Te ʼu Fehuʼi ʼe Fai e Te Hahaʼi ʼAē ʼe Fia Logo Ki Te Logo Lelei

Kapau ko te ʼAtua ʼe ʼofa, he koʼē ʼe ina fakagafua ia te agakovi?

ʼE FAKAGAFUA e te ʼAtua ia te agakovi, pea ko te ʼu lauʼi miliona hahaʼi ʼe natou lotolelei ki te fai ʼo te faʼahi ʼaia. Ohagē lā, ʼe natou fakahoko he ʼu tau, mo natou lī te ʼu pulu tau ki te ʼu tamaliki, mo maumauʼi ia te kele, pea mo fakatupu he ʼu hoge. Ko te ʼu lauʼi miliona hahaʼi ʼe natou suluka pea natou maʼu ai te mahaki ko te kōsea ʼo te ʼatefēfē, ko ʼihi ʼe natou tono pea natou maʼu ai he ʼu mahaki mai te ʼu felāveʼi fakasino, peʼe natou ʼinu kava fakavale ʼo natou maʼu ai te kōsea ʼo te ʼate, pea mo fai ʼihi atu ʼu aga ʼe kovi. Ko te hahaʼi ʼaia ʼe mole natou loto moʼoni ke pulihi ia te kovi. ʼE loto pē nātou ke ʼaua naʼa natou mamahi ʼi te ʼu fua kovi ʼo tanatou ʼu aga. ʼI te temi ʼaē ʼe natou utu ai ia te fua ʼo tanatou ʼu aga, ʼe natou kalaga fēnei: “He koʼē neʼe hoko te meʼa ʼaia kiā au?” ʼO natou tukugākoviʼi ai te ʼAtua, ohagē ko tona ʼui iā Tāʼaga Lea 19:3: “Ko te agavale ʼo te tagata ʼaē ʼe fakakovi ki tona ala, pea ʼe ʼita tona loto kiā Yahvé.” (Bible dʼOsty) Pea kanapau lā neʼe tāʼofi e te ʼAtua ia tanatou fai ia te meʼa ʼaē ʼe kovi, ʼe natou meomeo anai ʼo ʼui maʼa nātou ʼe fakafeagai ia ki tonatou faʼifaʼitaliha!

Ko te tupuʼaga tāfito ʼo te fakagafua e Sehova ke hoko ia te kovi, heʼe tonu ke tali ki te fakafifihi ʼa Satana. Neʼe lau e Satana te Tēvolo, ʼe mole feala ki te ʼAtua ke ina tuku ki te kele ia he ʼu hahaʼi ʼe natou nonofo agatonu anai kiā te Ia ʼi te ʼahiʼahi. (Sopo 1:6-12; 2:1-10) ʼE tuku e Sehova kiā Satana ia te fealagia ʼaē ke ina fakamoʼoni ki tana ʼu palalau. (Ekesote 9:16) ʼI te temi nei, ʼe haga fakatupu e Satana ia te ʼu malaʼia, ke fakafeagai ai ia te hahaʼi ki te ʼAtua, ʼi tana faiga ʼaē ke ina fakamoʼoni tana fakafifihi. (Fakahā 12:12) Kae neʼe nofo agatonu ia Sopo. ʼO toe fēia mo Sesu. ʼO toe fēia pē lā mo te kau Kilisitiano moʼoni ʼi te temi nei.—Sopo 27:5; 31:6; Mateo 4:1-11; 1 Petelo 1:6, 7.

ʼE au fia tui ki he palatiso ʼi te kele ʼaē kā māʼuʼuli ai te hahaʼi ʼo heʼegata, kae ʼe mole matalelei fau koa lā ke mata faigataʼa tatatou tui ki tona moʼoni?

ʼE mole ko te manatu ʼaia ʼaē ʼe tou maʼu ʼi te Tohi-Tapu. ʼE hagē ʼe matalelei fau te faʼahi ʼaia ke tou ʼui ai ʼe hoko moʼoni anai, heʼe talu mai fualoa mo te hoko ʼo te ʼu meʼa ʼaē ʼe kovi ʼi te mālamanei. Neʼe faʼu e Sehova ia te kele pea mo ina ʼui ke fakafonu te kele ʼaki he ʼu hahaʼi tagata mo fafine faitotonu, ke natou tōkakaga ki te ʼu vao ʼakau pea mo te ʼu manu, pea mo natou taupau ia tona matalelei, kae mole natou maumauʼi. (Vakaʼi ia te pāsina 12 pea mo te pāsina 17.) ʼE mole matalelei fau koa lā ia te fakapapau ʼaia ʼo ʼuhiga mo te Palatiso? Kailoa ia, heʼe mole feala ke hoko atu fēia ia te ʼaluʼaga ʼo te kele, heʼe kua kovi ʼaupitō. ʼE fetogi anai ia te faʼahi ʼaia ʼaki te Palatiso.

