Te ʼu Tapuakina ʼo Te Gāue Pionie
“Ko te tapuakina ʼa Sehova—koʼena te meʼa ʼaē ʼe ina fakakoloaʼia he tahi, pea ʼe mole ina hilifaki kiai he ʼu mamahi.”—Tāʼaga Lea 10:22.
1, 2. (a) Koteā te manatu ʼa te pionie ʼo ʼuhiga mo te minisitelio ʼi te temi katoa? (b) He koʼe ʼe lahi age te fiafia ʼaē ʼe maʼu e te kau pionie ʼi te gāue ʼaē ko te fai ʼo ni ʼu tisipulo?
“ ʼE ʼI AI koa he tahi meʼa ʼe fakafiafia age ʼi takotou sio ki he tahi neʼe ako mo koutou kua liliu ʼo fakavikiviki mālohi kia Sehova? ʼE ko he meʼa fakaloto mālohi pea mo fakamālohiʼi ʼo te tui, hakita sio ki te mālohi ʼo te Folafola ʼa te ʼAtua ʼe ina uga te hahaʼi, ke nātou fai he ʼu fetogi ʼi tonatou maʼuli ke leleiʼia nātou e Sehova.” Neʼe ko te tohi ʼaia ʼa he pionie ʼi Kanata kua taʼu 32 tana gāue ʼi te minisitelio ʼi te temi katoa. ʼO ʼuhiga mo tana gāue pionie, ʼe ina ʼui fēnei: “ ʼI taku manatu ʼe mole he tahi age meʼa, ʼe feala ke ina foaki mai ia te fiafia ʼaia.”
2 ʼE koutou lototahi koa la mo te ʼui ʼaē ʼe lahi age te fiafia ʼaē ʼe tou maʼu mokā tou tokoni ki he tahi ke ina maʼu te ala ʼo te maʼuli? ʼE mahino ia, ʼe mole ko te kau pionie ʼāteaina pe ʼaē ʼe nātou maʼu te taʼi fiafia ʼaia. Ko te ʼu kaugana fuli ʼa Sehova neʼe fakamaʼua kia nātou ke nātou “fai ni ʼu tisipulo,” pea ʼe nātou faiga ke nātou fakahoko te faʼahi ʼaia. (Mateo 28:19) Kae, mai tona ʼaluʼaga ʼaē ʼe feala ke lahi te ʼu hola ʼaē ʼe fakaʼaogaʼi e te kau pionie ʼi te minisitelio, koia ʼi te agamāhani ʼe nātou ʼiloʼi lelei te fiafia ʼaē ʼe maʼu ʼi te fai ʼo ni ʼu tisipulo. Kae ʼe tou maʼu te tahi ʼu fakapale ʼi te gāue pionie. Koutou fai palalau mo te kau pionie, pea ʼe nātou fakahā atu anai ko te selevisi pionie ʼe ko he faʼahi lelei ʼaia ke tou maʼu ai ‘te tapuakina ʼa Sehova ʼaē ʼe ina fakakoloaʼia he tahi.’—Tāʼaga Lea 10:22.
3. Koteā te meʼa ʼe feala ke ina uga ai tatou ke hoko atu tatatou tauhi ʼaē kia Sehova?
3 Mole heʼeki faʼa fualoa, neʼe fakafehuʼi te ʼu pionie ʼi te ʼu potu kehekehe ʼo te malamanei ke nātou fakamatala te ʼu tapuakina ʼaē neʼe nātou maʼu ʼi tonatou minisitelio. Tou vakaʼi te ʼu meʼa ʼaē neʼe nātou fakamatala. Kae ʼaua naʼa koutou lotovaivai, mo kapau ʼe faka tuʼakoi takotou gāue ʼuhi ko takotou mahamahaki, peʼe kua koutou matutuʼa, peʼe ko he tahi age ʼu ʼaluʼaga. Tou manatuʼi, ko te meʼa ʼaē maʼuhiga tāfito, ʼe ko te tauhi kia Sehova ʼaki totatou nefesi katoa, ʼo mulimuli ki totatou ʼu fealagia. Tahi ʼaē meʼa, ko takotou logo ki te ʼu fakamatala ʼa ʼihi pionie ʼe feala ke fakatuputupu ai takotou fia kau ki te gāue ʼaoga ʼaia mo kapau ʼe feala.
