Yihoowa Anjjuwaa Demmiyo Heezzu Gallassaa

1. Ha laytti awuraajjaa shiiquwaappe ay demmanau hidootana danddayiyoo?

¹ Ayyaanaaban koshatida Seexaanaa alamiyan, Yihooway ba ashkkarata ayyaanaaban miziiddi deꞌees. (Isi. 58:11) Yihooway nuna minttanau goꞌettiyo giigissotuppe issoy, layttan layttan shiiqiyo awuraajjaa shiiquwaa. Ha laytta awuraajjaa shiiqoy matiyo wode, Yihoowa anjjuwaa demmanau waani giigettana danddayiyoo?—Lee. 21:5.

2. Aybaa giigettidi polana koshshii?

² Intte awuraajjaa shiiquwan heezzu gallassa kumettan beettanau hanno gakkanaashin giigibeennaba gidikko, intte oosuwaa hanotaa giigissanau haꞌꞌi qoppana koshshees. Awuraajjaa shiiquwaa gallassatun, shiiqoy doomettanaappe kase yaa gakkidi uttiyoosaa oyqqanau aappun saatiyan kiyana koshshiyaakko qoppidetii? Yihooway nuuyyo giigissido ayyaanaaban minttettiya qumaappe awugeenne nuuppe halanaadan koyennaagee erettidaagaa! (Isi. 65:13, 14) Biidi shemppana sohuwaa, qassi aybin baanaakko qoppidetii?

3. Nuuninne nu soo asay awuraajjaa shiiquwaappe kumetta hanotan goꞌettanaadan maaddiya qofay awugee?

³ SHiiquwaa wode intte qofay laalettennaadan aybi maaddii? Danddayettiyaaba gidikko, shiiquwaa wode ubba gallassi sohuwaara ichite. Haasayaa shiishshiyaagaa xeellite. Geeshsha Maxaafaa kessidi ubba xiqisiyaakka kaallite. Qantta masttooshaa xaafite. Naati loytti ezgganaadan maaddanau so asay issippe uttiyoogee loꞌꞌo. (Lee. 29:15) Tamaaridobaa so asay ubba gallassi omarssan issippe zaarettana danddayees. Intte so asay Awuraajjaa shiiquwaappe simminkka goꞌettanaadan, so asay oosuwan peeshshanau koshshiya qofaa tobbanau So Asaa Goynuwaa omarssan amarida wodiyaa goꞌettana danddayeeta.

4. Nu gubaaꞌiyan deꞌiyaageeti ayyaanaaban minttettuwaa demmanaadan waati maaddana danddayiyoo?

⁴ Harati Goꞌettanaadan Maaddite: Haratikka ayyaanaaban goꞌettanaadan koyoos. Awuraajjaa shiiquwan beettanaadan maadoy koshshiyo, cimidaageetinne harati intte gubaaꞌiyan deꞌiyoonaa? Intte eta maaddanau danddayeetii? (1 Yoh. 3:17, 18) Cimati, ubba qassi citaa bollaara xeelliyaageeti, hegaa mala aassiyaageeti koshshiya maaduwaa demmidaakkonne akeekana koshshees.

5. Awuraajjaa shiiquwaa shoobe woraqataa waatidi asau immanee? (Qommoora deꞌiya saaxiniyaa xeella.)

⁵ Kase oottiyoogaadan awuraajjaa shiiquwaappe heezzu saaminttaa kasetidi, harati shiiquwan beettanaadan shoobboos. Gubaaꞌeti banttau imettida shoobe woraqataa ubbaa asau immanaunne danddayetta keenan bantta haggaazo moottaa gattanau halchana koshshees. Intte soo asay shoobbishin palahida woraqataa intte he shiiqo gallassatun asaa shoobbanau goꞌetana mala, ekki biite. Hegaa xeelliyaagan gujo qonccissoy Arbba galla shiiquwan odettana. Awuraajjau shiiqiyo kataman intte soo asay goꞌettenna shoobe woraqataa shiiquwaa sohuwan asaa mokkiyaageetussi immana koshshees. Woggaa gallassi kuusha haasayay shiiqiyo wode, intte hegaa oyqqidi kaallana mala hayyanintta issi shoobe woraqataa inttessi ashshite.