ʼE au lava tali feafeaʼi ki te hahaʼi ʼaē ʼe natou manukiʼi pea mo ʼui ko te Tohi-Tapu ʼe fakafeagai kiai ia te hisitolia mo te manatu ʼa te kau popoto lalahi?

ʼE mole ʼui leva ʼe tou hoko tui pē mo kapau ʼe tou tui ki te ʼu fakapapau ʼaia. “ ʼE tupu te tui mai te meʼa ʼaē neʼe kita logo kiai.” ʼAki tatatou ako ia te Folafola ʼa te ʼAtua, ʼe tou maʼu ai ia te poto pea mo tou tuputupu ai ʼi te tui.—Loma 10:17; Hepeleo 11:1.

Ko te ʼu kumi mātaga ʼo te temi faka Tohi-Tapu, ʼe natou fakamoʼoni ki te totonu ʼo te ʼu fakamatala faka Tohi-Tapu. Ko te ʼu meʼa fakapoto lalahi moʼoni ʼe mole fakafeagai ki te Tohi-Tapu. Ko te ʼu fakamatala ʼaenī ʼe hoa mai neʼe kua fualoa tona tohi ʼi te Tohi-Tapu ʼi muʼa atu ʼo te mahino kiai ʼa te hahaʼi fai kumi: te ʼu fetogi ʼaē neʼe hoko ki te kele ʼi tana tuputupu, te takafuafua ʼo te kele, tana tautau ʼi te noa, pea mo te mavae ʼa te ʼu manulele ʼi te fasiga taʼu ʼo ʼolo ki he tahi koga meʼa ke maʼu ai hanatou meʼa kai.—Senesi, kāpite 1; Isaia 40:22; Sopo 26:7; Selemia 8:7.

ʼE hā mai ko te Tohi-Tapu ʼe haʼu mai te ʼAtua heʼe hoko tana ʼu lea faka polofetā. Neʼe fakakikite fakatomuʼa e Taniela ia te fakatuʼu pea mo te tō ʼo te ʼu mālohi faka mālamanei, pea mo te temi ʼaē neʼe tonu ke hā pea mo matehi ai ia te Mēsia. (Taniela, kāpite 2, 8; 9:24-27) ʼE lolotoga hoko nei ʼi totatou temi ia te tahi ʼu lea faka polofetā, ʼo tou ʼiloʼi ai ʼe tou māʼuʼuli nei ʼi “te ʼu ʼaho fakamuli.” (2 Timoteo 3:1-5; Mateo, kāpite 24) ʼE mole feala ki te tagata ke ina ʼiloʼi fakatomuʼa te ʼu meʼa ʼaia. (Isaia 41:23) Kapau ʼe kotou fia maʼu he tahi ʼu fakamahino, kotou vakaʼi te kāpite 2 ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu? pea mo te kāpite 2 ʼo te tohi Koutou Tokagaʼi Te Lea Faka Polofeta ʼa Taniela! ʼaē neʼe tā e te kau Fakamoʼoni ʼa Sehova.

ʼE au lava ako feafeaʼi ke au tali ki te ʼu fehuʼi ʼaē ʼo ʼuhiga mo te Tohi-Tapu?