ʼE Tou Logoʼi Ia Te Fiafia Lahi
4, 5. (a) He koʼe ko te fakahā ʼo te logo lelei ki te hahaʼi ʼe fakapale ai tatou? (b) Koteā te manatu ʼa te kau pionie ʼo ʼuhiga mo tanatou kau katoa ki te minisitelio?
4 Neʼe ʼui fēnei e Sesu: “ ʼE lahi age te fiafia ʼi takita foaki, ʼi takita tali.” (Gāue 20:35) ʼIo, kapau ʼe tou foaki katoa, pea ʼe tou maʼu ai anai he ʼu fakapale. (Tāʼaga Lea 11:25) ʼE moʼoni tāfito te faʼahi ʼaia ʼi te fakahā ʼo te logo lelei ki te hahaʼi. ʼE moʼoni, koteā te tahi meʼa ʼe lahi ake ʼi hakita tokoni ki he tahi ke ina maʼu ia te ʼatamai mālama ʼo ʼuhiga mo te ʼAtua, ʼaē ʼe ina taki ki te maʼuli heʼegata?—Soane 17:3.
5 ʼE mole fakapunamaʼuli te ʼu palalau fakafiafia ʼaē ʼe tau fai e te kau pionie, ʼo ʼuhiga mo tanatou kau katoa ki te minisitelio. Neʼe ʼui fēnei e te pionie Pilitania e taʼu 64: “ ʼE ʼau ʼiloʼi ʼe mole he tahi age gāue ʼe ina foaki mai kia ʼau ia te fiafia ʼaē ʼe ʼau maʼu ʼi taku fakahā ia te moʼoni ki te hahaʼi.” Neʼe fakahā e te fafine vitua mai Zaïre ia te faka ʼuhiga ʼo te gāue pionie kia ia: “Ko te gāue pionie neʼe ina fakaloto mālohiʼi moʼoni ʼau ʼi te ʼosi mate ʼo toku ʼohoana ʼaē neʼe ʼau ʼofa mamahi ai. ʼI te lahi ʼo taku tokoni ki te hahaʼi ʼi te fai faka mafola, neʼe siʼisiʼi ai taku manatuʼi toku ʼohoana. ʼE ʼau tui ki te ʼu fakapapau ʼa Sehova pea ʼe ʼau fakakaukauʼi peʼe lava feafeaʼi haku tokoni ki te ʼu hahaʼi ʼaē ʼe ako Tohi-Tapu mo ʼau ke nātou fai he ʼu fetogi ʼi tonatou maʼuli. ʼI te ʼu afiafi fuli, ʼe ʼau moe fīmālie, pea ʼe fiafia ʼaupito toku loto.”
6. Koteā te fiafia makehe ʼaē neʼe maʼu e ʼihi pionie?
6 Ko ʼihi neʼe nātou pionie ʼi he ʼu taʼu e hogofulu tupu neʼe nātou maʼu te fiafia makehe ʼi tanatou gāue ʼi te ʼu kolo mamaʼo, ki te fakatuʼu ʼo he ʼu kokelekasio, ʼaē ki muli age neʼe tuputupu ko he ʼu silikosikilipisio. Ohage la, ʼi te kolo ʼo Abashiri, ʼi Hokkaido (te motu ʼi te potu tokelau ʼo Saponia), ʼe ʼi ai te tuagaʼane neʼe pionie talu mai ia taʼu e 33. Neʼe ina manatuʼi tana ʼuluaki fakatahi faka silikosikilipisio—ʼaē neʼe fai maʼa nātou ʼaē ʼi Hokkaido—neʼe nātou toko 70 ʼi te fakatahi ʼaia. Pea kua feafeaʼi ʼi te temi nei? Kua maʼu te ʼu silikosikilipisio e 12 ʼi te motu ʼaia, pea ko tona ʼu kaugā fai faka mafola ʼe toko 12 000. Koutou fakakaukauʼi atu muʼa te fiafia lahi ʼaē neʼe ina maʼu mokā kau ki te ʼu fakatahi mo te ʼatu ʼu kaugā fai faka mafola ʼo te Puleʼaga ʼo te motu ʼaia!
7, 8. Koteā te fiafia ʼaē neʼe maʼu e ʼihi neʼe fualoa tanatou gāue pionie?
