Mwaakhaliherye Ale Ahinimukupali Muluku Wala Biibiliya
1. Xeeni atthu akina wanipacerya ahinisiveliwa aya osoma eliivuru Biibiliya Oniixuttiha Exeeni?
1 Wira mutthu okhale murumeyi a Yehova, ohaana wiixutta ele Biibiliya oniixuttiha awe. Masi atthu akina, khaneettela etiini ya eKristau ni khanikupali wira Biibiliya Nuulumo na Muluku. Akina khanikupali wira Muluku ohaavo, ni khanimuttittimiha Biibiliya. Nto, iliivuru xeeni sinrowa waakhaliherya atthu yaale wanipacerya ahinisiveliwa osoma eliivuru Biibiliya Oniixuttiha Exeeni? Moone malakiheryo anittharelana, yaawo alavuliwe ni anamalaleerya a ilapo soowiiraka 20.
2. Akhala wira mutthu mukina onihimya wira khonikupali wira Muluku ohaavo, exeeni enitthuneya ahu osuwela, ni nthowa xeeni?
2 Ale Ahinimukupali Muluku: Akhala wira mutthu onihimya wira khonimukupali Muluku, ti vooloka osuwela mathowa aya. Niireke owo onikupali wira itthu siroothatuwa? Wala owo khonimwaamini Muluku mwaha wa otakhala onoona awe molumwenkuni ni wootha wa itiini? Niireke mutthu owo onikhuma elapo yeeyo anamunceene ahinimukupali aya Muluku? Atthu akina yaawo anihimya wira Muluku khuuvo, woonasa wene khatonko woona otthuneya waya omwaamini. Anamalaleerya anceene ahoona wira opaka nikoho nni: “Kiireke wira okhuma khalai munuupuwela siiso?”, onnimwiiriha mutthu ohimya moonelo awe. Nto munwiriyaneke ni muhimukwase masu. Akhala wira nnoosuwela mathowa animwiiriha mutthu ohimwaamini Muluku, nnimoona moota wowaakhula ni eliivuru yooreerela onvaha.—Mir. 18:13.
3. Ninrowa omuttittimiha sai mutthu ni moonelo awe?
3 Mmuttittimiheke ole onilavulana anyu ni moonelo awe. Namalaleerya mmosa a wEstados Unidos onihimya so: “Ti vooloka ottittimiha moonelo wa atthu woothanla ele eniphavela aya okupali. Ohiya ophavela wooniherya osuwela wanyu, ti vooloka opaka makoho aniwiiriha atthu wuupuwelela ni opaka soothanla saya”. Mutokweene mmosa ooweetteetta, nuumala onwiriyana mwaneene etthoko, onnimuttottopela, nto khiyamukoha so: “Mootoko othokorerya ela enihimmwa va?”
4. Ninrowa waalaleerya sai maBudista?
4 MaBudista manceene khanikupali wira Muluku ookhala. Wira yaakhaliherye atthu awo, anamalaleerya akina a wInglaterra annisiveliwa orumeela ebroxura eni: Como Ter Verdadeira Paz e Felicidade. Anamalaleerya awo annisoma ittima soopacerya sa ebroxura eyo. Nuumala-vo, annisoma ipantte sini: “Existe realmente um Criador supremo?”, ni “Um guia prático para beneficiar toda a humanidade”. Nuumala-vo, awo anniwerya opaceriha eliivuru Biibiliya Oniixuttiha Exeeni nto khiyamuleela mwaneene etthoko wira: “Hata muhikupaliki wira Muluku ohaavo, omusoma Biibiliya onimoophwanyihani mureerelo maana owo ohaana malakiheryo oovareleya muteko”. Pioneero onikhala wEstados Unidos, yoowo onaalaleerya maChines onihimya so: “Anamunceene mmuttettheni mwahu waasivela osoma iliivuru. Ikwaha sinceene, awo annimaliha osoma eliivuru yotheene nihinatthi otthikela waaxukurya. Masi khanoona otthuneya waya omusoma Biibiliya. Nto, onnikisivela waavaha ebroxura Ihapari Sooreera mmukwaha woopacerya, mwaha woowi eyo elepiwe mwa enamuna enimwiiriha mutthu ophavela ovaanela”. Mutokweene ooweetteetta onirumeela esirkwitu ya atthu anilavula eChina wEstados Unidos, onihimya wira vanniweryaneya opaceriha eliivuru Biibiliya Oniixuttiha Exeeni mukwaha woopacerya. Masi ti vooloka opacerya ekapiitulu 2, yeeyo enimuthokorerya Biibiliya maana ekapiitulu 1 enimuromola Muluku.