ʼE tonu ke kotou akoʼi pea mo metitāsioʼi ia te Tohi-Tapu, pea mo kotou toe kole ki te ʼAtua ke ina takitaki koutou ʼaki tona laumālie. (Tāʼaga Lea 15:28; Luka 11:9-13) ʼE ʼui fēnei ʼi te Tohi-Tapu: “Kapau ʼe iā koutou he tahi ʼe mole ina maʼu te poto, ke ina haga kole ki te ʼAtua, heʼe ina foaki ki te hahaʼi fuli ʼaki te manavaʼofa pea ʼe mole ina lau ia; pea ʼe ina foaki age anai kiā te ia.” (Sake 1:5) Pea ʼe ʼi ai mo te tahi ʼu tohi faka Tohi-Tapu ʼe feala ke kotou vakaʼi moʼo tokoni atu. ʼI te agamāhani, ʼe ʼaoga ke tokoni mai he tahi, ohagē ko te tagata Etiopea ʼaē neʼe ʼaoga ke tokoni age kiai ia Filipo ke mahino ki te koga Tohi-Tapu ʼaē neʼe ina lau. (Gāue 8:26-35) ʼE fai e te kau Fakamoʼoni ʼa Sehova ia he ʼu ako Tohi-Tapu mo te hahaʼi ʼaē ʼe fia logo ki te logo lelei ʼi tonatou ʼu loto fale pea ʼe mole totogi. ʼAua naʼa kotou lotolotolua ʼi te fakaʼui ʼo te faʼahi ʼaia kiā nātou.

He koʼē ʼe kaugamālie ia nātou ʼaē ʼe fakafeagai ki te kau Fakamoʼoni ʼa Sehova pea mo natou ʼui mai ke ʼaua naʼa au ako mo nātou?

Neʼe fakafeagai ia te hahaʼi ki te fai faka mafola ʼa Sesu, pea neʼe ina fakahā ʼe toe fakafeagai anai ia te hahaʼi ki tana kau tisipulo. Neʼe ʼi ai te ʼaho neʼe punamaʼuli ai ʼihi hahaʼi ʼo ʼuhiga mo te faiakonaki ʼa Sesu, neʼe ʼui fēnei e te kau takitaki lotu fakafeagai: “ ʼE kua toe kau koa ia mo koutou ʼi te fakahēʼi? ʼE ʼi ai koa lā he tahi ʼi te kau pule pe ko he tahi ʼi te kau Faliseo ʼe tui kiā te ia?” (Soane 7:46-48; 15:20) Tokolahi te hahaʼi ʼe natou ʼui atu ke ʼaua naʼa kotou ako mo te kau Fakamoʼoni ʼa Sehova, lagi ʼe natou mahino hala peʼe natou fehihiʼa kiā nātou. Kotou ako mo te kau Fakamoʼoni pea mo kotou sisio tonu peʼe kotou tuputupu ʼi te mahino ki te Tohi-Tapu peʼe kailoa.—Mateo 7:17-20.

He koʼē ʼe ʼaʼahi e te kau Fakamoʼoni ia te hahaʼi ʼaē kua ʼi ai tanatou lotu?

ʼI tanatou fai fēia, ʼe natou mulimuli ai ki te faʼifaʼitaki ʼa Sesu. Neʼe ʼalu ki te kau Sutea. Neʼe ʼi ai te lotu ʼa te kau Sutea, kae neʼe ʼi ai te ʼu faʼahi ʼi tanatou tauhi neʼe mole natou mulimuli ai ki te Folafola ʼa te ʼAtua. (Mateo 15:1-9) ʼE maʼu e te ʼu puleʼaga fuli pē ia tanatou ʼu lotu, nātou ʼe lau ʼe natou Kilisitiano pea mo nātou ʼe ʼui e mole natou Kilisitiano. ʼE maʼuhiga ke ʼalutahi tatatou tui pea mo te ʼu akonaki ʼo te Tohi-Tapu. ʼE fakahā e te kau Fakamoʼoni ia tonatou ʼofa ki tonatou tatau, ʼi tanatou faiga ʼaē ke natou tokoni kiā nātou ʼi te faʼahi ʼaia.

ʼE tui koa ia te kau Fakamoʼoni ʼe ko tanatou lotu pē ʼaē ʼe moʼoni?

