7-تەتقىق ماقالىسى
5-ناخشا مەسىھ ئۈلگىمىز
يەھۋانىڭ كەچۈرۈمى بىز ئۈچۈن نېمىنى بىلدۈرىدۇ؟
«سەن ئىنساننى چىن دىلدىن كەچۈرۈم قىلىسەن».—زەبۇر 130:4.
مەركىزى ئىدىيە
مۇقەددەس كىتابتا بىرقانچە سېلىشتۇرۇشلار ئارقىلىق يەھۋانىڭ كەچۈرۈمچانلىقى تەسۋىرلەنگەن. شۇلارنى مۇھاكىمە قىلىپ، ئۇنىڭ كەچۈرۈمچانلىقىغا بولغان مىننەتدارلىقىمىزنى ئاشۇرۇشقا نېمە ياردەم بېرىدىغانلىقىنى ئۆگىنىمىز.
1. بىرلىرى «مەن سىزنى كەچۈردۈم» دېسە، ئۇنىڭ زادى نېمە دېمەكچى بولغانلىقىنى چۈشىنىش نېمىشقا قىيىن؟
گەپ-سۆز ياكى ئىش-ھەرىكىتىمىز كىمدۇ-بىرىنى رەنجىتىپ قويغاندا، ئۇ كىشى بىزگە «مەن سىزنى كەچۈردۈم» دېسە، ئىنتايىن خۇشال بولۇپ، ئۆزىمىزنى يەڭگىللەپ قالغاندەك ھېس قىلىمىز. بىراق، «مەن سىزنى كەچۈردۈم» دېگەن سۆز نېمىنى بىلدۈرىدۇ؟ ئۇ بولغان ئىشنى كۆڭلىدىن چىقىرىۋېتىپ، بۇرۇنقىدەكلا دوست بولۇپ قالماقچىمۇ ياكى شۇ ئىشنى قايتا تىلغا ئېلىشنى خالىمىغاچقا، ئېغىزىنىڭ ئۇچىدىلا «كەچۈردۈم» دەپ قويدىمۇ؟ ھەركىم «كەچۈردۈم» دېگەن سۆزنى ھەر خىل مەنىدە چۈشىنىشى مۇمكىن.
2. مۇقەددەس كىتابتا يەھۋانىڭ كەچۈرۈمى قانداق تەسۋىرلىنىدۇ؟ (ئىزاھاتقا ھەم قاراڭ).
2 ئەمما، يەھۋانىڭ كەچۈرۈمى ئىنسانلارنىڭكىدىن تامامەن پەرقلىقتۇر. زەبۇر يازغۇچىسى ياراتقۇچى يەھۋا توغرىسىدا مۇنداق دېگەن: «ئىنسان سەندىن ئەيمىنسۇن دەپ، سەن ئىنساننى چىن دىلدىن كەچۈرۈم قىلىسەن»a (زەبۇر 130:4). ھەقىقەتەن، يەھۋا كەچۈرگەندە، چىن دىلىدىن كەچۈرىدۇ. ھېچكىم ئۇ كەچۈرگەندەك كەچۈرەلمەيدۇ. مۇقەددەس يازمىلارنى قەلەمگە ئالغانلار ئارىسىدىكى بەزىلەر يەھۋانىڭ كەچۈرۈمچانلىقىنى تەسۋىرلەش ئۈچۈن ھەتتا ئالاھىدە بىر ئىبرانىيچە سۆزنى قوللانغان ۋە بۇ سۆزنى ھېچقاچان ئادەملەرگە قارىتا ئىشلەتمىگەن.
3. يەھۋانىڭ كەچۈرۈمى بىزنىڭكىدىن قانداق پەرقلىنىدۇ؟ (يەشايا 55:6، 7)
3 ياراتقۇچى يەھۋا بىر ئىنساننى كەچۈرسە، ئۇنىڭ گۇناھلىرى يۇيۇلۇپ، ئۆچۈرۈلۈپ تاشلىنىدۇ. ئارىدىكى بۇزۇلغان مۇناسىۋەت قايتا پۈتۈنلەي ئەسلىگە كېلىدۇ. يەھۋا بىزنى قايتا-قايتا چىن دىلىدىن كەچۈرگىنى ئۈچۈن ئۇنىڭغا ئىنتايىن مىننەتدارمىز.—يەشايا 55:6، 7-نى ئوقۇڭ.
