Mweettelo Yoowo Oninvuwiha Muluku

1. Xeeni oryaaya vookhweya waasuwela Anamoona a Yehova okathi wa akongresu a edistritu?

¹ Okathi ninkhala ahu okongresuni, hiyo ninnisuweliwa saana ni atthu akina. Ipooma sinci sinipakiwa kongresu, ijornale, raadio ni televisau onnaaleela atthu sa ophiya wahu mapuro ale. Ikwaha sinci, irestaurante ni hoteli sinnisareya atthu anirwa okongresuni, nto atthu anikhala mapuro awo annoona wira ale anixukurya aawara ikaraxa sa kongresu. Moottharelana, sihaavo soowuupuxerya sikina sinirowa onikhaliherya onvuwiha Muluku orweela mwa mweettelo ahu wooloka okongresuni.​—1 Ped. 2:12.

2. Ninrowa onvuwiha sai Muluku orweela mwa mawarelo ahu oophwanelela niryeene muttetthe wa kongresu?

² Mawarelo Oophwanelela: Owara moophwanelela niryeene okongresuni, ikwaha sinci onnivara murima wa ale anniweha. Masi, mawarelo ahu okathi wotheene, ntoko okathi ninrowa ahu hoteli, olya orestaurante, okathi ninrowa ahu omerkaatu ni okathi mukina, pooti ovara murima wa ale anniweha. Vanaamwi vahitthuneyaka owara ntoko niri omuthukumanoni okathi owo, ikuwo sahu sihaana okhalaka soophwanelela, soottittimiha, ni soohuuliha muru. Atthu anniweha ahaana woonaka ovirikana wahu ni ale ahinimukokhorela Muluku. (aRom. 12:2) Nave-tho, nihaana owaraka ekaraxa ahu ya kongresu, maana eyo enirowa omulaleya kongresu, onivaha eparakha yoolaleerya, ni waakhweiherya anna akina onisuwela.

3. Ninrowa wooniherya sai opixa murima ni waathokorerya akina?

³ Opixa Murima ni Waathokorerya Akina: Okathi ola vaavo anamunceene aniisuupuwela aya paahi ni ohixukhuru, ale anniweha anirowa ohakalala vanci woona opixa wahu murima ni othokoreryana mapuro ari atthu ntoko murestaurante ni hoteli! (2 Tim. 3:1-5) Vaavo ninsuka ahu opuro wookilaathi wala okhala mbiixani wira naakhele iliivuru sikumiheriwe, nihiphavelake mureerelo ahu, masi niphavele mureerelo wa akina. (1 aKor. 10:23, 24) Mulopwana mmosa aasiveliwe ekeekhai, nuumala orowa kongresu oopacerya, aahimyale so: “Nkinuupuwela hata mwaha mmosa aalavuliwe nihiku nle, masi mweettelo wa Anamoona wookivara murima vanci”.

4. Xeeni vanitthuneya ahu wiivahererya okongresuni akhala wira makhalelo ahu annineemererya?

⁴ Atthu Owiivahererya: MaKristau a ekeekhai annooniherya munepa wowiivahererya. (Esal. 110:3) Niireke nyuwo munoowerya wiivahererya okathi wa kongresu? Mwa ntakiheryo, kongresu aapakiwe elapo ekina, anna ni arokora oowiiraka 600 yaahiivahererya wira areerihe opuro owo. Nikhuuru nimosa na mulaponi naahimyale so: “Ela etthu yootepa otikiniha nihitonko ahu oweha! Khivaniweryaneya okupali wira atthu ala otheene ari mwiivahererya”. Tthiri, ninnimulipelela moohakalala kongresu a edistritu a 2013 ni eparakha ninrowa ahu okhalana ohiya paahi ya owiriyana ni wiixutta sa Muluku, masi-tho onvuwiha.

[Ekaaxa epaaxina 3]

Soowuupuxerya sa Kongresu a Edistritu 2013

◼ Okathi wa Eprograma: Mikhora sinrowa ohuliwaka voosiisu 7:00. Mahiku awo mararu, masipo a Omwene anrowa opaceryaka voosisu 8:20. Nto okathi owo, otheene ahu nohaana okilaathi mmapuroni mwahu wira eprograma epacerye moophwanelela. Nsipo ni nivekelo nookiserya ninrowa opacerya 15:50 Namathanu ni eSaabadu, nto Domingo 14:35.

◼ Opuro Woopweha Mikukutta: Mapuro otheene aniiriwa kongresu neemiheriwe ahu olokiherya wira sipwehiweke ikaaro, khanrowa oliviwaka, masi khuta mutthu onookhalana opuro moovarihana ni okathi oniphiya awe. Okhala wira opuro ene mwaamukhaani, atthu pooti opakhirana wira otheene aphwanye opuro woopweha mukukutta aya.

