Yehova Onnaareeliha Atthu Arina Munepa Woovaha

MPATTUXA ahu Muulupale oonittittimiha vanceene mwaha woonivaha owerya wa osuwelaka wuupuwela. Nave owo onnaareeliha vanceene ale aniroihela ohoolo miteko sa okokhorela wa ekeekhai ni murima aya wotheene ni ale anikhaliherya otteelihiwa wa nsina nawe noowaarya ni yoolakela awe yuulupale. Yehova khonaaphavela atthu animurumeela mwaha wa woopopihiwa wala okhanyereriwa. Ohiya-vo, owo onnaavaha efaita yuulupale ale animurumeela ni murima aya wotheene mwaha wa ophavela waya omuxukhurela vaalupale.

Mwa ntakiheryo, okathi aIsarayeli yaaryaaya moothakoni wa oSinai, Yehova aahaaruma wira amutekele nipuro na okokhoreliwa. Owo aahimmye so: “Mwaruhele Apwiya [Yehova] sorera sanyu ni murima woleva. Khula mutthu avaheke sintthunawe”. (Okhum. 35:5) Khula mutthu a nloko na Isarayeli aahaana ovaha etthu, ni khula yoovaha yaahaana ovahiwa ni murima wotheene, khiyaathanliwa etthu ene, ni khiwaahimmwa mwaattelo aya, yakhalaru etthu yaaweryaneya orumeeliwa wira ovariwe muteko wa Muluku. Atthu ale yaakhunle sai?

Khula mutthu ‘atthuna ovaha’ ni ‘arina murima woleva’ aahipaka yoovaha awe ni ‘murima omuttelale ene’. Alopwana ni athiyana yaahivaha khula etthu yaarina aya wira sivareliwe muteko wa Yehova, maniya n’ibrinku, n’inyattu, ni malutte, n’itthu sothene sa ewero, eparatha, ebronze, ikuwo sorika soripelela, soxerya, sophilivila, sa elinyu, manri a epuri, ixapala sa epwittipwitthi sotthaveleliwa ni oxerya, ixapala soorika sikina, miri sa khampiri, maluku oowaarya, balsamu, makhura ni erupani yowunkhela. Wanikisa waya “itthu sattotteliwe sanivikana vaphaveleliwaya miteko sothene satthuna ovariwa”.​—Okhum. 35:21-24, 27-29; 36:7.

Etthu yaatempe omusivela Yehova khahiyo mwaattelo wa mireerelo iye saavahiwe, masi waari munepa woovaha waarina aya atthu ale wa okhaliherya miteko sa okokhorela wekeekhai. Awo yaaheemererya ovaha okathi ni ikuru saya wira akhaliherye muteko ole. Biibiliya onihimya so: “Athiyana othene òratta yahitthava ni matat’aya ikuwo sorika”. Onnihimya-tho wira “akina yahitthava ikuwo ni manri a èpuri”. Ohiya-vo, Yehova aahinvaha Besaleli “ankhili ni miruku n’usuwela n’uratta w’ovara miteko sa mikhalelo sothene”. Tthiri Yehova aahinvaha Besaleli ni Oholiabi osuwela wotheene onitthuneya wira avare muteko wotheene waavahiwe aya.​— Okhum. 35:25, 26, 30-35.

Okathi Yehova aavekenle awe aIsarayeli opaka soovaha, owo aanaaroromela wira “khula mutthu arina murima woloka” aarowa okhaliherya miteko sa okokhorela. Nto owo, aahaareeliha mwaha wa oreera waya murima aavahaka malakiheryo ni murettele munceene. Nave Yehova onnipaka mareheryo wira okathi onaareeliha awe arummwa awe, akhumelele atthu anrowa osuwela ovara miteko sawe. (Esal. 34:10) Vakhala wira munoomurumeela Yehova ni murima anyu wotheene, tthiri owo onimooreelihani mwaha wa munepa anyu woovaha.