4. يەھۋا چىن دىلدىن كەچۈرۈم قىلىدىغانلىقىنى چۈشىنىشىمىزگە قانداق ياردەم بېرىدۇ؟
4 يەھۋانىڭ كەچۈرۈمى بىزنىڭكىدىن تامامەن پەرقلىق. ئۇنداقتا، بىز نامۇكەممەل ئىنسان سۈپىتىدە، چىن دىلدىن كەچۈرۈشنىڭ ھەقىقىي مەنىسىنى چۈشىنەلەيمىزمۇ؟ يەھۋا ئۇنىڭ كەچۈرۈمىنى چۈشىنىشىمىزگە ياردەم بېرىش ئۈچۈن بەزى سېلىشتۇرۇشلارنى مۇقەددەس كىتابقا يازدۇرغان. ئۇلاردىن بەزىلىرىنى مۇھاكىمە قىلىپ چىقايلى. ئۇلار يەھۋانىڭ گۇناھلىرىمىزنى بىزدىن قانداق يىراقلاشتۇرىدىغانلىقى ۋە بىزنى ئۆزى بىلەن قانداق ياراشتۇرىدىغانلىقىنى كۆرسىتىدۇ. بۇ سېلىشتۇرۇشلار رەھىم-شەپقەتلىك ۋە كۆيۈمچان ئاتىمىزغا بولغان مىننەتدارلىقىمىزنى تېخىمۇ ئاشۇرىدۇ.
يەھۋا گۇناھنى يوق قىلىدۇ
5. يەھۋا گۇناھلىرىمىزنى كەچۈرۈم قىلسا، نېمە ئىش بولىدۇ؟
5 مۇقەددەس كىتابتا گۇناھلار ئېغىر يۈككە ئوخشىتىلغان. داۋۇت پادىشاھ ئۆز گۇناھلىرىنى شۇنداق تەسۋىرلىگەن: «بېشىمدىن ئېشىپ كەتتى گۇناھلىرىم؛ ئۇلار خۇددى ئېغىر يۈكتەك، مەن ئۇلارنى كۆتۈرەلمىدىم» (زەبۇر 38:4). بىراق، يەھۋا توۋا قىلغان كىشىلەرنىڭ گۇناھلىرىنى كەچۈرىدۇ (زەبۇر 25:18؛ 32:5). بۇ ئايەتلەردىكى «كەچۈرۈش» دەپ تەرجىمە قىلىنغان ئىبرانىيچە سۆز «كۆتۈرمەك» ياكى «ئېلىپ تاشلىماق» دېگەنلەرنى بىلدۈرىدۇ. يەھۋا گۇناھلىرىمىزنى كەچۈرگەندە، يەلكىمىزدىكى ئېغىر يۈكنى ئېلىپ تاشلىۋەتكەندەك بولىدۇ.
«گۇناھىمنى قىلدىڭ كەچۈرۈم» (زەبۇر 32:5)
6. يەھۋا گۇناھلىرىمىزنى قانچىلىك يىراققا ئېلىپ كېتىدۇ؟
6 يەنە بىر ئايەتتە، يەھۋانىڭ گۇناھلىرىمىزنى بىزدىن قانچىلىك يىراقلاشتۇرىدىغانلىقى تەسۋىرلەنگەن. زەبۇر 103:12-ئايەتتە مۇنداق يېزىلغان: «كۈن چىقىش كۈن پېتىشتىن يىراق بولسا قانچىلىك، ئۇ بىزنى گۇناھلىرىمىزدىن يىراقلاشتۇرغان شۇنچىلىك». شەرق ۋە غەرب بىر-بىرىدىن ئەڭ يىراق ئىككى نۇقتا، بۇ ئىككى نۇقتا مەڭگۈ بىر-بىرى بىلەن ئۇچراشمايدۇ. باشقىچە ئېيتقاندا، يەھۋا بىزنىڭ گۇناھلىرىمىزنى كۆتۈرۈپ، تەسەۋۋۇر قىلالمىغۇدەك يىراق يەرگە ئېلىپ كېتىدۇ. بۇ سېلىشتۇرۇشتىن ناھايىتى ئېنىق كۆرەلەيمىزكى، يەھۋا بىزنى پۈتۈنلەي كەچۈرىدۇ!
