Ko He Kaupepa Foʼou Moʼo Ako Te ʼu Meʼa ʼAē ʼe Fakamaʼua Mai e Te ʼAtua
“ ʼE FUA lelei anai te fakahā ʼo te kaupepa faigafua, mo fakahagatonu pea mo fakakaumeʼa ʼaia. Ko te faigafua pea mo lelei ʼo te ʼu akonaki ʼo te kaupepa ʼaia, ʼe ina uga anai te hahaʼi ʼaē ʼe fakamalotoloto pea mo nātou ʼaē ʼe nātou kumi te moʼoni ke nātou ʼui, ‘Ko te ʼAtua ʼe nofo moʼoni ʼi te lotolotoiga ʼo koutou.’ ” (1 Kolonito 14:25) Ko te ʼui ʼaia ʼa te Fakamoʼoni ʼa Sehova ʼi Tailani, ʼi tana talanoa ʼo ʼuhiga mo te kaupepa foʼou ʼaenī, Koteā ʼAē ʼe Fakamaʼua Mai e Te ʼAtua Kia Tatou? Neʼe fakahā e te Sosiete Watch Tower te kaupepa lahi ʼaia ʼi te ʼu Fakatahi Faka Tisitilike ʼaē “Ko Te Kau ʼAve Logo ʼo Te Tokalelei Fakaʼatua” ʼi te taʼu 1996 mo te 1997.
Ko te kaupepa ʼaia, ʼaē ko ʼona ʼu pasina e 32, pea mo ʼona ʼu paki matalelei, ʼe ko he kaupepa moʼo fai ʼaki he ʼu ako Tohi-Tapu. ʼE talanoa ʼo ʼuhiga mo te ʼu akonaki tāfito ʼo te Tohi-Tapu. Ko tona ʼu kupu ʼe faigafua pea mo nounou, pea ʼe ina fakamahino lelei mai te ʼu meʼa ʼaē ʼe fakamaʼua mai e te ʼAtua kia tatou. ʼE mole faigataʼa anai te mahino lelei ʼa te kau lautohi ki te kaupepa ʼaia. ʼE lava feafeaʼi anai hakotou fai he ako Tohi-Tapu ʼaki te kaupepa foʼou ʼaia?
Koutou fakaʼaogaʼi te ʼu fehuʼi. ʼI te kamata ʼo te ʼu kapite fuli ʼo te kaupepa, ʼe tuʼu ai te ʼu fehuʼi. Pea ʼi te ʼu fehuʼi fuli, ʼe pipiki ki ai te ʼu numelo ʼo te ʼu palakalafe ʼaē ʼe maʼu ai te ʼu tali. ʼE feala ke fakaʼaogaʼi te ʼu fehuʼi ʼaia moʼo tokoni ki te teuteuʼi ʼo te ako, pea mo toe fakamanatuʼi te ako. Ohage la, ʼi takotou kamata he ako Tohi-Tapu, ʼe feala anai takotou fai te ʼu fehuʼi kia ia ʼaē ʼe ako, ke feala hana tuku atu tana ʼu manatu. ʼE mole tonu anai ke koutou fakatonutonuʼi tana ʼu tali ʼi te moʼi temi pe ʼaia, kae ʼe feala takotou hoko atu te ako. Pea ʼi te fakaʼosi ʼo te ako, ʼe feala takotou toe fai te ʼu fehuʼi moʼo vakaʼi peʼe kua feala hana tali atu ʼo mulimuli ki te Tohi-Tapu.
Koutou vakaʼi te ʼu vaega faka Tohi-Tapu. ʼI te ʼu ako fuli, ko te ʼu fakamatala nounou ʼo te ʼu moʼoni faka Tohi-Tapu, ʼe muli kiai mo te ʼu vaega faka Tohi-Tapu ʼaē ʼe lagolago ki te ʼu manatu ʼaia. Mai tona ʼaluʼaga ʼaē ʼe lahi te ʼu vaega ʼaē ʼe mole tohi fuli tonatou ʼu kupu ʼi te kaupepa, koia ʼe maʼuhiga ke tou fakaloto mālohiʼi ia ia ʼaē ʼe ako ke ina vakaʼi te ʼu vaega ʼaia ʼi tana Tohi-Tapu totonu. ʼE tonu ke ina lau pea mo ina metitasioʼi te Folafola ʼa te ʼAtua ʼi muʼa ʼo hana maʼuliʼi.—Sosue 1:8.
