47-تەتقىق ماقالىسى
42-ناخشا ئاجىزلارغا ياردەم بەر
بۇرادەرلەر ئاقساقال بولۇشقا ئىنتىلىۋاتامسىلەر؟
«كىمكى يېتەكچى بولۇش ئۈچۈن لاياقەتلىك بولۇشقا ئىنتىلسە، ئۇ ياخشى بىر ئىشنى ئارزۇ قىلغان بولىدۇ».—1-تىموت. 3:1.
مەركىزى ئىدىيە
بىر بۇرادەر ئاقساقال بولۇپ تەيىنلىنىشى ئۈچۈن مۇقەددەس كىتابتىكى قانداق تەلەپلەرگە لايىق بولۇشى كېرەكلىكىنى مۇھاكىمە قىلىمىز.
1، 2. ئاقساقاللار قانداق «ياخشى ئىشنى» قىلىدۇ؟
ئەگەر ياردەمچى خىزمەتچى بولۇپ خىزمەت قىلىۋاتقان بولسىڭىز، ئاللىقاچان گۈزەل پەزىلەتلەرنى يېتىلدۈرۈپ، ئاقساقال بولۇپ تەيىنلىنىش ئۈچۈن جان كۆيدۈرۈپ خىزمەت قىلىۋاتقانسىز. سىزمۇ مۇقەددەس كىتابتا تىلغا ئېلىنغان «ياخشى ئىشنى» ئارزۇ قىلىۋاتامسىز؟—1-تىموت. 3:1.
2 ئاقساقال قانداق ئىشلارنى قىلىدۇ؟ ئۇ جامائەت باش بولۇپ ۋەز قىلىدۇ؛ يەھۋا تاپشۇرغان پادىلاردىن خەۋەر ئالىدۇ؛ گەپ-سۆز ۋە ئىش-ھەرىكەتلىرى باشقىلارغا ئۈلگە بولۇپ، قېرىنداشلارنىڭ ئىمان-ئېتىقادىنى كۈچەيتىدۇ. شۇ سەۋەبتىن، مۇقەددەس كىتابتا ئاقساقاللارنى «ھەدىيەلەر» دەپ ئاتالغان.—ئەفەس. 4:8.
3. بىر بۇرادەر ئاقساقال بولۇش ئۈچۈن قايسى تەلەپلەرگە لاياقەتلىك بولۇشى كېرەك؟ (1-تىموتىي 3:1–7؛ تىتۇس 1:5–9)
3 بىر بۇرادەر ئاقساقال بولۇش تەيىنلىنىشى ئۈچۈن نېمە قىلالايدۇ؟ ئاقساقال بولۇپ خىزمەت قىلىش بىلەن مۇشۇ دۇنيادا مەلۇم بىر ئىش ئورنىغا كىرىش ئارىسىدا پەرق بار. سىز بىر ئىش ئورنىغا ئىلتىماس قىلسىڭىز، خۇجايىن تەلەپ قىلغان قابىلىيەتلىرىڭىز بولسا، سىزنى ئىشقا ئالىدۇ. لېكىن، ئاقساقال بولۇپ تەيىنلىنىش ئۈچۈن ۋەز قىلىش ۋە تەلىم بېرىشتەك قابىلىيەتلەرنىڭ بولۇشىلا يېتەرلىك ئەمەس، ئۇنىڭدىن باشقا 1-تىموتىي 3:1–7 ۋە تىتۇس 1:5–9 ئايەتلەردە (ئوقۇڭ) يېزىلغان تەلەپلەرگە لايىق بولۇشى كېرەك. بۇ ماقالىدە مۇشۇ ئايەتلەر ئاساسىدا، ئۈچ جەھەتتىن ئاقساقاللاردىن نېمە تەلەپ قىلىدىغانلىقىنى كۆرۈپ چىقىمىز: (1) جامائەت ئىچى-سىرتىدا ياخشى نام-ئاتاققا ئىگە بولۇش (2) ياخشى ئائىلە بېشى بولۇش (3) ۋە جامائەتكە خۇشاللىق بىلەن خىزمەت قىلىش.
