Munnuupuwela?

Moosoma oratteene myaha sa ninaano sa erevista Owehaweha? Nto nkaya moone akhala wira munniwerya waakhula makoho ala:

Niireke maKristau ahaana omurumeelaka Biibiliya ntoko ehako?

Akina, annimukhunula Biibiliya, nto khiyasoma eveersu anipacerya aya ophwanya yuupuwelaka wira opaka eyo, enrowa okhaliherya muxankiho orina aya. MaKristau khaniirela mpantta sowiira sa ehako. Masi, awo animusoma Biibiliya moophwanelela wira esuwele malakiheryo a Muluku.​—15/12, epaaxina 3.

“Olumwenku” xeeni onkela ovira?

“Olumwenku” onkela omala ti apinaatamu ahinikhala moovarihana ni Muluku. (1 Yoh. 2:17, Tradução do Novo Mundo) Etthaya ela ni apinaatamu oororomeleya animoopowa.​—1/1, ipaaxina 5-7.

Nnaamwi akhwiye ene, Abeli onilavula sai ni hiyo? (aHéb. 11:4)

Abeli onnilavula orweela mwa waamini aarina awe. Hiyo pooti wiixutta orweela mwa otakiha waamini wawe. Ntakiheryo nawe nlelo ninnikhaliherya vanceene.​—1/1, epaaxina 12.

Itthu xeeni sinitthuneya ahu okhalana ephoole wira nihimurakamele Muluku?

Itthu sikina tiiya: Miteko sinivara ahu, otthekula wahu, moota onaathokorerya ahu amusi akumihiwe mmulokoni, moota woorumeela etekonologia ya vano, moota onithokorerya ahu ekumi ahu, moonelo woohiloka wa musurukhu, ni otepexa osiveliwa ni okhulupale.​—15/1, ipaaxina 12-21.

Wiiyeviha wa Moise onniixuttiha exeeni?

Moise, nnaamwi aavahiwe okhulupale, owo khaixinnuuha, masi aamuroromela Muluku. Nto hiyo, nihiixunnuuheke mwaha wa okhulupale orinahu, wala osuwela opaka itthu saana, masi nihaana omuroromelaka Yehova. (Mir. 3:5, 6)​—1/2, epaaxina 5.

Atthu yaale anrowa ohihimuxiwa anrowa okhalaka woowi?

Nummuru naamukhaani na—144.000—anrowa okhalaka wiirimu. Atthu anceene anrowa ohihimuxiwa, nto anrowa okhalaka valaponi-va, wira ekhaleke okathi woohimala ni murettele.​—1/3, epaaxina 6.

Nuulumo noowi aIsarayeli: ‘khiyainuuhiwe mirima saya’ nintaphulelani? (Yer. 9:26, Tradução do Novo Mundo.)

AnaIsarayeli khiyaaleeleya, yaari atthu oohiiwelela, nto awo yaatthuneya okumiha ele yiiriha mirima saya ohicalela, nto yahaana olokiherya muupuwelo, moonelo aya, ni makhalelo aya yahaavarihana ni Muluku. (Yer. 5:23, 24)​—15/3, ipaaxina 9-10.

Moota xeeni Yesu aaryaawe ntakiheryo nuulupale na okumi woohakalaliha?

Owo aahikhalana yoolakela mookumini: opaka yootthuna ya Muluku. Yesu aanimphenta vanceene Tiithi awe, anaaphenta-tho atthu. Nave-tho, Yesu aanisuwela wira owo aaniphentiwa ni Tiithi awe. Nto itthu iya ti ephiro ya ophwanya ohakalala wekeekhai.​—1/4, ipaaxina 4-5.

Exeeni eri epantte ya vathi ya mulokiheryo wa Muluku?

Nikhuuru Noolamulela, Ikomisau sa Ifiliyaali, axitokweene ooweetteetta, axitokweene a mmulokoni, miloko, ni khula Namoona a Yehova.​—15/4, epaaxina 29.

Xeeni vanihimya ahu wira okathi Muluku onaaphukela awe atthu, khahiyo wira owo mutakhali?

Yehova khanihakalala okathi anikhwa aya atakhali. (Ezek. 33:11) Ntoko sinooniherya aya miteko sawe sa khalai, owo onipacerya waalopola toko atthu, nuumala vo, anaaphukela. Ela enninlipiherya owehererya woopoliwa mwa maphukelo a muhoolo.​—1/5, ipaaxina 5-6.

Niireke aIsarayeli yaaniwiiva atthu orweela mwa waahopha vamwirini?

Nnaari. Maloko makina yaanipaka eyo, masi aIsarayeli khiyaapaka. Okathi wa Soolempwa sa eHeeberi, wIsarayeli, atakhali yaapacerya toko wiiviwa ni maluku. (Onam. 20:2, 27) Nuumala wiiviwa, nto yaanihompwa vamwirini wira akina yooveke opaka ekrime.​—15/5, epaaxina 13.

Nthowa xeeni apinaatamu ahiniwerya aya okumiherya murettele?

Nnaamwi apinaatamu epanke ene itthu sinceene, masi awo khaniwerya weettiha mavalo aya, eyo piiyo, wiilamulela. (Yer. 10:23) Satana tonilamulela olumwenku, tivonto apinaatamu khaniwerya oruuha murettele. (1 Yoh. 5:19)​—1/6, epaaxina 16.