Akonkresu Annivaha Onamoona Wuulupale Wekeekhai
1. Okathi wa ifesta, mureerelo xeeni anaIsarayeli yaaphwanya aya wa wiixutta ikeekhai sa Muluku?
1 AnaIsarayeli a khalai, yaanithukumana ikwaha tthaaru vamwaakhani. Nnaamwi yaavekeliwa alopwana orowa mithukumano iyo, ikwaha sinceene yaanirowa ni emusi aya oYerusalemu wira yahakalale vamosa. (Otum. 16:15, 16) Okathi owo, wanaakhaliherya wuupuwelela, ni wiixutta ikeekhai suulupale sa Muluku. Sowiixuttiha xeeni sekeekhai? Sowiixuttiha iyo, sinihimya wira Yehova, Namavaha oophenta. (Otum. 15:4, 5) Sowiixuttiha sikina sinihimya wira Yehova onninivaha malakiheryo ni onaakiherya. (Otum. 32:9, 10) AnaIsarayeli, okhala wira yaahikuxa nsina na Yehova yahaana weettela exariya awe. (Otum. 7:6, 11) Olelo-va, akonkresu ahu a edistritu khuta mwaakha anninikhaliherya.
2. Konkresu ahu onrowa onikhaliherya sai wiiwexexa ekeekhai?
2 Eprokrama Enikumiherya Muthuko Wekeekhai: Okonkresuni, ninniwiriyana moohakalala myaha sinilavuliwa, idrama, sowooniherya, okohiwa ni waakhula, seiyo sinooniherya ikeekhai sooloka sa mBiibiliyani. (Yoh. 17:17) Nto, aattamelaka konkresu onnivariwa muteko munceene. Mulokiheryo wa Yehova onnitthokiha eprokrama enivaha malakiheryo olumwenku wotheene moovarihana ni sootthuneya sa mahiku ala. (Math. 24:45-47) Nto nyuwo munniphavela wiiwa ni oweha itthu sinrowa okumiheriwa?
3. Nipakeke exeeni wira nittottele mureerelo eprokrama ya konkresu?
3 Masi, nnoottottela mureerelo munceene narowa okonkresuni iwo mahiku oomararu ni owiriyana ni ephoole. Akhala wira nlelo khamunvekenle patarau anyu efolka, muhaana onvekela nenna va. Mumpake palano wira ohiyu wa mahiku a konkresu, mpehereryeke orupa wira okonkresuni muhirupe. Enaakhaliherya akina ohirupa, ori onweha mulipa onilavula mwaha, ni olepaka vakhaani ele enilavuliwa. Mukhalane ephoole wira selulari anyu, atthu, wala ekaruma akina ehiwaakanyeryeni. Okathi sinipacerya aya mithukumano, musyake ovaanela, olepa mensaxe, wala olya.
4. Anamuyari anrowa waakhaliherya sai anaaya okonkresuni?
4 Iyaakha seiye AnaIsarayeeli yuupuwelela aya ntoko eSaabadu yoomumula, yaanithukumana wira yawiriyane Nlamulo na Muluku okathi wa Niira na Maxaxa vamosa “n’anamwane . . . wira yiweke, esuweleke, yixutteke wattittimiha Apwiya”. (Otum. 31:12) Ti voolipiha oweha imusi sikilaathiki vamosa okathi wa konkresu ni waaweha anamwane awiriyanaka saana! Nto atthu a vatthokoni anoottottela mureerelo akhala wira khula oxekuwa animuuluula iponto yiixuntte aya. Okhala wira “anamwane anetta vohisuwela ni vohupuwela”, anamuyari ahaana waakhapelela, waahela muhina amiravo; nto ‘muhahiye yettaka sintthuna aya’ vanceenexa okathi wa ophumurya wala muryeene owateelo.—Mir. 22:15; 29:15.
5. Nakhala owateelo, mweettelo ahu wooloka onrowa ovuwiha sai ekeekhai?
5 Mweettelo Ahu wooloka Onnivuwiha Ekeekhai: Okhalana mweettelo wooloka muttetthe oniiriwa konkresu onnivuwiha ekeekhai. (Tito 2:10) Anamuteko a nwateelo, annisiveliwa akhala wira munnitthara malakiheryo a mapuro awo moopixa murima ni moohakalala. (aKol. 4:6) Anna yaarummwe ni efiliyaali emosa wira yaphavele opuro owateelo, diretore a ewateelo eyo aahilavula wira: “Ninnisiveliwa vanceene atthu anyu yalukamaka owateelo-va , mwaha wa mukhalelo aya wooloka. Awo atthu a nttittimiho ni ooreera murima, ni annithokorerya saana itthu sahu ni mapuro ahu”.
