Tou Tokoni Ki Te Hahaʼi ʼAē ʼe Mole Heʼeki Fakapotopoto Ke Nātou Mahino
1 ʼAki te gāue ʼaē ko te fai ʼo ni ʼu tisipulo, ʼe tou akoʼi ki te hahaʼi te ʼu meʼa ʼaē ʼe fakamaʼua e te ʼAtua kia nātou. (Mat. 28:19, 20) ʼI te malamanei katoa, ko te toko nima miliona tupu ʼe nātou faiga mālohi ke nātou fakahoko te faʼahi ʼaia. Ko te ʼu fua lelei ʼo tatatou gāue ʼe mole fakafuafua ʼaki te ʼu hola ʼaē ʼe tou fai, te ʼu tohi ʼaē ʼe tou tufa, peʼe ko te ʼu ako Tohi-Tapu ʼaē kua tou kamata. ʼE hoki feala ke tou ʼui kua tou fakahoko tatatou fakatuʼutuʼu, mo kapau kua mahino te hahaʼi pea mo nātou maʼuliʼi te ʼu meʼa ʼaē ʼe nātou ako.
2 Ko tatatou tokoni ki te hahaʼi ʼi te faʼahi fakalaumālie ʼe pipiki kiai tatatou “fakamahino kia nātou ʼaē ʼe mole heʼeki fakapotopoto.” (Pes. 119:130) ʼE hoki malave ki te loto ʼo te hahaʼi, pea mo nātou maʼuliʼi mo kapau ʼe nātou “mahino ki tona faka ʼuhiga.” (Mat. 15:10) ʼI te mafola pea mo te tuputupu ʼo tatatou gāue, kua mahino lelei kia tatou, ʼe tonu ke faigafua tatatou ʼu palalau pea mo tatatou faʼahiga fai ʼo te ako. Ko te tupuʼaga la ʼaia ʼo te tā e te Sosiete te kaupepa Koteā ʼAē ʼe Fakamaʼua Mai e Te ʼAtua Kia Tatou? ʼE tou maʼu ai te ʼu fakamahino lelei ʼo te ʼu akonaki tāfito ʼo te Tohi-Tapu. Ko te ʼu kapite ʼe nounou, ko te ʼu kupu ʼaē ʼe fakaʼaogaʼi ai ʼe mole faigataʼa, pea ʼe tou mahino gafua ki te ʼu meʼa ʼaē ʼe akoʼi ai, ʼo faigafua ai te tufa ʼo te kaupepa ʼaia.
3 Ko te kaupepa ʼaia e tahi ka tufa anai mo te ʼu nusipepa lolotoga te māhina ʼo ʼApelili pea mo Maio. ʼE kole mai mokā koutou fakatuʼutuʼu takotou fai faka mafola ʼi te vāhaʼa fuli, pea ke koutou fakatuʼutuʼu ke koutou tufa te ʼu nusipepa ʼi te ʼu Moeaki, kae ke koutou faka maʼuhigaʼi te tufa ʼo te kaupepa ʼi tokotou minisitelio lolotoga te vāhaʼa. Koutou ʼave te kaupepa ki te hahaʼi ʼaē neʼe kua nātou tali he ʼu tohi ki muʼa atu. Tou manatuʼi ko te kaupepa ʼaia ʼe feala ke ʼaoga ʼaupito moʼo akoʼi ʼo te fānau, mo te hahaʼi ʼaē ʼe palalau ʼi he tahi lea, pea mo nātou ʼaē ʼe mole faʼa popoto lelei ʼi te lautohi.
4 Tou Fakaʼaogaʼi He ʼu Palalau ʼe Faigafua: Ka tou fakahā te kaupepa Fakamaʼua, tou fakaʼaogaʼi te pasina 2, ʼaē ʼe fakamahino ai ko “te kaupepa lahi ʼaenī ʼe ko he kaupepa moʼo fai ʼaki he ako Tohi-Tapu.” Tou fakahā age te palakalafe 3 ʼi te pasina 3, ke mahino kia ia ʼaē ʼe fai palalau mo tatou, pe koʼe ʼe tonu ke ina ako te Tohi-Tapu. Tou uga tana fia logo, ʼo tou fakaʼaogaʼi he ʼu kupu tāfito ʼo te kaupepa, ʼe nātou fakahā ai he ʼu moʼoni faigafua ʼo te Tohi-Tapu. Tou fakahā ki ai ʼe ko he meʼa fakafiafia te meʼa ʼaē ka ina ako ʼi te kaupepa ʼaia, pea mo tou tokoni ki ai.
5 Tou Fai He Ako ʼe Tuputupu Māmālie: Ko tatatou fakatuʼutuʼu ʼe mole gata ʼaki pe tatatou fai ʼo te ʼu ako Tohi-Tapu—kae ʼe tou loto ke tou fai he ʼu tisipulo ʼe liliu anai ko he hahaʼi ʼe lagolago mālohi ki te tauhi moʼoni. ʼE feala ke fai fuli te kaupepa lolotoga ni ʼu vāhaʼa, pea ʼe tonu ke hoko atu te ako ʼi te tohi Te ʼAtamai Mālama. (Vakaʼi te kiʼi nota ʼi te lalo pasina 31.) ʼI te kamata ʼo takotou ako, ʼe tonu ke koutou tokoni kia ia ʼaē ʼe ako ke ina ʼiloʼi te kautahi ʼa Sehova. (Vakaʼi te tohi Comment raisonner, pasina 273 ki te 274.) Koutou fakahā age te maʼuhiga ʼo te ʼu fono ʼo te kokelekasio, pea mo koutou fakamahino ko te kau ki te ʼu fono ʼaia ʼe tokoni anai kia tatou ke tou mahino peʼe feafeaʼi tatatou maʼuliʼi te tauhi moʼoni.—Hep. 10:24, 25.
6 ʼE mahino ia, ko tatatou kau katoa ki te gāue makehe ʼaia lolotoga te māhina ʼo ʼApelili pea mo Maio, ʼe tou maʼu ai anai te fiafia, ʼuhi ko tatatou tokoni ki te hahaʼi fakamalotoloto ke nātou “maʼu te mahino” ʼaē ʼe ina taki nātou ki te maʼuli.—Taag. 4:5.