ياخشى نام-ئاتاق تىكلەش
4. «ئەيىبسىز» بولۇش نېمىنى بىلدۈرىدۇ؟
4 ئاقساقال بولۇپ خىزمەت قىلىدىغانلار «ئەيىبسىز» بولۇشى لازىم. باشقىچە ئېيتقاندا، گەپ-سۆز ۋە ئىش-ھەرىكەتتە باشقىلارغا ئۈلگە بولۇپ، جامائەتتە ياخشى نام-ئاتاق تىكلىشى كېرەك. ئۇنىڭدىن باشقا، «جامائەت سىرتىدىكىلەر ئالدىدا ياخشى گۇۋاھلىقىغا سازاۋەر بولۇشى كېرەك». بەلكىم، يەھۋا خۇداغا ئىبادەت قىلمايدىغانلار ئىمان-ئېتىقادىڭىزنى تەنقىد قىلىشى مۇمكىن. بىراق، ئۇلارنىڭ سىزنىڭ راستچىل ۋە ياخشى ئادەم ئىكەنلىكىڭىزدىن گۇمانلىنىشىغا بانا-سەۋەبى بولماسلىقى كېرەك (دانىيال 6:4، 5). ئۆز-ئۆزىڭىزدىن: «جامائەتنىڭ ئىچى-سىرتىدىكىلەر ئارىسىدا ياخشى نام-ئاتىقىم بارمۇ؟» دەپ سوراڭ.
5. «ياخشىلىقنى سۆيىدىغان» بولۇش نېمىنى بىلدۈرىدۇ؟
5 ئەگەر «ياخشىلىقنى سۆيىدىغان» بىرى بولسىڭىز، باشقىلارنىڭ ياخشى تەرىپىنى بايقاپ، ئارتۇقچىلىقلىرىنى ماختايسىز. شۇنىڭدەك باشقىلارغا ياخشىلىق قىلىشتىن خۇشاللىق تېپىپ، ھەتتا سىزدىن كۈتىمىگەن ئىشلارنى تەشەببۇسكارلىق بىلەن قىلىسىز (1-سالونىكا. 2:8؛ تىتۇس 1:8). نېمە ئۈچۈن بۇ پەزىلەت ئاقساقاللار ئۈچۈن بەك مۇھىم؟ چۈنكى، جامائەتتە قېرىنداشلارغا كۆڭۈل بۆلۈش ۋە تاپشۇرۇلغان ۋەزىپىلەرنى ئورۇنداش كۆپ ۋاقىت تەلەپ قىلىدۇ (1-پېتر. 5:1–3). ئۇلار باشقىلارغا خىزمەت قىلىش ئۈچۈن كۆپ قۇربانلىقلارنى بەرسىمۇ، ئەمما ئۇلار تېخىمۇ زور شاد-خۇراملىققا ئېرىشىدۇ.—ئەلچى. 20:35.
6. «مېھماندوست» بولۇش نېمىنى بىلدۈرىدۇ؟ (ئىبرانىيلار 13:2، 16؛ رەسىمگە ھەم قاراڭ).
