1 Te Nofo Agatonu

TONA FAKAʼUHIGA

Ko te ʼu taumatuʼa ʼae ʼe natou fakapapau ke natou nonofo agatonu, ʼe natou fakaʼuhiga te nofo ʼohoana ʼe ko he noʼo ʼe tologa pea ʼe ko he puipui kia natou. ʼE natou fefalalaʼaki ʼe natou nonofo agatonu anai, maʼia moka ʼe hoko he ʼu fihifihia.

Ko ʼihi taumatuʼa ʼe nonofo fakatahi fakakinau ʼuhi ko te hahaʼi peʼe ko te famili. Kae, ʼe lelei age he nofo ʼohoana ʼe fakatafito ki te feʼofaʼaki mo te fefakaʼapaʼapaʼaki.

PELESEPETO FAKATOHI-TAPU: “ ʼE mole tonu ki te tagata ke mavae mai tona ʼohoana.” —1 Kolonito 7:11.

ʼE ui fenei e Micah: “Kapau ʼe ke fia agatonu ki tou ʼohoana pea tuku tau hoko ita moka ʼe ina fai atu he meʼa ʼe ke mamahi ai. Ke ke fakamolemole gafua mo faifakalelei vave. Koia ko te ʼu fihifihia, ʼe ko he ʼu ʼahiʼahi pe kae ʼe mole ko he fakatupuʼaga mavete.”

TONA MAʼUHIGA

Ka natou tau mo he ʼu faigataʼaʼia, ko te ʼu taumatuʼa ʼae ʼe mole natou fakamaʼuhigaʼi ʼanatou fakapapau ʼe natou ui fenei: ‘Neʼe mole tonu pe ia ke ma ʼohoana.’ Pea ʼe natou kumi ai leva he puleʼaki ke mavete.

ʼE ui fenei e Jean: “Ko te tokolahi ʼe ʼohoana kae ʼe natou iloʼi lelei pe ʼe feala anai ke natou mavete. Ko natou ʼae ʼe manatu feia, ʼe mole natou fia nonofo agatonu ia.”

TE MEʼA ʼAE ʼE FEALA KE KE FAI

SIVISIVI IA KOE

Moka hoko he ke . . .

• ʼE ke manatu koa kua ke fakahemala ʼi tau ʼohoanaʼi ia ia?

• ʼE ke manatu koa ke ke maʼuli mo he tahi age?

• ʼE ke fai koa te ʼu palalau ʼaeni: “ ʼE au alu au” peʼe “ ʼE au kumi he tahi age ʼe ʼofa moʼoni ia au”?

Kapau ʼe ke ʼio ki he fehuʼi ʼi te ʼu fehuʼi ʼaeni pea ʼe mahino ia ʼe tonu ke ke fakamalohiʼi nei tau nofo agatonu.

FAIPALALAU MO TOU HOA

• ʼE kua vaivai koa amā faiga ʼae ke tologa tomā maʼuli fakataumatuʼa? Kapau ko ia, kotea tona tupuʼaga?

• Kotea te ʼu fakatuʼutuʼu ʼe tonu ke mā fai ke fakamalohiʼi ai toma maʼuli fakataumatuʼa?

TOKONI

• ʼI ʼihi temi, tohi he ʼu kiʼi aga fakapelepele ki tou ʼohoana

• Fakaha ʼe maʼuhiga kia koe takolua ʼohoana, ʼi tau ai he pāki ʼo tou ʼohoana ki tou pilo gaue

• Faitelefoni ki tou ʼohoana ʼi te ʼaho fuli moka ke gaue peʼe ʼe ke ʼi he tahi age faʼahi

PELESEPETO FAKATOHI-TAPU: “Ko te meʼa ʼae neʼe fakatahiʼi e te ʼAtua, ke ʼaua naʼa veteki e te tagata.”—Mateo 19:6.