Psalm 46:10​—‘Dey Quiet, and Know Say I Be God’

“Make una surrender and know say na me be God. Them go praise me for all the country. Them go praise me for the whole earth.”​—Psalm 46:​10, New World Translation.

‘Dey quiet, and know say I be God: I go get praise from people wey be pagan, them go praise me for the earth.’​—Psalm 46:10, King James Version.

Wetin Psalm 46:10 mean?

God de tell everybody make them worship-am and make them accept say na im get the right to rule the whole earth. We no fit deny-am say e get power and authority. And na this truth everybody wey want live forever go need to accept.​—Revelation 4:11.

“Make una surrender and know say na me be God.” Some Bible translation talk the first part of this statement as ‘dey quiet.’ Na this one make many people no get the correct understanding of that verse. Them think say na command to get respect and dey quiet for church. But the Hebrew statement wey them translate as “make una surrender and know say na me be God” na something wey Goda de tell people for all the nation. E de tell them make them stop to do things wey de show say them dey against-am and accept say na only im them suppose worship.

This kind thing still dey for Psalm 2. For there, God promise say e go destroy anybody wey dey against-am. But the people wey accept im authority de trust-am to guide them, to give them power, and to give them sense. “The people wey go meet-am for protection” go dey happy and them go dey safe, especially when things hard.​—Psalm 2:​9-12.

“Them go praise me for all the country. Them go praise me for the whole earth.” For time wey don pass, Jehovah get praise when e use im great power protect im people. (Exodus 15:​1-3) For future, when everybody don accept Jehovah authority and de worship-am, e go get praise wey big well-well pass the one wey e don get before.​—Psalm 86:​9, 10; Isaiah 2:11.

Things wey dey around Psalm 46:10

One reference work call Psalm 46 ‘song wey de celebrate the power of God, wey dey mighty and wey de defend im people.’ When God people de sing wetin dey Psalm 46, them show say them trust the power wey Jehovah get to protect and help them. (Psalm 46:​1, 2) The song remind them say Jehovah always dey with them.​—Psalm 46:​7, 11.

To make their trust for Jehovah strong say E get the power to protect them, the psalm help them to think about the better-better things wey Jehovah don do. (Psalm 46:8) One of the main thing wey e talk about na the power wey Jehovah get to end war. (Psalm 46:9) So we fit talk say for Bible time, Jehovah end war as e protect im people from the different-different nation wey be their enemy. But Bible promise say God go soon do the one wey pass that one. E go remove war for everywhere for this world.​—Isaiah 2:4.

Jehovah still de help people wey de worship-am today? Yes. Even apostle Paul encourage Christians say make them de trust Jehovah to help them. (Hebrews 13:6) The things wey dey Psalm 46 de make our trust for God strong more-more, say e get the power to protect us. Them de help us see God as Person wey “de protect us and de give us power.”​—Psalms 46:1.

Watch this short video to see the things wey dey the book of psalms