5. Xeeni opixa murima oryaaya wootthuneya?
5 Khivanikhweya wira mutthu opacerye omwaamini Muluku; nto opixa murima ti vootthuneya. Khivaniphiyerya ovaanela omosa paahi wira mutthu owo okupali wira ookhala Mpattuxa. Masi nuumala ovaanela ikwaha sinceene, owo onoopacerya waamini wira ohaavo Mpattuxa; aahiiso onoohimya wira onniiwexexa nthowa naya atthu akina animukupali aya Muluku.
6. Xeeni atthu akina ahininvaha aya efaita Biibiliya?
6 Ale Ahininvaha Efaita Biibiliya Wala Omuroromela: Ikwaha sinceene, mutthu yoole onikupali wira Muluku ookhala, pooti ohiphavela osuwela ele Biibiliya oniixuttiha awe mwaha woowi owo khonikupali wira Biibiliya ti Nuulumo na Muluku. Woonasa wene, owo onikhala elapo yeeyo atthu anceene ahikhanle aya maKristau, wala onuupuwela wira Biibiliya ta eKristau yoowootha. Aahiiso, owo onikhala elapo yeeKristau yeeyo anamunceene anoona aya wira Biibiliya khonivareleya muteko. Ninrowa waakhaliherya sai atthu awo onvaha efaita Biibiliya wira muhoolo yeemererye osoma eliivuru Biibiliya Oniixuttiha Exeeni?
7. Ninrowa waakhaliherya sai atthu onvaha efaita Biibiliya?
7 Efiliyaali ya oGrecia elempe so: “Enamuna yooloka yowaakhaliherya ale ahininvaha efaita Biibiliya, ori omutthukula Biibiliya ni owooniherya ele elempwale mBiibiliyani mmo. Anamalaleerya anceene ahoona wira Nuulumo na Muluku ninniwerya orukunuxa murima wa mutthu ovikana itthu sotheene sikhanle ahu oohimya. (aHéb. 4:12) Oweha Nsina na Muluku mBiibiliyani, ohaakhaliherya anamunceene ophavela omusoma Biibiliya”. Efiliyaali ya wIndia elempe so: “Ekeekhai voohimya sa yoolakela ya okumi ni mukhalelo wa alipa ookhwa, ennivara murima wa maHindu. Nave-tho, yooleiherya ya Biibiliya ya olumwenku ohinrowa okhala onyokhana wa maloko ennaasivela vanci”. Ohimya itthu sinaaxankiha atthu a mmuttettheni, onnaavaha eparakha anamalaleerya yowooniherya wira Biibiliya onniixuttiha wira Omwene wa Muluku onoomaliha mixankiho.
8. Nihimyeke exeeni wa atthu yaale ahininvaha efaita Biibiliya mwaha wa eKristau yoowootha ?
8 Akhala wira mutthu khoninvaha efaita Biibiliya mwaha wa sowiixuttiha sa eKristau yoowootha , mmukhaliherye osuwela wira ele eniixuttihiwa ni eKristau yoowootha khenivarihana ni Biibiliya. Efiliyaali ya wÍndia yoolepa so: “Ikwaha sikina, nihaana waakhaliherya atthu woona wira ikerexa khahiyo axineene Biibiliya”. Anna a elapo eyo, anihimya wira maHindu waasivela epantte 4 ya ebroxura eni: Qual É o Objetivo da Vida? Como Encontrá-lo? Ebroxura eyo ennitthokiherya moota ikerexa saamananinhe aya ohonona ni omala-maliha Nuulumo na Muluku. Pioneero onikhala oBrasil onnaahimeerya atthu onaalaleerya awe oriki: “Atthu anceene annimusoma Biibiliya hata ahirowaka okerexa. Awo aniphavela osuwela paahi ele eri mBiibiliyani. Xeeni nyuwo muhinipaka anyu etthu emosaru? Waaniheryasa enimoosivelani ele enrowa anyu osoma”.
