Mahiku Mararu a Olipihana Omunepani
1. Muraarelo xeeni onirowa ahu ophwanya okonkresuni a mitano?
1 Elapo ela yootakhala ya Satana, Yehova onivikaniha waalipiha arumeyi awe. (Yes. 58:11) Enamuna emosa enirumeela awe wira opake eyo ti konkresu a edistritu khula mwaakha. Vaavo muthukumano owo vanaattamela awe, ninrowa opaka exeeni wira nalipihiwe omunepani?—Mir. 21:5.
2. Malokiheryo xeeni anitthuneya ahu omaleliha opaka?
2 Akhala wira nlelo khamunatthi wiilokiherya, ola tokhanle okathi wooreerela wira mpake marehereryo anyu, aahiiso ovekela omutekoni wanyu wira mwawiriyane muthukumano wotheene wa mahiku mararu. Niireke wira nyuwo munnisuwela saana okathi onitthuneya khula nihiku wira mphiye nipuro ninrowa wiiriwa konkresu, wira mukilaathiki eprokrama ihinatthi opacerya? Hiyo khannireerela oyeleela yoolya eyo yoolipiha ya omunepani Yehova olokihenrye awe wira onivahe! (Yes. 65:13, 14) Niireke wira moopaka marehereryo a mukukutta woorowana ni opuro woomaka?
3. Malakiheryo xeeni yaawo anirowa okhaliherya emusi ahu ottottela mureerelo eprokrama?
3 Exeeni enirowa onikhaliherya ovaha ephoole oratteene okathi wa eprokrama? Vakhala wira vanniweryaneya, mwiimananihe wira murupe saana khuta ohiyu wa mahiku a konkresu. Munweheke mulipa onilavula mwaha. Nweheke khula yoolepa enisommwa mBiibiliyani mwanyu. Mulepe itthu vakhaani siniiwa anyu. Ti vooloka akhala wira emusi enikilaatthi nipuro nimosa, okhala wira eyo enimwaakhweiherya anamuyari waatumererya annaya wira awiriyaneke. (Mir. 29:15) Khino nyuwo pooti ottittimiherya iponto suulupale sa muthukumano owo khula nihiku ni emusi anyu owaani makaaripi. Nave-tho emusi anyu pooti ovikaniha ottottela mureerelo eprokrama ela, akhala wira munrowa othokorerya iponto sinitthuna anyu orumeela okathi wa omulompa Muluku vatthokoni.
4. Ninrowa waakhaliherya sai atthu akina a mmulokoni wira attottele mureerelo muthukumano owo?
4 Mwaakhaliherye Akina Wira Yalipihiwe: Hiyo nimphavela wira atthu akina attottele mureerelo muthukumano owo. Niireke wira aakhala anamalaleerya oowuuluvala mmulokoni mwanyu yaawo annitthuneleya waakhaliherya wira yawiriyane muthukumano owo? Niireke wira nyuwo munoowerya waakhaliherya? (1 Yoh. 3:17, 18) Axitokweene, vanceenexa ale anihoolela khula ekrupu, ahaana ottittimiherya wira awehe akhala wira anamalaleerya awo anoowerya okhaliheriwa mookhalela.
5. Ninrowa okawaka sai ifolyeeto sa nlattulo na konkresu? (Nwehe ekaaxa eri vasulu-vo)
5 Ntoko sinimakela ahu wira, sihalaka isumana tthaaru, enookhala ekampaanya enrowa ahu waalattulaka atthu wira yawiriyane eprokrama eyo. Miloko sohaana opaka malokiheryo wira sikawe ifolyeeto sotheene saakhenle aya mmuttettheni mwaya motheene. Masi akhala wira emusi anyu yoohalana ifolyeeto iyo sa nlattulo nyuwo pooti okuxa murowaka okonkresuni wira mwarumeeleke okathi onilaleerya anyu moohilokiherya. Malakiheryo makina anrowa ohimmwa okathi wa eprokrama ya Namatthanu. Nto ifolyeeto seiye sinoona anyu wira pooti mukawaka khamunrowa omaliha muryeene epooma eniiriwa konkresu, mwaavahererye anamathoonyerya okathi onivolowa anyu nipuro na konkresu. Xoontte musuke efolyeetu emosa okhala wira enrowa orumeeliwa okathi wa mwaha wookiserya wa ettiminku.