[Ekaaxa epaaxina 5]

Moota Atthu Akina Anipaka Aya Misonkheryo Sa Muteko Wa Olumwenku Wotheene

Ntoko siiraneya aya mahiku a murummwa Paulo, anamunceene olelo-va annivalaanya wala osuka “musurukhu”, aahiiso annimpaka palano a musurukhu anirowa aya orihela ekaaxa elempwale “Obra Mundial”. (1 aKor. 16:2) Khula mweeri, miloko sinniroiha soovaha iyo ofiliyaali ya Anamoona a Yehova ya muttetthe aya. Ti vooweryaneya khula mutthu oroiha mmansawe soovaha sawe orumeelaka nsina na mutthenkeso wa Anamoona a Yehova wooweemereriwa wa muttetthe awe. Wira musuwele nsina na mutthenkeso woweemereriwa wa Anamoona a Yehova onirumeeliwa mmuttettheni mwanyu, xontte mukohe efiliyaali ya elapo anyu. Endereso ya khula efiliyaali enniphwanyaneya va www.jw.org. Enamuna ya soovaha sikhanle anyu ooroiha mmansinyu tiiya:

SOOVAHA SOOROIHA MUTTHU MWANEENE

• Ovaha musurukhu orumeelaka ikartau wala inamuna sikina sa otrasnfereri, aahiiso ovaha itthu sikina sinikumiherya musurukhu.

• Mutthu owo ohaana olepa epaphelo ohimyaka wira tovanhe itthu iyo.

OVAHA MUSURUKHU OKHANLE AWE OOTTIKIHERIWA

• Mutthu pooti ovaha musurukhu okhanle awe oottikiheriwa okathi oniphavela awe.

• Muhinatthi ovaha, xontte mukohe oskritoorio ya efiliyaali anyu wira musuwele etthu ekhanle anyu oopaka.

OVAHA MISONKHERYO MWA INAMUNA SIKINA

Ohiya ovaha musurukhu paahi wala itthu sikina, sookhala inamuna sikina sa ovaha etthu mmureerelo wa muteko wa Omwene wa ilapo sotheene. Inamuna sene tiiya sihimmwale vathi-vo. Voohicikha etthu sa enamuna eniphavela anyu orumeela, xontte muhinatthi, muhaana okoha efiliyaali ya elapo anyu wira musuwele inamuna sinireerela. Okhala wira malamulo voohimya sa mpoosito annivirikana, ti vooreera omukoha mutthu onisuwela saana myaha sa mpoosito ni malamulo, mutthu ohinatthi othanla enamuna eniphavela awe.

Ovaha omurumeelaka seguru: Mutthu pooti ompaka seguru ophavelaka wira Associação das Testemunhas de Jeová de Moçambique aphwanye mureerelo wa seguro de vida wala pensão.

Ekontha oBanko: Mutthu pooti orumeela ekontha ya obanko, epaphelo enooniherya wira wodepositari musurukhu, wala ekontha ya musurukhu wa ereforma. Nto ohaana olepa idukumento sinivekeliwa ni nlamulo ohimyaka wira nuumala okhwa ekontha eyo ehaana okhala ya Anamoona a Yehova.

Enupa wala opuro wa mutthu: Mutthu pooti ovaha ntoko misonkheryo enupa awe wala opuro orina awe. Yakhala enupa enikhala awe, ohaana olepa ohimyaka wira onnivaha okathi yoole, wala muhoolo; ni nuumala okhwa anrowa ohalana akhale Anamoona a Yehova.

Ompaka Testamento: Mutthu pooti ompaka testamento wira ovahe etthu erina awe wala musurukhu. Nto ohaana olepa edukumento eneemereriwa ni nlamulo ohimyaka saana etthu eniphavela awe, wira musurukhu wala etthu erina awe akhwa vale ovahereriwe Associação das Testemunhas de Jeová de Moçambique.

Wira musuwele itthu sikina, nyuwo pooti okoha oskritoorio wa Associação das Testemunhas de Jeová de Moçambique, otelefonari wala olepa epaphelo murumeelaka enderesu ela enittharelana, wala okoha ofiliyaali ya elapo eryaanyu.

Mwaaphavelaka soohimmwa sikina mukohe efiliyaali ya elapo anyu.