6. Wira nivuwihe ekeekhai mapuro aniiriwa konkresu, niwareke sai?
6 Ekaraxa eniwara ahu okonkresuni, khahiyo paahi enilaleya muthukumano ni waakhweiherya annihu onisuwela, masi-tho ennaavaha onamoona ale aniweha. Atthu ari muttetthe oniiriwa konkresu, anooweha wira ale arina ekaraxa, ahiitthokiha ni owara saana, ohiya owara ikuwo sookhuveya ni sowooneela muhina seiyo siniwariwa ni atthu a mulaponi. (1 Tim. 2:9, 10) Nto, nihaana okhalana ephoole mawarelo ni wiitthokiha wahu okathi wa konkresu, ohela muhina niryeene owateelo. Weetta ekwaha nirowaka okonkresuni ninwanre ene kaputtula, wala ekamiseeti, khiwaarowa ottittimiha mukhalelo ahu. Pooti akhala wira konkresu ahu oniiriwa vanlakani vene, nihaana wiiwariha moophwanelela. Akhala wira nimphavela oturuka ikuwo sahu naarowaka owateelo, nisuweleke wira nlelo niri okathi wa konkresu vamosa ni annihu, nto khivanloka owara moohiphwanelela.
7. Ninrowa opuha sai wataana wa eKristau okathi wa konkresu?
7 Okathi wa efesta, anaIsarayeeli yaanittottela mureerelo olipihana ni wataana mukina ni mukhwaawe okhala wira yaanikumanela ni axinna aya a mittetthe sikina. (Mit. 2:1, 5) Okathi wa konkresu, wataana wahu wa eKristau onnisuwanyeya vanceene. Wataana woohakalaliha orina ahu, onnaavara murima ale anniweha. (Esal. 133:1) Muruuheke eyoolya anyu wira muhikhumeke opuro oniiriwa konkresu murowaka othuma eyoolya; nto, nittottele muraarelo wira naasuwele anna akina. Opaka eyo, enoonikhaliherya ovaanela ni anna ni arokora akilanthe vakhiviru!
8. Xeeni vari aya vooloka ovara muteko okonkresuni vaaweryaneyaka?
8 Ale anniweha, ikwaha sinceene annitikiniheya otthokiheya orina aya akonkresu ahu, vanceenexa vaavo anoona aya wira miteko sahu ninvara mowiivahererya. Munniphavela wiivahererya wira mwakhaliherye okonkresuni? (Esal. 110:3) Imusi sikina sinniivahererya ovara muteko wira siwiixuttihe anaaya wiivahereryaka. Akhala wira munnuuliwa muru, nto ovara muteko okonkresuni onimookhaliheryani waasuwela anna akina. Murokora mmosa onihimya so: “Okonkresuni khuuvo kaamusuwela aka voohikhala emusi aka ni apatthani aka. Masi okathi kaakhaliherya aka olokiherya opuro wa konkresu kahaasuwela anna ni arokora anceene. Nto, kaahihakalala vanceene”! Waapaka apatthani akina okonkresuni ohakalaliha vanceene. (2 aKor. 6:12, 13) Akhala wira khimutonko wiivahererya, mwaakohe axitokweene moota woweemereriwa wira mwakhaliherye.
9. Ninrowa waalattula sai atthu wira arwe okonkresuni?
9 Mwaalattule Akina Wira Yiiwe Ekeekhai: Ntoko iyaakha sivinre, mwakha ola, sihalaka isumana tthaaru orowa okonkresuni, nnookhalana ekampaanya ya waalattula atthu. Miloko sinrowa wiimananiha wira sikawe ifolyeeto sa nlattulo muttetthe aya wotheene. (Nwehe ekaaxa eni: “Ninrowa Okawa Sai Ifolyeeto sa Nlattulo?”) Mwahalana ifolyeeto sa nlattulo, muhaana oruuha okonkresuni. Nto nyuwo pooti orumeela mapuro anrowa wiiriwa muthukumano owo, mulaleeryaka mohiilokiherya.
