Haggaazuwawu SHiiqiyo SHiiquwan Awu Halchettidabaa Poliyoogaa
1. Haggaazuwawu shiiqiyo shiiquwaa ay halchidi shiiqiyoo?
1 Issi wode Yesuusi ba erissiyo ashkkaratuppe 70ti sabbakanawu baanaappe kase etaara shiiqiis. (Luq. 10:1-11) “Kattaa Godai” Yihooway eta kaalettanaagaanne eti banttarkka oottennaagaa hassayissidi, i eta minttettiis. I eti he oosuwawu qara gidanaadan kaaletuwaa yootiis, qassi eti ‘naaꞌꞌa naaꞌꞌa’ gididi giigetti baanaadan oottiis. Ha wodiyan haggaazuwaa kiyanaappe kase shiiqiyo shiiqoykka, nuuni hegaadan minettanaadan, qara gidanaadaaninne giigettanaadan maaddees.
2. Haggaazuwawu shiiqiyo shiiqoy aappun daqiiqan wurana koshshii?
2 Haggaazuwawu shiiqiyo shiiqoy giigettiyoogan, haggaaziyo moottaa immiyoogaaninne wurssettan woossiyoogan 10ppe 15 daqiiqan wurees. SHin hegee haꞌꞌi laamettiis. Hosppuniyaappe doommidi haggaazuwawu shiiqiyo shiiqoy ichashu daqiiqaappe laappun daqiiqaa gakkanaashin wurees. SHin gubaaꞌe shiiquwaappe simmin shiiqikko, aassiyaageeti Geeshsha Maxaafaappe loytti tamaarido gishshawu, hegaappekka guutta daqiiqan wurana koshshees. Haggaazuwawu qantta shiiquwaa shiiqiyoogee, aassiyaageeti ubbay daro saatiyaa haggaazanaadan maaddees. Hegaa bollikka, aqinyeti woy aassiyaageeti he shiiquwaappe kase haggaazuwaa doommi uttikko, eti haggaaziyoogaa guutta wode xallawu agganaadan oottana koshshees.
3. Haggaazuwawu shiiqiyo shiiqoy aassiyaageeta keehi maaddana mala waati giigissana koshshii?
3 Aassiyaageeta keehi maaddana mala haggaazuwawu shiiqiyo shiiquwaa loytti halchidi giigissana koshshees. Daro gubaaꞌetun haggaazo cita ubbay issippe shiiqiyoogaappe dumma dummasan shiiqiyoogee maaddees. Hegee aassiyaageeti shiiquwaa sohuwaanne haggaazo moottaakka eesuwan gakkanaadan maaddana danddayees. Hegaa bollikka, aassiyaageeti eesuwan maddabettanaadaaninne haggaazo citaa xomoosiya ishay ba citan deꞌiyaageeta loytti maaddanaadan oottees. Gubaaꞌiyaa cimati bantta gubaaꞌiyawu haniya loꞌꞌobay aybakko kuuyana danddayoosona. SHiiqoy woosan kuuyettanaappe kase, aassiyaageeti ubbay awan, qassi oonaara haggaazanaakko erana bessees.
4. Haggaazuwawu shiiqiyo shiiqoy hara shiiqotu keena goꞌꞌenna giidi qoppana koshshennay aybissee?
4 Hara Gubaaꞌe SHiiquwaadan Keehi Koshshiyaaba: Haggaazuwawu shiiqiyo shiiqoy giigidoy haggaazanawu kiyiyaageeta maaddanaassa gidiyo gishshawu, kumetta gubaaꞌee shiiqennan aggana danddayees. SHin hegaa giyoogee, he shiiqoy hara gubaaꞌe shiiqotu keena goꞌꞌenna giyoogaa gidenna. Nuuni shiiqiyo hara ubba shiiqotuugaadan, haggaazuwawu shiiqiyo shiiqoykka siiqettanawunne loꞌꞌo oosuwaa oottanawu issoy issuwaa minttettanaadan Yihooway giigissidobaa. (Ibr. 10:24, 25) Hegaa gishshawu, Yihoowa bonchissiyaabanne shiiqidaageeta goꞌꞌiyaaba gidana mala, shiiquwaa kaalettiyaagee loytti giigettana koshshees. Danddayettiyaabaa gidikko, haggaazuwaa kiyiyaageeti he shiiquwaa shiiqanawu baaxetana koshshees.
