Li yorail sventa chichʼ alel Snaʼobil slajel Cristoe chlik ta 17 yuʼun marso
1. ¿Kʼusi ora chlik jtaktik ta ikʼel krixchanoetik sventa li Snaʼobil slajel Cristoe?
1 Ti chijkʼot li ta Snaʼobil slajel Cristo jujun jabile jaʼ chtun-o sventa xkalbetik batel skʼoplal li slajel Jesuse (1 Cor. 11:26). Jaʼ yuʼun, ta jkʼantik ti xbatik yantik sventa xaʼiik ti jaʼ jmotontik yakʼoj Jeova li pojelale (Juan 3:16). Ti ta jtaktik ta ikʼel krixchanoetik sventa li Snaʼobil slajel Cristo li jabil liʼe chlik ta sabado 17 yuʼun marso. ¿Mi jnopojtik xa kʼusi chkutik sventa jpastik bu kʼalal xuʼ kuʼuntike?
2. ¿Kʼuxi xuʼ xkakʼtik li uni vunetike?
2 Kʼusi xuʼ xkaltik. Jaʼ me lek ti mu xijalijutike. Xuʼ xi xkaltike: «Liʼote, li avie yakal ta jtakotkutik ta ikʼel xchiʼuk avutsʼ avalal sventa jun tsobajel toj tsots skʼoplal, yuʼun ch-echʼ jun mantal ti chalbe skʼoplal li kʼusi sbalil chichʼ tael ti cham li Jesuse xchiʼuk li kʼusi tspas avie. Li tsobajel taje chichʼ pasel ta spʼejel Balumil ta 5 yuʼun avril xchiʼuk muʼyuk tojbil chij-och. Li vun liʼe chal bu ch-echʼ xchiʼuk jayib ora». Li ta sabado xchiʼuk domingoe, xuʼ xkakʼtik revistaetik xtok mi sta-o chkiltike.
3. ¿Kʼuxi xuʼ ep buchʼutik jtaktik ta ikʼel?
3 Jtaktik ta ikʼel ti bu kʼalal xuʼ kuʼuntike. Li kʼusi oy ta koʼontontike jaʼ ti epuk buchʼu jtaktik ta ikʼele. Jaʼ yuʼun, oyuk me ta avoʼonton stakel ta ikʼel li buchʼutik chachaʼvulaʼane, avajchanuntak ta Vivliae, avutsʼ avalaltake, achiʼiltak ta chanun o ta abtele, alakʼnatake o yantik buchʼu xavojtikine. Li moletik ta tsobobbaile chalik kʼuxi xuʼ xkabtelantik lek li bu ta jcholtik mantale. Oy me kʼusi lek chkʼot ta pasel ti ta jtaktik ta ikʼel li krixchanoetike. Li echʼ jabile, kʼot jun ants li bu echʼ li Snaʼobil slajel Cristoe, vaʼun oy jun jcholvanej laj yalbe ti tskolta saʼel li buchʼu takvan ta ikʼele. Pe li antse laj yal ti muʼyuk buchʼu xojtikine xchiʼuk ti jaʼ toʼox la ta sob echʼ iktabatuk komel li uni vune.
4. ¿Kʼu yuʼun ta sjunul koʼontontik skʼan jtaktik ta ikʼel krixchanoetik li ta Snaʼobil slajel Cristoe?
4 Ta skoj ti chkiktatik li uni vunetike xuʼ van oy buchʼu xkʼot li ta Snaʼobil slajel Cristoe. Manchuk mi xchʼamik o mi muʼyuk li takel ta ikʼele, mi jech chavakʼ persa spasele yakal xa chachol mantal. Li vunetik chachʼake chalbe batel skʼoplal ti jaʼ xa jun ajvalil tsots sjuʼel li Jesuse. Mi ta sjunul avoʼonton chapase, maʼuk noʼox chilik ti ep sbalil chavil pojelal li krixchanoetike xchiʼuk li yan jcholmantaletike, moʼoj, yuʼun mas to ep sbalil chil li Jeova eke (Col. 3:15).