Selemia

44 Neʼe fekauʼi e te ʼAtua ia Selemia ke alu ʼo tala age ki te kau Sutea fuli ʼae neʼe nonofo ʼi Esipito,+ ia natou ʼae neʼe nonofo ʼi Miketoli,+ mo Takepanese,+ mo Nofi*+ pea mo te potu fenua ʼo Patolosi:+ 2 “Koʼeni te folafola ʼa Sehova ʼo te ʼatu kautau, te ʼAtua ʼo Iselaele: ‘Neʼe kotou sisio ki te malaʼia ʼae neʼe au fakahoko ki Selusalemi+ pea mo te ʼu kolo fuli ʼo Suta. ʼI te ʼaho nei, kua maumau mo tuʼu lavaki.+ 3 Neʼe hoko te ʼu aluʼaga ʼaia ʼuhi ko te ʼu meʼa kovi ʼae neʼe kotou fai moʼoku fakamamahiʼi: neʼe kotou momoli ni sakilifisio+ mo tauhi ki ni ʼatua neʼe mole pe la kotou iloʼi ʼo feia mo ʼakotou kui.+ 4 Neʼe au fekauʼi liuliuga atu ʼaku tagata faifekau, ia te kau polofeta fuli ke natou ui atu: “Fakalelei siʼokotou ʼu loto, ʼaua takotou fai te meʼa fakalialia ʼae ʼe au fehiʼa ki ai.”+ 5 Neʼe mole pe la kotou fakalogo peʼe kotou tokaga mai, neʼe mole kotou liʼaki takotou agakovi. Neʼe hoko atu pe takotou momoli ni sakilifisio ki ʼihi ʼatua.+ 6 Neʼe to ai toku hauhau ohage ko he afi ki te ʼu kolo ʼo Suta pea mo te ʼu ala ʼo Selusalemi ʼo vela ai. Pea ʼi te ʼaho nei kua liliu ko ni koga meʼa maumau mo tuʼu lavaki.’+

7 “Pea koʼeni leva te folafola ʼa Sehova, te ʼAtua ʼo te ʼatu kautau, te ʼAtua ʼo Iselaele: ‘He koʼe ʼe kotou fakatupu he toe malaʼia feia kia koutou? ʼE mamate fuli anai te hahaʼi tagata mo fafine, mo te ʼu fanau pea mo te ʼu kiʼi toe ʼae ʼe kei meamea ʼo Suta, ʼo mole hao he tahi. 8 He koʼe ʼe kotou fakamamahiʼi au ʼaki ʼakotou aga, ʼo kotou momoli ni sakilifisio ki ʼihi ʼatua ʼi Esipito, te fenua ʼae neʼe kotou olo ʼo maʼuʼuli ai? ʼE kotou pupuli anai pea ʼe talanoaʼi anai koutou e te hahaʼi ʼo te ʼu puleʼaga fuli ʼo te kele, ʼi ʼanatou faitutuku mo ʼanatou laukovi.+ 9 Kua galo koa kia koutou te ʼu gaue kovi ʼo ʼakotou kui, mo te ʼu gaue kovi ʼo te ʼu hau ʼo Suta+ pea mo ʼae ʼo ʼonatou ʼohoana,+ ʼo feia mo ʼakotou gaue kovi pea mo ʼae ʼo ʼokotou ʼohoana,+ ʼae neʼe kotou fakahoko ʼi te fenua ʼo Suta pea mo te ʼu ala ʼo Selusalemi? 10 ʼO kaku mai ki te ʼaho nei, neʼe mole kotou fakamalaloʼi ia koutou, neʼe mole kotou manavasiʼi kia te au,+ pea neʼe mole kotou fakaʼapaʼapa ki te lao mo te ʼu fakatotonu ʼae neʼe au foaki atu kia koutou mo ʼakotou kui.’+