6 يېقىن دوست-يارەنلىرىڭىزگىلا ئەمەس، ئانچە قويۇق ئارىلىشىپ كەتمەيدىغانلارغىمۇ ياخشىلىق قىلسىڭىز، «مېھماندوست» ئىكەنلىكىڭىزنى كۆرسىتىسىز (1-پېتر. 4:9). بىر كىتاب مېھماندوست ئادەمنى توغرۇلۇق مۇنداق تەسۋىرلىگەن: «ئۇنىڭ ئۆيىنىڭ ۋە قەلبىنىڭ ئىشىكى ناتونۇش ئادەملەر ئۈچۈن ھەرقاچان ئوچۇق». ئۆز-ئۆزىڭىزدىن مۇنداق سوراپ كۆرۈڭ: «باشقىلار مېنى جامائەتكە كەلگەن مېھمانلارغا كۆڭۈل بۆلىدىغان مېھماندوست ئادەم دەپ تونامدۇ؟» (ئىبرانىيلار 13:2، 16-نى ئوقۇڭ). مېھماندوست ئادەم ھەرقانداق كىشىگە، مەسىلەن كەمبەغەل قېرىنداشلارغا، جامائەتكە نۇتۇق ئېيتىشقا كەلگەن مېھمان بۇرادەرلەرگە، رايونغا مەسئۇل ئاقساقاللار ۋە باشقا تىرىشىپ خىزمەت قىلىۋاتقانلارغا قولىدىن كېلىشىچە مېھماندوستلۇقنى كۆرسىتىدۇ.—يارىت. 18:2–8؛ پەند. نە 3:27؛ لۇقا 14:13، 14؛ ئەلچى. 16:15؛ رىملىقلار 12:13.
مېھماندوست ئەر-ئايال خۇشاللىق بىلەن رايونغا جاۋابكار ئاقساقال ۋە ئۇنىڭ ئايالىنى قارشى ئېلىۋاتىدۇ (6-ئابزاسقا قاراڭ)
7. ئاقساقال ئۆزىنىڭ «پۇلپەرەس» ئەمەسلىكىنى قانداق كۆرسىتىدۇ؟
7 «پۇلپەرەس بولمىسۇن» دېگەن نېمىنى بىلدۈرىدۇ؟ بۇ ھاياتىدا پۇل-مال ۋە بايلىق ئەڭ مۇھىم ئورۇندا بولماسلىقى، مەيلى باي ياكى گاداي بولۇشتىن قەتئىينەزەر، خۇدا پادىشاھلىقىنى ھاياتىڭىزدا بىرىنچى ئورۇنغا قويۇڭ دېگەننى بىلدۈرىدۇ (مەتتا 6:33). دېمەك، ۋاقتىڭىز، كۈچىڭىز ۋە باشقا بارلىقىڭىزنى يەھۋاغا ئىبادەت قىلىش، ئائىلىڭىزنى بېقىش ۋە جامائەتتە خىزمەت قىلىش ئۈچۈن ئىشلىتىڭ (مەتتا 6:24؛ 1-يۇھاننا 2:15–17). ئۆزىڭىزنى مۇنداق تەكشۈرۈپ كۆرۈڭ: «پۇل مېنىڭ ئۈچۈن قانچىلىك پۇل مۇھىم؟ تۇرمۇشتا زۆرۈر نەرسىلەرگە ئېرىشسەم، شۈكۈر قانائەت قىلىمەنمۇ؟ ياكى بولمىسا، ھەردائىم كۆپرەك تېپىشنى ياكى بايلىق توپلاشنى ئويلايمەنمۇ؟».—1-تىموت. 6:6، 17–19.
8. ھەر ئىشتا «ئۆزىگە چەك قويالايدىغان» ۋە «ئۆزىنى تۇتالايدىغان» ئادەم ئىكەنلىكىڭىزنى قانداق كۆرسىتەلەيسىز؟