7 Ko ʼihi kua fualoa tanatou pionie neʼe nātou fiafia ʼi tanatou sio ki te kau ako Tohi-Tapu kua papitema, pea kua nātou maʼu te ʼu pilivilesio lahi ʼi te gāue fai faka mafola. ʼI Saponia ko te tuagaʼane neʼe gāue pionie ʼi te ʼu telituale kehekehe e hiva talu mai te taʼu 1957, pea ʼe ina manatuʼi neʼe ina tuku te Réveillez-vous! ki te fafine neʼe gāue ʼi te fale paʼaga. Hili kiai māhina e hiva pea papitema te fafine ʼaia. Ki muli age pea ʼohoana te fafine, pea liliu mo tona ʼohoana ko te ʼu pionie makehe. Neʼe fiafia te tuagaʼane pionie ʼaia, koteʼuhi ʼi te tolu telituale ʼaē neʼe hinoʼi kiai, neʼe ʼaʼahi tana kokelekasio e te tagata taupau faka silikosikilipisio foʼou pea mo tona ʼohoana—ʼaē neʼe ko te fafine neʼe ako Tohi-Tapu mo ia ʼi muʼa atu!
8 ʼE mole tou punamaʼuli ki te ʼui ʼa te kau pionie, ko te selevisi pionie ʼi te temi katoa ʼe “ko he pilivilesio maʼuhiga ʼe tonu ke tou manako kiai,” ohage ko tona ʼui e te pionie e taʼu 22!
ʼE Hā Te Tokaga ʼa Sehova
9. ʼUhi ko ia ʼaē neʼe ina foaki ia meʼa fuli, koteā te meʼa ʼe fakapapau e Sehova ki tana ʼu kaugana, pea koteā tona faka ʼuhiga kia tatou?
9 Ko Sehova, ia ia ʼaē ʼe ina foaki ia meʼa fuli, ʼe ina fakapapau ʼe lagolago anai ki tana ʼu kaugana, pea mo tokaga kia nātou ʼi te faʼahi fakalaumālie pea mo te faʼahi fakasino. Neʼe tonu te ʼu palalau ʼaē neʼe fai e te Hau ko Tavite: “Neʼe ʼau tūpulaga, pea kua ʼau matuʼa foki, kae neʼe mole ʼau sio ki te agatonu kua līaki katoa, pea neʼe mole ʼau sio ki tona hākoga ʼe ina kumi he pane.” (Pesalemo 37:25) ʼE mahino ia, ko te fakapapau fakaʼatua ʼaia ʼe mole ina faka lākatonuʼi tatou ke mole tou fakahoko totatou maʼua ki totatou famili ʼi te faʼahi fakasino, peʼe ke tou fakalogo ki te manavaʼofa ʼo totatou ʼu tēhina Kilisitiano. (1 Tesalonika 4:11, 12; 1 Timoteo 5:8) Kae kapau ʼe tou fai he ʼu sakilifisio ʼi totatou maʼuli ke lahi age tatatou tauhi kia Sehova, pea ʼe mole līaki anai tatou.—Mateo 6:33.
10, 11. ʼAki te ʼu meʼa ʼaē neʼe hoko kia nātou, koteā te meʼa kua ʼiloʼi e te kau pionie ʼe feala ke fai e Sehova?