6. Awuraajjaa shiiquwan loꞌꞌo kandduwaa ayba ogiyan bessana danddayiyoo?

⁶ Loꞌꞌo Kanddoy Minttettees: Daro ‘asay bana siiqiyaagaa,’ qassi haratuyyo qoppennaagaa gidido ha wodiyan, loꞌꞌo kanddoy deꞌiyoogeeta gidanau baaxetiya nu mala Kiristtaanetuura shiiqiyoogee ayba minttettiyaabee! (2 Xim. 3:2) SHiiquwaa sohuwaa karee 2 saatiyan dooyettiyo wode maaraa mankkan geliyoogan, qassi nu soo asau, nunaara issippe biyaageetuyyo woykko nuuni Geeshsha Maxaafaa xannaꞌissiyoogeetu xallau sohuwaa oyqqiyoogan loꞌꞌo kandduwaa bessoos. SHiiquwaa bakkaa liqambbaree, nu sohuwan uttidi shiiqoy doommiyoogaa erissiya muuziqaa siyanaadan yootiyo wode, hegaadan oottana bessees. SHiiquwaa wode haratu qofay laalettennaadan, moobayliyaanne hegaa malabaa gorddiyoogee loꞌꞌo kanddoy deꞌiyoogaa bessees. Issoy issuwaara haasayiyoogaappe, moobayliyan xuufe kiitaa yeddiyoogaappe, shiiquwaa saatiyan qumaa miyoogaappe woykko yaa haa giiddi silkkiyan haasayissiyoogaappe haakiyoogan loꞌꞌo kandduwaa bessoos.

7. Nu ishatuura shiiqiyo wode, waani minettanaunne eta minttettanau danddayiyoo?

⁷ Minttettiya Issippetettaa: Awuraajjaa shiiqoy nuuni Kiristtaane issippetettaaninne ishanttu maabaran minettanau injje gidida hanotay deꞌanaadan oottees. (Maz. 133:1-3) Hara gubaaꞌiyaappe yiida ishatuuranne michotuura gayttidi, siiquwaa ‘aassanau’ he injjiyaa aybissi goꞌettekketii? (2 Qor. 6:13) He shiiquwan, hachi hachi issi uraara woykko issi keettaa asaara erettanau halchana danddayeeta. Laaxa saatee hegaadan oottanau loꞌꞌo injje. Hegaa gishshau, qumaa shammanau woy hooteeliyan maanau biyoogaappe, shiiqiyo sohuwan maanaunne haratuura wodiyaa aattanau laaxaa ekkidi biite. Hegee hara ooratta laggetuura dabbotaa medhanau maaddana danddayees.

8. Awuraajjaa shiiquwan dosan oottiyo oosuwaa oottana koshshiyoy aybissee, hegaadan waatidi oottana danddayiyoo?

⁸ Nu mala Kiristtaanetuura boncho oosuwaa issippe oottiyoogee ayba minttettiyaabee! Issi ooso kifiliyaa woy intte gubaaꞌiyau imettida geeshshiyo oosuwaa ootti maaddanau dosan oottana danddayeetii? (Maz. 110:3) Intte oottiyo oosoy imettibeennaba gidikko, hayyanintta awuraajjaa shiiquwau Dosan Oottiyo Ooso Kifiliyau yootite. Daro asay issippe oottiyoogee ufayssees; qassi oosoy sohuwaara wuranaadan maaddees.

9. Awuraajjaa shiiquwaa wode nu kandduwaa, nuuni maayiyoonne alleeqettiyo ogiyaa xeelliyaagan loytti qoppana koshshiyoy aybissee?