9. Xeeni nihintthuneya ahu wooceya, akhala wira atthu akina anihimya wira khaniphavela omusoma Biibiliya?
9 Yehova onnitokosa murima wa khuta mutthu. (1 Sam. 16:7; Mir. 21:2) Owo onnaathanla ale arina murima wooloka aniphavela weettela okokhorela wekeekhai. (Yoh. 6:44) Anamunceene khatonko wiixutta voohimya sa Muluku wala osuwela ele Biibiliya onihimya awe. Olaleerya wahu onnaavaha eparakha atthu awo wira “yòpowe, [ni] esuwele ekekhai”. (1 Tim. 2:4) Nto, akhala wira atthu akina anihimya wira khaniphavela omusoma Biibiliya, nihooceye! Nivikaniheke orumeela iliivuru sikina sinrowa waasivela. Muhoolo mwaya, waaniheryasa nnoowerya orumeela eliivuru ahu yuulupale ya omwiixuttiha Biibiliya, eyo piiyo: Biibiliya Oniixuttiha Exeeni Tthiri?.
[Ekaaxa epaaxina 8]
Moota wowaakhaliherya ale ahinikupali wira Muluku ohaavo
• Wira musuwele mathowa aya, mwaakohe so: “Kiireke wira okhuma khalai munuupuwela siiso?”
• Akhala wira mutthu owo budista, murumeele ebroxura eni: Como Ter Verdadeira Paz e Felicidade?, ipaaxina 9-12.
• Akhala wira owo onikupali othatuwa wa itthu, pooti orumeela ireferensia sinittharelana:
Despertai! epantte eni: “Teve um Projeto?”
Eviidiyu eni: As Maravilhas da Criação Revelam a Glória de Deus
Ibroxura sini: Como Ter uma Vida Satisfatória, epantte 4; A Vida — Teve um Criador?, ni A Origem da Vida — Cinco Perguntas Que Merecem Resposta
• Akhala wira owo oohiya omwaamini Muluku mwaha wa itthu sootakhala ni ohaawa molumwenkuni, pooti orumeela ireferensia sinittharelana:
Eliivuru eni: Existe um Criador Que Se Importa com Você?, muru 10
Ibroxura sini: Niireke Wira Muluku Onninthokorerya Tthiri?, epantte 6, ni Qual É o Objetivo da Vida? Como Encontrá-lo?, epantte 6
• Vaavo mutthu onipacerya awe okupali wira Muluku ohaavo, nirumeeleke eliivuru Biibiliya Oniixuttiha Exeeni. Ti vooloka opacerya muru 2, aahiiso muru mukina wooreerela wa mutthu owo.
[Ekaaxa epaaxina 9]
Moota wowaakhaliherya ale ahinimukupali Biibiliya:
• Murumeele eliivuru A Vida— Qual a Sua Origem? A Evolução ou a Criação?, miru 17 ni 18.
• Wa maHindu, murumeele ebroxura eni: Por Que Devemos Adorar a Deus com Amor e Verdade?
• Wa aYuda, murumeele ebroxura eni: Haverá Algum Dia um Mundo sem Guerra?, ipaaxina 3-11.
• Mooniherye efaita ya weettela malakiheryo a Biibiliya. Pooti orumeela ireferensia sinittharelana:
Despertai! epantte eni: “Ajuda para a Família”.
Eviidiyu eni: A Bíblia: O Poder Dela na Sua Vida.
