Te Kau Faiako ʼo Te Folafola ʼa Te ʼAtua—Mo Te Fakahoko ʼo ʼOnatou Maʼua
ʼI TE māhina ʼaenī kua hili, neʼe fono te ʼu lauʼi teau afe kau faiako ke akoʼi nātou. ʼI te malamanei katoa, talu mai te māhina ʼo Maio, neʼe nātou ʼolo ki te ʼu Fakatahi faka Tisitilike ʼa te kau Fakamoʼoni ʼa Sehova “Te Kau Faiako ʼo Te Folafola ʼa te ʼAtua.” Neʼe uga te hahaʼi fuli ʼo te fakatahi, ke nātou akoʼi ia nātou totonu, ke nātou liliu ʼo faiva age, pea ke nātou fakahoko tonatou ʼu maʼua ʼi tonatou ʼuhiga kau faiako.
Neʼe koutou kau koa ki te ʼu fakatahi ʼaia? Kapau neʼe koutou kau ai, ʼe mahino ia neʼe koutou leleiʼia te meʼa kai fakalaumālie ʼaē neʼe maʼu ʼi te ʼu fakatahi ʼaia ki te tauhi ki te ʼAtua moʼoni, ia Sehova. He koʼe koa ʼe mole koutou kau fakatahi mai ki te toe fakamanatu ʼo te polokalama ako ʼo te fakatahi?
ʼUluaki ʼAho—Ko Te ʼu Tohi Mai Te ʼAtua Moʼo Akoʼi
Neʼe fakamālo e te tēhina takitaki ʼo te fakatahi ki te kau fono fuli ʼaki te akonaki “Kau Faiako ʼo Te Folafola ʼa te ʼAtua, Koutou Tuku Ke Akoʼi Koutou.” Neʼe liliu ia Sesu Kilisito ko te Faiako Lahi, he neʼe akoʼi ia ia e te “Faiakonaki Lahi” ʼaē ko Sehova. (Isaia 30:20; Mateo 19:16) Kapau ʼe tonu ke tou tuputupu ʼi totatou ʼuhiga kau faiako ʼo Te Folafola ʼa te ʼAtua, pea ʼe tonu foki ke akoʼi tatou e Sehova.
Neʼe hoa kiai te akonaki ʼaē “ ʼE ʼi Ai Te ʼu Fua Lelei ʼi Te Faiakonaki ʼo ʼUhiga Mo Te Puleʼaga.” ʼAki te ʼu fakamatala mai te kau faiako ʼo te Folafola ʼa te ʼAtua kua māhani, neʼe faka maʼuhigaʼi te ʼu fiafia pea mo te ʼu tapuakina ʼi te gāue ʼaē ko te fai ʼo ni tisipulo.
Neʼe hoa kiai te akonaki maʼuhiga, ko tona kupu tāfito “Neʼe Uga Nātou e ‘Te ʼu Meʼa Taulekaleka ʼa Te ʼAtua.’ ” ʼI te ʼuluaki sēkulō ko te ʼu “meʼa taulekaleka” ʼo ʼuhiga mo te Puleʼaga ʼo te ʼAtua, neʼe ina uga te hahaʼi ke nātou fai ni ʼu gāue. (Gaue 2:11, MN ) ʼE feala pe foki mo tatou ke tou uga te hahaʼi ke nātou tala te ʼu “meʼa taulekaleka” ʼaia ohage ko te ʼu akonaki faka Tohi-Tapu ʼo ʼuhiga mo te totogi, mo te fakatuʼuake, pea mo te fuakava foʼou.
Ko te akonaki ʼaē neʼe hoa kiai neʼe ina fakaloto mālohiʼi te hahaʼi fuli ke nātou “Fakafiafia Ki Te Faitotonu ʼa Sehova.” (Pesalemo 35:27) ʼE tokoniʼi tatou ke tou haga faiga ki te faitotonu ʼo tou ako ke tou manako ki te meʼa ʼaē ʼe faitotonu pea mo fehiʼa ki te meʼa ʼaē ʼe kovi, mo tou ako te Tohi-Tapu, mo teteke mālohi te ʼu fakahala ʼaē ʼe fakatupu tuʼutāmaki ʼi te faʼahi fakalaumālie, pea mo haga maʼuliʼi te agavaivai. Ko te ʼu faʼahi ʼaia ʼe tokoni mai anai moʼo puipui ʼo tatou mai te ʼu fakakaugā fakatupu kovi, mo te faka maʼuhigaʼi e te mālama ia te ʼu koloā, pea mo te ʼu fakafiafia heʼeʼaoga pea mo te ʼu agamālohi.