10 Ko te kau pionie ʼi te malamanei katoa, ʼe nātou ʼiloʼi ʼaki te meʼa ʼaē neʼe hoko kia nātou, ʼe tokoni ia Sehova kia nātou ʼaē ʼe falala kia te ia. Tou vakaʼi te meʼa neʼe hoko ki te taumatuʼa pionie neʼe nā ʼolo ki te kiʼi kolo veliveli neʼe ʼaoga kiai he ʼu kaugā fai faka mafola ʼo te Puleʼaga. Hili kiai te ʼu māhina, pea tahitahiga te maʼu ʼo he gāue, pea neʼe mole kei ʼi ai hanā falā. Pea nā maʼu te pepa ʼe fakahā ai ʼe tonu ke nā totogi te 8 100 ki te assurance ʼo tanā motokā. Neʼe fakamahino fēnei e te tēhina ʼaia: “Neʼe mole feala ke ma totogi te assurance ʼaia. Neʼe ma faikole mālohi ʼi te po ʼaia.” ʼI te ʼaho ake neʼe nā maʼu te kate ʼe fakamomoli mai e te famili ʼe fakahā ai neʼe toe faigataʼaʼia foki mo nātou ʼi te faʼahi ʼo te paʼaga. Neʼe fakamahino ʼi te kate ʼaia, neʼe maʼu e te famili ʼaia he paʼaga neʼe foaki age e te puleʼaga, pea mai tona ʼaluʼaga ʼaē neʼe lahi te falā ʼaia, koia neʼe nātou fia vaevae ai mo te taumatuʼa pionie ʼaia. Neʼe nātou fakamomoli mai ai te seki ko te 8 100! Neʼe ʼui e te tēhina pionie: “ ʼE mole toe galo anai ia ʼau ia te ʼaho ʼaia—neʼe ʼau fiafia ʼaupito! Neʼe ma leleiʼia ʼaupito te manavaʼofa ʼo te famili ʼaia.” ʼE toe leleiʼia foki e Sehova te loto fia foaki ʼaia, pea ʼe ʼalutahi mo te loto fia foaki ʼaē ʼe ina fakaloto mālohiʼi ke maʼu e tana kau kaugana.—Tāʼaga Lea 19:17; Hepeleo 13:16.
11 ʼE lahi te ʼu pionie ʼe feala ke nātou fakamatala he ʼu meʼa feiā. Koutou fakafehuʼi nātou, pea ʼe nātou tala atu anai neʼe mole heʼeki “līaki katoa” ia nātou. Ko te pionie e taʼu 72, neʼe ina ʼui fēnei ʼi tana toe manatuʼi te ʼu taʼu e 55 ʼaē neʼe gāue pionie ai: “Neʼe mole he temi neʼe līaki ai ʼau e Sehova.”—Hepeleo 13:5, 6.
“Ko He Faʼahiga Fai ʼe Lelei Ke Tou Fakaōvi Ai Kia Sehova”
12. He koʼe ko te kalagaʼi ʼo te logo lelei ʼe ko he pilivilesio taulekaleka?
12 ʼE tou maʼu te pilivilesio ʼe fakatotonu mai e Sehova ke tou kalagaʼi te logo lelei ʼo tona Puleʼaga. ʼE ina faka ʼuhiga tatou—logope totatou heʼe haohaoa—ko tana ʼu “kaugā gāue” ʼi te gāue ʼaia ʼaē ko te hāofaki ʼo te hahaʼi. (1 Kolonito 3:9; 1 Timoteo 4:16) ʼI tatatou fai faka mafola ki te hahaʼi ʼo ʼuhiga mo te Puleʼaga ʼo te ʼAtua, mo tatatou fakahā te fakaʼosi ʼo te agakovi, mo tatatou fakamahino ki te hahaʼi tona ʼofa taulekaleka ʼi tana foaki mai te sakilifisio, mo tatatou fakahā age tana Folafola maʼuli pea mo tatatou akoʼi ki te hahaʼi ʼaē ʼe lotolelei te ʼu meʼa taulekaleka ʼaē ʼe maʼu ʼi tana Folafola, ʼe tou fakaōvi ai ki totatou Tupuʼaga, ko Sehova.—Pesalemo 145:11; Soane 3:16; Hepeleo 4:12.
13. Koteā te ʼui ʼa ʼihi ʼo ʼuhiga mo te pikipikiga ʼo te fua ʼo tanatou gāue pionie ki tanatou ʼu felogoi ʼaē mo Sehova?
