chal ta Vivliae, yuʼun chchʼak «yuʼun li jpat jxokontike xchiʼuk li yut koʼontontike», jaʼ xkaltik, ti «xuʼ yuʼun chchaj ta kʼelel li jnopbentik xchiʼuk li kʼusi oy ta koʼontontike». Mi muʼyuk lijtojob stunesel lek li Vivliae, xuʼ oy buchʼu chopol xaʼi sba kuʼuntik o ti xkap-o sjole. Kalbetik junuk skʼelobil.

¹² Jnoptik noʼox ti ta jtatik ta cholmantal jun vinik ti nopem xaʼi tskʼopon li santoetike, ti tskʼupin spasel li Navidade xchiʼuk li Achʼ Jabile. Xuʼ van xtal ta joltik ti chkakʼbetik yil ta Vivlia ti muʼyuk sbalil ti chichʼ ta mukʼ li santoetike, li spasel Navidade xchiʼuk li Achʼ Jabile, yuʼun likem tal ta jecheʼ relijion (Is. 44:​14-20; 2 Kor. 6:​14-17). Kʼalal jech ta xkaltike, xuʼ van muʼyuk lek ta jtunestik li Vivliae akʼo mi melel li kʼusi chkaltike.

13. ¿Kʼuxi xuʼ oyuk «lek yatsʼamil» li jkʼopojeltike?

¹³ Li Pabloe laj yal xtok ti skʼan «oyuk me lek yatsʼamil» li jkʼopojeltike. Pe maʼuk skʼan xal ti muʼyuk jamal chkaltik li kʼusi melele. Li kʼusi oy ta koʼontontike jaʼ ti jaʼuk xkalbetik li kʼusi tskʼupin li krixchanoe ti oyuk xa ta yoʼonton «tspas preva» xkaltike (Job 12:11). Pe taje mu kʼunuk ta pasel. Jech kʼuchaʼal li ta veʼlile, jelajtik ti kʼu yelan xchiʼil ta jlajestike, jaʼ yuʼun ti kʼu yelan chijkʼopoje mu skotoluk krixchanoetik lek chaʼiik. Ta junantik lume, nopem xaʼiik ti jamal snaʼ xkʼopojike akʼo mi jaʼ chchiʼinik ta loʼil li buchʼu oy xa sjabilalike. Pe ta junantik lume chopol ta aʼiel chaʼiik. Jaʼ yuʼun, li jtakbol Pabloe laj yal ti skʼan jnaʼtikuk kʼu yelan ta jtakʼbetik li jujun krixchanoe, jaʼ xkaltik ti skʼan oyuk lek smuil xchiʼuk yatsʼamil li jkʼopojeltike, yuʼun jaʼ jech skʼan xijkʼopoj ti kʼu yelan lek chaʼi li buchʼu ta jchiʼintik ta loʼile, maʼuk ta jtsaktik ta venta li kʼusi lek chkaʼitike o ti kʼu yelan nopemutike.

¿BAKʼIN SKʼAN XKALTIK LI KʼUSI MELELE?

14. Kʼalal liʼ toʼox oy ta balumil li Jesuse, ¿mi laj yakʼbe xchan yajtsʼaklomtak ta anil skotol li kʼusi snaʼoje?

¹⁴ Li Jesuse ta slekil yoʼonton la xchiʼin ta loʼil li yajtsʼaklomtake xchiʼuk ta slekil yoʼonton la xchanubtasan (Mar. 6:34). Akʼo mi ep to kʼusi skʼan xchanik, pe li Jesuse maʼuk ti ta anil laj yalbe skotol li kʼusi snaʼoje, moʼoj, la stsak ta venta ti kʼu yepal xchan noʼox yuʼunike. Yuʼun snaʼoj ti maʼuk to yorail sventa xaʼibeik smelolal junantik li chanubtaseletik ta Vivliae (Juan 16:12). ¿Kʼusi chakʼ jchantik taje?

15. ¿Mi skʼan xkakʼbetik xchan ta anil skotol li kʼusi jnaʼojtik li buchʼu ta jchanubtastike? (Proverbios 25:11; kʼelo xtok li lokʼoletike).

¹⁵ Jech kʼuchaʼal la spas Jesuse skʼan mu xkaltik ta anil skotol li kʼusi jnaʼojtike. Jaʼ mas lek ti jchanbetik ti kʼu yelan la spase ti la stsak ta venta li yajchankʼoptake. Jnopbetik skʼoplal yan velta li vinik ti tspas li kʼin Navidad xchiʼuk li Achʼ Jabile. Li voʼotike jnaʼojtik ti likem tal ta jecheʼ relijione xchiʼuk ti muʼyuk lek chil li Jeovae. Pe jnoptik noʼox ti jaʼo chlik kakʼbetik chanubtasel ta Vivlia kʼalal jun chib xa ox xemana skʼan li kʼin taje. ¿Mi oy van smuil jkʼopojeltik mi jamal chkalbetik ta anil li kʼusi melel chal Vivlia ti likem tal ta jecheʼ relijion li kʼinetik taje xchiʼuk ti mu xa spase? Moʼoj. Akʼo mi oy junantik chakʼ noʼox ta xkuxlejalik li kʼusi chchanike, pe li yantike vokol chaʼi tsjel xkuxlejalik. Melel onoʼox ti skʼan xkalbetik ta jamal li kʼusi melel sventa xchʼi ta mantal li buchʼu ta jchanubtastike, pe skʼan jnaʼtik bakʼin skʼan xkalbetik (kʼelo Proverbios 25:11).

16. ¿Kʼuxi xuʼ jkoltatik li buchʼu ta jchanubtastik sventa jechuk-o xkuxlebin «li kʼusi melele»?

¹⁶ Chakʼbutik tajek muyubajel kʼalal oy buchʼu ta jchanubtastik ta Vivlia ta sventa li kʼusi melel ta stojolal Jeovae. Pe sventa jkoltatik ti jechuk-o xkuxlebinik «li kʼusi melele», toj tsots skʼoplal ti voʼotikuk baʼyel vinajuk ta jkuxlejaltike xchiʼuk ti jchʼunojtikuk li kʼusi yaloj chkʼot ta pasel li Jeovae (3 Juan 3, 4). Jech kʼuchaʼal la jchantik xa tale, kʼalal chkaltik batel li kʼusi melele teuk ta joltik li kʼusi tstij koʼontontik spasele, ti oyuk lek smuil jkʼopojeltike, ti kʼupiluk sbae xchiʼuk ti jnaʼtikuk bakʼin skʼan xkaltik li kʼusi melele. Jech xtok, jaʼuk xkakʼtik ta ichʼel ta mukʼ Jeova mi oy buchʼu la skʼupil kʼoptautike. Mi jech ta jpastike, jaʼ jech chkakʼtik ta ilel ti chijtun ta stojolal li Dios ti melel snaʼ xkʼopoje.