Немә үчүн улар маканидин һайдап чиқирилди?

НЕМӘ иш йүз бериватиду, қараңа! Адәм билән Һава гөзәл Ерәм беғидин һайдап чиқирилди. Немә үчүн һайдап чиқирилди, биләмсиз?

Сәвәви, улар яман иш қилди. Шуңа, Йәһва уларни җазалиған еди. Адәм билән Һаваниң қандақ яман иш қилғанлиғини биләмсиз?

Улар, Йәһва Худа уларға қилмаңлар, дәп буйруған ишни қилди. Худа уларға бағдики дәрәқләрниң мевисини йесә болидиғанлиғини ейтти. Амма, бағдики бир түп дәрәқниң мевисини йемәсликни буйриди, һәмдә әгәр улар йесә, уларниң өлүп кетидиғанлиғи һәққидә агаһландурди. Шу дәрәқни Худа өзи үчүн қалдурған еди. Башқиларға тәвә болған нәрсиләрни елишниң хата екәнлигини билимиз, шундақ әмәсму? Ундақта, зади немә иш йүз бәргән?

Бир күни, Һава бағда ялғуз турғинида, бир илан келип униңға сөз қилди. Адәмниң һәқиқәтән ишәнгүси кәлмәйду!? У Һаваға, Худа уларға йемәңлар, дәп буйруған дәрәқниң мевисидин елип йейишни ейтти. Худа иланларни яратқанда, улар сөзлийәлмәтти. Шуңа, наһайити ениқки башқа бири иланни шундақ сөз қилдурған еди. У зади ким?

У Адәм ата әмәс. У чоқум башқа бир шәхс. Йәһва йәр шарини яритиштин узун заманлар илгири, башқа җанлиқларни, йәни биз көз билән көрәлмәйдиған периштәләрни яратқан еди. Шуларниң арисидики бир периштә бәкму тәкәббур болуп кәткәч, у өзини Худаға охшаш башқиларға һөкүмранлиқ қилиши керәк, дәп ойлиған еди. Шуңа, у инсанларниң Йәһваға әмәс, әксичә өзигә бойсунушини халиди. Дәл шу периштә иланни сөз қилдурған еди.

Шу периштә Һавани аздуруп, әгәр Һава шу мевини йесә, Худаға охшаш болидиғанлиғини ейтти. Һава шу сөзләргә ишәнди вә мевини елип йеди, Адәмму у мевидин йеди. Адәм билән Һава Худаға итаәтсизлик қилди. Бу дәл уларниң гөзәл бағ маканидин һайдап чиқирилғанлиғиниң сәвәвидур.

Амма, ахир бир күн, Худа пүткүл йәр шарини худди шу Ерәм бағдәк чирайлиқ қияпәткә кәлтүриду. Кейинирәк, қандақ қилип өз күчиңизни чиқирип, шу ишқа һәссә қошалайдиғанлиғиңиз һәққидә үгинимиз. Амма, һазир Адәм билән Һаваға немә иш болғанлиғини көрүп бақайли.