13 ʼE feala ke lahi te temi ʼaē ʼe fakaʼaogaʼi e te kau pionie ʼi te māhina fuli, ke nātou ako pea mo nātou akoʼi ki te hahaʼi te ʼu meʼa ʼaē ʼo ʼuhiga mo Sehova. ʼE lave feafeaʼi te meʼa ʼaia ki tanatou ʼu felogoi ʼaē mo te ʼAtua? Neʼe tali fēnei e te tagata ʼāfea ʼi Falani neʼe pionie ia taʼu e hogofulu: “Ko te gāue pionie ʼe ko he faʼahi lelei ʼaia ke tou fakaōvi ai kia Sehova.” Ko te tahi tēhina ʼi te fenua ʼaia, neʼe pionie lolotoga taʼu e 18, pea ina ʼui fēnei: “Ko te gāue pionie ʼe ina faka fealagia mai ke tou ‘ ʼiloʼi pea ke tou sio ko Sehova ʼe lelei,’ pea ʼi te ʼaho fuli ʼe toe ʼāsili mālohi ai tatatou ʼu felogoi mo totatou Tupuʼaga.” (Pesalemo 34:8) ʼE toe feiā te manatu ʼa te tuagaʼane ʼi Pilitania neʼe pionie lolotoga taʼu e 30. Neʼe ina ʼui fēnei: “Neʼe ʼāsili taku fakaōvi kia Sehova ʼi taku kole tona laumālie ke ina takitaki ʼau ʼi toku minisitelio. ʼE lahi te ʼu lakaga neʼe ʼau logoʼi moʼoni ai, ʼe ko te laumālie ʼo Sehova ʼaē neʼe ina taki ʼau ki he ʼapi ʼi tona lakaga tonu.”—Vakaʼi ia Gāue 16:6-10.
14. Koteā te ʼu fua lelei ʼaē ʼe maʼu e te kau pionie ʼi tanatou fakaʼaogaʼi te Tohi-Tapu pea mo te ʼu tohi faka Tohi-Tapu moʼo akoʼi ʼo te hahaʼi?
14 ʼE lahi te kau pionie ʼe nātou tokagaʼi ko te fakaʼaogaʼi ʼo te Tohi-Tapu pea mo te ʼu tohi faka Tohi-Tapu ʼi te ʼaho fuli moʼo fakamahino pea mo akoʼi ʼo te ʼu moʼoni faka Tohi-Tapu, ʼe tokoni kia nātou ke nātou tuputupu ʼi te mālama ki te Folafola ʼa te ʼAtua. Ko te tēhina e taʼu 85 ʼi Sepania neʼe pionie lolotoga taʼu e 31, neʼe ina fakamahino fēnei: “Ko te gāue pionie neʼe tokoni kia ʼau ke ʼau maʼu te ʼatamai mālama ʼo ʼuhiga mo te Tohi-Tapu, pea ʼe ʼau fakaʼaogaʼi moʼo tokoni ki te hahaʼi ke nātou ʼiloʼi ia Sehova pea mo tana ʼu fakatuʼutuʼu.” Neʼe ʼui fēnei e te tuagaʼane ʼi Pilitania neʼe pionie lolotoga taʼu e 23: “Ko te gāue pionie neʼe tokoni kia ʼau ke ʼau holi tāfito ki te meʼa kai fakalaumālie.” Kapau ʼe koutou fakamahino ki te hahaʼi te “tupuʼaga ʼo te falala ʼaē ʼe ia koutou,” pea ʼe feala ke ina fakaloto mālohiʼi ai takotou tui ki te ʼu meʼa ʼaē ʼe koutou tui papau kiai. (1 Petelo 3:15) ʼE ʼui fēnei e te pionie ʼi Ositalalia: “Ko te gāue pionie ʼe ina fakatuputupu taku tui ʼi taku palalau ki te hahaʼi.”
15. Koteā te ʼu fetogi ʼaē neʼe fai e te tokolahi ke feala hanatou pionie pea mo nātou hoko atu te gāue ʼaia, pea koteā tona tupuʼaga?
15 ʼE moʼoni, ʼe ʼiloʼi papau e te ʼu pionie ʼaia neʼe nātou fili he gāue ʼe nātou maʼu ai te ʼu tuʼuga tapuakina mai ia Sehova. ʼE mole fakapunamaʼuli te lotolelei ʼa te tokolahi ke nātou fai he ʼu fetogi ʼi tonatou maʼuli, ʼo sakilifisioʼi tanatou gāue fakamālama pea mo tonatou ʼu koloā, ke feala ai hanatou kau ki te gāue pionie pea ke hoko atu tanatou fai te gāue ʼaia!—Tāʼaga Lea 28:20.
ʼE Lotolelei Koa Tokotou Loto Ke Lahi Age Takotou Gāue?
16, 17. (a) Kapau ʼe koutou feʼekeʼaki peʼe feala hakotou pionie peʼe kailoa, koteā te meʼa ʼaē ʼe tonu ke koutou fai? (b) Koteā te meʼa ʼaē ʼe logoʼi e ʼihi mo kapau ʼe mole feala tanatou pionie?