Haggaazuwawu shiiqiyo shiiqoy hara gubaaꞌe shiiqotu keena goꞌꞌenna giidi qoppana koshshenna
5. (a) Haggaazuwawu shiiqiyo shiiquwaa giigissiyoogan haggaazuwaa xomoosiyaagee oottiyoobay aybee? (b) Issi michiyaa haggaazuwawu shiiqiyo shiiquwaa waata kaalettana koshshii?
5 Kaalettiyaagee Giigettana Koshshiyaabaa: Issi uri shiiquwaa kifiliyaa loytti giigettana mala, awu kaseti imettana koshshees. Haggaazuwawu shiiqiyo shiiqoykka hegaara issi mala. Haggaazo citati dumma dummasan shiiqiyo wode, citaa xomoosiyaageeti woy eta maaddiyaageeti shiiquwaa kaalettiyoogee tuma. SHin gubaaꞌee haggaazuwawu issippe shiiqiyo wode, haggaazuwaa xomoosiyaagee kaalettiya ura maddabees. Haggaazuwaa xomoosiya issoti issoti kaalettiya ubbawu prograamiyaa immoosona, qassi erissuwaa kaqqiyosankka prograamiyaa wottoosona. Haggaazuwaa xomoosiya ishay kaalettiyaageeti tamaarissiyoonne darajjayiyo hanotay shiiqoy muruta gidanaadan oottiyoogaa hassayidi, shiiquwaa kaalettiyaageeta yuushshi qoppidi doorana koshshees. Gubaaꞌe cima, gubaaꞌiyawu oottiyaagaa woy kaalettana danddayiya hara xammaqettida isha amarida gallassatun maddabanawu danddayettennaba gidikko, haggaazuwaa xomoosiyaagee kaalettana danddayiya xammaqettida michiyo maddabana koshshees.—“Issi Michiyaa Kaalettana Koshshiyo Wode” giya huuphe yohuwaa xeella.
6. Kaalettanaadan maddabettida uri loytti giigettana koshshiyoy aybissee?
6 Tiꞌokiraase Haggaazo Timirtte Keettan woy Haggaazo SHiiquwan nuuyyo kifilee imettiyo wode, xaasayidi xeellennan loyttidi giigettoos. Woyganaakko qoppiyoogaa doommanawu shiiquwaa baanaashin uttiigiya uri baawa. Haggaazuwawu shiiqiyo shiiqo kaalettanawu maddabettiyoogaakka hegaadan xeellana bessees. Haggaazuwawu shiiqiyo shiiqoy hagaappe guyye kaseegaappe guutta wodiyan wurana; hegaa gishshawu, shiiqoy maaddiyaaba gidanaadaaninne saatiyan wurana mala loytti giigettiyoogee keehi koshshiyaaba. Haggaazo moottaa kasetidi ekkiyoogeekka loytti giigettiyoogaa bessees.
7. Kaalettiya uri tobbanaadan giigettana danddayiyo issi issibay aybee?
7 Tobbana Koshshiyaabaa: Hanotay moottaappe moottan dummatiyo gishshawu, ammanettida ashkkaray haggaazuwawu shiiqiyo shiiqo ubbawu xuufiyaa giigissibeenna. “Haggaazuwawu SHiiqiyo SHiiquwan Tobbana Danddayiyoobata” giya saaxinee hegawu maaddiya issi issibaa yootees. Darotoo he shiiquwaa wode nuuni tobbana. Issi issitoo, loytti giigettidi ootti-besuwaa bessana danddayettees; woy jw.org sayttiyaappe hegawu haniya biiduwaa goꞌettana danddayettees. Haggaazuwawu shiiqiyo shiiqo kaalettiya uray hegawu giigettiyo wode, he galla haggaazuwawu kiyiyaageeta minttettiyaabaanne eti qara gidanaadan maaddiyaabaa qoppana koshshees.