8 ئاقساقاللار ھەر ئىشتا «ئۆزىگە چەك قويالايدىغان» ۋە «ئۆزىنى تۇتالايدىغان» بولۇشۇڭلار كېرەك. مەسىلەن، كۆپ يەپ-ئىچىش، كىيىنىش ياكى ياسىنىش ۋە ئويۇن-تاماشىلارغا بېرىلىپ كەتمەسلىكى، بۇ دۇنيانىڭ مودا ئېقىمىنى قوغلىشىپ، ئۇلارنىڭ قولى بولۇپ قېلىشتىن ساقلىنىڭلار (لۇقا 21:34؛ ياقۇپ 4:4). باشقىلار ئاچچىقىڭلارنى كەلتۈرگەندە، ئۆزۈڭلارنى بېسىۋېلىڭلار. ئاقساقاللار «ھاراقكەش» بولماسلىقى، يەنى باشقىلارنىڭ ئالدىدا كۆپ ھاراق ئىچىدىغان ئادەم دېگەن يامان ئاتاقنى ئالماسلىقى كېرەك. شۇڭا، مۇنداق دەپ ئويلىنىپ كۆرۈڭ: «تۇرمۇش كەچۈرۈش ئادىتىم مېنىڭ ئۆزىگە چەك قويالايدىغان ۋە ئۆزىنى تۇتالايدىغان ئادەم ئىكەنلىكىمنى كۆرسىتەمدۇ؟»
9. «ساغلام ئوي-پىكىرلىك» ۋە «تەرتىپلىك» ئادەم نېمە ئىشلارنى قىلىدۇ؟
9 «ساغلام ئوي-پىكىرلىك» ئادەم بولسىڭىز، پەرقلىق ۋەزىيەتلەرگە قارىتا مۇقەددەس كىتاب پرىنسىپلىرىنىڭ نېمە دەيدىغانلىقى ھەققىدە تەپەككۇر يۈرگۈزۈپ، توغرا چۈشەنچە ۋە خۇلاسە كېلىسىز، ئالدىراپ-سالدىراپلا ئەمەس، بەلكى يەتتە ئۆلچەپ بىر كېسىسىز (پەند. نە 18:13). نەتىجىدە، دانا قارار چىقىرىپ، يەھۋانىڭ ئوي-پىكىرىنى ئەكس-ئەتتۈرىسىز. «تەرتىپلىك» ئادەم بولسىڭىز، ھەر ئىشنى پىلانلىق قىلىپ، ۋاقىتقا رىئايە قىلىسىز. باشقىلار سىزنىڭ ئىشەنچىلىك ۋە ئىشلارنى كۆرسەتمىلەر بويىچە قىلىدىغان بىرى ئىكەنلىكىڭىزنى بىلىدۇ. يۇقىرىدا ئېيتىپ ئۆتكەن پەزىلەتلەرنى يېتىلدۈرسىڭىز، ياخشى نام-ئاتاققا ئېرىشەلەيسىز. ئۇنداقتا، ھازىر مۇقەددەس كىتاب ياخشى ئائىلە بېشى قانداق پەزىلەتلەرنى يېتىلدۈرۈشى كېرەكلىكى ھەققىدە نېمە دېگەنلىكىنى كۆرۈپ چىقايلى.
ياخشى ئائىلە بېشى بولۇش
10. بىر ئەر «ئائىلىسىنى ياخشى باشقۇرالايدىغان» بولۇشى ئۈچۈن نېمە قىلالايدۇ؟
10 ئەگەر توي قىلغان بولسىڭىز، ئاقساقال بولۇشىڭىز ئۈچۈن ئائىلە ئەزالىرىڭىزمۇ ياخشى نام-ئاتاق تىكلىشى بەك مۇھىم. مۇقەددەس كىتاب مۇنداق دەيدۇ: ئاقساقاللار «ئائىلىسىنى ياخشى باشقۇرالايدىغان بولسۇن». دېمەك، ئاقساقال بولغان كىشى سۆيگۈ-مۇھەببەت بىلەن ئائىلە ئەزالىرىدىن خەۋەر ئېلىپ، مەسئۇلىيەتچان ئائىلە بېشى ئىكەنلىكىنى كۆرسىتىشى كېرەك. بۇ مۇنتىزىم رەۋىشتە ئائىلىۋى ئىبادەتنى ئۆتكۈزۈش، ئايالى بىلەن پەرزەنتلىرى بىلەن جامائەت يىغىلىشلىرى ھەمدە ۋەز خىزمەتلىرىگە قاتنىشىشنى ئۆز ئىچىگە ئالىدۇ. بۇ نېمە ئۈچۈن بەك مۇھىم؟ ئەلچى پاۋلۇس مۇنداق يازغان: «ئەگەر بىر كىشى ئۆز ئائىلىسىنى باشقۇرۇشنى بىلمىسە، ئۇ قانداقمۇ خۇدانىڭ جامائىتىدىن خەۋەر ئالالايدۇ؟».—1-تىموت. 3:5.