⁹ Nu Kanddoy Harati Nuna Nashshanaadan Oottees: Nuuni shiiquwau yiida imatta gidiyoy, shiiqo saate xallaana gidennan, heezzu gallassa kumettaana. Nu hanotay, awuraajjau shiiqiyo kataman deꞌiya asay, Yihoowa Markkati haratuppe dummatiyoogaa akeekidi nashshanaadan oottana bessees. (1 PHe. 2:12) Nuuni awuraajjau shiiqiyo sohuwan, aqiyoosaaninne hooteeliyan maayiyoonne alleeqettiyo ogee Yihoowa bonchissiyaagaa gidana bessees. (1 Xim. 2:9, 10) Nuuni baajiyaa wottiyaaba gidikko, harati nuuni Yihoowa Markka gidiyoogaa akeekana danddayoosona. Hegee nuuni awuraajjaa shiiquwaabaa etau yootanaunne tumaabaa markkattanau hanotay giiga gidanaadan oottees.

10. Hooteeliyaa oosanchatussi awuraajjaa shiiquwau loꞌꞌo xeelay deꞌanaadan ay oottana danddayiyoo?

¹⁰ Hooteeliyaa oosanchati nashshanaadan ay oottana danddayiyoo? Haratussi giidi nuuni goꞌettana danddayiyoogaappe daro alggaa oyqqana koshshenna; hegaadan oottiyoogee shiiquwau yiya hara ishati aqiyoosaa demmennaadan, qassi hooteelee demmiyo miishshay attanaadan oottees. Nuuni alggaa oyqqiyoonne yeddiyo wode, hooteeliyaa oosanchatussi oosoy darin nuussi koshshiyaabaa sohuwaara polana xayikko, danddayanchanne keha gidana koshshees. (Qol. 4:6) Nu kifiliyaa pittiyaageetuyyoonne hegaa mala harabaa oottiya, hooteeliyaa oosanchatuyyo guutta miishshaa immana koshshees.

11. Nu loꞌꞌo kanddoy asau loꞌꞌo markkatettaa gidiyoogaa bessiya temokroy awugee?

¹¹ Nu loꞌꞌo kanddoy awuraajjaa shiiquwaa wode harati waananaadan oottii? Issi gaazeexaa huuphe yohoy qonccissidoogaadan, awuraajjaa shiiquwau goꞌettido sohuwaa halaafee, “Asati keehippe pashkka asata. Eti layttan layttan ha sohuwan shiiqiyaakko ufayttoos” yaagiis. Zillaytti awuraajjaa shiiquwau yiidaageeti aqiyo issi hooteeliyan, Yihoowa Markka gidenna issi bitaniyau miishshaanne harabaa yeggiyo borssay bayiis. He borssay a giddon deꞌiya ubbabaara hooteeliyaa halaafiyau imettin, i borssaa godau hagaadan giis: “Yihoowa Markkati hagaa heeran awuraajjaa shiiqiyo gishshau, ha hooteeliyan alggaa oyqqidaageetuppe daroti eta gidiyoogee neeyyo kehiis. Hegee baynnaakko ne borssaa demmanaagaa yeꞌꞌe.”

12. Awuraajjaa shiiqoy matattiyo wode, nu halchoy ayba gidana koshshii, aybissi?

¹² Ha laytta awuraajjaa shiiqoy matattiiddi deꞌees. Prograameenne awuraajjaa shiiquwaara gayttidabay ufayssiyaagaa gidanaadan darobay oosettiis; hegau daro wodiyaa koshshiis. SHiiquwan heezzu gallassankka beettanau halchite; qassi Yihoowaynne a dirijjitee inttessi giigissidobaa goꞌettanau giigettite. Intte loꞌꞌo eeshshan, ufayssiya issippetettan, qassi loꞌꞌo kandduwan harata minttettanau murttite. Hegaadan oottikko, zillaytti awuraajjaa shiiquwau yiidaageetuppe issoy, “Hagaappe aaruwan ufayssiyaabaa taani hassayikke!” giidi xaafidoogaadan intteyyo siyettana danddayees.