6. Moota xeeni ninrowa ahu wooniherya makhalelo ooloka okonkresuni?
6 Makhalelo Ooloka Animwaalipiha Akina: Okathi ola atthu anceene aniisupuwela aya “mmansaya pahi” ni ahinathokorerya aya atthu akina, ti voolipiha murima othukumana ni maKristau aniimananiha wooniherya makhalelo ooloka! (2 Tim. 3:2) Hiyo nnimooniherya mweettelo wooloka vaavo vanivolowa ahu nipuro na konkresu mmukhalelo woomaaleleya ni wookhalela, okhala wira mikhora sinihuliwa 7:00 ya voosiisu. Nto naphavela osuka opuro, naasukeryeke atthu yaale paahi anikhalana ahu vamosa, ari mukaaroni mwahu wala ale anaasomiha ahu Biibiliya. Nihaana wiiwelela malakiheryo a presidenti a eprokrama vaavo owo vanaaleela awe atthu wira yakilatthi awiriyaneke isipo, ehinatthi opacerya eprokrama. Nohaana omurekulari selulari ahu wira ohaanyonyiheke ale yaattamanne ahu aniwiriyana eprokrama. Nave-tho vanirowa okhala vooloka akhala wira khinnirowa ovaanelaka, olepa mensaxe muselularini, olya wala weetteetta eriyari ya alipa owiriyana okathi wa eprokrama.
7. Vaniweryaneya sai olipihiwa ni waalipiha anna anirowa ahu okumanana okonkresuni?
7 Wataana Onilipiha: Okathi wa konkresu onniniphwanyiha eparakha yooreerela ya wataana ni maKristau akhwiihu wira nlipihane. (Esal. 133:1-3) Xeeni muhipaceryaka waatthukulela “murim’anyu” anna yaale anikhuma miloko sikina wira mwaasuwele saana? (2 aKor. 6:13) Nyuwo pooti opaka okhala yoolakela anyu omusuwela mutthu mmosa wala emusi emosa khula nihiku. Okathi woophumurya onoonivaha eparakha ya waasuwela anna akina. Xontte, muruuheke eyoolya anyu owaani wira muhikhumeke opuro oniiriwa konkresu murowaka othuma eyoolya. Eyo enimookhaliheryani waasuwela atthu anceene.
8. Exeeni enniiriha wiivahererya wira navare miteko okonkresuni, ni ninrowa opaka sai?
8 Tthiri ti voohakalaliha ovara muteko wa Muluku ni maKristau akhwiihu! Niireke wira nyuwo munoowerya wiivahererya wira mwaakhaliherye edepartamento wala muloko anyu mmuteko woorattela opuro oniiriwa muthukumano? (Esal. 110:3) Akhala wira nlelo khamurina muteko onirowa anyu ovara okonkresuni, nto pooti olavula ni Edepartamento Eniweherya Muteko wa Atthu Owiivahererya. Nto yakhala atthu anceene anivara muteko mmosaru onikhala woohakalaliha ni wookhweya.
9. Nthowa xeeni vanitthuneya ahu ovaha ephoole yuulupale mweettelo ahu ni mawarelo ahu okathi wa konkresu?
9 Mweettelo Ahu Onimwaalipiha Ale Anniweha: Okathi wotheene wa konkresu nooniheryeke wira tthiri nri okonkresuni, ohiya paahi okathi wa muthukumano. Atthu anniweha ahaana woonaka ovirikana okhanle eriyari ya hiyo ni ale ahikhanle Anamoona a Yehova. (1 Ped. 2:12) Mawarelo ahu ni moota wowiitthokiha nryeene okonkresuni, nipuro nimanke ahu wala mapuro anittumihiwa yoolya ahaana onvuwiha Yehova. (1 Tim. 2:9, 10) Owara ekaraxa onoowiiriha ale anniweha onisuwela wira na Anamoona a Yehova. Nto owehasa wene nnoophwanya okathi wooreerela wira nilavule voohimya sa konkresu ni olaleerya.