10. Muhimye moota ekampaanya ya waalattula atthu enikumiherya aya mireerelo.
10 Niireke ekampaanya ela ennaakhaliherya tthiri atthu? Okonkresuni, munna mmosa, aahikhaliherya emusi emosa ophwanya opuro wookilaathi. Emusi eyo yaahimuleela wira yaavahiwe efolyeeto ya nlattulo nto “yaasivela vanceene”. Yaaheetta ikiloomo 320 wira yaphiye okonkresuni! Nave-tho, murokora mmosa aalaleerya khuta empa, aahinvaha efolyeeto mulopwana mmosa aaphavela osuwela voohimya sa konkresu. Owo aahimutthokiherya efolyeeto eyo. Mahiku vakhaani, okonkresuni, murokora ole aahimoona mulopwana ole ni mpatthani awe akunxe ene iliivuru saakumiheriwe okonkresuni!
11. Xeeni vari aya vootthuneya orowa okonkresuni khula mwaakha?
11 Okathi wa ifesta sa anaIsarayeli, moophenta Yehova anaakhaliherya wira ‘amurumeleke ni murima aya wothene ni ankhili aya othene’. (Yox. 24:14) Moolikanasa, orowa okonkresuni khula mwaakha, onninikhaliherya ‘wettela ekekhai mohihiyererya’, ni omukokhorela Muluku. (3 Yoh. 3) Nto, Yehova aareelihe otheene yaale aniphenta ekeekhai orowa okonkresuni wira yattottele mureerelo!
[Eponto yuulupale epaaxina 4]
Okhalana mweettelo wooloka muttetthe oniiriwa konkresu onnivuwiha ekeekhai
[Eponto yuulupale epaaxina 5]
Sihalaka isumana tthaaru orowa okonkresuni, nnookhalana ekampaanya ya waalattula atthu
[Ekaaxa ipaaxina 3-6]
Soowupuxerya Sa Konkresu A Edistritu 2012
◼ Okathi wa Eprokrama: Mahiku awo mararu, muthukumano onrowa opaceryaka voosiisu 8:20. Mikhora sinrowa ohuliwaka voosiisu 7:00. Yaapaceryaka oruma masipo a Omwene, otheene ahu nohaana okilaathi mmapuroni mwahu wira eprokrama epacerye moophwanelela. Namathanu ni Saabadu muthukumano onrowa omalaka 15:55, nto Ettiminku 14:40.
◼ Opuro Woopweha Mikukutta: Mapuro otheene aniiriwa konkresu, neemiheriwe ahu olokiherya wira sipwehiweke ikaaro, khanrowa oliviwaka, masi khuta mutthu onookhalana opuro moovarihana ni okathi oniphiya awe. Okhala wira opuro ene mwaamukhaani, atthu pooti opakhirana wira otheene aphwanye opuro woopweha mukukutta aya.
◼ Osuka Opuro: Opuro wookilaathi pooti waasukerya paahi atthu anikhalana anyu vamosa, ari mukaaroni mwanyu, wala anaasomiha anyu Biibiliya.—1 aKor. 13:5.
◼ Yoolya ya Othana: Xontte, muruuheke yoolya anyu owaani wira muhikhumeke opuro oniiriwa konkresu murowaka othuma yoolya okathi woophumurya. Pooti orumeela murupa woohela eyoolya mwaamukhaani oniphiyerya okuha vathi va ekhukulu anyu. Mirupa suulupale ni itthu sowaakuva ophweeya, khisineemereriwa oruuha opuro oniiriwa konkresu.
◼ Soovaha: Hiyo pooti wooniherya oxukhurela wahu nivahaka soosonkherya soohikhanyereriwa opuro oniiriwa konkresu wira nikhaliherye muteko woolaleerya ilapo sotheene. Khuta cheque onivahiwa opuro oniiriwa konkresu ohaana olempwa nirumeeliwaka nsina na “Associação das Testemunhas de Jeová de Moçambique”.
◼ Ihasara ni Sowiiraneya Sootutuxerya: Yakhumelela eretta yootutuxerya opuro oniiriwa konkresu, xontte mulavule ni namathoonyerya owaattamenleni; mowaakuveya onimwaaleela anna aniphwanelela ni athanliwe othokorerya Iretta Sootutuxerya wira ekhaliherye.
◼ Murette: Akhala wira munilya murette wa oxipitaali mwaha wa oretta, xontte muhiliyale okuxa murette owo, maana okonkresuni khonrowa okhala murette.
◼ Ixapattho: Khuta mwaakha atthu anceene annihorokonyeya mwaha wa ixapattho soohikhalela, nto ti vooloka owara ixapattho sihinrowa onimoroxa.