«كۈن چىقىش كۈن پېتىشتىن يىراق بولسا قانچىلىك» (زەبۇر 103:12)
7. مۇقەددەس كىتابتا يەھۋا گۇناھلىرىمىزنى قانداق بىر تەرەپ قىلىدىغانلىقى ھەققىدە نېمىلەر يېزىلغان؟ (مىكاھ 7:18، 19)
7 يەھۋا گۇناھلىرىمىزنى كۆچمە مەنىدە بىزدىن يىراققا ئېلىپ كەتكەندە، ئۇلارنى تاشلىۋەتمەي ساقلاپ يۈرەمدۇ؟ ئەلۋەتتە، ياق! پادىشاھ ھىزقىيا يەھۋا توغرىسىدا مۇنداق يازغان: «سەن بارچە گۇناھلىرىمنى ئارقاڭغا تاشلىۋەتتىڭ» (يەشايا 38:9، 17). دېمەك، يەھۋا توۋا قىلغان گۇناھكارنىڭ گۇناھلىرىنى ئېلىپ تاشلىغاندىن كېيىن، ئۇلارغا قايتا قارىمايدۇ. ھىزقىيانىڭ سۆزلىرىنى باشقىچە مۇنداق تەرجىمە قىلىشقا بولىدۇ: «سەن گۇناھلىرىمنى پۈتۈنلەي يوق قىلدىڭكى، گويا ھېچقاچان گۇناھ ئۆتكۈزمىگەندەك». مىكاھ 7:18، 19-ئايەتلەردە (ئوقۇڭ) بۇ ئوي-پىكىرنى تەكىتلەيدىغان يەنە بىر سېلىشتۇرۇش تەسۋىرلەنگەن بولۇپ، يەھۋا بارچە گۇناھلىرىمىزنى چوڭقۇر دېڭىزنىڭ ئاستىغا تاشلايدىغانلىقى ئېيتىلغان. قەدىمكى زامانلاردا، دېڭىز ئاستىغا تاشلانغان بىر نەرسىنى قايتۇرۇپ ئېلىپ چىقىش ئەسلا مۇمكىن ئەمەس ئىدى.
«سەن بارچە گۇناھلىرىمنى ئارقاڭغا تاشلىۋەتتىڭ» (يەشايا 38:17)
«سەن بارچە گۇناھلىرىنى چوڭقۇر دېڭىز ئاستىغا تاشلايسەن» (مىكاھ 7:19)
8. بۇ ماقالىدە ھازىرغىچە نېمىلەرنى ئۆگەندۇق؟
8 بۇ سېلىشتۇرۇشلار شۇنى چۈشىنىشىمىزگە ياردەم بېرىدۇكى، ئەگەر يەھۋا بىزنى كەچۈرسە، يەلكىمىزدىن بېسىپ تۇرغان ئېغىر يۈك ئېلىپ تاشلىنىپ، ئۆزىمىزنى يەڭگىل ھېس قىلىمىز. داۋۇت ئېيتقاندەك، «خاتا قىلمىشلىرى كەچۈرۈلگەن ۋە گۇناھلىرى ئەپۇ قىلىنغانلار بەختلىكتۇر، يەھۋا گۇناھىنى ھېسابقا ئالمايدىغان كىشى بەختلىكتۇر» (رىملىقلار 4:6–8). مانا بۇ ھەقىقىي كەچۈرۈم!
يەھۋا گۇناھنى يۇيۇپ ئۆچۈرۈپ تاشلايدۇ
9. يەھۋا ئۆزىنىڭ پۈتۈنلەي كەچۈرۈم قىلىدىغانلىقىنى چۈشەندۈرۈش قانداق سېلىشتۇرۇشنى ئىشلەتكەن؟
9 تۆلەم ئارقىلىق يەھۋا توۋا قىلغان ئىنسانلارنىڭ گۇناھلىرىنى يۇيۇپ، ئۆچۈرۈپ تاشلايدۇ. مۇقەددەس كىتابتا بۇنى تەسۋىرلەيدىغان باشقا سېلىشتۇرۇشلار بار. كۆچمە مەنىدە، يەھۋا ئىنساننىڭ گۇناھلىرىنى يۇيۇپ تازىلاپ، گۇناھكارنى پاك قىلىدۇ (زەبۇر 51:7؛ يەشايا 4:4؛ يەرەم. 33:8). يەھۋا ئۆزى بۇنى مۇنداق چۈشەندۈرگەن: «ئەگەر گۇناھلىرىڭلار قىپقىزىل بولسىمۇ، ئۇلار قاردەك ئاپئاق بولىدۇ. ئەگەر قىپقىزىل لاتىدەك بولسىمۇ، ئۇلار ئاق يۇڭدەك بولىدۇ» (يەشايا 1:18). ئادەتتە، كىيىم-كېچەكلەردىكى قىپقىزىل داغنى يۇيۇپ، پاكىزە چىقىرىپ تاشلاش ئاسانغا چۈشمەيدۇ. لېكىن، بۇ سېلىشتۇرۇش ئارقىلىق يەھۋا بىزنى گۇناھلىرىمىزدىن پاكلاپ، ھەتتا ئۇلارنىڭ ئىزناسى ھەم قالمايدىغانلىقىغا ئىشەندۈرىدۇ.