16 ʼI tatatou ʼosi vakaʼi te ʼu fakamatala ʼaē neʼe fai e te kau pionie ʼo ʼuhiga mo te ʼu tapuakina ʼaē ʼe nātou maʼu ʼi tonatou minisitelio, ʼe lagi koutou feʼekeʼaki peʼe feala hakotou pionie. Kapau koia ʼaia, he koʼe ʼe mole koutou palalau mo he pionie neʼe fua lelei tana gāue ʼi te minisitelio? Tahi ʼaē meʼa, ʼe feala hakotou palalau mo he tagata ʼāfea ʼi te kokelekasio, ko he tahi ʼe ina ʼiloʼi koutou—tokotou maʼuli fakasino, tokotou ʼu tuʼakoi, pea mo tokotou ʼu maʼua faka famili. (Tāʼaga Lea 15:22) Ko te ʼu tokoni ʼaē ka fai atu e ʼihi, ʼe feala ke tokoni atu kia koutou ke koutou fakafuafua fakalelei peʼe feala hakotou pionie. (Vakaʼi ia Luka 14:28.) Kapau ʼe feala hakotou pionie, pea ʼe lahi anai te ʼu tapuakina ʼaē ka koutou maʼu.—Malakia 3:10.
17 Kae, e feafeaʼi koa ki te tokolahi ʼo te ʼu kaugā fai faka mafola ʼo te Puleʼaga ʼaē ʼe mole feala ke nātou pionie, logope la tanatou loto ʼaē ke lahi tanatou kau ki te minisitelio? Ohage la, tou vakaʼi te manatu ʼa te tuagaʼane ʼe gāue mālohi ki te akoʼi ʼo tana ʼu tamaliki e toko fā. Neʼe ina ʼui fēnei: “ ʼE ʼau lotomamahi he neʼe ʼau pionie katoa, kae ʼi te temi nei, ʼuhi ko toku ʼu ʼaluʼaga, ʼe mole kei feala ke lahi taku gāue ʼi te minisitelio ohage ko taku fai ʼi muʼa atu te meʼa ʼaē ʼe ʼau loto kiai.” Neʼe ʼofa mamahi te tuagaʼane ʼaia ki tana ʼu tamaliki pea neʼe loto ia ke ina foaki age te ʼu meʼa ʼaē ʼe ʼaoga kia nātou. Tahi ʼaē meʼa, neʼe loto te tuagaʼane ke lahi tana gāue ʼi te fai faka mafola. ʼE ina fakamahino fēnei: “ ʼE ʼau leleiʼia te minisitelio.” ʼe toe maʼu pe e ʼihi Kilisitiano te ʼu manatu ʼaia, ʼo uga nātou e te ʼofa ki te ʼAtua ke nātou tauhi kia Sehova ‘mo tonatou loto katoa.’—Pesalemo 86:12.
18. (a) Koteā te meʼa ʼaē ʼe fakaʼamu e Sehova ke tou fai? (b) He koʼe ʼe mole tonu ke tou lotovaivai mo kapau ʼe faka tuʼakoi te ʼu meʼa ʼaē ʼe feala ke tou fai?
18 Tou manatuʼi, ʼe loto ia Sehova ke tou tauhi kia te ia ʼaki totatou nefesi katoa. Kae ʼe mole tatau te gāue ʼa te ʼu nefesi fuli. ʼE feala ke fai e ʼihi he ʼu fetogi ʼi tanatou gāue ke feala ai hanatou pionie vaeluaʼi temi. Ko te tokolahi ʼe nātou pionie vaeluaʼi temi ʼi he māhina, peʼe nātou fai hoholo, ʼo nātou fakaʼaogaʼi te ʼu hola e 60 ʼi te māhina fuli ʼi te minisitelio. Kae ko te tokolahi ʼo te hahaʼi ʼa Sehova, ʼe nātou fai faka mafola pea mo akoʼi te hahaʼi ʼaki tonatou nefesi katoa, ʼi tonatou ʼuhiga kaugā fai faka mafola ʼo te kokelekasio. Koia kapau ʼe mole feala hakotou pionie, koteʼuhi ʼe koutou mahamahaki, peʼe kua koutou matutuʼa, pe ko tokotou ʼu maʼua faka famili, peʼe ko he tahi age ʼu ʼaluʼaga, pea ʼe mole tonu ke koutou lotovaivai. Kapau ʼe koutou foaki katoa te ʼu meʼa ʼaē ʼe koutou lavaʼi, pea ʼe maʼuhiga takotou tauhi kia mata ʼo te ʼAtua, ohage pe ko nātou ʼaē ʼe pionie!