10. Ninrowa ottittimiherya sai wira anamuteko a hotel ni orestaurante akhalane moonelo wooloka voohimya sa konkresu?
10 Akhala wira ninrowa omaka mu hotel, ninrowa waakhaliherya sai atthu ale anivara muteko mu hotel ni orestauranti? Hiyo nihivekeleke osukeriwa ikwaartu sinceene nihirowaka orumeela, okhala wira niira siiso nnoowooceeliha anna akina ophwanya opuro woomaka, nave-tho nnoohonona muteko wa axineene hotel. Akhala wira okathi oniphiya ahu wala onikhuma ahu hotel axineene ahaatteliwa miteko, hiyo nihaana okhala oopixa murima ni waattittimiha. (aKol. 4:6) Nohaana waatthuvelaka atthu ale anivara muteko orestaurante ni hotel wala ale antteexa mirupa sahu, anirattela ekwaartu ahu aahiiso annikhaliherya miteko sikina.
11. Sookhumelela xeeni sinooniherya wira mweettelo wooloka wa eKristau onnikhaliherya olaleerya?
11 Moonelo xeeni onirowa aya okhalana atthu ale aniweha mweettelo ahu wooloka? Moovarihana ni yoolempwa ya exornaale emosa, xerenti a empa emosa yeeyo yaarumeliwe okathi wa konkresu aahimmye so: “Atthu ala toottittimiha vanceene. Vamunisivela owaakhela khula mwaakha”. Mutthu ahaakhanle namoona a Yehova aahimoriwa murupa awe mwaamukhaani ari musurukhu mu hotel yaamanke anna. Vaavo xerenti a hotel ele amuttikehenrye awe murupa ole ni musurukhu wotheene, owo ahimmye so: “Mocaaleliwa okhala wira Anamoona Yehova yaarina Muthukumano aya vakhiviru vaava, nto anamunceene yaamanke va, yaari yaawo. Vahaakhanle siiso khimwaapwanya murupa anyu”.
12. Vaavo konkresu vanaattamela awe, nikhalaneke yoolakela xeeni ni nthowa xeeni?
12 Konkresu a eyaakha ela ori vakhiviru. Anna aaviriha okathi ni wiimananiha vanceene wira amulokiherye konkresu owo. Mpake okhala yoolakela anyu owiriyana mahiku otheene mararu ni mwiilokiherye wira mwaakhelele ele Yehova ni mulokiheryo awe yoosukenryayani. Mwiimananihe waalipiha atthu akina orweela mwa makhalelo anyu ooloka, okhala oopatthaneya ni mweettelo wooloka. Nto nyuwo ni atthu akina munoowerya ohimya ntoko munna mmosa aaronwe okonkresuni mwaisana, yoowo aahimmye so: “Nkitonko ohakalala moota yoola”!
[Eponto yuulupale epaaxina 4]
Ntoko sinimakela ahu wira, sihalaka isumana tthaaru, enookhala ekampaanya enrowa ahu waalattulaka atthu wira yawiriyane eprokrama eyo
[Eponto yuulupale epaaxina 6]
Mawarelo ahu ni moota wowiitthokiha nryeene nipuro na konkresu, nipuro nimanke ahu wala mapuro anittumihiwa yoolya ahaana onvuwiha Yehova
[Eponto yuulupale epaaxina 7]
Mwiimananihe waalipiha atthu akina orweela mwa makhalelo anyu ooloka, okhala oopatthaneya ni mweettelo wooloka
[Ekaaxa ipaaxina 4]
Soowuupuxerya sa Konkresu a eDistritu 2011
◼ Okathi wa Eprokrama: Mahiku awo mararu, muthukumano onrowa opaceryaka voosiisu 8:20. Mikhora sinrowa ohuliwaka voosiisu 7:00. Vaavo vanipacerya oruma masipo a Omwene, otheene ahu nohaana okilaathi mmapuroni mwahu wira eprograma epacerye moophwanelela. Namathanu ni Saabadu muthukumano onrowa omalaka 15:55, nto Ettiminku onrowa omala 14:40.