«ئەگەر گۇناھلىرىڭلار قىپقىزىل بولسىمۇ، ئۇلار قاردەك ئاپئاق بولىدۇ» (يەشايا 1:18)
10. يەھۋا بىزنى پۈتۈنلەي كەچۈرۈم قىلىدىغانلىقىنى قايسى سېلىشتۇرۇشلار ئارقىلىق چۈشەندۈرۈپ بېرىدۇ؟
10 ئالدىنقى ماقالىدە تىلغا ئېلىنغاندەك، گۇناھنى قەرزگە ئوخشىتىشقا بولىدۇ (مەتتا 6:12؛ لۇقا 11:4). شۇڭا، بىز ھەر قېتىم گۇناھ ئۆتكۈزگەندە، قەرزنىڭ ئۈستىگە قەرز قوشۇلۇپ، قەرزگە بوغۇلۇپ كېتىمىز. لېكىن، يەھۋا بىزنى كەچۈرگەندە، ئۇ شۇ قەرزىمىزنى پۈتۈنلەي كەچۈرۈم قىلىدۇ. ئۇلارنى تۆلەشنى قايتا تەلەپ قىلمايدۇ. بۇ سېلىشتۇرۇش يەھۋا گۇناھلىرىمىزنى كەچۈرگەندە، ئېغىر يۈكتىن قۇتۇلۇپ، ئۆزىمىزنى يەڭگىل ۋە خۇشال ھېس قىلىدىغانلىقىمىزنى تەسۋىرلەپ بېرىدۇ.
«گۇناھلىرىمىزنى كەچۈرگەيسەن» (مەتتا 6:12)
11. مۇقەددەس كىتابتا يەھۋا گۇناھلىرىمىزنى قايسى مەنىدە ئۆچۈرۈپ تاشلايدىغانلىقى يېزىلغان؟ (ئەلچىلەر 3:19)
11 يەھۋا قەرزىمىزنى ياكى گۇناھىمىزنى كەچۈرۈپلا قويماي، ئۇلارنى يۇيۇپ، پۈتۈنلەي ئۆچۈرۈپ تاشلايدۇ (ئەلچىلەر 3:19-نى ئوقۇڭ). ئادەتتە قەرز كەچۈرۈم قىلىنغاندا، ئۇنى سىزىۋېتىدۇ. بىراق، سىزىق ئاستىدا قانچىلىك قەرز بولغانلىقىڭىز يەنىلا كۆرۈنۈپ تۇرىدۇ. لېكىن، يەھۋانىڭ قەرزنى كەچۈرۈم قىلىشى تامامەن پەرقلىق. قەدىمكى زاماندا كۈل، سېغىز ۋە سۇنى ئارىلاشتۇرۇپ ياسىغان سىياھنى نەم لاتا بىلەن ئېيتىپ ئۆچۈرۈۋېتىشكە بولاتتى. قەرزنى شۇنداق «ئۆچۈرگەندە»، ئۇ پۈتۈنلەي ئۆچۈپ كېتىپ، ئىزناسى يوقۇلۇپ، كۆزگە كۆرۈنمىگەن. شۇنىڭ بىلەن، قەرزدار ئادەم ھېچقاچان قەرزى بولمىغاندەك بولغان ئىدى. دېمەك، يەھۋا گۇناھلىرىمىزنى كەچۈرگەندە، ئۇلارنى ئۆچۈرۈپ يوق قىلىدىغانلىقىنى بىلگەن ئىكەنمىز، يەھۋاغا چوڭقۇر مىننەتدارلىق بىلدۈرمەي تۇرالمايمىز!—زەبۇر 51:9.