[Sinttaa 4n deꞌiyaagaa]

Kase oottiyoogaadan awuraajjaa shiiquwaappe heezzu saaminttaa kasetidi, harati shiiquwan beettanaadan shoobboos

[Sinttaa 5n deꞌiyaagaa]

SHoobe Woraqataa Asau Waatidi Immanee?

Nu haggaazo moottaa gattanau, qanttan asau yootana koshshees. Hagaadan gaana danddayoos: “Saro. Ha shoobe woraqatay alame yuushuwan asau imettiiddi deꞌees. Hagee intte gishshaa. Aaho qofaa ha shoobe woraqataappe beꞌana danddayeeta.” SHoobe woraqatau sintta baggay koshshaa denttettiyaagaa; yaattiyo gishshau, keettaaway hegaa beꞌanaadan oottiiddi immite. Wozanappe yootite. Qeeraanne Woggaa gallassatun shoobe woraqataa immiyo wode, hanotay injjetikko maxeetetakka issippe immana koshshees.

[Sinttaa 6n deꞌiyaagaa]

Nuuni awuraajjaa shiiqiyo sohuwan, aqiyoosaaninne hooteeliyan maayiyoonne alleeqettiyo ogee Yihoowa bonchissiyaagaa gidana bessees

[Sinttaa 7n deꞌiyaagaa]

Intte loꞌꞌo eeshshan, ufayssiya issippetettan, qassi loꞌꞌo kandduwan harata minttettanau murttite

[Sinttaa 4n Deꞌiya saaxiniyaa]

2011 Awuraajjaa Shiiquwaa Hassayissuwaa

◼ Prograamiyaa Saatiyaa: Heezzu gallassatunkka prograamee maallado 3:20n doommees. Oydiyaa oyqqana danddayiyoy maallado 2:00 saatiyaana. Muuziqay doommanaagaa erissiyo wode, prograamee boncho hanotan doomettana mala nuuni ubbaykka nu sohuwan uttana koshshees. Prograamee wuriyoy Arbba gallassinne Qeeraa gallassi saateppe guyyiyan 10:55na gidishin, Woggaa gallassi saateppe guyyiyan 9:40na.

◼ Kaamiyaa Essiyoosaa: Kaamiyaa essanau deꞌiya sohoy guutta gidiyo gishshau, danddayettida keenan haratuura issippe yiyoogee loꞌꞌo. Qassi intte gubaaꞌee shiiqiyo awuraajjaa shiiquwan beettanau baaxetite.

◼ Uttiyoosaa Oyqqiyoogaa: Uttiyoosaa oyqqana danddayiyoy inttenaara issippe kaamiyan yiidaageetu xallaassa woykko inttenaara issippe deꞌiyaageetussa woykko intte xinaatetu xallaassa.—1 Qor. 13:5.

◼ Laaxaa: Laaxaa shemppuwaa wode, laaxaa maanau shiiquwaa sohuwaappe harasaa biyoogaappe hayyanintta laaxaa ekkidi yiite. Intte oydiyaa garssan wottana danddayiyo, qumaa oyqqiyoobaa goꞌettana danddayeeta. Hegaappe gitatiya miishshanne xaaramusiyaa ehaana bessenna.

◼ Miishshaa Immiyoogaa: Nu Kawotettaa Addaraashan woy awuraajjaa shiiquwaasan, alame yuusho oosuwau dosan miishshaa immiyoogan, shiiquwaa giigissuwaa nashshiyoogaa bessana danddayoos. Awuraajjaa shiiquwan immiyo cheekkee qanxxettana bessiyoy “Yeyihowa Misikiroch” gidiyoogee qonccana bessees.

◼ Daafabaanne Qoppenna Sahuwaa: SHiiquwaa sohuwan eesuwaara akkamettanaadan oottiyaabi gakkiyaaba gidikko, koyro akkamuwaa maaduwau giday deꞌiyoogeeti hanotay ay keena deexokko beꞌanaadaaninne maaduwaa immanaadan, mokkiyaageetuppe intte matan deꞌiya uri sohuwaara shiiquwaa sohuwan deꞌiya Koyro Akkamuwaa Maaduwaa kifiliyau erissanaadan hayyanintta yootite.

