WAAKHULIWA WA MAKOHO A MBIIBILIYANI

Niireke ehaavo etthu emwiirinhe Muluku opattuxa eplaneta ahu?

Eplaneta ahu epakiwe wira ekhaliweke. Eyo yookhalana maasi manceene yaawo anikhaliherya okumi. Othetemana wa elapo ni orukurerya waya nsuwa, onnikhaliherya wira ephareya ehipakeyeke egeelo wala oviha vanceene. Nave, epheyo ya atmosfera ni ikuru sihinooneya sa etthaya sinnikhaliherya elapo voohimya sa oviha wootepexa. Ohiya-vo, wiiwanana wa miri ni okumi wa inama siri valaponi ti wootikiniha. Ti maana aya, atthu anceene anikupali aya wira Muluku oopattuxa eplaneta ahu wira ekhaliweke.​—Mmusome Yesaya 45:18.

Masi nyuwo pooti wiikoha so: ‘Kiireke ohaawa ni ohixariya oniirela mpantta yoolakela ya Muluku?’​—Musome Otumererya 32:4, 5.

Niireke yoolakela ya Muluku enimwiiraneya?

Elapo epakiwe wira ekhaliweke ni atthu oohakalala yaawo anittittimihana ni omphenta Mpattuxa aya. Tthiri, okumi wa pinaatamu wookhalana yoolakela yuulupale ovikana miri wala okumi wa inama. Hiyo nnoowerya omusuwela ti pani ori Mpattuxa ahu, omwaamini ni otakiha ophenta ni exariya awe.​—Mmusome Musuweli 12:13; Mikeya 6:8.

Mpattuxa ahu onoowerya opaka sotheene silakenle awe. Nto nikupaliki wira owo onoomaliha ohaawa ni ohixariya. Nave onimwiiriha eplaneta ahu okhala yooreera wira ekhaliweke ni atthu.​—Musome Esalimo 37:11, 29; Yesaya 55:11.

Wira musuwele soohimmwa sikina, muwehe muru 3 wa eliivuru ela, yoolaleiwa ni Anamoona a Yehova

Mubaxari va www.jw.org/vmw