11، 12. ئائىلە ئەزالىرىنىڭ يۈرۈش-تۇرۇشى دادىنىڭ ئاقساقال بولۇش لاياقىتىگە قانداق تەسىر قىلىدۇ؟ (رەسىمگە ھەم قاراڭ).
11 ئەگەر سىز ئاتا بولۇپ، 18 ياشقا تولمىغان بالىلىرىڭىز بولسا، ئۇلار «ئىتائەتچان ۋە ئەدەپ-ئەخلاقلىق تەربىيىلەنگەن» بولۇشى كېرەك. سۆيگۈ-مۇھەببەت بىلەن ئۇلارغا تەلىم-تەربىيە بېرىش سىزنىڭ مەجبۇرىيىتىڭىز. ئەلۋەتتە، بالىلىق ئۆي بازار، بالىسىز ئۆي مازار. بىراق، سۆيگۈ-مۇھەببەت بىلەن پەرزەنتلىرىڭىزگە تەلىم-تەربىيە بەرسىڭىز، ئۇلار گەپ ئاڭلايدىغان، ئەدەپ-ئەخلاقلىق ۋە گۈزەل پەزىلەتلىك ئادەم بولىدۇ. ئەڭ مۇھىمى، بالىلارنىڭ يەھۋا بىلەن يېقىن دوست بولۇشى، مۇقەددەس كىتاب پرىنسىپلىرىغا ماس ھايات كەچۈرۈشنى ئۆگىنىشى ۋە چۆمۈلدۈرۈلۈشتىن ئۆتۈش مەقسىتىگە يېتىشى ئۈچۈن پۈتۈن كۈچىڭىز بىلەن ياردەم بېرىشىڭىز لازىم.
12 «پەرزەنتلىرى ئىمانلىق، ئەخلاقسىزلىق ۋە ئىتائەتسىزلىك بىلەن ئەيىبلەنمىگەن كىشى بولسۇن». ئەگەر مەسىھ ئەگەشكۈچىسى بولغان بالا ئېغىر گۇناھ ئۆتكۈزسە، بۇ دادىسىنىڭ جامائەتتىكى خىزمىتىگە تەسىر قىلىدۇ. ئەگەر دادا بالىسىنىڭ تەلىم-تەربىيىسىگە سەل قارىغان بولسا، ئۇ ئاقساقال بولۇپ خىزمەت قىلشقا لايىق كەلمەسلىكى مۇمكىن.—«كۈزىتىش مۇنارى» ژۇرنىلى، (باشقا تىلدا) 1996-يىلى، 15-ئۆكتەبىر سانى 21-بەت، 6، 7-ئابزاسلارغا قاراڭ.
ئائىلە باشلىقلىرى پەرزەنتلىرىگە يەھۋاغا ۋە جامائەتتە قېرىنداشلار خىزمەت قىلىشنىڭ ھەرخىل يوللىرىنى ئۆگىتىۋاتىدۇ (11-ئابزاسقا قاراڭ)
جامائەتكە خىزمەت قىلىش
13. «غەرەز ئۇقىدىغان» ۋە «ئۆز بېشىمچى» ئەمەس كىشى ئىكەنلىكىڭىزنى قانداق كۆرسىتەلەيسىز؟
13 گۈزەل پەزىلەتلەرنى نامايان قىلغان بۇرادەرلەر جامائەت ئۈچۈن بېرىلگەن ھەدىيە. مەسىلەن، «غەرەز ئۇقىدىغان» ئادەم جامائەتنىڭ ئىناق-ئىتتىپاقلىقىنى قوغدايدۇ. باشقىلارنىڭ سۆزلىرىگە قۇلاق سېلىپ، ئوي-پىكىرلىرى ۋە ھېس-تۇيغۇلىرىنى چۈشىنىشكە تىرىشسىڭىز، ئۆزىڭىزنى