Yihoowa Kehatettaa Nashshiyoogaa Bessa

YIHOOWAY keha Xoossa. (Yaaq. 1:17) Xoolintteti kumido saloy, maatay mittay kumido saꞌaynne Yihooway medhido hara ubbabay a kehatettaa bessees.—Maz. 65:12, 13; 147:7, 8; 148:3, 4.

Mazamurawee bana Medhidaagaa keehi nashshiyoogee i Yihoowa oosuwaa xoqqu xoqqu oottiya mazamuriyaa xaafanaadan denttettiis. Mazamure 104 nabbabada, neeyyo aagaadan siyettiyaakkonne qoppa. Mazamuraawee, “Taani ta de7o ubban GODAAYYO yexxana; taani paxa de7ido keenan ubban ta Xoossaa sabbana” yaagiis. (Maz. 104:33) Neenikka hegaadan amottay?

KEHATETTAN LAGGETIYAABI BAYNNA LEEMISUWAA

Yihooway nuuni aagaadan keha gidana mala koyees. Nuuni keha gidana bessiyo gaasuwaakka i yootiis. Kiitettida PHawuloosi hagaadan giidi xaafanaadan i denttettiis: “Ha77i ha wodiyan dure gidiyaageeti otorettennaadaaninne qassi nuuni ufaittanaadan, ubbabaa palahissidi nuuyyo immiya de7o Xoossan ammanettanaagaappe attin, aadhdhiya duretettan eti ammanettennaadan, eta azaza. Eti lo77obaa oottanaadan, lo77o oosuwan duretanaadan, kehiyaageetanne haratuura shaakki ekkiyaageeta gidanaadan azaza. Hegaa yaatiyoogan eti sinttanau banttau mino baaso gidiya miishshaa banttau shiishshoosona. Hegaappe guyyiyan, eti tumu de7uwaa ekkana.”—1 Xim. 6:17-19.

PHawuloosi ayyaanaa kaaletuwan Qoronttoosa gubaaꞌiyawu naaꞌꞌantto dabddaabbiyaa xaafido wode, imotaa immiyoogaa waati xeellana bessiyaakko qonccissiis. PHawuloosi, “Xoossai ufaissan immiya uraa siiqiyo gishshau, qarettiiddi woi dosennan immiyoogaa gidennan, immiya urai huuphen huuphen ba wozanan qoppidobaa immo” yaagiis. (2 Qor. 9:7) Hegaappe kaallidi, ekkin etawu koshshiyaabay kumiyoogeetakka immidi ayyaanaabaa anjjuwaa demmiyaageetakka kehatettan immiyoogee goꞌꞌiyoogaa PHawuloosi qonccissiis.—2 Qor. 9:11-14.

PHawuloosi ba dabddaabbiyan ha qofaa wurssettan Xoossaa kehatettaabaa loytti qonccissiyaabaa yootiis. I, “Zawai bainna Xoossaa aaro kehatettaa gishshau, Xoossaa galatai gakko” yaagiis. (2 Qor. 9:15) Yihooway Yesuus Kiristtoosa baggaara ba asawu kehiyo ubbabay a imota gidiyoogee qoncce. Yihoowa imotaa goꞌꞌay odidi wurssana danddayennaagaa keena keehi maalaalissiyaaba.

Yihoowaynne a Naꞌay nuuyyo oottidobaanne sinttappe oottanabaa ubbaa nashshiyoogaa waati bessana danddayiyoo? Nuuni yaatana danddayiyo issi ogee, Yihoowa geeshsha goynoy aakkanaadan, guuxxin darin nuuyyo deꞌiya wodiyaa, wolqqaanne miishshaa kehatettan immiyoogaa.—1 Odi. 22:14; 29:3-5; Luq. 21:1-4.

Kumetta Saꞌan Oottiyo Oosuwawu Miishshaa Waati Immiyoo?

Kiitettida PHawuloosa wodeegaadan, ha wodiyan daroti gubaaꞌiyan “Alame Yuusho Oosuwawu” giya xuufee deꞌiyo saaxiniyan yegganawu amarida miishshaa ‘dagayoosona.’ (1 Qor. 16:2) SHiiqida miishshaa gubaaꞌeti Yihoowa Markkatu oosuwaa bantta biittan kaalettiya biiruwawu aginan aginan yeddoosona. Neeni immiyo miishshaa Yihoowa Markkati ne biittan goꞌettiyo, higgiyan erettida dirijjitiyawu yeddanawukka danddayaasa. Ne biittan Yihoowa Markkati goꞌettiyo, higgiyan erettida waanna dirijjitiyaa sunttaa eranawu yan deꞌiya macara biiruwaa oycha. Macara biiruwaa adrashaa www.jw.org Weyb sayttiyan beꞌana danddayaasa. Neeni yeddana danddayiyo imotaa qommoy hagaappe kaallidi deꞌiyaagaa:

MULEERA IMMIYOOGAA

Bankkiyaappe elektiroonikiyaa baggaara, deebit karddiyan woy kiredit karddiyan miishshaa immiyoogaa. Issi issi macara biirotun jw.org weyb sayttiyaa woy doorettida hara weyb sayttiyaa goꞌettidikka hegaadan oottana danddayettees.
Miishshaa, alleequwaa woy hara alꞌꞌobaa imotaa. Immiyo miishshay woy harabay muleera imettidaba gidiyoogaa dabddaabbiyan qonccissa.