◼ Opuro Woopweha Mikukutta: Mapuro otheene aniiriwa konkresu, yaawo yeemereriwe ahu olokiherya opuro woopweha ikaaro, khanrowa oliviwaka, masi khuta mutthu onrowa ophwanyaka moovarihana ni okathi oniphiya awe. Okhala wira opuro ene onikhala woohatta, atthu pooti opakhirana wira otheene aphwanye opuro woopweha mukukutta aya.
◼ Osuka Opuro: Opuro wookilaathi pooti osukeriwa atthu yaale paahi anikhalana anyu vamosa, ari mukaaroni mwanyu, aahiiso ale anaasomiha ahu Biibiliya.—1 aKor. 13:5.
◼ Yoolya ya Othana: Xontte, muruuheke yoolya anyu owaani wira muhikhumeke opuro oniiriwa konkresu murowaka othuma yoolya okathi woophumurya. Pooti orumeela murupa mwaamukhaani woohela eyoolya wira ehintte, murupa oniphiyerya okuha vathi va ekhukulu anyu. Mirupa suulupalexa, itthu sowaakuva ophweeya, khisineemereriwa oruuha opuro oniiriwa konkresu.
◼ Soovaha: Hiyo pooti wooniherya oxukhurela wahu nivahaka soosonkherya soohikhanyereriwa opuro oniiriwa konkresu wira nikhaliherye muteko woolaleerya ilapo sotheene. Khuta cheque onivahiwa opuro oniiriwa konkresu ohaana olempwa nirumeeliwaka nsina na “Associação das Testemunhas de Jeová de Moçambique”.
◼ Ihasara ni Sowiiraneya Sootutuxerya: Yakhumelela eretta yootutuxerya opuro oniiriwa konkresu, xontte mulavule ni namathoonyerya owaattamenleni, mowaakuveya, owo onrowa waahimeerya ale anithokorerya Iretta Sootutuxerya. Nto annihu oophwanelela anivara muteko owo anrowa oweha otepa wa oretta owo ni ovaha yookhaliherya enitthuneya.
◼ Murette: Akhala wira munilya murette wa hospitaali mwaha wa oretta, xontte muhiliyale okuxa murette owo, okhala wira okonkresuni khonrowa okhala murette.
◼ Ixapatto: Khuta mwaakha atthu anceene anniphwanya owerya mwaha wa ixapattho soohikhalela. Ti vooreera owara ixapatttho sinikhalela siniira ahu nawara nihinaakuva omora.
◼ Iformulaario Queira Visitar (S-43): Yohaana orumeeliwaka eformulaario Queira Visitar moophavela ovaha soolakiherya voohimya sa mutthu onooniherya osiveliwa yoowo onimulaleerya ahu mohiilokiherya okathi wa konkresu. Anamalaleerya ahaana okuxa eformulaario emosa aahiiso piili yaarowaka okonkresuni. Mwamaleliha olepa eformulaario eyo pooti ovahererya mapuro yaale anikaiwa iliivuru, wala onvahererya mulipa-oolepa a muloko anyu. Munwehe Nosso Ministério do Reino a Novembro 2009, epax. 4.
◼ Irestaurante: Makhalelo anyu orestaurante ahaana onvuwihaka Yehova. Mwaattuveleke ale anoorumeelani, akhala wira eyo yoolema ya muttetthe owo.