«گۇناھلىرىڭلار كەچۈرۈلۈشى [ياكى، يۇيۇلۇشى] ئۈچۈن» (ئەلچى. 3:19)
12. بۇلۇت توغرىسىدىكى سېلىشتۇرۇشتىن نېمىنى ئۆگىنىمىز؟
12 يەھۋا گۇناھلىرىمىزنى پۈتۈنلەي كەچۈرۈم قىلىدىغانلىقىنى كۆرسىتىش ئۈچۈن يەنە بىر سېلىشتۇرۇشنى ئىشلەتكەن: «سېنىڭ گۇناھلىرىڭنى بۇلۇت بىلەن ياپىمەن، قويۇق بۇلۇت بىلەن گۇناھلىرىڭنى يېپىپ قويىمەن» (يەشايا 44:22). دېمەك، يەھۋا بىزنى كەچۈرگەندە، گۇناھلىرىمىزنى قويۇق بۇلۇت بىلەن يېپىلىپ، كۆزگە كۆرۈنمەيدىغان بولىدۇ.
«سېنىڭ گۇناھلىرىڭنى بۇلۇت بىلەن ياپىمەن» (يەشايا 44:22)
13. يەھۋا گۇناھلىرىمىزنى كەچۈرگەندە، قانداق ھېس-تۇيغۇدا بولىمىز؟
13 بۇ سېلىشتۇرۇشلاردىن نېمىنى ئۆگەندۇق؟ يەھۋا گۇناھلىرىمىزنى كەچۈرگەندە، ئۆزىمىزنى يەنە داۋاملىق گۇناھكار ھېس قىلماسلىقىمىز كېرەك. يەنى، ئۆتمۈشتە ئۆتكۈزگەن خاتالىقىمىز ئۈچۈن ئۆمۈر بويى ۋىجدان ئازابى تارتىپ يۈرۈشنىڭ كېرىكى يوق. ئەيسا مەسىھنىڭ تۆلەم قۇربانلىقى گۇناھلىرىمىزنى، يەنى خۇدانىڭ ئالدىدىكى قەرزىمىزنى پۈتۈنلەي يېپىپ قويىدۇ. خۇددى ھېچقاچان گۇناھ ئۆتكۈزمىگەندەك بولىمىز. ئەگەر گۇناھلىرىمىزغا توۋا قىلساق، يەھۋا خۇدا بىزنى چىن دىلىدىن كەچۈرىدۇ.
يەھۋا دوستلۇقنى ئەسلىگە كەلتۈرىدۇ
ئاسماندىكى ئاتىمىزنىڭ بىزنى كەچۈرگەنلىكى ئۇنىڭ بىلەن دوست بولۇشىمىزغا مۇمكىنچىلىك بېرىدۇ (14-ئابزاسقا قاراڭ)
14. نېمە ئۈچۈن يەھۋانىڭ بىزنى پۈتۈنلەي كەچۈرىدىغانلىقىغا ئىشەنچ قىلالايمىز؟ ( ھەم قاراڭ).