KOSHSHIKKO ZAARIDI EKKANAWU IMMIYOOGAA

Immiya uri koyiyaaba gidikko zaaridi ekkanawu immiyo miishshaa.
Immiyo miishshaa koshshikko zaarada ekkanaagaa dabddaabbiyan qonccissa.

LOYTTI HALCHIDI IMMIYOOBAA

Miishshaappenne neeni goꞌettiyo alꞌꞌoobaappe harabaa immiyoogankka, kumetta saꞌan oottiyo Kawotettaa oosuwaa maaddana danddayaasa. Hegeetikka hagaappe kaallidi deꞌiyaageeta. Neeni goꞌettana koyiyo ogee awugaanne gidin, intte biittan deꞌiyaagaa eranawu kasetada ne biittaa macara biiruwaa oycha. Higgiyaa hanotaynne qaraxaa wogay wodiyaappe wodiyan dummatiyo gishshawu, neeni ayba ogiyan immiyoogee loꞌꞌokko dooranaappe kase qaraxaabaanne higgiyaabaa eranchata zoriyaa oychiyoogee keehi loꞌꞌo.

Inshuranssiyaa: Issi uri Yihoowa Markkatu haymaanoote dirijjitee ba gishshaa deꞌuwaa inshuransse higgiyan woykko xurataa miishshaa goꞌettanaadan oottana danddayees.

Bankkiyan Deꞌiya Miishshaa: Deꞌiyo biittaa bankkiyaa higgee paqqadiyoogaadan, bankkiyan deꞌiya miishshay, miishshay deꞌiyoogaa qonccissiya woraqataa woykko xurataa miishshay hadaran woykko hayqqiyo wode Yihoowa Markkatuyyo imettanaadan qonccissana danddayettees.

Akisiyoonetanne Bonddeta: Akisiyoonetanne bonddeta Yihoowa Markkatu haymaanoote dirijjitiyawu immana danddayettees; woykko hayqqi simmin Yihoowa Markkatu haymaanoote dirijjitiyawu imettanaadan oottana danddayettees.

Gadiyaanne Keettaa: Yihoowa Markkatu dirijjitiyawu immiyo, bayzettana danddayiya keettaanne biittaa; keetta gidikko, deꞌido keenan goꞌettidi hegaappe simmin laatissana danddayettees.

Immidobaappe Aballiyaa Ekkiyoogaa: Immiya uri woy a gishshaa oottiya uri ba deꞌido wodiyan layttan layttan amarida aballiyaa ekkana mala Yihoowa Markkatu dirijjitiyawu immiyo miishshaa woy issibay he uraabaa gidiyoogaa erissiya sanadeta. Immiya uri immiyo layttan kaseegaappe guutta qaraxaa qanxxana danddayees.

Laataanne Hadara Miishshaa: Higgiyaara maayettiya ogiyan, aquwaa woykko miishshaa Yihoowa Markkatu dirijjitiyaa laatissanawu woykko hadaran immettida aquwan Yihoowa Markkatu dirijjitee goꞌettanaadan oottana danddayettees. Ha imotaa immiyaagee qaraxaara gayttidaagan goꞌettana danddayees.

“Loytti halchidi immiyoobaa” giyoogee bessiyoogaadan, hagaa mala imotaa immiya uri loytti halchana koshshees. Yihoowa Markkati kumetta saꞌan oottiyo oosuwaa halchidi maaddanawu koyiyaageetussi hegaa loytti qonccissanawu, Kawotettaabaa Sabbakiyo Kumetta Saꞌan Oottiyo Oosuwaa Maaddanawu Loytti Halchidi Immiyoobaa giyo brooshuree Inggilizettuwaaninne Isppeenettuwan giigiis. Ha brooshuree giigidoy, asay hayqqiyo wode laatissiyoogaadan sinttappe woy qassi haꞌꞌi imotaa immanawu waatana danddayiyaakko dumma dumma qofaa qonccissanaassa. Intte biittan deꞌiya qaraxaa higgiyaa gaasuwan woy hara higgiyaa gaasuwan ha brooshuriyan qonccida issi issibay neeyyo hanennan aggana danddayees. Yaatiyo gishshawu, ha brooshuriyaa nabbaba simmada, higgiyaa woykko qaraxaa xeelliyaagan zoriyaa oychana koshshees. Daroti hagaa mala hanotan kehatettan immiyoogan, nuuni kumetta saꞌan oottiyo haymaanoote oosuwaaninne asawu koshshiyaaban maaddidosona; qassi qaraxaara gayttidaagan goꞌettidosona. Ha brooshuree ne biittan deꞌikko, intte gubaaꞌiyaa xaafiyaa oychada demmana danddayaasa.

Gujo qofaa demmanawu neeni deꞌiyo biittaa macara biiruwaa oychana danddayaasa.