غەرەز ئۇقىدىغان كىشى ئىكەنلىكىڭىزنى كۆرسىتىسىز. ئاقساقال بولسىڭىز، ئاقساقاللار يىغىلىشىدا بىر مەسىلىنى مۇزاكىرە قىلىۋاتقاندا، باشقىلارنىڭ ئوي-پىكىرلىرىگە قوشۇلمىسىڭىز، ئەمما مۇقەددەس كىتابتىكى پرىنسىپلارغا زىت كەلمىسە، سىز كۆپچىلىكنى قۇللاپ-قۇۋۋەتلەمسىز؟ ئاقساقال «ئۆز بېشىمچى» بولماسلىقى كېرەك. مېنىڭكى راست دەپ، سۆزىڭىزدە چىڭ تۇرۇۋالماي، باشقىلارنىڭ ئوي-پىكىرلىرىنىمۇ نەزەرگە ئېلىڭ (يارىت. 13:8، 9؛ پەند. نە 15:22). ئۇنىڭدىن باشقا، ئاقساقال «جېدەلخور» ۋە «ئاسانلىقچە غەزەپلەنمەيدىغان» بولۇشى كېرەك. شۇڭا، قوپال سۆزلەپ تالاش-تارتىش قىلماڭ، قىزىق قانلىق بىلەن جېدەل-ماجىرا قىلماڭ. تىنچلىقپەرۋەر ئادەم سۈپىتىدە، ئەڭ ئېغىر ۋەزىيەتتىمۇ تىنچلىقنى ساقلاش ئۈچۈن تىرىشىڭ (ياقۇپ 3:17، 18). باشقىلارغا جاۋاب بەرگەندە، ھەتتا ئىمان-ئېتىقادىمىزغا قارشى چىققۇچىلارغا مۇلايىم ۋە ئىللىق سۆزلەرنى قىلىڭ.—ھاكىم. 8:1–3؛ پەند. نە 20:3؛ 25:15؛ مەتتا 5:23، 24.
14. «يېڭى ئېتىقادچىلاردىن بولماسلىقى ۋە «ۋاپادار» بولۇش دېگەن نېمىلەرنى بىلدۈرىدۇ؟
14 ئاقساقال بولۇپ خىزمەت قىلىدىغان بۇرادەر «يېڭى ئېتىقادچىلاردىن بولماسلىقى كېرەك». بۇ چۆمۈلدۈرۈلگەنلىكىڭىزگە ئۇزۇن يىل بولغان بولۇشى كېرەك دېگەننى ئەمەس، بەلكى روھىي جەھەتتىن پىشىپ يېتىلگەن كىشى بولۇشى كېرەكلىكىنى بىلدۈرىدۇ. ئاقساقال بولۇشتىن ئىلگىرى، سىز ئەيسا مەسىھكە ئوخشاش كەمتەر، ھەرقانداق ئىشنى قىلىشقا تەييار، يەھۋا سىزگە كۆپرەك ۋەزىپىلەرنى تاپشۇرغىچە سەۋرچانلىق بىلەن كۈتۈپ تۇرالايدىغان بولۇشىڭىز لازىم (مەتتا 20:23؛ فىلىپى. 2:5–8). يەھۋانىڭ ھەققانىي ئۆلچەملىرى بويىچە ياشاپ، ئۇنىڭ تەشكىلاتى بېرىۋاتقان كۆرسەتمىلىرىگە بويسۇنۇش ئارقىلىق، ئۆزىڭىزنىڭ «ۋاپادار» ئىكەنلىكىڭىزنى ئىسپاتلاڭ.—1-تىموت. 4:15.
15. ئاقساقال چوقۇم نۇتۇق ئېيتىشقا ماھىر بولۇش كېرەكمۇ؟ چۈشەندۈرۈپ بېرىڭ.