11 “Koia, koʼeni te folafola ʼa Sehova ʼo te ʼatu kautau, te ʼAtua ʼo Iselaele: ‘Kua au fakatotonu ke au fakahoko kia koutou ia te malaʼia moʼo molehi ia Suta katoa. 12 ʼE au pulihi anai ʼi Esipito ia natou fuli ʼae neʼe nonofo ʼi Suta, ʼae neʼe natou fakatotonu ke natou olo ʼo maʼuʼuli ʼi Esipito.+ ʼE natou mamate anai ʼi te tau pea ʼi te hoge. ʼEi, ʼe natou mamate anai ʼi te tau pea ʼi te hoge, mai ia ia ʼae ʼe malalo kia ia ʼae ʼe maʼuhiga. ʼE fakamalaʼia anai ia natou mo fakalainoaʼi. Pea ʼe talanoaʼi anai natou e te hahaʼi ʼi ʼanatou faitutuku, pea ʼe natou liliu anai ko he meʼa fakalialia ʼuhi ko te meʼa ʼae ka hoko kia natou.+ 13 ʼE au tauteaʼi anai ia natou ʼae ʼe nonofo ʼi Esipito ohage pe ko taku tauteaʼi ia te hahaʼi ʼo Selusalemi ʼaki te tau, mo te hoge pea mo te ʼu taʼi mahaki.*+ 14 ʼE mole hao anai peʼe maʼuli he tahi ia natou ʼae neʼe nonofo ʼi Suta, ʼae neʼe olo ʼo maʼuʼuli ʼi Esipito. ʼE mole natou toe liliu anai ki Suta. ʼE natou fakaʼamu anai ke natou toe liliu ʼo maʼuʼuli ai, kae ʼe toe liliu pe anai ki ai he tokosiʼi.’ ”

15 Neʼe tali leva kia Selemia e te ʼu tagata fuli ʼae neʼe natou iloʼi neʼe momoli e ʼonatou ʼohoana ni sakilifisio ki ʼihi ʼatua, pea mo te ʼu fafine kaugamalie fuli ʼae neʼe fakatahitahi ai, ʼo feia mo natou fuli ʼae neʼe nonofo ʼi Esipito+ ʼi Patolosi:+ 16 “ ʼE mole matou fai anai te meʼa ʼae neʼe ke ui mai kia matou ʼi te huafa ʼo Sehova. 17 Kae kua matou fakapapau ke matou fai te ʼu meʼa fuli ʼae neʼe matou fakatotonu. ʼE matou momoli anai ni sakilifisio ki te Fineʼaliki ʼo Te Lagi* pea ʼe matou liligi anai ni molaga meʼa inu kia ia.+ Neʼe matou fai te faʼahi ʼaia talu mai mo ʼamatou kui, mo ʼomatou hau pea mo ʼamatou tama ʼaliki ʼi te ʼu kolo ʼo Suta pea mo te ʼu ala ʼo Selusalemi. ʼI te temi ʼaia, neʼe mahu tamatou pane, neʼe lelei ʼosi ʼomatou maʼuli, pea neʼe mole hoko he malaʼia kia matou. 18 Kae ʼi te temi pe ʼae neʼe matou fakagata ai tamatou momoli ni sakilifisio ki te Fineʼaliki ʼo Te Lagi* pea mo liligi ni molaga meʼa inu ki ai, neʼe mole kei matou maʼu he meʼa pea neʼe matou mamate ʼi te tau mo te hoge.”

19 Neʼe toe ui e te ʼu fafine: “ ʼI te temi ʼae neʼe matou momoli ai ni sakilifisio ki te Fineʼaliki ʼo Te Lagi* pea mo liligi ni molaga meʼa inu ki ai, neʼe mole koa la fakagafua mai e ʼomatou ʼohoana ke matou fai ni foʼi keke ki tona pāki ko he ʼu sakilifisio ke momoli ki ai? Neʼe mole fakagafua mai koa la e ʼomatou ʼohoana ke matou liligi ni molaga meʼa inu ki ai?”

