Зәйтун теғида

ӘЙСА пәйғәмбәр Зәйтун теғиға чиққан еди. Төрт киши келип уни чөрәдәп олтарди. Улар Әндәр вә униң қериндиши Петрус, Яқуп билән қериндиши Юһанна болуп, униң әлчилири еди. Қараң, Йерусалимдики Худаниң ибадәтханиси жирақтин көрүнүп туриду.

Һәзрити Әйса ешәк минип Йерусалимға кирип, һазирғичә икки күн өтүп кәтти. Бу бир сешәнбә күни еди. Бу күн, Әйса Мәсиһ ибадәтханида болғанда, роһанийлар уни тутуп өлтүрмәкчи болушти. Амма, улар шундақ қилиштин қорқти. Чүнки, хәлиқ уни яхши көрәтти.

Әйса пәйғәмбәр диний йетәкчиләрни: “Әй зәһәрлик иланлар! Иланниң әвлатлири”, дәп атиди. Андин кейин, у уларниң қилған яман ишлири үчүн, Худаниң уларни җазалайдиғанлиғини ейтти. Шуниңдин кейин, һәзрити Әйса Зәйтун теғиға чиқип кәтти. У йәрдә бу төрт әлчи униңдин соалларни сорашқа башлиди. Улар Әйса пәйғәмбәрдин немә соал сораватқанлиғини биләмсиз?

Әлчиләр кәлгүси ишлар һәққидә сораватиду. Улар Әйса Мәсиһниң йәр йүзидики барлиқ рәзилликни йоқ қилидиғанлиғини биләтти. Бирақ, улар шу ишларниң қачан йүз беридиғанлиғини билмәкчи еди. Мәсиһ зади қачан қайта келип, Падиша сүпитидә һөкүмранлиқ қилиду?

Мәсиһ Әйса қайта кәлгәндә, йәр йүзидики униң әгәшкүчилириниң уни көрәлмәйдиғанлиғини биләтти. Сәвәви, Мәсиһ асманда болиду. Шуңа, уларниң уни көрәлмәслиги наһайити тәбиий иш. Шуңа, Әйса асманда Падиша болуп һөкүмранлиқ қиливатқанда, йәр йүзидә бәзи ишларниң болидиғанлиғини әлчиләргә ейтип бәрди. Шу ишлар немиләрни өз ичигә алиду?

Әйса пәйғәмбәр: шу вақитта чоң урушлар болиду; нурғун кишиләр кесәл болиду, қосиғи ач қалиду; җинайәтләр көпийип кетиду; вә чоң йәр тәврәшләр болиду, дегән еди. У йәнә Худа Падишалиғи тоғрисидики хуш хәвәр дунияниң һәммә җайлирида тарқитилидиғанлиғини ейтқан еди. Шу ишларниң бүгүнки күндә йүз бериватқанлиғини көрүватимизму? Шундақ, шу ишлар бизниң күнимиздә әмәлгә ешиватиду! Шуңа, шуниңға ишәнч қилалаймизки, Мәсиһ Әйса һазир асманда Падиша болуп һөкүмранлиқ қиливатиду. Пат арида, у йәр йүзидики барчә яманлиқни йоқ қилиду.