Soowuupuxerya sa Muthukumano wa Muttetthe
◼ Okathi wa Eprograma: Mikhora sinrowa ohuliwaka voosisu 7:00. Mahiku awo mararu, masipo a Omwene anrowa opaceryaka voosisu 8:20. Nto okathi owo, otheene ahu nohaana okilaathi mmapuroni mwahu wira eprograma epacerye moophwanelela. Eprograma enrowa omalaka 15:55 Namathanu ni eSaabadu, nto Ettiminku 14:45.
◼ ‘Omwipela Yehova’: Atthu a Muluku a okathi wa khalai yaaninvuwiha Yehova orweela wa masipo. Nave olelo-va masipo annivikaniha wiirela mpantta okokhorela wekeekhai. (Esal. 28:7) Ipantte sotheene sa muthukumano wa muttetthe sinipacerya ni muusika. Owo kholokiheriwe mahala, masi opakiwe wira oniixuttiheke etthu vamosa ni omukokhorela Yehova. Nto okathi muhooleli a eprograma onihimya awe wira onrowa opacerya muusika, nihaana okilaathiki khiyawiriyana mooxukhurela, ohiya ovaanela. Hiyo ninnivaha efaita wiimananiha wa anna anilokiherya orquestra a Watchtower. Ikwaha piili vamwaakhani, anna ni arokora ala annirumeela musurukhu aya wira arowe oPatterson, Nova York, wira yalokiherye masipo ooreera yaawo annihakalaliha. Nuumala owiriyana muusika, nto otheene ahu nihaana weemelaka wira ninvuwihe Yehova nimwiipelaka masipo a Omwene.
◼ Opuro Woopweha Mikukutta: Mapuro otheene aniiriwa kongresu neemiheriwe ahu olokiherya wira sipwehiweke ikaaro, khanrowa oliviwaka. Masi khuta mutthu onookhalana opuro moovarihana ni okathi oniphiya awe. Okhala wira opuro ene mwaamukhaani, atthu pooti opakhirana wira otheene aphwanye opuro woopweha mukukutta aya.
◼ Osuka Opuro: Vaavo mikhora sinihuliwa aya khuta voosisu, xontte muhitthimakeleke okilaathi opuro onoosivelani, khiyakhala ntoko muniwanela opuro. Xontte, mwaathokoreryeke akina, ni mpweheke mureerelo aya ohoolo wanyu. Munepa wowiileva onniiriha ophavelasa mureerelo wa akina, onninsuwanyeiha okhala maKristau eekeekhai ni onniwiiriha ale anniweha onvuwiha Muluku. (Yoh. 13:34, 35; 1 aKor. 13:4, 5; 1 Ped. 2:12) Opuro wookilaathi pooti osukeriwa atthu anikhalana anyu vamosa, ari mukaaroni mwanyu, aahiiso ale anaasomiha anyu Biibiliya. Xontte, muhipwehe itthu opuro wookilaathi ohinrowa anyu orumeela. Wiiwananeya wanyu mmwaha ola, onoowiiriha akina ophwanya opuro wookilaathi. Ale oowuuluvala ni aniwereiwa, aasukeriwa opuro aya wookilaathi. Okhala wira opuro owo khonaatta, mutthu mmosa wala anli paahi yaale animukhapelela toneemiheriwa okilaathi hoothe ni yena.
◼ Owara Saana: Mawarelo ahu akhaleke oophwanelela ni ookhalela, nihitakihaka olumwenku. (1 Tim. 2:9) Hata okathi woophumurya aahiiso nuumala nihiku nimosa na kongresu, nisyakeke mawarelo oohitthokiheya wala oohiloka. Opaka eyo onooniiriha ohoovelela owara ekaraxa ahu ni ohuuleliwa muru olaleerya okathi wooreerela. Tthiri, mawarelo ni mweettelo ahu wooloka okathi wa kongresu a 2015, onoowiiriha atthu a murima saana waakhulela ihapari sinoopola okumi sa Biibiliya, ni omuhakalaliha Yehova.—Sof. 3:17.
