“Mwettelo Anyu Okhaleke Worera Eriyari y’Atthu”
1. Xeeni varyaaya vootthuneya okhalana mweettelo wooloka okathi wa kongresu?
1 Okathi wa kongresu, atthu anceene anniniweha; tivonto varyaaya vootthuneya wira mweettelo ahu onvuwiheke Muluku onimukokhorela ahu. (Okhum. 20:26) Nto makhalelo ahu ooloka vamosa ni moota woowara ni wiitthokiha, ahaana onisuwanyeiha okhala atthareli eekeekhai a Kristu. Ninrowa okhalana sai ‘mwettelo worera eriyari ya atthu’, wira ninvuwihe Tiithi ahu a wiirimu okathi wa kongresu?—1 Ped. 2:12.
2. Eparakha xeeni enrowa ahu okhalana ya wooniherya mikhalelo sa eKristau?
2 Mooniherye Mikhalelo sa eKristau: Ophentana wahu mukina ni mukhwaawe ni moota onaathokorerya ahu ale oohaamini, onnivirikana ni munepa wa olumwenku ola. (aKol. 3:10; 4:5; 2 Tim. 3:1-5) Nikhaleke ooreera murima ni oopixa murima vaavo ninlavula ahu ni anamuteko a murestaurante wala hotel, hata sikhumaka mixankiho. Nave, makhalelo ooloka anooniiriha waatthuvela anamuteko awo akhala wira eyo yoolema ya muttetthe owo.
3. Etthu xeeni anuupuxeriwa aya anamuyari, ni nthowa xeeni?
3 Anamuyari ahaana waathokoreryaka anaaya okongresuni, orestaurante wala hotel. (Mir. 29:15) Muthiyana mmosa ori gerente a erestaurante, aahimuttottopela namathelana mmosa oriki: “Hiyo ninnoottotopelani. Emusi sanyu ni aniinyu tooreera murima. Anamuteko otheene a opuro ola annoolavulani, Naaniphavela wira khula woomalani wa esumana murwaaseke vaava”.
4. Ephoole xeeni enitthuneya ahu okhalana niryeene opuro oniiriwa kongresu?
4 Owara Saana: Mawarelo ahu akhaleke oophwanelela ni ookhalela, nihitakihaka olumwenku. (1 Tim. 2:9) Hata okathi ninkhuma ahu wala okela opuro ori hotel, aahiiso omanke ahu, nisyakeke mawarelo oohitthokiheya wala oohiloka. Niira siiso, nnoohakalala owara ekaraxa ahu ni ohuuleliwa muru olaleerya okathi wooreerela. Tthiri, mawarelo ni mweettelo ahu wooloka okathi wa kongresu a 2014, onoowiiriha atthu a murima saana waakhulela ihapari sinoopola okumi sa Biibiliya, ni omuhakalaliha Yehova.—Sof. 3:17.
[Ekaaxa ipaaxina 7-8]
Soowuupuxerya sa Kongresu a 2014
◼ Okathi wa Eprograma: Mikhora sinrowa ohuliwaka voosisu 7:00h. Mahiku awo mararu, masipo a Omwene anrowa opaceryaka voosisu 8:20. Nto okathi owo, otheene ahu nohaana okilaathi mmapuroni mwahu wira eprograma epacerye moophwanelela. Nsipo ni nivekelo nookiserya ninrowa opacerya 15:55 Namathanu ni eSaabadu, nto Domingo 14:50.
◼ Kongresu Anithukumana Anna a Ilapo Sinceene: Ilapo sikina anookhala akongresu anithukumana anna a ilapo sinceene. Muupuweleke wira efiliyaali yoolattula miloko sa vameekhaaya ni anna ookhuma ilapo sikina, nuumala wuupuwelela opuro wookilaathi, woopweha ikaaro ni ikwaartu sa hotel. Nto pooti okhumelela muxankiho, akhala wira anna annimurowela kongresu yoole ohilattuliwe aya. Akhala wira muniphavela onweha kongresu mukina, muhimuthanle kongresu anithukumana anna a ilapo sinceene.
◼ Opuro Woopweha Mikukutta: Mapuro otheene aniiriwa kongresu neemiheriwe ahu olokiherya wira sipwehiweke ikaaro, khanrowa oliviwaka, masi khuta mutthu onookhalana opuro moovarihana ni okathi oniphiya awe. Okhala wira opuro ene mwaamukhaani, atthu pooti opakhirana wira otheene aphwanye opuro woopweha mukukutta aya.
◼ Osuka Opuro: Vaavo mikhora sinihuliwa aya khula voosisu, xontte muhitthimakeleke okilaathi opuro onoosivelani. Munepa wowiileva onniiriha ophavelasa mureerelo wa akina, onninisuwanyeiha okhala maKristau eekeekhai ni onniwiiriha ale anniweha onvuwiha Muluku. (Yoh. 13:34, 35; 1 aKor. 13:4, 5; 1 Ped. 2:12) Opuro wookilaathi pooti osukeriwa atthu yaale anikhalana anyu vamosa, ari mukaaroni mwanyu, aahiiso ale anaasomiha anyu Biibiliya. Ale oowuuluvala ni aniwereiwa, aasukeriwa opuro aya wookilaathi. Okhala wira opuro owo mwaamukhaani, nto mutthu mmosa wala anli animukhapelela ole oowunnuwela aahiiso oniwereiwa pooti okilaathi hoothe ni yena.
