Olaleerya Wookhweya

Wira Nipacerihe Soosoma sa Biibiliya eSaabadu Yoopacerya ya Novembro

“Anamunceene anikupali wira Muluku onrowa waaphukela atthu ottharihelaka sowiira saya. Nyuwo munuupuwela wira nihaana woova Nihiku Noophukela, wala nihaana olipelelaka moohakalala? [Nwehererye waakhuliwa.] Nkawehani ele ehimmwale va”. Munvahe mwaneene etthoko erevista Owehaweha 1 ya Outubro ni muthokorerye hoothe masu ari vathi wa muru mwaamukhaani woopacerya epax. 16, nto muthanle yoolepa wira musome. Munvahe irevista, ni mwiiwanane nihiku nootthikela.

Owehaweha 1 ya Outubro

“Mapuro manceene mulaponi, athiyana annihaaxiwa ni ohooneliwa etthu. Mooriipiha murima, itiini soowoka sinnikhaliherya okhumelela wa itthu iyo. Nyuwo munuupuwela wira tthiri Muluku onniwoonela vatthu axithiyana? [Nwehererye waakhuliwa.] Nkawehani ele Biibiliya enaatumererya awe alopwana athenle. [Mmusome aÉefeso 5:28, 29.] Erevista ela ennithokorerya ele Biibiliya enihimya awe sa moota Muluku oniwoonela awe athiyana”.

Despertai! a Novembro

“Hiyo nnaaxukurya atthu olelo nivaraka muteko mmosa onikhaliherya itthoko. Olelo ti vookhweya waaphwanya axitiithi aahiiso aximaama anaahuwa anamwane mekhaya. Munuupuwela wira awosa aakhalana mixankiho sinceene ovikana imusi seiye sirina anamuyari otheene? [Nwehererye waakhuliwa.] Anamuyari anceene aaphwanya malakiheryo oovareleya muteko mBiibiliyani. [Mmusome 2 Timótheyo 3:16.] Erevista ela ennivaha malakiheryo anirowa waakhaliherya axitiithi aahiiso aximaama anaahuwa anamwane mekhaya okhumela saana”.