14 يەھۋا بىزنى چىن دىلىدىن كەچۈرگەچكە، بىز قايتا ئۇنىڭ بىلەن دوست بولالايمىز. بۇنىڭدىن باشقا، گۇناھلىرىمىز كەچۈرۈلسە، ئۆزىمىزنى گۇناھكار ھېس قىلماسلىقىمىز لازىم. يەھۋا ئۆچ-ئاداۋەت ساقلاپ، بىزنى جازالاش ئۈچۈن پۇرسەت ئىزدەۋاتىدۇ دەپ قورقۇپ يۈرمەسلىكىمىز كېرەك. ئۇ ھەرگىز ئۇنداق قىلمايدۇ. ئەگەر يەھۋا بىزنى «كەچۈردۈم» دېسە، نېمە ئۈچۈن ئۇنىڭ سۆزىگە ئىشەنچ قىلالايمىز؟ چۈنكى، يەھۋا ئاللىقاچان يەرەمىيا پەيغەمبەر ئارقىلىق: «مەن ئۇلارنىڭ خاتاسىنى كەچۈرىمەن ۋە ئۇلارنىڭ گۇناھىنى ئەسلا يادقا ئالماسمەن»،— دېگەن (يەرەم. 31:34). ئەلچى پاۋلۇس شۇ سۆزنى نەقىل كەلتۈرۈپ مۇنداق دېگەن: «ئۇلارنىڭ گۇناھلىرىنى يەنە قايتا ئەسكە ئالمايمەن» (ئىبرانىي. 8:12). ئۇنداقتا، يەھۋا قايسى مەنىدە گۇناھلىرىمىزنى ئەسكە ئالمايدۇ؟
«مەن … ئۇلارنىڭ گۇناھىنى ئەسلا يادقا ئالماسمەن» (يەرەم. 31:34)
15. يەھۋانىڭ گۇناھلىرىمىزنى ئەسكە ئالمايدىغانلىقى نېمىنى بىلدۈرىدۇ؟
15 مۇقەددەس كىتابتا، «يادقا ئېلىش» ياكى «ئەسكە ئېلىش» دېگەن سۆز-ئىبارىلەر پەقەتلا ئۆتمۈشتىكى بىرەر ئىشنى ئەسلەش ياكى شۇ توغرۇلۇق ئويلاشنى بىلدۈرۈپ قالماي، بەلكى يەنە ئەمەلىي ئىش-ھەرىكەتنىمۇ بىلدۈرىدۇ. مەسىلەن، ئەيسانىڭ يېنىدا تۈۋرۈككە مىخلانغان جىنايەتچى: «ئەيسا، پادىشاھ بولغىنىڭدا مېنى ئەسلىگەيسەن»،— دېگەن (لۇقا 23:42، 43). بۇ جىنايەتچى ئەيسادىن ئۇنى ئەسلەشنىلا ئەمەس، ھەرىكەت قىلىشنى، يەنى ئۇنى تىرىلدۈرۈشنى سورىغان. دېمەك، يەھۋانىڭ گۇناھىمىزنى ئەسكە ئالمايدىغانلىقى ئۇنىڭ بىزگە قارشى ھەرىكەت قىلمايدىغانلىقىنى، يەنى گۇناھلىرىمىزنى كەچۈرگەندىن كېيىن، كېلەچەكتە جازالىمايدىغانلىقىنى بىلدۈرىدۇ.
16. مۇقەددەس كىتابتا گۇناھلىرىمىزنىڭ كەچۈرۈلۈشى نېمە بىلەن سېلىشتۇرۇلغان؟
16 يەھۋا بىزنى كەچۈرسە، ئۆزىمىزنى ئەركىن ھېس قىلىمىز. مۇقەددەس كىتابتا بۇنى چۈشىنىشمىزگە ياردەم بېرىش ئۈچۈن يەنە بىر سېلىشتۇرۇش ئىشلىتىلگەن. بىز ھەممىمىز گۇناھكار ۋە گۇناھ قىلىشقا مايىل تەبىئىتىمىز بولغاچقا، بىزنى «گۇناھنىڭ قۇللىرى» دەپ تەسۋىرلىگەن. يەھۋا بىزنى كەچۈرگەچكە، بىز «گۇناھتىن ئازاد» قىلىندۇق (رىملىقلار 6:17، 18؛ ۋەھىي. 1:5). يەھۋانىڭ بىزنى كەچۈرگەندە، قۇللۇقتىن ئەركىنلىككە ئېرىشكەن كىشىگە ئوخشاش خۇشال-خۇراملىققا چۆمىمىز.
«گۇناھتىن ئازاد [بولدۇڭلار]» (رىملىقلار 6:18)
17. يەھۋا بىزنى كەچۈرگەندە، قايسى مەنىدە ساقىيىپ كېتىمىز؟ (يەشايا 53:5)
17 يەشايا 53:5-نى ئوقۇڭ. مۇقەددەس كىتابتا گۇناھكارلار ساقايماس كېسەلگە گىرىپتار بولغان ئىنسانلار كەبى تەسۋىرلەنگەن. لېكىن، ئۆز ئوغلىنى تۆلەم قۇربانلىقى سۈپىتىدە بېرىپ، يەھۋا خۇدا بىزنى ساقايتتى (1-پېتر. 2:24). بىز گۇناھ قىلغاندا، يەھۋا بىلەن بولغان مۇناسىۋىتىمىز بۇزۇلىدۇ. لېكىن، ئۇ تۆلەم ئاساسىدا بىزنى كەچۈرگەندە، دوستلۇق مۇناسىۋىتىمىز ئەسلىگە كېلىدۇ. خۇددى ئېغىر كېسىلىدىن ساقىيىپ كەتكەن ئادەمگە ئوخشاش، بىزمۇ روھىي جەھەتتىن ساقىيىپ، قايتا يەھۋا بىلەن دوست بولغاندا، ئىنتايىن خۇشال بولىمىز.