15 مۇقەددەس كىتاب: ئاقساقال چوقۇم «تەلىم بېرىشكە لاياقەتلىك بولسۇن»،— دەيدۇ. بۇ چوقۇم ماھىر ناتىق بولۇشى كېرەك دېگەننى بىلدۈرەمدۇ؟ ياق. ئاقساقاللارنىڭ ھەممىسىلا نۇتۇق ئېيتىشقا ماھىر بولۇشى ناتايىن، بىراق ۋەز خىزمىتى ۋە قېرىنداشلارنى يوقلاپ پادىچىلىق زىيارىتى قىلغاندا، مۇقەددەس كىتابنى ياخشى ئىشلىتىپ، ئۇلارغا تەلىم ۋە ئىلھام-مەدەت بېرەلەيدىغان بولۇشى لازىم (1-تىموتىي 3:2؛ 1-كورىنتلىقلار 12:28، 29 بىلەن ٸەفەسلىكلەر 4:11-ئايەتنى سېلىشتۇرۇڭ). گەرچە ئىنتايىن ياخشى ناتىق بولمىسىڭىزمۇ، ئۆز قابىلىيەتلىرىڭىزنى داۋاملىق ئۆستۈرۈش ئۈچۈن تىرىشىڭ. ئۇنداقتا، بۇنىڭ ئۈچۈن نېمە قىلالايسىز؟
16. تېخىمۇ ئۈنۈملۈك تەلىم بېرىش ماھارىتى يېتىلدۈرۈش ئۈچۈن نېمە قىلالايسىز؟ (رەسىمگە ھەم قاراڭ).
16 «خۇدانىڭ ئىشەنچىلىك سۆزىنى مەھكەم تۇتىدىغان كىشى بولسۇن». تېخىمۇ ياخشىراق تەلىم بەرگۈچى بولۇش ئۈچۈن، مەيلى سەھنىدە پروگراممىلارغا رىياسەتچىلىك قىلىش نۇتۇق ئېيتىش ۋە شەخسەن نەسىھەت بەرگەندە بولسۇن، خۇدانىڭ سۆزىگە ئاساسەن سۆز قىلىڭ. مۇقەددەس كىتابنى ۋە تەشكىلاتىمىز نەشىر قىلغان ماتېرىياللارنى ئەستايىدىل تەتقىق قىلىپ ئۆگىنىڭ. بولۇپمۇ نەشىرى ماتېرىياللىرىمىزدا ئايەتلەر قانداق چۈشەندۈرۈلگەنلىكىگە دىققەت قىلىپ، شۇ ئاساستا باشقىلارغا تەلىم بېرىڭ (پەند. نە 15:28؛ 16:23؛ تىتۇس 1:9). تەلىملىرىڭىزنى تىڭشىغۇچىلارنىڭ قەلبىگە تەسىر قىلىش ئۈچۈن تىرىشىڭ. تەجرىبىسى مول ئاقساقاللاردىن مەسلىھەت سوراپ، ئۇلارنىڭ پىكىرلىرىگە قۇلاق سېلىڭ (1-تىموت. 5:17). ئاقساقاللار ئېتىقادچى قېرىنداشلارغا «ئىلھام بېرەلەيدىغان» بولۇشى لازىم. بەزىدە زۆرۈر بولغاندا مەسلىھەت بېرەلەيدىغان، ھەتتا تەنبىھ بېرىپ «ئەيىبلىيەلەيدىغان» بولۇشى كېرەك. مەيلى قانداق ۋەزىيەتلەردە بولمىسۇن، ئاقساقاللار ھەردائىم مۇلايىم ۋە مېھرىبان بولۇشى كېرەك. ئەگەر قېرىنداشلارغا سۆيگۈ-مۇھەببەت بىلەن خۇدا سۆزىگە تايىنىپ تەلىم بەرسىڭىز، ئۇلۇغ ئۇستازىمىز ئەيسانى ئۈلگە قىلىپ، ماھىر تەلىم بەرگۈچى بولالايسىز.—مەتتا 11:28–30؛ 2-تىموت. 2:24.