◼ Iformulaario Queira Visitar (S-43): Yohaana orumeeliwaka eformulaario Queira Visitar moophavela ovaha soolakiherya voohimya sa mutthu onooniherya osiveliwa yoowo onimulaleerya ahu mohiilokiherya okathi wa konkresu. Anamalaleerya ahaana okuxa eformulaario emosa wala piili yaarowaka okonkresuni. Mwamaleliha olepa eformulaario eyo pooti ovahererya mapuro yaale anikaiwa iliivuru, wala onvahererya mulipa-oolepa a muloko anyu.—Nwehe Orummwa Ahu wa Omwene, Maio 2011, epax. 3.
◼ Irestaurante: Makhalelo anyu orestaurante ahaana onvuwihaka Yehova. Mwaattuveleke ale anoorumeelani, akhala wira eyo yoolema ya muttetthe owo.
◼ Opuro Woomaka: Nihinatthi ophiya nihiku na konkresu eDepartamento ya Opuro Woomaka, ennipacerya ovara muteko wira ekhaliheriwe anna yaale aniveka opuro woomaka. Mareheryo awo annincererya ohakalala oniphwanya ahu mwaha wa othukumana ni annihu eeKristau. Masi, wuupuwela yoolepa eni “sothene sìriwe ni nttittimiho ni wiwanana”, ni mwaha woowi okhala saana wa anna akina onniheliwa muhina, vannireerela wuupuxeriwa itthu sikina. Anna yaale animaka vatthokoni va munna, ahaana ohakalalaka ni ele enivahiwa aya, ni waakhulela itthu sikina sinivekeliwa aya. Khuta nihiku, muhinatthi orowa okonkresuni, muhaana orattela ekwaartu anyu, nave nihiku noorowa owaani, muhiye ekwaartu enari yooratteliwa. Omaka vatthokoni va munna khonikumiha muritti wa khuta mutthu wa ophavela yoolya awe ni moota woorowa okonkresuni. Tthiri, khula mutthu ohaana opaka marehereryo awe mmwaha ola. Wiiwananeya wanyu ni osuwela miritti sirina anyu onoomukhweiherya mwaneene etthoko wooniherya osuwela owaakhela aletto, opakaka eyo moohinlaseya ni moohikhanyereriwa. Soowuupuxerya iya sinnivareleya-tho muteko wa ale animaka mapuro aniiriwa konkresu, awo ahaana wiiwananaka ni anamathoonyerya wira khuta nihiku mapuro aniiriwa konkresu akhaleke ooratteleya.—1 aKor. 14:40.
◼ Muteko wowiivahererya: Ohakalala wahu mwaha wa orowa konkresu onimuncerereya naivahererya ovara miteko sinitthuneya. (Mit. 20:35) Khuta mutthu oniphavela wiivahererya ohaana olavula ni eDepartamento ya Muteko Wowiivahererya. Anamwane arina iyakha16, pooti-tho okhaliherya akhala wira ari ni anamuyari aya, wala mutthu muulupale, aahiiso mutthu eemereriwe ni anamuyari wala mutthu onaakhapelela.
◼ Obatizo: Saabadu voosiisu, eprokrama ehinatthi opacerya, ale anrowa obatiziwa ahaana okilaathi opuro othanleliwa aya. Otheene yeemereriwe obatiziwa ahaana oruuha ikuwo ni ituwalya sooreerela wira arumeele okathi woobatiziwa. Iyaakha sivinre akina yaahiwara ikuwo soohireerela, nto eyo yahaakanyerya obatizo owo. Axitokweene anikoha makoho a obatizo arumeelaka efolyeeto Murowé Mwawixuttiheke Atthu Mwabatizaka ahaana ottittimiherya wira ale anrowa obatiziwa annisuwela otthuneya waya owara mookhalela attharelaka sooruma sa Biibiliya.
[Ekaaxa epaaxina 6]
Ninrowa Okawa Sai Efolyeeto sa Nlattulo?
Wira nikawe ifolyeeto iyo muttetthe ahu wotheene, nihilavuleke itthu sinceene. Hiyo pooti olavula so: “Ehaali. Ninkawa ifolyeeto sa nlattulo seiyo sinkaiwa olumwenku wotheene. Nto ela efolyeeto anyu ya olattuliwa. Munoophwanya soohimmwa sinceene mfolyeetoni mmo”. Mooniheryeke ohakalala. Mwaakawaka ifolyeeto sa nlattulo wanikisa wa esumana, pooti ovaha irevista vaareerelaka.