ʼE Feala Ke Tou Fakahā Fuli ʼe Tou Maʼu Te Manatu Faka Pionie
19. Koteā te faka ʼuhiga ʼo te manatu faka pionie?
19 Tatau aipe peʼe mole feala hakotou pionie, kae ʼe feala ke koutou fakahā ʼe koutou maʼu te faʼahiga manatu ʼaia. Koteā koa te manatu faka pionie? Neʼe ʼui fēnei e te alatike ʼi Te Minisitelio ʼo Te Puleʼaga ʼo Sūlio 1988: “ ʼE feala ke tou ʼui ʼe ko he tahi ʼe fakalogo lelei ki te fakatotonu ʼo ʼuhiga mo te fai faka mafola pea mo te fai ʼo ni ʼu tisipulo, mo ina fakaʼaogaʼi katoa tona temi moʼo fakahā tona ʼofa pea mo tana fia tokoni ki te hahaʼi, ko he tahi ʼe maʼuli faka sakilifisio, pea ʼe fiafia ʼi te faʼifaʼitakiʼi lelei ki te ʼAliki, pea ʼe ina leleiʼia te ʼu meʼa fakalaumālie, kae mole ko te ʼu meʼa fakasino.” ʼE lava feafeaʼi hakotou fakahā ʼe koutou maʼu te manatu faka pionie?
20. ʼE lava fakahā feafeaʼi e te ʼu mātuʼa ia te manatu faka pionie?
20 Kapau ʼe koutou maʼu fānau, pea ʼe feala hakotou fakaloto mālohiʼi nātou ke nātou pionie. Kapau ʼe koutou leleiʼia te minisitelio, pea ʼe feala ke ina uga ai nātou ke nātou fakamuʼamuʼa ʼi tonatou maʼuli te gāue ʼa Sehova. ʼE feala ke koutou fakaafe te kau pionie pea mo te ʼu tagata taupau feʼaluʼaki pea mo tonatou ʼu ʼohoana ki tokotou ʼapi, ke feala he sio ʼa takotou fānau ki te ʼu faʼifaʼitaki lelei ʼo nātou ʼaē ʼe nātou fiafia ʼi te gāue pionie. (Vakaʼi ia Hepeleo 13:7.) Māʼiape la mo te ʼu famili ʼaē ʼe mole nātou kau fuli ʼi te moʼoni, ko te tāmai peʼe ko te faʼe ʼaē ʼe tauhi kia Sehova, ʼe feala ʼaki tana ʼu palalau pe ko tana faʼifaʼitaki, ke ina uga tana fānau ke nātou fakatuʼutuʼu ʼi tonatou maʼuli ke nātou pionie.—2 Timoteo 1:5; 3:15.
21. (a) ʼE lava feafeaʼi ke tou lagolago fuli kia nātou ʼaē ʼe pionie? (b) Koteā ʼaē ʼe lava fai e te ʼu tagata ʼāfea moʼo fakaloto mālohiʼi ʼo te manatu faka pionie?
