ʼE Nā Nounou, Kae Lahi Tonā ʼOfa

E FEAFEAʼI kapau ʼe koutou faka mafola te Puleʼaga ʼo te ʼAtua ki te hahaʼi ʼe mole koutou ʼiloʼi, pea ʼe koutou satimeta 76 pe? ʼE lava fakamahino atu e Laura te faʼahi ʼaia. ʼE taʼu 33 kae ʼe nounou heʼe 76 satimeta pe. Ko ia pea mo tona tēhina ko María ʼaē ʼe taʼu 24 pea ʼe satimeta 86, ʼe nā nonofo ʼi Quito, ʼi Équateur. ʼE nā fakamatala mai te ʼu faigataʼaʼia ʼaē ʼe tau mo nāua ʼi tonā minisitelio.

“Ka ma ʼolo ki te telituale ʼaē ʼe tonu ke ma fai faka mafola ai, pea ka ma ʼolo ki te ʼu fono, ʼe tonu ke ma haʼele ʼi te vaeluaʼi kilometa moʼo toʼo ʼo te kā. Mai te potu ʼaē ʼe ma hihifo ai, ʼe toe tonu ke ma haʼele ʼi te vaeluaʼi kilometa ke ma toʼo te lua kā. Meʼa fakaʼofaʼofa, heʼe ʼi te ala ʼaia ʼe ʼi ai te ʼu kuli agakovi e nima. ʼE ma matataku ʼi te ʼu kuli koteʼuhi kia māua, ʼe nātou lalahi ohage ko he ʼu hōsi. Moʼo kapu te ʼu kuli ʼaia, ʼe ma toʼo te kauʼi ʼakau ʼe ma fufū ʼi te ala ʼi muʼa ʼo tamā toʼo te kā, ke feala hamā toe fakaʼaogaʼi ʼi tamā liliu ki fale.

“ ʼE toe faigataʼa kia māua tamā kake ki te kā. ʼI te kiʼi fale tali kā, ʼe ma tutuʼu ʼi te kiʼi tuʼuga kele ke faigafua tamā kake ki te kā. Ko ʼihi hahaʼi taki kā ʼe nātou fakaōvi ki te tuʼuga kele, kae ko ʼihi ʼe mole nātou loto kiai. ʼI te lakaga ʼaia, ko toku tēhina ʼaē ʼe lahi age ia ʼau, ʼe tokoni mai ki taku kake ki te kā. Tahi ʼaē meʼa, moʼo toʼo te lua kā, ʼe tonu ke ma fakalaka ʼi te ala ʼe lahi ai te feʼoloʼaki ʼo te ʼu motokā​—⁠pea ʼe faigataʼa te faʼahi ʼaia kia māua heʼe nounou tomā ʼu vaʼe. ʼE mole feala ke ma ʼave he kato mamafa heʼe veliveli tomā sino. Koia moʼo fakamaʼamaʼa ʼo tomā kato, ʼe ma ʼolo mo te kiʼi Tohi-Tapu veliveli pea ʼe mole lahi te ʼu tohi ʼaē ʼe ma ʼave.

“Talu mai tamā kei liliki, ʼe ma umiuminoa ʼaupito. ʼE ʼiloʼi e tomā ʼu vāhaʼa fale ʼe ma matataku ʼi te palalau mo te hahaʼi ʼe mole ma ʼiloʼi. Koia ʼe nātou punamaʼuli ʼi tanatou sio ʼe ma ʼōmai ʼo fisifisi ʼi tonatou matapā, pea ʼi te agamāhani ʼe nātou fakalogo kia māua. Kae ʼi te ʼu telituale ʼaē ʼe mole ʼiloʼi māua e te hahaʼi, ʼe mole nātou faʼa tokagaʼi te logo maʼuhiga ʼaē ʼe ma fakahā age, heʼe nātou sioʼi pe nātou tomā ʼuhiga leka. Logola te faʼahi ʼaia, kae ko te ʼofa ʼo Sehova ʼe ina tuku mai he lotomālohi ke ma haga fai te gāue fai faka mafola. Pea ʼe ma toe lotomālohi mokā ma metitasio kia Tāʼaga Lea 3⁠:​5, 6.”

Ohage ko tona fakahā mai e Laura pea mo María, ko te kātakiʼi ʼo te ʼu faigataʼaʼia fakasino ʼe feala ke ina faka kolōlia te ʼAtua. Neʼe faikole te ʼapositolo ko Paulo ke toʼo te “foto i [tona] kakano,” ʼaē neʼe lagi ko hona mahaki. Kae neʼe tali age e te ʼAtua: “E feauga mo koe toku [ʼofa makehe, MN], io, e katoa te gaue o toku mafimafi i te vaivai.” Ei, ʼe mole maʼua ke pulihi totatou ʼu fihifihia fakasino, ke feala ai hatatou tauhi ki te ʼAtua. ʼE tou lava tauʼi anai totatou ʼu fihifihia mo kapau ʼe tou falala katoa ki te ʼAtua. Neʼe faka ʼuhiga feiā e Paulo te “foto i [tona] kakano,” ʼo feala ai tana ʼui fēnei: “E hoki au malohi moka e hoki au vaivai.” (2 Kolonito 12⁠:​7, 9, 10) Hili kiai ni ʼu taʼu, neʼe tohi fēnei e Paulo: “E au fealagia te meafuape ia Ia ae e ina fakamalohi au.”​—⁠Filipe 4⁠:⁠13.

ʼI totatou temi, neʼe fakahoko e te ʼAtua te gāue mālohi ʼaki te ʼu tagata, mo te ʼu fafine pea mo te ʼu tamaliki kua nātou foaki katoa tonatou maʼuli kia te ia. Ko ʼihi ʼe lagi tau mo he mahaki. Logope la ʼe nātou ʼamanaki fuli ke fakamālōlō nātou e te Puleʼaga ʼo te ʼAtua, kae ʼe nātou gāue maʼa te ʼAtua ʼo aʼu ki te temi ʼaē ka ina molehi ai tonatou fihifihia.

ʼE ʼi ai koa hokotou vaivaiʼaga fakasino? Koutou faʼa kātaki! ʼAki tokotou tui, ʼe feala ke koutou hage ko Paulo, mo Laura pea mo María. Ohage ko te ʼu tagata pea mo te ʼu fafine tui ʼo te temi muʼa, ʼe feala ke toe ʼui fēnei ʼo ʼuhiga mo nātou: “Neʼe nātou vaivai [pea] kua nātou liliu ʼo mālohi.”​—⁠Hepeleo 11⁠:​34, MN.

[Paki ʼo te pasina 8]

Ko María

Ko Laura

[Paki ʼo te pasina 9]

ʼE tokoni ia María kia Laura ke kake ki te kā

[Paki ʼo te pasina 9]

“ ʼE ma matataku ʼi te ʼu kuli koteʼuhi kia māua, ʼe nātou lalahi ohage ko he ʼu hōsi”

ʼI lalo: Ko Laura mo María pea mo nāua ʼaē neʼe nā fai tanā ako Tohi-Tapu