◼ Opuro Woomaka: Nihinatthi ophiya nihiku na konkresu eDepartamento ya Opuro Woomaka, ennipacerya ovara muteko wira athokoreriwe anna yaale aniveka opuro woomaka. Marehereryo awo annincererya ohakalala oniphwanya ahu mwaha wa othukumana ni annihu eeKristau. Masi, wuupuwela yoolepa eni “sothene sìriwe ni nttittimiho ni wiwanana”, ni mwaha woowi okhala saana wa anna akina onniheliwa muhina, vannireerela wuupuxeriwa itthu sikina. Anna yaale animaka vatthokoni va munna, ahaana ohakalalaka ni ele enivahiwa aya, ni waakhulela itthu sikina sinivekeliwa aya. Khuta nihiku, muhinatthi orowa okonkresuni, muhaana orattela ekwaartu anyu, nto nihiku noorowa owaani, muhaana ohiya ekwaartu enari yooratteliwa. Omaka vatthokoni va munna khonikumiha muritti wa khuta mutthu wa ophavela yoolya awe ni moota woorowa okonkresuni. Tthiri, khuta mutthu ohaana opaka marehereryo awe mmyaha iyo. Wiiwananeya wanyu ni osuwela miritti sirina anyu onoomukhweiherya mwaneene etthoko wooniherya osuwela owaakhela aletto, opakaka eyo moohinlaseya ni moohikhanyereriwa. Soowuupuxerya iya sinnivareleya-tho muteko wa ale animaka mapuro aniiriwa konkresu, awo ahaana wiiwananaka ni anamathoonyerya wira khuta nihiku mapuro aniiriwa konkresu akhaleke ooratteleya.—1 aKor. 14:40.
◼ Muteko wowiivahererya: Ohakalala wahu mwaha wa orowa konkresu onimuncerereya akhala wira ninrowa wiivahererya ovara miteko sinitthuneya. (Mit. 20:35) Khuta mutthu oniphavela wiivahererya ohaana olavula ni eDepartamento ya Muteko Oowiivahererya. Anamwane arina iyaakha sinimalela 16, anoowerya-tho okhaliherya vanceene akhala wira anivara muteko ni anamuyari aya wala mutthu muulupale orina aya aahiiso mutthu eemereriwe ni anamuyari wala mutthu onaakhapelela.
◼ Obatizo: Saabadu voosiisu, eprokrama ehinatthi opacerya, ale anrowa obatiziwa ahaana okilaathi opuro othanleliwa aya. Otheene yeemereriwe obatiziwa ahaana oruuha ikuwo ni ituwalya sooreerela wira arumeele okathi woobatiziwa. Iyaakha sivinre akina yaahiwara ikuwo soohireerela, nto eyo yahaakanyerya obatizo owo. Axitokweene anikoha makoho a obatizo arumeelaka efolyeeto Murowé Mwawixuttiheke Atthu Mwabatizaka ahaana ottittimiherya wira ale anrowa obatiziwa annisuwela otthuneya waya owara mookhalela attharelaka sooruma sa Biibiliya.
[Eponto yuulupale epaaxina 5]
Ninrowa Okawaka Sai Efolyeeto ya Nlattulo?
Moophavela wira nikawe ifolyeeto iyo muttetthe ahu wotheene, khinnirowa ohimyaka itthu sinceene. Hiyo pooti olavula so: “Ehaali. Hiyo ninkawa ifolyeeto sinikaiwa olumwenku wotheene. Vano naarweenle woovahani efolyeeto ela ya nlattulo. Munoophwanya soohimmwa sinceene mfolyeetoni mmo”. Efolyeeto eyo yookhalana itthu sookuxa murima ohoolo waya, tivo-nto munvahereryeke mwaneene etthoko emosa wira owehe. Mooniheryeke ohakalala. Mwaakawaka ifolyeeto iyo wuumalani wa esumana, pooti ovaha-tho irevista akhala wira vannireerela.