Neʼe fakamanatuʼi mai kia tatou e te akonaki tāfito, ko tona kupu tāfito “Kua Tou Katoa Moʼo Akoʼi Te Folafola ʼa te ʼAtua,” ko Sehova ʼe ina fakaliliu tana ʼu minisi ke nātou faiva ʼaki tana Folafola, mo tona laumālie maʼoniʼoni, pea mo tana kautahi fakakelekele. ʼO ʼuhiga mo te fakaʼaogaʼi ʼo te Folafola ʼa te ʼAtua, neʼe tokoniʼi fēnei tatou e te tagata faiakonaki: “ ʼE tou faiga ke tou toʼo mai te lauʼi pepa ia te logo ʼo te Tohi-Tapu pea ke tou tohi ki te loto ʼo te hahaʼi ʼaē ʼe nātou fakalogo mai.”
Neʼe ʼi ai te akonaki e tolu, neʼe mulimuli ki te kupu tāfito “Tou Akoʼi Ia Tatou Totonu Mokā Tou Akoʼi Te Hahaʼi.” Neʼe faka maʼuhigaʼi e te ʼuluaki akonaki te maʼua ʼaē ke tou maʼuliʼi te ʼu pelesepeto faka Kilisitiano māʼoluga ʼaē ʼe tou akoʼi ki te hahaʼi, ʼo ʼuhiga mo te ʼu aga ʼaē ʼe tonu ke tou fai. Neʼe tokoniʼi tatou e te lua akonaki ke tou ‘fakaʼaoga fakalelei te folafola ʼo te moʼoni.’ (2 Timoteo 2:15) Moʼo akoʼi ʼo tatou totonu, ʼe maʼuhiga ke ʼi ai hatatou ako takitokotahi ʼo te Tohi-Tapu ʼe fai tuʼumaʼu pea mo fai fakalelei, tatau aipe peʼe kua fualoa hatatou tauhi ki te ʼAtua. Neʼe fakahā e te akonaki fakaʼosi ʼe lamalama tatou e te Tevolo moʼo fakaneke ke tou fai te ʼu aga ohage ko te fialahi, te fia faʼifaʼitaliha, te fia maʼuhiga, te maheka, te aga ʼitaʼia, te lotokovi, pea mo te fatufatu. Kae kapau ʼe tou fakafeagai mālohi ki te Tevolo, pea ʼe hola mamaʼo anai ia tatou. Moʼo fakafeagai kia te ia, ʼe tonu ke tou fakaōvi ki te ʼAtua.—Sakopo 4:7, 8.
Ko te akonaki neʼe to tonu, ko tona kupu tāfito “Tou Fehiʼa Ki Te ʼu Paki ʼAē ʼe Hā Ai Te ʼu Felāveʼi Fakasino Heʼeʼaoga,” neʼe ina fakahā peʼe feafeaʼi hatatou tauʼi te meʼa fakatupu tuʼutāmaki ʼaia ki totatou maʼuli fakalaumālie. Neʼe ʼui fēnei e te polofeta ko Hapakuke kia Sehova: “ ʼE maʼoniʼoni fau tou ʼu mata ke ke sio ki te meʼa ʼaē ʼe kovi; pea ʼe mole ke lava sioʼi te malaʼia.” (Hapakuke 1:13) ʼE tonu ke tou “fehiʼa ki te meʼa ʼaē ʼe kovi.” (Loma 12:9, MN ) Neʼe tokoniʼi te ʼu mātuʼa ke nātou fakaʼaluʼalu lelei te fakaʼaogaʼi e tanatou fānau te Internet pea mo te sioʼi ʼo te televisio. Neʼe ʼui e te tagata faiakonaki kia nātou ʼaē ʼe nātou fia sioʼi te ʼu paki peʼe ko te ʼu ʼata heʼeʼaoga ʼaia, ke nātou kumi tokoni ki honatou kaumeʼa ʼe mālohi ʼi te faʼahi fakalaumālie. ʼE toe ʼaoga pe foki anai te metitasio pea mo te maʼu fakaʼatamai ʼo te ʼu vaega ohage ko te Pesalemo 97:10; Mateo 5:28; 1 Kolonito 9:27; Efeso 5:3, 12; Kolose 3:5; pea mo 1 Tesalonika 4:4, 5.