Haggaazuwawu shiiqiyo shiiqo kaalettiya uray hegawu giigettiyo wode, he galla haggaazuwawu kiyiyaageeta minttettiyaabaanne eti qara gidanaadan maaddiyaabaa qoppana koshshees
8. Qeeraa gallassinne Woggaa gallassi haggaazuwawu shiiqiyo shiiquwan ay tobbiyoogee keehi maaddana danddayii?
8 Leemisuwawu, Qeeraa gallassi, aassiyaageetuppe daroti Wochiyo Keelaanne Beegottite! maxeetiyaa asawu immoosona. Qeeraa galla haggaaziya daroti saaminttan hara gallassi kiyenna gishshawu, asaa haasayissanawu bantta So Asaa Goynuwaa omarssan giigettidobaa hassayennan aggana danddayoosona. Hegaa gishshawu, kaalettiya uri Nu Kawotetta Haggaazuwan kiyiya asaa haasayissiyoogaa doommanawu maaddiya qofaappe issuwaa zaarettiyoogee loꞌꞌo gidennan aggenna. Harabay qassi, heeran odettidabaa, hanidabaa, woy baalaabaa maxeetiyaa erissiyo wode denttiyoogaa, woy keettaaway maxeetiyaa ekkikko, zaarettidi oychiyo wodiyawu i giigettanaadan maaddiyaabaa tobbiyoogaa. Haggaazuwawu shiiqiyo shiiquwan deꞌiya amaridaageeti asawu immiyo maxeetiyaa goꞌettiiddi deꞌikko, kaalettiyaagee eti qantta qofaa woy hanida minttettiyaabaa yootanaadan oychana danddayees. Woggaa gallassi, kaalettiyaagee he aginan asawu immiyo xuufiyaa xeelliyaagan hegaadan oottana danddayees. Asaa xannaꞌissiyo Mishiraachuwaa giyoonne Xoossay Yootiyoobaa Siya giyo brooshureta, qassi Geeshsha Maxaafay Tamaarissiyoy giyo maxaafaa ay gallassikka asawu immana danddayettiyo gishshawu, he xuufetuppe issuwaa asawu waati immanaakko kaalettiyaagee qanttan yootana danddayees.
9. Dummaa zamachaa wode, Qeeraa gallassinne Woggaa gallassi tobbana danddayiyoobay aybee?
9 Qeeraa gallassinne Woggaa gallassi gubaaꞌiyaa asay dummaa zamachaa oottikko, shoobiyaa woraqataara woy trakttiyaara issippe he aginaa maxeetiyaa asawu waati immanaakko, woy qassi issi uri eranawu koyikko waatanaakko kaalettiyaagee qonccissana danddayees. Harabay qassi hegaa mala zamachaa goꞌꞌaa qonccissiyaabaa yootiyoogaa.
10, 11. Haggaazuwawu shiiqiyo shiiqoy muruta gidana mala aassiyaageeti giigettana koshshiyoy aybissee?
10 Aassiyaageeti Giigettana Koshshiyaabaa: Haggaazuwawu shiiqiyo shiiqoy muruta gidana mala aassiyaageetikka maaddoosona. Eti geella so asaa goynuwaa wode haggaazuwawu kasetidi giigettiyoogan, hara aassiyaageetuyyo issi issibaa yootana danddayoosona. Haggaazuwawu shiiqiyo shiiquwaa baanaappe kase maxeetiyaanne xuufiyaa ekkiyoogee ubbay takkennan haggaazo moottaa baana mala maaddiyo gishshawu, hegaadan giigettiyoogee loꞌꞌo.
11 Haggaazuwawu shiiqiyo shiiqoy doomettanaappe guuttaa kasetidi gakkanawu halchiyoogeekka keehi koshshiyaaba. Nuuni gubaaꞌe shiiqo ubbaa pooꞌissennan gakkanawu baaxetoos. Yaatikkonne, haggaazuwawu shiiqiyo shiiquwawu pooꞌissidi gakkiyoogee shiiquwaa maara polennaadan oottana danddayees. Waatidi? Kaalettiya ishay aassiyaageeta maddabanaappe kase darobaa qoppees. SHiiqida aassiyaageeti amaridaageeta gidikko, ubbaakka daro oosettibeenna moottawu yeddanawu kuuyana danddayees. Etappe amaridaageeti haggaazuwawu shiiqiyo shiiquwaa sohuwaa hemettidi biidaba, qassi haggaaziyo moottay haahosaana gidikko, i ha aassiyaageeta kaamee deꞌiyoogeetuura maddabana danddayees. He moottay iitabay dariyo soho gidikko, i ishantti michonttuura woy amarida michontti haggaaziyo heeran haggaazanaadan maddabana danddayees. Abbe paca gidida aassiyaageeti dembbattiya heeran woy xekkay darenna keettati deꞌiyoosan haggaazanaadan maddabettana danddayoosona. Mata wode aassiyaageeta gididaageeti kaymidaageetuura haggaazanaadan maddabettana danddayoosona. SHin, aassiyaageeti pooꞌissidi gakkikko, eta gujjanawu issi issitoo zaarettidi maddabana koshshees. Nuuni issi issitoo pooꞌissanaadan oottiyaabi deꞌana danddayees. SHin, nuuni pooꞌissiyoogaa meeze oottikko, pooꞌissiyoy haggaazuwawu shiiqiyo shiiquwaa nashshenna gishshassakko woy kasetidi giigettenna gishshassakko, nuna oychana danddayoos.