◼ Osuka Opuro: Opuro wookilaathi pooti waasukerya paahi atthu anikhalana anyu vamosa, ari mukaaroni mwanyu, wala anaasomiha anyu Biibiliya.​—1 aKor. 13:5.

◼ Yoolya ya Othana: Xontte, muruuheke yoolya anyu owaani wira muhikhumeke opuro oniiriwa kongresu murowaka othuma yoolya okathi woophumurya. Pooti orumeela murupa woohela eyoolya mwaamukhaani oniphiyerya okuha vathi va ekhukulu anyu. Mirupa suulupale ni itthu sowaakuva ophweeya, khisineemereriwa oruuha opuro oniiriwa kongresu.

◼ Soovaha: Hiyo pooti wooniherya oxukhurela wahu nivahaka soosonkherya soohikhanyereriwa opuro oniiriwa kongresu wira nikhaliherye muteko woolaleerya ilapo sotheene. Khuta cheque onivahiwa opuro oniiriwa kongresu ohaana olempwa nirumeeliwaka nsina na: “Associação das Testemunhas de Jeová de Moçambique”.

◼ Murette: Akhala wira munilya murette wa oxipitaali mwaha wa oretta, xontte muhiliyale okuxa murette owo, maana okongresuni khonrowa okhala murette.

◼ Ixapattho: Ti vooloka owara ixapattho sihinrowa onimoroxa.

◼ Iformulaario Queira Visitar (S-43-T): Yohaana orumeeliwaka eformulaario Queira Visitar moophavela ovaha soolakiherya voohimya sa mutthu onooniherya osiveliwa yoowo onimulaleerya ahu mohiilokiherya okathi wa kongresu. Mwamaleliha olepa eformulaario eyo pooti ovahererya mapuro yaale anikaiwa iliivuru, wala onvahererya mulipa-oolepa a muloko anyu.

◼ Irestaurante: Makhalelo anyu orestaurante ahaana onvuwihaka Yehova. Muwareke saana ntoko murumeyi a eKristau. Mwaattuveleke ale anoorumeelani, akhala wira eyo yoolema ya muttetthe owo.

◼ Opuro Woomaka: Nihinatthi ophiya nihiku na kongresu eDepartamento ya Opuro Woomaka, ennipacerya ovara muteko wira ekhaliheriwe anna yaale aniveka opuro woomaka. Marehereryo awo annincerya ohakalala oniphwanya ahu mwaha wa othukumana ni annihu eeKristau. Masi, wuupuwela yoolepa eni “sothene sìriwe ni nttittimiho ni wiwanana”, ni mwaha woowi okhala saana wa anna akina onniheliwa muhina, vannireerela wuupuxeriwa itthu sikina. Anna yaale animaka vatthokoni va munna, ahaana ohakalalaka ni ele enivahiwa aya, ni waakhulela itthu sikina sinivekeliwa aya. Khuta nihiku, muhinatthi orowa okongresuni, muhaana orattela ekwaartu anyu, nave nihiku noorowa owaani, muhiye ekwaartu enari yooratteliwa. Omaka vatthokoni va munna khonikumiha muritti wa khuta mutthu wa ophavela yoolya awe ni moota woorowa okongresuni. Tthiri, khula mutthu ohaana opaka marehereryo awe mmwaha ola. Wiiwananeya wanyu ni osuwela miritti sirina anyu onoomukhweiherya mwaneene etthoko wooniherya osuwela owaakhela aletto, opakaka eyo moohinlaseya ni moohikhanyereriwa. Soowuupuxerya iya sinnivareleya-tho muteko wa ale animaka mapuro aniiriwa kongresu, awo ahaana wiiwananaka ni anamathoonyerya wira khuta nihiku mapuro aniiriwa kongresu akhaleke ooratteleya.​—1 aKor. 14:40.

◼ Muteko Wowiivahererya: Khuta mutthu oniphavela wiivahererya ohaana olavula ni eDepartamento ya Muteko Wowiivahererya. Anamwane arina iyakha16, pooti-tho okhaliherya akhala wira ari ni anamuyari aya, wala mutthu muulupale, aahiiso mutthu eemereriwe ni anamuyari wala mutthu onaakhapelela.

◼ Obatizo: Saabadu voosiisu, eprograma ehinatthi opacerya, ale anrowa obatiziwa ahaana okilaathi opuro othanleliwa aya. Otheene yeemereriwe obatiziwa ahaana oruuha ikuwo ni ituwalya sooreerela wira arumeele okathi woobatiziwa. Iyaakha sivinre akina yaahiwara ikuwo soohireerela, nto eyo yahaakanyerya obatizo owo. Axitokweene anikoha makoho a obatizo arumeelaka efolyeeto ‘Murowé Mwawixuttiheke Atthu Mwabatizaka’ (wala eliivuru Organizados) ahaana ottittimiherya wira ale anrowa obatiziwa annisuwela otthuneya waya owara mookhalela attharelaka sooruma sa Biibiliya.