Ko te akonaki ʼaē neʼe hoa mai kiai, ko tona kupu tāfito “Koutou Tuku Te Tokalelei ʼa Te ʼAtua Ke Ina Hāofaki Koutou,” neʼe ina tuku mai te ʼu palalau fakaloto fīmālieʼi kia tatou ʼo ina ʼui fēnei, kapau ʼe tou mafasia ʼi te ʼu hoha ʼo te maʼuli pea ʼe feala ke tou tuku tatatou kavega kia Sehova. (Pesalemo 55:22) Kapau ʼi te faikole ʼe tou fakahā katoa kia Sehova te ʼu meʼa ʼo totatou loto, pea ʼe ina foaki mai anai “te tokalelei o te Atua,” ko te loto fīmālie pea mo te mole hoha ʼaē ʼe tupu ʼi tatatou ʼu felogoi lelei mo ia.—Filipe 4:6, 7.
Neʼe fakaʼosi te ʼuluaki ʼaho ki he fakatokaga makehe ʼaki te akonaki “Ko Sehova ʼe Ina Fakamataleleiʼi Tana Hahaʼi ʼAki Te Mālama,” neʼe fakamahino ai te fakahoko ʼo Isaia kapite 60. ʼI te lotolotoiga ʼo te fakapōʼuli ʼo te mālama ʼaenī, “ko te kau matāpule”—te toe hahaʼi tokolahi ʼaē ʼe nātou hage ni ōvi—ʼe nātou maʼu fakatahi mo te kau Kilisitiano fakanofo te mālama ʼaē ʼe tuku mai e Sehova. ʼI tanatou fakaʼaogaʼi te ʼu vaega 19 pea mo te 20, neʼe fakamahino fēnei e te tagata faiakonaki: “ ʼE mole ‘to’ anai ia Sehova ohage ko te laʼā peʼe ‘fakapōʼuli’ anai ohage ko te māhina. Kae ʼe hoko atu anai tana fakamataleleiʼi tana hahaʼi ʼo fakamālamaʼi nātou. Neʼe ko he fakamoʼoni taulekaleka kia tatou ʼaenī ʼe tou maʼuʼuli ʼi te ʼaho fakaʼosi ʼo te mālama fakapōʼuli ʼaenī!” ʼI te fakaʼosi ʼo te akonaki, neʼe fakahā ifo e te tēhina te kua tā ʼo te tohi La prophétie dʼIsaïe, lumière pour tous les humains, Volume 2. Kua koutou ʼosi lau koa te tohi foʼou ʼaia?
Lua ʼAho—Faiva Katoa Moʼo Akoʼi Te Hahaʼi
ʼI te ʼosi fai palalau ki te koga tohi ʼo te lua ʼaho, neʼe tou fakalogo lelei ki te lua akonaki koga tolu ʼo te fakatahi, ko tona kupu tāfito “Ko He Kau Minisi ʼe Nātou Tokoni Ki Niʼihi Ke Nātou Liliu Ko He ʼu Hahaʼi Tui.” Ko te ʼu tēhina ʼaē neʼe nātou fai te ʼu akonaki ʼaia, neʼe nātou faka maʼuhigaʼi fuli te ʼu koga e tolu moʼo tokoni ki te hahaʼi ke nātou liliu ko he ʼu hahaʼi tui—ʼe nātou faka mafola te logo ʼo te Puleʼaga, ʼe nātou ʼolo ʼo ʼaʼahi te ʼu hahaʼi, pea mo akoʼi te hahaʼi ʼaē ʼe nātou leleiʼia ke nātou maʼuliʼi te meʼa ʼaē neʼe fakatotonu e Kilisito. ʼAki te tokoni ʼo nātou ʼaē neʼe fakafehuʼi pea mo tanatou ʼu fakamatala, neʼe tou sio ai ki te ʼu faʼahiga fai moʼo akoʼi te hahaʼi ke nātou liliu ko he ʼu tisipulo.
Ko te akonaki ʼaē neʼe hoa kiai, koʼeni tona kupu tāfito “Koutou Hilifaki Ki Takotou Faʼa Kātaki Ia Te Pipiki Ki Te ʼAtua.” Neʼe fakahā e te tēhina faiakonaki ko te meʼa ʼaē ʼe maʼuhiga ʼe ko tatatou ‘faʼa kātaki ʼo kaku ki te fakaʼosi.’ (Mateo 24:13) Moʼo lagalaga tatatou pipiki ki te ʼAtua, ʼe tonu ke tou fakaʼaogaʼi te ʼu meʼa fuli ʼe foaki mai e te ʼAtua—ia te faikole, te ako takitokotahi, te ʼu fono, pea mo te minisitelio. ʼE tonu ke tou teteke te ʼu holi pea mo te ʼu gāue fakamālama ʼaē ʼe nātou faʼao peʼe nātou maumauʼi tatatou pipiki maʼu ki te ʼAtua.