◼ Yoolya ya Othana: Xontte, muruuheke yoolya anyu owaani wira muhikhumeke opuro oniiriwa kongresu murowaka othuma yoolya okathi woophumurya. Pooti orumeela murupa woohela eyoolya mwaamukhaani oniphiyerya okuha vathi va ekhukulu anyu. Mirupa suulupale ni itthu sowaakuva ophweeya, khisineemereriwa oruuha opuro oniiriwa kongresu.
◼ Soovaha: Hiyo pooti wooniherya oxukhurela wahu nivahaka soosonkherya soohikhanyereriwa opuro oniiriwa kongresu wira nikhaliherye muteko woolaleerya ilapo sotheene. Khuta cheque onivahiwa opuro oniiriwa kongresu ohaana olempwa nirumeeliwaka nsina noowi: “Associação das Testemunhas de Jeová de Moçambique”.
◼ Murette: Akhala wira munilya murette wa oxipitaali mwaha wa oretta, xontte muhiliyale okuxa murette owo, maana okongresuni khonrowa okhala murette.
◼ Ixapattho: Xontte, mukhalane ephoole wira muhivulale mwaha wa otherekuwa wala omora. Khuta mwaakha atthu anceene annivulala mwaha wa ixapattho soohikhalela. Ti vooreera owara ixapattho sinikhalela siniira ahu nawara nihinaakuva omora.
◼ Iformulaario Queira Visitar (S-43-T): Yohaana orumeeliwaka eformulaario Queira Visitar moophavela ovaha soolakiherya voohimya sa mutthu onooniherya osiveliwa yoowo onimulaleerya ahu mohiilokiherya okathi wa kongresu. Mwamaleliha olepa eformulaario eyo pooti ovahererya mapuro yaale anikaiwa iliivuru, wala onvahererya mulipa-oolepa a muloko anyu.
◼ Irestaurante: Mweettelo anyu orestaurante ahaana onvuwihaka Yehova. Muwareke saana ntoko murumeyi a eKristau. Mwaattuveleke ale anoorumeelani, akhala wira eyo yoolema ya muttetthe owo.
◼ Opuro Woomaka: Nihinatthi ophiya nihiku na kongresu, eDepartamento ya Opuro Woomaka, ennipacerya ovara muteko wira ekhaliheriwe anna yaale aniveka opuro woomaka. Marehereryo awo annincererya ohakalala oniphwanya ahu mwaha wa othukumana ni annihu eeKristau. Masi, wuupuwela yoolepa eni “sothene sìriwe ni nttittimiho ni wiwanana”, ni mwaha woowi okhala saana wa anna akina onniheliwa muhina, vannireerela wuupuxeriwa itthu sikina. Anna yaale animaka vatthokoni va munna, ahaana ohakalalaka ni ele enivahiwa aya, ni waakhulela itthu sikina sinivekeliwa aya. Khuta nihiku, muhinatthi orowa okongresuni, muhaana orattela ekwaartu anyu, nave nihiku noorowa owaani, muhiye ekwaartu enari yooratteliwa. Omaka vatthokoni va munna khonikumiha muritti wa khuta mutthu wa ophavela yoolya awe ni moota woorowa okongresuni. Tthiri, khula mutthu ohaana opaka marehereryo awe mmwaha ola. Wiiwananeya wanyu ni osuwela miritti sirina anyu onoomukhweiherya mwaneene etthoko wooniherya osuwela owaakhela aletto, opakaka eyo moohinlaseya ni moohikhanyereriwa. Soowuupuxerya iya sinnivareleya-tho muteko wa ale animaka mapuro aniiriwa kongresu, awo ahaana wiiwananaka ni anamathoonyerya wira khuta nihiku mapuro aniiriwa kongresu akhaleke ooratteleya.—1 aKor. 14:40.
◼ Muteko Wowiivahererya: Khuta mutthu oniphavela wiivahererya ohaana olavula ni eDepartamento ya Muteko Wowiivahererya. Anamwane arina iyakha16, pooti-tho okhaliherya akhala wira ari ni anamuyari aya, wala mutthu muulupale, aahiiso mutthu eemereriwe ni anamuyari wala mutthu onaakhapelela.
◼ Obatizo: Saabadu voosisu, eprograma ehinatthi opacerya, ale anrowa obatiziwa ahaana okilaathi opuro othanleliwa aya. Otheene yeemereriwe obatiziwa ahaana oruuha ikuwo ni etuwalya yooreerela wira arumeele okathi woobatiziwa. Iyaakha sivinre akina yaahiwara ikuwo soohireerela, nto eyo yahaakanyerya obatizo owo. Axitokweene anipaka makoho a obatizo arumeelaka efolyeeto ‘Murowé Mwawixuttiheke Atthu Mwabatizaka’ (wala eliivuru Organizados) ahaana ottittimiherya wira ale anrowa obatiziwa annisuwela otthuneya waya owara mookhalela attharelaka sooruma sa Biibiliya.