Ko ia ʼaē ʼe ina faka maʼuhigaʼi tana lotu ʼe tonu ke tui ʼe ko te lotu moʼoni ʼaia. He koteā anai ia te tupuʼaga ʼo tana nofo ʼi te lotu ʼaia? Neʼe fai te tokoni ʼaenī ki te kau Kilisitiano: “Kotou sivisivi ia meʼa fuli; tāʼofi maʼu te meʼa ʼaē ʼe lelei.” (1 Tesalonika 5:21) ʼE tonu ki he tahi ke ina ʼiloʼi papau peʼe fakatafito ia te ʼu meʼa ʼaē ʼe tui kiai ki te Tohi-Tapu, heʼe ko te tui moʼoni pē e tahi. ʼE fakamoʼoni iā Efesi 4:5 ki te faʼahi ʼaia, heʼe ʼui ai “ko te ʼAliki e tahi, ko te tui e tahi, ko te papitema e tahi.” Neʼe mole maʼu e Sesu ia te manatu ʼaē ʼe maʼu ʼi te temi ʼaenī, ʼaē ʼe ʼui ai ko te ʼu tuʼuga lotu fuli ʼe taki ki te fakamaʼuli. Kae neʼe ina ʼui fēnei: “Fāveliveli ia te matapā pea mo lauveliveli ia te ala ʼaē ʼe fakatau ki te maʼuli, pea e tokosiʼi ia nātou ʼe natou maʼu.” ʼE tui ia te kau Fakamoʼoni ʼa Sehova kua natou maʼu ia te ala ʼaia. He kanaʼaua lā, neʼe natou kumi ia he tahi age lotu.—Mateo 7:14.

ʼE natou tui koa ʼe ko nātou pē ʼaē kā haofaki anai?

Kailoa ia. Ko te ʼu lauʼi miliona hahaʼi ʼaē neʼe māʼuʼuli ki muʼa atu pea neʼe mole ko he kau Fakamoʼoni ʼa Sehova, ʼe toe fakatuʼuake anai pea mo feala ai ke natou maʼu ia te maʼuli. Tokolahi ʼe kei māʼuʼuli ʼi te temi nei, ʼe kei feala pē hanatou kau ki te moʼoni pea mo te faitotonu ʼi muʼa ʼo te hoko mai ʼo te “mamahi lahi,” pea ʼe haofaki anai nātou. Tahi ʼaē meʼa, neʼe ʼui e Sesu ʼe mole tonu ke tou fakamāuʼi he tahi. ʼE tou sio pē tātou ki te meʼa ʼaē ʼe hā ki tuʼa; kae ʼe sio te ʼAtua ia ki te loto. ʼE totonu tana sio pea mo manavaʼofa tana fai fakamāu. Neʼe ina tuku kiā Sesu ia te maʼua ʼaē ke ina fakamāuʼi ia te hahaʼi, kae neʼe mole ina tuku mai kiā tātou.—Mateo 7:1-5; 24:21; 25:31.

Ko te tokoni faka paʼaga fea ʼe ʼamanaki ke maʼu mai iā nātou ʼaē ʼe kau ki te ʼu fono ʼa te kau Fakamoʼoni ʼa Sehova?

ʼO ʼuhiga mo te ʼu meʼa ʼofa faka paʼaga, neʼe ʼui fēnei e te ʼapositolo ko Paulo: “Ke tahi fai pē ki te meʼa kua ina fakatotonu ʼi tona loto, ʼo mole fai ʼaki he loto fakahemala peʼe ʼaki he loto fakakinau, heʼe ko te ʼAtua ʼe ʼofa kiā ia ʼaē ʼe ina foaki ʼaki te loto fiafia.” (2 Kolonito 9:7) ʼE mole fai he tae falā ʼi te ʼu Fale ʼo Te Puleʼaga pea mo te ʼu fale ʼaē ʼe fai ai te ʼu fakatahi lalahi ʼa te kau Fakamoʼoni ʼa Sehova. ʼE ʼi ai te ʼu puha ke feala ai ki he tahi ʼe loto kiai ke ina foaki hana meʼa ʼofa. ʼE mole he tahi ʼe ina ʼiloʼi ia te meʼa ʼaē neʼe foaki pea mo kumi pe foaki e ʼihi hanatou ʼu meʼa ʼofa. ʼE feala ke lahi age te ʼu meʼa ʼaē ʼe foaki e ʼihi; ko ʼihi ʼe mole lagi feala ke natou foaki ia he meʼa. Neʼe fakahā e Sesu ia te manatu ʼaē ʼe lelei, ʼi te temi ʼaē neʼe palalau ai ʼo ʼuhiga mo te ʼu puha tānakiʼaga falā ʼi te fale lotu ʼi Selusalemi, pea mo nātou ʼaē neʼe foaki meʼa ʼofa: ko te meʼa ʼaē ʼe maʼuhiga ʼe mole ko te lahi ʼo te falā ʼaē ʼe foaki kae ʼe ko te fealagia ʼaē ki he tahi ke ina foaki pea mo tana loto fia foaki.—Luka 21:1-4.

Kapau ʼe au liliu ko he Fakamoʼoni ʼa Sehova, ʼe tonu anai koa ke au fai faka mafola mo au?

