Ko Te Tohi ʼe Mole Fia Lau e Te Kau Tūpulaga
“E FEAFEAʼI anai haku ʼiloʼi papau ko te Tohi-Tapu ʼe ko te Folafola ʼa te ʼAtua? ʼE mole ʼau fia lau ʼau te tohi ʼaia,” ko te ʼui ʼaia ʼa te fafine kei finemui ʼe higoa ko Beate.
ʼI te fenua ʼo Siamani, ʼe maʼuli ai ia Beate, tokolahi te kau tūpulaga ʼe nātou hage ko ia; ʼe mole faʼa maʼuhiga kia nātou te lau ʼo te Tohi-Tapu. Mole heʼeki faʼa fualoa neʼe fai te sivi ʼi te fenua ʼaia, pea ʼe teitei ko te 1 ki te teau ʼi te kau tūpulaga ʼe nātou lau māhani te Tohi-Tapu, ko te 2 ki te teau ʼe nātou lau tuʼumaʼu, ko te 19 ki te teau ʼe tahitahiga tanatou lau, pea ko te 80 ki te teau ʼe mole nātou lau te Tohi-Tapu. ʼE teitei tatau pe te ʼu tānaki ʼi te tahi ʼu fenua, pea ʼe lagi feiā mo te koga meʼa ʼaē ʼe koutou nonofo ai. ʼE hā mai, ko te Tohi-Tapu ʼe ko he tohi ʼe mole fia lau e te kau tūpulaga.
Kae ʼe mole tou punamaʼuli kiai, heʼe ko te taʼiake tūpulaga ʼe mole nātou faʼa mahino lelei ki te Tohi-Tapu! ʼI te kamata ʼo te taʼu 2000, neʼe fakahā e te sulunale Lausitzer Rundschau, neʼe fakahā e te sivi pe ko hahaʼi e toko fia ʼaē neʼe nātou ʼiloʼi te ʼu Folafola e Hogofulu pea mo nātou fakaʼaogaʼi moʼo takitaki tonatou maʼuli. ʼO ʼuhiga mo te hahaʼi ʼaē ʼe nātou taʼu 60 tupu, neʼe ko te toko 67 ki te teau neʼe nātou ʼiloʼi te ʼu folafola pea mo nātou mulimuli kiai ʼi tonatou maʼuli, pea kia nātou ʼaē ʼe mole heʼeki fakalaka ʼi te taʼu 30, neʼe fakahā e te ʼu tānaki neʼe gata pe ʼi te toko 28 ki te teau te hahaʼi ʼaē ʼe nātou lau te Tohi-Tapu. Ei, ki te kau tūpulaga ʼe tokolahi, ko te Folafola ʼa te ʼAtua ʼe ko he tohi ʼe mole nātou faʼa ʼiloʼi lelei.
Ko ʼIhi ʼe Nātou Leleiʼia Te Tohi-Tapu
ʼI te tahi faʼahi, ʼi te malamanei katoa, ko te toko lauʼi miliona kau tūpulaga ʼe nātou faka maʼuhigaʼi ʼaupito te Folafola ʼa te ʼAtua. Ohage la ko Alexander, ʼe taʼu 19 pea ʼe ina lau te Tohi-Tapu ʼi te uhu fuli ʼi muʼa ʼo tana ʼalu ʼo gāue. ʼE ina ʼui fēnei: “ ʼE mole ʼau ʼiloʼi he tahi age meʼa ʼe lelei age moʼo kamata te ʼaho.” Ko te agamāhani ʼa Sandra ko te lau ʼo te Tohi-Tapu ʼi te afiafi fuli. ʼE ina ʼui fēnei: “Kua liliu te faʼahi ʼaia ko haku agamāhani ʼi te ʼaho fuli.” Pea kia Julia ʼaē ʼe taʼu 13, neʼe kua ina fai tana polokalama ke ina lau te kapite e tahi ʼo te Tohi-Tapu ʼi muʼa ʼo tana moe ʼi te pōʼuli. “ ʼE ʼau leleiʼia ʼaupito te Tohi-Tapu, pea ʼe ʼau fia muliʼi tuʼumaʼu taku fakatuʼutuʼu ʼaia ʼi te ʼaho fuli pe.”
Ko te manatu fea ʼaē ʼe totonu pea mo fakapotopoto? ʼE tonu koa ke kita lau te Tohi-Tapu? ʼE ʼaoga koa te Tohi-Tapu pea mo maʼuhiga ki te kau tūpulaga? Koteā takotou manatu?