◼ Orumeela Aparelyo Eletroniku: Hiyo ninnirumeela saana aparelyo ahu eletroniku vaavo nnaaregulari ahu wira nihiwaakanyerye akina. Akhala wira munirumeela maakina anikumiha ifootu wala eviidiyu, tablet, aahiiso ekaruma ekina, xontte murumeeleke saana wira muhiwiirihe akina ohoona saana ele eniiraneya opalkuni. Nave-tho nisyakeke olepa mensage wala otelefonari voohitthuneya.
◼ Yoolya ya Othana: Xontte, muruuheke yoolya anyu owaani wira muhikhumeke opuro oniiriwa kongresu murowaka othuma yoolya okathi woophumurya. Pooti orumeela murupa woohela yoolya mwaamukhaani oniphiyerya okuha vathi va ekhukulu anyu. Mirupa suulupale ni itthu sowaakuva ophweeya, khisineemereriwa.
◼ Soovaha: Hiyo pooti wooniherya oxukhurela wahu nivahaka soosonkherya soohikhanyereriwa opuro oniiriwa kongresu wira nikhaliherye muteko woolaleerya ilapo sotheene. Khuta cheque onivahiwa opuro oniiriwa kongresu ohaana olempwa nirumeeliwaka nsina noowi: “Associação das Testemunhas de Jeová de Moçambique”.
◼ Murette: Akhala wira munilya murette wa oxipitaali mwaha wa oretta, xontte muhiliyale okuxa murette owo, maana okongresuni khonrowa okhala murette.
◼ Ixapattho: Ti vooreera owara ixapattho sinikhalela siniira ahu nawara nihinaakuva omora.
◼ Iformulaario Queira Visitar (S-43-T): Yohaana orumeeliwaka eformulaario Queira Visitar wira nivahe soolakiherya voohimya sa mutthu onisiveliwa ekeekhai yoowo onimulaleerya ahu mohiilokiherya okathi wa kongresu. Mwamaleliha olepa eformulaario eyo pooti ovahererya mapuro yaale anikaiwa iliivuru, wala onvahererya mulipa-oolepa a muloko anyu.
◼ Irestaurante: Mweettelo anyu orestaurante ohaana onvuwihaka Yehova. Muwareke saana ntoko murumeyi a Kristu. Mwaavaheke etthu ale anoorumeelani, akhala wira teri yoolema opuro owo.
◼ Opuro Woomaka: Nihinatthi ophiya nihiku na kongresu, eDepartamento ya Opuro Woomaka, ennipacerya ovara muteko wira ekhaliheriwe anna yaale aniveka opuro woomaka. Marehereryo awo annincererya ohakalala oniphwanya ahu mwaha wa othukumana ni annihu eeKristau. Masi, wuupuwela yoolepa eni “sothene sìriwe ni nttittimiho ni wiwanana”, ni mwaha woowi okhala saana wa anna akina onniheliwa muhina, vannireerela wuupuxeriwa itthu sikina. Anna yaale animaka vatthokoni va munna, ahaana ohakalalaka ni ele enivahiwa aya, ni waakhulela itthu sikina sinivekeliwa aya. Khuta nihiku, muhinatthi orowa okongresuni, muhaana orattela ekwaartu anyu, nave nihiku noorowa owaani, muhiye ekwaartu enari yooratteliwa. Omaka vatthokoni va munna khonikumiha muritti wa khuta mutthu wa ophavela yoolya awe ni moota woorowa okongresuni. Tthiri, khula mutthu ohaana opaka marehereryo awe mmwaha ola. Wiiwananeya wanyu ni osuwela miritti sirina anyu onoomukhweiherya mwaneene etthoko wooniherya osuwela owaakhela aletto, opakaka eyo moohinlaseya ni moohikhanyereriwa. Soowuupuxerya iya sinnivareleya-tho muteko wa ale animaka mapuro aniiriwa kongresu, awo ahaana wiiwananaka ni anamathoonyerya wira khuta nihiku mapuro aniiriwa kongresu akhaleke ooratteleya.—1 aKor. 14:40.
◼ Muteko Wowiivahererya: Khuta mutthu oniphavela wiivahererya ohaana olavula ni eDepartamento ya Muteko Wowiivahererya. Anamwane arina iyakha 16, pooti-tho okhaliherya akhala wira ari ni anamuyari aya, wala mutthu muulupale, aahiiso mutthu eemereriwe ni anamuyari wala mutthu onaakhapelela.