◼ Xaliyaa: Intte mittiyo xalee deꞌiyaaba gidikko, awuraajjaa shiiquwaa sohuwan he xalee deꞌenna gishshau, hayyanintta ekkidi yiite.

◼ Caammaa: Wottiyo caammaara gayttidaagan, layttan layttan amarida asay qohettees. Issi uri darajaanne hegaa mala daafa gattana danddayiya sohuwan saruwan hemettana danddayissiya sima gidida ba gediyau likke gidida caammaa wottiyoogee daro loꞌꞌo.

◼ Siyanau Metootiyaageeta: Ef-em eraadooniyaa xaabiyaa goꞌettidi shiiquwaa prograamiyaa sissiyo giigissoy deꞌees. Hegaa siyanau, hayttan wottidi ezggiyoobay deꞌiyo, baatiriyan oottiya guutta eraadooniyaa ehaana koshshees.

◼ Qeeri Naatu Gaariyaanne Allaxxiyoosan Goꞌettiyo Oydiyaa: Qeeri naata wottidi sugiyo gaariyaanne allaxxiyoosan goꞌettiyo oydiyaa shiiqo sohuwaa ehaana bessenna. Gidoppe attin, yelidaageeti bantta miyyiyan wottana danddayiyo, naata utissiyoobaa ehaana danddayoosona.

◼ Quma Keettaa: Quma keettan loꞌꞌo eeshshaa bessiyoogan Yihoowa bonchissite. Meeza gididaba gidikko, qumaa aattida urau guutta santtimiyaa immite.

◼ Kawotettaa Addaraashaa Goꞌettiyoogaa: Kawotettaa Addaraashaa asay aqiyoosa oottennaagee loꞌꞌo. Goꞌettiyoogee attennaba gidikko, Kawotettaa Addaraashay ubba wode geeshsha gidanaadan ubbau aawatettay siyettana bessees. Hiittaa denttidi maara wottana bessees; gukkidabaa sohuwaara quccana bessees; qassi woraqataanne hegaa malabaa a yegganau giigissidoban yeggana koshshees.

◼ Geeshshiyoogaa: Geeshshatettaa Kifilee geeshshiyo prograamiyaa giigissiyaaba gidikkokka, Yihooway ba asaappe koyiyo geeshshatettaa xoqqa maaraa nu ubbay kaallana danddayoos. Hegaa gishshau, shiiquwaa sohuwan woraqati woykko hegaa mala harabi saꞌan deꞌana koshshenna. Hegaa malabaa yegganau giigidaban sohuwaara yeggana koshshees; yaatiyoogee shiiqo saatiyan gidin, laaxa saatiyan nu shiiqiyo sohoy moorettennaadan oottees. Hegaadankka, nuuni uttosaappe denddidi biyo wode, nuuni uttido heeraa xeelliyoogeenne saꞌan wodhidabaa denttiyoogee bessiyaaba.

◼ Kaallidi Maaddite Giya Qitsiyaa: Hayyanintta Kaallidi Maaddite (S-43) yaagiya qitsiyaa awuraajjaa shiiquwaa wode nuuni haggaazuwau kiyennan sabbakiyoogan demmido, koshshay deꞌiyoogeetu hanotaa kunttanau goꞌettana koshshees. Kunttido qitsiyaa Xuufe Kifiliyau woykko gubaaꞌiyaa simmiyo wode intte gubaaꞌiyaa xaafiyau immana danddayeeta.

◼ Dosan Oottiyoogaa: Nuuni koshshiya oosota nu dosan oottiyaaba gidikko, awuraajjaa shiiquwan beettiyoogan daroppe ufayttana danddayoos. (Oos. 20:35) Hegaadan oottana koyiya uri Dosan Oottiyo Oosuwaa Kifiliyau yootana koshshees. Layttay 16 kumibeenna naatikka banttana yelidaageeti woy etappe issoy doorido gastta uri kaalettin loꞌꞌo oosuwaa oottana danddayoosona.