ʼI te lahi ʼo te ʼatamai mālama ʼaē ʼe maʼu e he tahi ʼo ʼuhiga mo te Palatiso ʼi te kele ʼaē neʼe fakapapauʼi ʼi te pule ʼo te Puleʼaga ʼo Kilisito, ʼe ina fia vaevae anai mo te hahaʼi. ʼE kotou holi anai ki te fai ʼo te faʼahi ʼaia, heʼe ko he logo lelei!—Gāue 5:41, 42.

ʼE maʼuhiga ia te faʼahi ʼaia ke kotou fakahā ai ko koutou ko he tisipulo ʼa Sesu Kilisito. ʼI te Tohi-Tapu, ʼe fakahigoaʼi ia Sesu ko “te fakamoʼoni agatonu pea mo moʼoni.” ʼI tana ʼi te kele, neʼe fai faka mafola ʼo ʼui māʼana: “Kua fakaovi mai te puleʼaga ʼo selō,” pea neʼe ina fekauʼi tana kau tisipulo ke natou fai fēia. (Fakahā 3:14; Mateo 4:17; 10:7) Ki muli age, neʼe fakatotonu fēnei age e Sesu ki tana kau tisipulo: “Kotou ʼolo pea ke kotou fai ni ʼu tisipulo ʼi te hahaʼi ʼo te ʼu fenua fuli pē, . . . ʼo kotou akoʼi ia nātou.” Neʼe ina toe fakakikite foki ʼi muʼa ʼo te fakaʼosi, “ko te logo lelei ʼaenī ʼo te puleʼaga ʼe faka mafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa.”—Mateo 24:14; 28:19, 20.

ʼE lahi ia te ʼu faʼahiga fai moʼo faka mafola ia te logo lelei ʼaia. ʼE feala ke kotou kamata palalau mo tokotou ʼu kaumeʼa peʼe ko hokotou feʼilo. Ko ʼihi, ʼe natou faitohi peʼe natou fakaʼaogaʼi te telefoni. ʼE momoli e ʼihi ia te ʼu tohi ki he tahi ʼe natou ʼiloʼi lelei ʼe ina fia lau anai. ʼE ʼolo te kau Fakamoʼoni ʼi te ʼu ʼapi fuli ʼo tala ia te logo, heʼe natou fia maʼu ia te hahaʼi fuli.

ʼE maʼu ʼi te Tohi-Tapu ia te fakaafe ʼofa ʼaenī: “Ko te laumālie pea mo te fafine ʼohoana e nā haga ʼui: ‘Haʼu!’ Pea ko ʼaē ʼe logo kiai ke ina ʼui: ‘Haʼu!’ Pea ko ʼaē ʼe fia ʼinu ke haʼu; ko ʼaē ʼe loto kiai, ke ina toʼo noa te vai ʼo te maʼuli.” (Fakahā 22:17) Ko nātou ʼaē ʼe natou palalau ki te hahaʼi ʼo ʼuhiga mo te Palatiso ʼi te kele pea mo tona ʼu lelei, ʼe natou fai ʼaki he lotolelei, heʼe fonu tonatou loto ʼi te fia vaevae ʼo te logo lelei ʼaia.

ʼE lagi ʼe ʼi ai hakotou tahi ʼu fehuʼi ʼe kotou fia lagaʼi ʼo ʼuhiga mo te kau Fakamoʼoni ʼa Sehova pea mo te ʼu meʼa ʼaē ʼe natou tui kiai. ʼE lagi ʼe ʼi ai hanatou ʼu akonaki ʼe mole kotou tali. ʼE matou fia tali ki ʼakotou ʼu fehuʼi. ʼI te mole hao fuli ʼo te ʼu manatu ʼi te kaupepa lahi ʼaenī, ʼe matou fakaafe atu koutou ke kotou faka felōgoi mo te kau Fakamoʼoni ʼo tokotou kolo. ʼE kotou lava fai ia te faʼahi ʼaia ʼi tonatou Fale ʼo Te Puleʼaga peʼe ʼi te temi ʼaē ʼe ʼolo atu ai ki tokotou ʼapi. Peʼe kotou momoli takotou ʼu fehuʼi ki te kau Fakamoʼoni ʼa Sehova, ʼo kotou fakaʼaogaʼi ia te ʼu tuʼasila ʼaē ʼe tuʼu ʼi lalo.