20 Neʼe ui leva e Selemia ki te hahaʼi katoa, te ʼu tagata mo ʼonatou ʼohoana, pea mo natou fuli ʼae neʼe faipalalau mo ia: 21 “Neʼe manatuʼi e Sehova, ʼei, neʼe mole galo kia te ia, te ʼu sakilifisio ʼae neʼe kotou momoli ʼi te ʼu kolo ʼo Suta mo te ʼu ala ʼo Selusalemi, ʼo feia mo ʼakotou kui, mo ʼokotou hau, mo ʼakotou tama ʼaliki pea mo te hahaʼi fuli ʼo te fenua.+ 22 Koia neʼe mole kei lava katakiʼi e Sehova ʼakotou aga ʼae ʼe kovi pea mo te ʼu meʼa fakalialia ʼae neʼe kotou fai. Kua liliu ai tokotou fenua ʼi te ʼaho nei ko he koga meʼa kua maumau, mo tuʼu lavaki, mo fakalialia, he koga meʼa ʼe talanoaʼi e te hahaʼi ʼi ʼanatou faitutuku.+ 23 Kapau ʼe hoko te malaʼia kia koutou ʼi te ʼaho nei, ʼe tupu ko takotou momoli te ʼu sakilifisio ʼaia pea mo takotou agahala ʼae kia Sehova. Neʼe mole kotou fakalogo kia Sehova pea neʼe mole kotou fakaʼapaʼapa ki tana lao, mo ʼana fakatotonu pea mo ʼana fakamanatu.”+

24 Pea neʼe ui e Selemia ki te hahaʼi fuli mo te ʼu fafine fuli: “Kotou fakalogo ki te meʼa ʼae ʼe ui e Sehova, ia koutou fuli hahaʼi ʼo Suta ʼae ʼe nonofo ʼi Esipito! 25 Koʼeni te folafola ʼa Sehova ʼo te ʼatu kautau, te ʼAtua ʼo Iselaele: ‘Ko te meʼa ʼae neʼe kotou fakaha mo ʼokotou ʼohoana ʼi ʼokotou gutu, neʼe kotou fakahoko ʼaki ʼokotou nima he neʼe kotou ui: “Kua matou fakatotonu ke matou fakahoko ʼamatou fakapapau he neʼe matou fakapapau ʼe matou momoli anai ni sakilifisio ki te Fineʼaliki ʼo Te Lagi* pea mo momoli ni molaga meʼa inu ki ai.”+ ʼU fafine, ʼe au iloʼi lelei pe, ʼe kotou fakahoko anai ʼakotou fakapapau, ʼei, ʼe kotou fakahoko anai.’

26 “Koia kotou fakalogo ki te folafola ʼa Sehova, ia koutou fuli hahaʼi ʼo Suta ʼae ʼe nonofo ʼi Esipito. ‘ “Koʼeni ʼe au fakapapau ʼi toku huafa lahi,” ko te ui ʼaia ʼa Sehova, “ ʼe mole toe toʼo anai toku huafa e he tagata ʼo Suta+ ʼe maʼuli ʼi Esipito ʼo ui: ‘ ʼE au fakapapau ia muʼa ʼo te Tuʼi ʼAliki ko Sehova, te ʼAtua maʼuli!’+ 27 ʼI te temi nei, ʼe au tokagaʼi natou ke au fakahoko te malaʼia kia natou kae mole ko te lelei.+ ʼE mamate fuli anai ia te ʼu tagata ʼo Suta ʼae ʼe nonofo ʼi Esipito ʼi te tau mo te hoge, ʼo kaku ki tanatou pupuli fuli.+ 28 ʼE hao pe anai he tokosiʼi ʼi te tau pea ʼe natou mavae anai mai Esipito ʼo toe liliu ki Suta.+ Pea ʼe iloʼi ai leva e natou fuli ʼae neʼe nonofo ʼi Suta pea mo natou olo ʼo maʼuʼuli ʼi Esipito pe ʼe ko te folafola fea ʼae neʼe hoko: pe ko taku folafola peʼe ko tanatou folafola.” ’ ”

29 “ ‘Pea koʼeni te fakailoga ʼae ka kotou mahino ai, ʼe au tauteaʼi anai koutou ʼi te koga meʼa ʼaeni,’ ko te ui ʼaia ʼa Sehova, ‘ke kotou iloʼi ai ʼe hoko moʼoni anai ʼaku folafola ʼo ʼuhiga mo tokotou malaʼia. 30 Koʼeni te folafola ʼa Sehova: “ ʼE au tuku anai te Falaone ko Hofala, te hau ʼo Esipito ki te nima ʼo ʼona fili pea mo natou ʼae ʼe natou fia matehi ia ia, ohage pe ko taku tuku te Hau ʼo Suta ko Setesiasi ki te nima ʼo te Hau ʼo Papiloni ko Nepukanesa, ia tona fili ʼae neʼe ina fia matehi ia ia.” ’ ”+