«ئۇنىڭ يارىلىرى بىزنى شىپا تاپقۇزدى» (يەشايا 53:5)
يەھۋانىڭ كەچۈرۈمى ھاياتىمىزغا قانداق تەسىر قىلىدۇ؟
18. مۇقەددەس كىتابتىكى سېلىشتۇرۇشلاردىن يەھۋانىڭ كەچۈرۈمى توغرۇلۇق نېمىنى ئۆگەندۇق؟ («يەھۋا بىزنى قانداق كەچۈرىدۇ؟» ناملىق رامكىغا ھەم قاراڭ).
18 يەھۋانىڭ كەچۈرۈمى توغرۇلۇق بۇ ماقالىدە نېمىلەرنى ئۆگەندۇق؟ ئۇ گۇناھلىرىمىزنى كەچۈرگەندە، پۈتۈنلەي كەچۈرىدۇ ۋە كېلەچەكتە شۇ گۇناھلىرىمىز قايتا سۈرۈشتۈرۈپ ئولتۇرمايدۇ ۋە بىزنى جازالىمايدۇ. شۇڭلاشقا، بىز ئاسماندىكى ئاتىمىز بىلەن يېقىن دوست بولالايمىز. بىراق، شۇنى ئەستىن چىقارمايلىكى، يەھۋانىڭ كەچۈرۈمى — ئۇ بىزگە بەرگەن سوۋغات. ئەسلىدە بىز بۇ سوۋغاتقا لايىق ئەمەس ئىدۇق، لېكىن يەھۋا بىزگە سۆيگۈ-مۇھەببەت ۋە رەھىم-شەپقەت كۆرسەتكەچكە، ئۇنىڭغا ئېرىشتۇق.—رىملىقلار 3:24.
19. (1) بىز يەھۋاغا نېمە ئۈچۈن مىننەتدار؟ (رىملىقلار 4:8) (2) كېيىنكى ماقالىدە نېمە توغرۇلۇق مۇھاكىمە قىلىمىز؟
19 رىملىقلار 4:8-نى ئوقۇڭ. يەھۋانىڭ گۇناھلىرىمىزنى چىن دىلدىن كەچۈرگەنلىكى ئۈچۈن، ئۇنىڭغا چەكسىز مىننەتدارمىز! (زەبۇر 130:4) ئەلۋەتتە، يەھۋانىڭ كەچۈرۈمىگە ئېرىشىشنى خالىساق، بىز مۇھىم بىر ئىشنى قىلىشىمىز كېرەك. ئەيسا مەسىھ مۇنداق دېگەن: «سىلەر باشقىلارنىڭ خاتالىقلىرىنى كەچۈرمىسەڭلار، ئاسماندىكى ئاتاڭلارمۇ سىلەرنى كەچۈرمەيدۇ» (مەتتا 6:14، 15). دېمەك، بىز خۇدايىمىز يەھۋانى ئۈلگە قىلىپ، باشقىلارنى كەچۈرۈشىمىز كېرەك. كېيىنكى ماقالىدە، باشقىلارنى كەچۈرۈش ئۈچۈن نېمىلەرنى قىلىشىمىز كېرەكلىكى توغرۇلۇق كۆپرەك مۇھاكىمە قىلىمىز.
2-ناخشا تەشەككۈر يەھۋا!
a ئىبرانىيچە يازمىلارنىڭ ئەسلى نۇسخىسىدا «ھەقىقىي كەچۈرۈم» دېگەن سۆز-ئىبارە ئىشلىتىلگەن. بۇ ئايەتتە تىلغا ئېلىنغان كەچۈرۈم چىن دىلدىن كەچۈرۈشنى ئىشارەت قىلغان بولۇپ، باشقا شەكلىدىكى كەچۈرۈشتىن پەرقلىق. بەزى تەرجىمىلەردە، زەبۇر 130:4-ئايەتنىڭ تەرجىمىسىدە بۇ نۇقتىغا سەل قارالغان.