ياردەمچى خىزمەتچى تەجرىبىلىك ئاقساقالدىن مۇقەددەس كىتابقا ئاساسلىنىپ تەلىم بېرىشنى ئۆگىنىش پۇرسىتىنى چىڭ تۇتۇۋاتىدۇ. ياردەمچى خىزمەتچى ئەينەك ئالدىدا تۇرۇپ، جامائەتتە ئېيتماقچى بولغان نۇتۇقىنى مەشىق قىلىۋاتىدۇ (16-ئابزاسقا قاراڭ)
كۆزلىگەن مەقسەتكە يەتكۈچە تىرىشىڭ
17. (1) ياردەمچى خىزمەتچىلەرنىڭ داۋاملىق تىرىشىپ، ئاقساقال بولۇش مەقسىتىگە يېتىشىگە نېمە ياردەم بېرەلەيدۇ؟ (2) مەلۇم بىر بۇرادەرلەرنى ئاقساقال بولۇشقا تەۋسىيە قىلماقچى بولغاندا، ئاقساقاللار نېمىنى ئۇنتۇماسلىقى كېرەك؟ («باشقىلارنى باھالىغاندا كىچىك پېئىل بولۇڭلار» دېگەن رامكىغا قاراڭ).
17 ئاقساقاللارغا قويۇلغان تەلەپلەرنى كۆرۈپ، بەزى ياردەمچى خىزمەتچىلەر ئۆزىنى ھەرگىزمۇ ئاقساقال بولۇشقا لاياقەتلىك بولالمايدىغاندەك ھېس قىلىشى مۇمكىن. ئەگەر سىزمۇ شۇنداق ئويلىسىڭىز، شۇنى ئۇنتۇماڭكى يەھۋا ۋە ئۇنىڭ تەشكىلاتى سىزنىڭ شۇ پەزىلەتلەرنى مۇكەممەل دەرىجىدە نامايان قىلىشىڭىزنى كۈتمەيدۇ (1-پېتر. 2:21). ئۇنىڭدىن باشقا، يەھۋانىڭ مۇقەددەس روھىنىڭ ياردىمىدە شۇ تەلەپلەرگە لاياقەتلىك بولالايسىز (فىلىپى. 2:13). سىز بولۇپمۇ قايسى پەزىلەتنى تېخىمۇ ياخشىراق نامايان قىلىشنى خالايسىز؟ بۇ توغرۇلۇق يەھۋاغا دۇئا قىلىپ ياردەم سوراڭ. شۇ پەزىلەتلەرنى يېتىلدۈرۈش ھەققىدە يېزىلغان ماقالىلەرنى ئوقۇپ ئىزدىنىڭ ۋە ئاقساقاللاردىن مەسلىھەت سوراپ، تەكلىپ-پىكىرلىرىنى ئاڭلاڭ.
18. بارچە ياردەمچى خىزمەتچىلەر قايسى مەقسەتكە يېتىشكە دەۋەت قىلىنىدۇ؟
18 بىز ھەممىمىز، ھەتتا ئاللىقاچان ئاقساقال بولۇپ خىزمەت قىلىپ كېلىۋاتقان بۇرادەرلەرمۇ، بۇ ماقالىدە كۆرۈپ چىققان پەزىلەتلەرنى يېتىلدۈرۈشكە داۋاملىق تىرىشىڭلار (فىلىپى. 3:16) سىز ياردەمچى خىزمەتچىمۇ؟ قېرىنداشلارغا تېخىمۇ كۆپرەك خىزمەت قىلىش ئۈچۈن، ئاقساقال بولۇشقا ئىنتىلىڭ! يەھۋا خۇداغا ۋە جامائەتتە قېرىنداشلارغا كۆپرەك خىزمەت قىلىش ئۈچۈن، ئۇنىڭ سىزنى تەربىيىلەپ تاۋلاپ، شەكىلگە كەلتۈرۈشى ئۈچۈن دۇئا قىلىڭ (يەشايا 64:8). ئاقساقال بولۇشقا ئىنتىلىپ، كۆرسەتكەن بارچە تىرىشچانلىقىڭىزنى يەھۋا مول بەرىكەتلىگەي!
53-ناخشا ئىناق بىللە خىزمەت قىلىش