21 ʼI te kokelekasio, ʼe feala ke tou lagolago fuli mo totatou loto katoa kia nātou ʼaē ʼe feala ke nātou pionie. Ohage la, ʼe feala koa hakotou gāue mo he pionie ʼi te minisitelio, tāfito la mo kapau ʼi ʼihi temi ʼe gāue tokotahi he pionie? ʼE koutou fakatokagaʼi ʼe “koutou fefakaloto mālohiʼaki.” (Loma 1:11, 12) Kapau ko koutou ko te ʼu tagata ʼāfea, pea ʼe lahi te ʼu meʼa ʼaē ʼe feala ke koutou fai moʼo fakaloto mālohiʼi ʼo te kau pionie. Ka fakatahitahi te kolesi ʼo te ʼu tagata ʼāfea, pea ʼe tonu ke nātou vakaʼi tuʼumaʼu te ʼu meʼa ʼaē ʼe ʼaoga ki te kau pionie. Kapau ʼe lotovaivai he pionie peʼe felāveʼi mo he ʼu fihifihia, pea ʼe mole tonu ke koutou foimo ʼui atu aipe ke ina tuku tana gāue pionie. Logope la ʼi te tahi ʼu lakaga ʼe tonu ke fai ai te faʼahi ʼaia, kae ʼe mole tonu ke galo kia tatou ko te gāue pionie ʼe ko he pilivilesio taulekaleka ʼe manako ʼaupito kiai ia ia ʼaē ʼe gāue ʼi te selevisi katoa kia Sehova. ʼE lagi ʼaoga ki ai he ʼu palalau fakaloto mālohi, pea mo he tokoni ʼaoga peʼe ko he lagolago ki ai. Neʼe tohi fēnei e te filiale ʼo Sepania: “Kapau ʼe fakaloto mālohiʼi e te ʼu tagata ʼāfea te gāue pionie, mo nātou lagolago kia nātou ʼaia ʼi te fai faka mafola, pea mo nātou ʼaʼahi tuʼumaʼu ia nātou ʼi tanatou ʼu ʼaʼahi faka tauhi ōvi, pea ʼe fiafia ʼaupito anai te kau pionie, ʼo nātou logoʼi ʼe ʼi ai tonatou ʼaoga, pea mo nātou loto ke hoko tuʼumaʼu atu pe tanatou gāue pionie logope la te ʼu fihifihia ʼaē ʼe feala ke felāveʼi mo nātou ʼi tonatou maʼuli.”
22. ʼI te ʼu temi faigataʼa ʼaenī ʼo te hisitolia ʼo te tagata, koteā te meʼa ʼaē ʼe tonu ke tou lotomālohi ʼo fai?
22 ʼE tou maʼuʼuli ʼi te ʼu temi faigataʼa ʼo te hisitolia. Neʼe fakatotonu mai e Sehova ke tou fakahoko te gāue ʼaē ʼe ina hāofaki ia te maʼuli ʼo te hahaʼi. (Loma 10:13, 14) Tatau aipe peʼe feala ke tou pionie peʼe kailoa moʼo fakahoko ʼo te gāue ʼaia, kae ʼe tonu ke tou fakahā ʼe tou maʼu te manatu faka pionie. ʼE tou mahino ki te maʼuhiga ʼo te temi pea ʼe tonu ke tou maʼuli faka sakilifisio. Tou fakatuʼutuʼu ke tou foaki kia Sehova te meʼa ʼaē ʼe ina fakaʼui mai kia tatou—ke tou gāue ʼaki totatou nefesi katoa. Pea ke tou manatuʼi kapau ʼe tou foaki fuli te ʼu meʼa ʼaē ʼe tou lavaʼi, peʼe tatau mo te ʼu kiʼi foʼi piesi ʼa te fafine vitua peʼe tatau mo te lolo magoni ʼaē neʼe foaki e Malia, ʼe tonu ke tou fai tatatou gāue ʼaki totatou nefesi katoa, pea ʼe leleiʼia e Sehova tatatou tauhi ʼaia!
ʼE Kei Koutou Manatuʼi Koa?
◻ He koʼe ko te gāue pionie ʼe ina foaki mai te fiafia lahi?
◻ ʼAki te ʼu fua ʼaē neʼe nātou maʼu, koteā te meʼa ʼaē ʼe ʼiloʼi e te tokolahi ʼo te kau pionie ʼo ʼuhiga mo te tokaga ʼa Sehova ki tana ʼu kaugana?
◻ Koteā te ʼu fua ʼaē ʼe maʼu e te kau pionie, ʼo ʼuhiga mo tonatou minisitelio pea mo tanatou ʼu felogoi mo Sehova?
◻ ʼE lava feafeaʼi hakotou fakahā ia te manatu faka pionie?
[Paki ʼo te pasina 23]
Ko te kau pionie ʼe nātou maʼu te fiafia lahi ʼi te gāue ʼaē ko te fai ʼo te ʼu tisipulo
[Paki ʼo te pasina 23]
ʼE feala ke ʼi ai he ʼu fua lelei ki takotou ʼu fānau ʼi tanatou fakakaugā mo nātou ʼaē ʼe gāue katoa maʼa te Puleʼaga
[Paki ʼo te pasina 23]
ʼE feala ke fakaloto mālohiʼi e te ʼu tagata ʼāfea te kau pionie ʼi te minisitelio