12. Neeni darotoo ne koyido uraara haggaazanawu doorikko, ay qoppana danddayay?
12 Haggaazuwawu shiiqiyo shiiquwaa biida aassiyaageeti he shiiqoy doommanaappe kase bantta koyido uraara haggaazanawu doorana danddayoosona; woy etaara haggaaziya ura maddabana danddayettees. Neeni darotoo haggaaziyoy ne koyido uraara gidikko, ne mata laggetu xallaara haggaaziyoogaappe, dumma dumma ishanttuura woy michonttuura haggaaziyoogan ne siiquwaa aassana danddayaasa. (2 Qor. 6:11-13) Mata wode aassiyaagaa gidida uri tamaarissiyoogan qara gidanaadan maaddanawu issi issitoo aara haggaazana danddayay? (1 Qor. 10:24; 1 Xim. 4:13, 15) Awan haggaazanaakko odettiya kaaletuwaa gujjin, neeyyo imettiya kaaleto ubbaa loytta ezgga. SHiiqoy wuriyo wode, nenaara maddabettida uraa aggada hara uraara haggaazoppa, qassi sohuwaara ne haggaazo moottaa ba.
13. Nuuni ubbay nuuppe koyettiyaabaa akeekan oottikko, haggaazuwawu shiiqiyo shiiqoy nuna waati maaddii?
13 Yesuusi haggaazuwawu maddabido 70ti sabbakidi “ufaissan simmidosona.” (Luq. 10:17) Eti sabbakiyoogaa doommanaappe kase Yesuusi etaara shiiqidoogee loꞌꞌo ayfiyaa demmanaadan eta maaddidoogee qoncce. Ha wodiyan, haggaazuwawu shiiqiyo shiiqoy hegaadan maaddana danddayees. Nuuni ubbay nuuppe koyettiyaabaa akeekan oottikko, haggaazuwawu shiiqiyo shiiqoy ‘asa ubbawu markkattana mala’ nuussi imettida oosuwaa oottanawu minettanaadan, qara gidanaadaaninne giigettanaadan maaddees.—Maa. 24:14.
Haggaazuwawu shiiqiyo shiiquwaa kaalettiya issi michiyaa ba huuphiyaa qachananne uttada kaalettana koshshees. Tobbanaadan a dooriyoobay issi ishay dooriyoobaara issi mala. A shiiqidaageeta tamaarissiyaaba milatana koshshennaba gidikkokka, tobbanaadan denttettana danddayawusu. A xammaqettida hara michiyaa woossanaadan shoobbikko, he michiyaakka ba huuphiyaa qachana koshshees. Xammaqettida ishi shiiqoy doomettin gakkikko, a he ishay shiiquwaa kaaletti wurssanaadan shoobbana koshshees. Bessennabay hanenna mala, haggaazuwaa xomoosiya ishay hanana oorattabaa kasetidi qoppananne bessiya kaaletuwaa immana koshshees. Leemisuwawu, xammaqettida guutta naꞌay issi michiyaa kaalettiyo shiiquwaa shiiqana danddayees; shin cimati i he shiiquwaa kaalettanawu danddayenna giidi qoppoosona. Hegaa mala hanotan, maddabettida michiyaa he shiiquwaa kaalettana koshshikkonne, cimati maayikko ishay woossana koshshiyoogaa haggaazuwaa xomoosiya ishay akeekissana danddayees. Woy qassi cimati eriyoobaa gaasuwan shiiquwaa kaalettennaadan woy gubaaꞌiyan woossennaadan teqqido gastta ishi he shiiquwan deꞌana danddayees. Cimati xuura gididabaa qonccissennan, he ishay shiiquwan deꞌikkokka, maddabettida michoti kaalettananne woossana koshshiyoogaa etawu yootana bessees. Haggaazuwawu shiiqiyo shiiquwaa michontti ay gallassatun kaalettiyaakkokka cimati he ishawu yootana danddayoosona.