Koutou faka maʼuhigaʼi te ʼu paki. ʼE lahi te ʼu paki ʼaē ʼe tuʼu ʼi te kaupepa—ʼe ko paki matalelei e 50 tupu. Ko te ʼu paki ʼaia neʼe mole fai pe moʼo sioʼi, kae ʼe toe ʼi ai foki tonatou ʼaoga moʼo fai ʼaki te ako. Ohage la, ko te ʼu ako fakaʼosi e lua (ʼaē ʼe tuʼu takitahi ʼi te pasina) ko tonā ʼu kupu tāfito “Ke Nātou Fai Te Finegalo ʼo Te ʼAtua” pea mo “Takotou Fakatotonu ʼAē Ke Koutou Tauhi Ki Te ʼAtua.” Ko te ʼu paki ʼaē ʼe tuʼu ʼi te ʼu pasina ʼaia e lua, ʼe fakahā ai te tuputupu ʼa he Kilisitiano ʼi te faʼahi fakalaumālie, ʼi tana fai te fagonogono faigamālie, ʼi tana kau ki te faka mafola ʼi te ʼu ʼapi, ʼi tana foaki tona maʼuli ki te ʼAtua, pea mo papitema. ʼI takotou fakahā te ʼu paki ʼaia kia ia ʼaē ʼe ako, ʼe koutou tokoni anai ke mahino ki te ʼu meʼa ʼaē ʼe tonu ke ina fai, ke feala hana tauhi ki te ʼAtua.
Koteā te meʼa ʼaē ʼe tonu ke fai mo kapau ko he tahi ʼe mole faʼa poto lelei ʼi te lautohi, peʼe mole poto ʼi te lautohi? ʼE fai e te Sosiete te foʼi fime ʼo te kaupepa lahi ʼaia ʼi te ʼu lea kehekehe. Neʼe puke ʼi te foʼi fime ʼaia te ʼu meʼa fuli ʼaē ʼe tohi ʼi te kaupepa, pea mo te ʼatu vaega ʼaē ʼe tuʼu ʼi te ʼu palakalafe. Neʼe fēnei te puke ʼo te foʼi fime: ʼE lau te ʼuluaki fehuʼi, pea mo te palakalafe (peʼe ko te ʼu palakalafe) ʼaē ʼe tali kiai, pea mo te tahi ʼu vaega ʼaē ʼe tuʼu ʼi te palakalafe ʼaia. Pea ʼe lau te fehuʼi ʼaē ʼe hoa kiai, mo te palakalafe pea mo te ʼu vaega ʼaē ʼe tali kiai, ʼo toe feiā aipe mo te ʼu palakalafe ʼaē ʼe hoa kiai. Ko ia ʼaē ʼe ako, ʼe feala ke ina fakalogo te foʼi fime mokā ina teuteuʼi tana ako. ʼE toe feala foki ke fakaʼaogaʼi te foʼi fime lolotoga te ako.
Ko nātou ʼaē neʼe kau ki te fakatahi neʼe kua nātou lotomālohi ke nātou fakaʼaogaʼi te kaupepa lahi ʼaia ʼi te gāue faka mafola. Ohage la, hili kiai ni ʼu ʼaho ʼi te ʼosi maʼu ʼo te kaupepa ʼaia, ko te ʼu pionie e lua (ko te ʼu kaugā fai faka mafola katoa) ʼi Amelika, neʼe nā tuku te kaupepa ʼaia ki tana ʼaʼahi, ʼe ko te tama mo te taʼahine ʼe nonofo fakatahi. ʼI tanā vakaʼi te tānakiʼaga ʼo te ʼu kupu ʼo te kaupepa, neʼe nā tokagaʼi te ako ʼaē ko “Te ʼu Aga ʼAē ʼe Fehiʼa Kiai Te ʼAtua.” Neʼe ʼui e te taʼahine: “Neʼe akoʼi tuʼumaʼu mai kia ʼau ʼe mole feala ke fehiʼa te ʼAtua ki he meʼa—heʼe ʼofa te ʼAtua kia meʼa fuli. ʼE ʼau ʼuluaki lau anai te ako ʼaia.” ʼI te toe liliu mai ʼa te ʼu pionie ʼaia e lua ʼi te vāhaʼa ki muli age, neʼe ʼui age e te taʼahine: “Neʼe ʼau lau te kaupepa foʼou. ʼE ko he meʼa faigataʼa tamā fai te ʼu meʼa fuli ʼaē ʼe tonu ke ma fai. ʼE mole tali māua e te ʼAtua—koteʼuhi ʼe mole heʼeki ma ʼohoana. Kae kua ma fakatotonu ke ma fai he ʼu fakatuʼutuʼu ke ma ʼohoana ʼi te Feliaono ka haʼu.” ʼI tanā fāʼufua ki te ʼu pionie, neʼe nā ʼui fēnei: “ ʼE ma fakalelei atu ʼi tamā mole heʼeki ako te Tohi-Tapu, kae ʼi te temi ʼaenī, kua ma logo fīmālie.”
Koia, koutou fakaʼaogaʼi te kaupepa foʼou Fakamaʼua. ʼE ko he kaupepa ʼe lelei moʼo tokoni ki te hahaʼi ke nātou ako te ʼu meʼa ʼaē ʼe fakamaʼua mai e te ʼAtua.
[Paki ʼo te pasina 17]
ʼE feafeaʼi anai takotou fakaʼaogaʼi te kaupepa foʼou?