Ibroxura sini: Ihapari Sooreera Sinikhuma wa Muluku!, soosoma 9 ni 11; Um Livro Para Todas as Pessoas, ipaaxina 22-26; ni Como Ter uma Vida Satisfatória, epantte 2.
Wa mabudista, murumeele ebroxura eni: O Caminho para a Paz e Felicidade, ipaaxina 3-7.
Wa Amaka, murumeele ebroxura eni: Waamini Wekeekhai—Esiiri Eniphwanyiha Okumi Woohakalala, mpantta 3.
Akhala wira munilaleerya muttetthe yoowo Biibiliya oninyokhiwa awe, ti vooloka wanipacerya ohihimya wira itthu muniixuttiha anyu sinikhuma mBiibiliyani, mpakha omuxukurya mutthu iwo ikwaha sinci.
• Mutthokiherye moota iprofesia sa Biibiliya siiraneyale aya. Pooti orumeela ireferensia sinittharelana:
Eviidiyu eni: A Bíblia — História Exata, Profecias Confiáveis
Ebroxura eni: Um Livro Para Todas as Pessoas, ipaaxina 27-29
• Vaavo mutthu owo onipacerya awe ophavela osuwela ele Biibiliya oniixuttiha awe, murumeeleke eliivuru Biibiliya Oniixuttiha Exeeni.
[Ekaaxa epaaxina 10]
Akhala wira mutthu mukina onihimya so: “Nkinkupali wira Muluku ohaavo”
• Pooti omukoha so: “Kiireke munnikeemererya woohimeeryani ele ekiirinhe okupali wira ookhala Mpattuxa?” Nto, mmooniherye iponto siri eliivuru Raciocínios ipaaxina 94-96, wala mpake mareheryo wira munvahe eliivuru ekina yooreerela.
• Aahiiso pooti omukoha so: “Masi vaakhanle wira Muluku ohaavo, mikhalelo xeeni mwaarowa anyu ophavela wira owo okhalane?” Anamunceene anihimya wira anniphavela omwaattamela Muluku yoowo ori oophenta, axariya, oomoriwa ikharari, ni ohirina nthalu. Nto mmurumeelaka Biibiliya, mmooniherye wira Muluku ookhalana mikhalelo iyo. (Opaka eyo pooti wookhaliheryani orumeela muru 1 a eliivuru Biibiliya Oniixuttiha Exeeni okhuma ettima 6.)
Akhala wira mutthu mukina onihimya so: “Nkinimukupali Biibiliya”
• Pooti waakhula so: “Atthu anceene anihimya siiso. Akina anuupuwela wira Biibiliya khonivarihana ni siensia, wala malamulo awe khanivareleya muteko. Kiireke mootoko ophwanya okathi woomusoma Biibiliya? [Nwehereryeke waakhuliwa. Nto mmooniherye masu oopacerya ari epaaxina 3 ya ebroxura Um Livro Para Todas as Pessoas, ni munvahe ebroxura eyo.] Anamunceene khaninvaha efaita Biibiliya mwaha woowi eKristau yoowootha kheneettela sowiixuttiha sa Biibiliya. Nihiku nikina, kiniphavela owooniheryani ntakiheryo niri ipaaxina 4 ni 5”.
• Aahiiso pooti waakhula so: “Atthu anceene anuupuwela siiso. Xontte, kiniphavela owooniheryani etthu emosa ekisivenle yeeyo Biibiliya onihimya awe. [Mmusome Yobi 26:7 wala Yesaya 40:22, yoowo onooniherya wira Biibiliya onnivarihana ni siensia.] Nave-tho, Biibiliya ookhalana miruku soovareleya muteko sinikhaliherya imusi. Nihiku nikina, kiniphavela owooniheryani ntakiheryo nimosa”.
• Wala pooti waakhula so: “Kooxukhuru mwaha woohimya moonelo anyu. Akhala wira Muluku ohaavaha eliivuru apinaatamu, nto malakiheryo xeeni erina aya eliivuru eyo?” Moottharelana, mmooniherye mutthu owo etthu ekina enivarihana ni moonelo awe.