ʼE lava fīmālie feafeaʼi he ʼu hahaʼi ʼe kinakina pea mo mafasia ʼi te temi nei? Ko te akonaki “Koutou Maʼu He Fakaloto Fīmālie ʼi Te ʼAkau Toho ʼa Kilisito” neʼe tali ki te fehuʼi ʼaia. Neʼe fakaafe fakalelei e Sesu tana ʼu tisipulo ke nātou ʼōmai ki tana ʼakau toho pea mo ako mai ia te ia. (Mateo 11:28-30) ʼE tou lava toʼo te ʼakau toho ʼa Sesu mo kapau ʼe tou mulimuli lelei ki tona faʼifaʼitaki, he neʼe faigafua tona maʼuli pea mo fakafuafua lelei. Ko te ʼu puani maʼuhiga ʼo te akonaki ʼaia neʼe fakaʼiloga lelei ʼaki te ʼu fakafehuʼi kia nātou ʼaē neʼe nātou fakamaʼamaʼa tonatou maʼuli.
Ko he koga maʼuhiga ʼi te ʼu fakatahi ʼa te kau Fakamoʼoni ʼa Sehova ʼe ko te kau papitema foʼou ʼaē neʼe nātou foaki tonatou maʼuli ke nātou kaugana ki te ʼAtua. Ko te tēhina ʼaē neʼe ina fai te akonaki “Ko Te Papitema ʼe Ina ʼAumai Te ʼu Pilivilesio Lahi Age” neʼe fakamālo kia nātou ʼaē neʼe teuteu ki te papitema, pea neʼe ina fakaafe ia nātou ke nātou fakalahi tanatou ʼu pilivilesio gāue. ʼE feala ki te kau faiako ʼo te Folafola ʼa te ʼAtua ʼaē neʼe hoki papitema, pea kua mulimuli ki te ʼu meʼa ʼaē ʼe fakamaʼua e te Tohi-Tapu, ke nātou fakahoko he tahi ʼu maʼua ʼi te kokelekasio.
Ko te kupu tāfito ʼo te ʼuluaki akonaki ʼo te hili hoʼatā, neʼe fēnei “Koutou Faʼifaʼitaki Ki Te Faiakonaki Lahi.” Lolotoga he temi loaloaga ʼi selo, neʼe siosio fakalelei ia Sesu ki tana Tāmai pea mo faʼifaʼitaki ki ai, pea neʼe liliu ai ko te Tagata Faiako Lahi. ʼI te temi ʼaē neʼe nofo ai ʼi te kele, neʼe ina fakaʼaogaʼi te ʼu faʼahiga faiakonaki neʼe lelei ʼaupito, ohage la ko te fakaʼaogaʼi ʼo te ʼu fehuʼi ʼe malave ki te loto, pea mo te ʼu lea fakatātā ʼe faigafua pea mo maʼuli. Neʼe fakatafito e Sesu tana faiakonaki ki te Folafola ʼa te ʼAtua pea neʼe lea ʼaki he loto māfana, pea mo mālohi. ʼE tou faiga anai koa ke tou faʼifaʼitaki ki te Tagata Faiako Lahi ʼaia?
Ko te tahi akonaki maʼuhiga, “ ʼE Koutou Fia Tauhi Koa Ki Niʼihi?,” neʼe tokoni mai kia tatou ke tou muliʼi te faʼifaʼitaki ʼa Sesu ʼi tana tauhi ki te hahaʼi. (Soane 13:12-15) Neʼe fakaloto mālohiʼi e te tēhina faiakonaki ia nātou ʼaē kua faiva ke nātou hage ko Timoteo ʼo fakaʼaogaʼi te ʼu faigamālie fuli moʼo tokoni ki te hahaʼi. (Filipe 2:20, 21) Neʼe fakaloto mālohiʼi te ʼu mātuʼa ke nātou faʼifaʼitaki kia Elekana pea mo Ana ʼo tokoni ki tanatou fānau ke nātou kau ki te minisitelio temi katoa. Pea neʼe tokoniʼi te kau tūpulaga ke nātou tokagaʼi te ʼu faʼifaʼitaki ʼa Sesu Kilisito pea mo te tūpulaga ko Timoteo ʼo nātou tali lelei te foaki ʼo tonatou maʼuli. (1 Petelo 2:21) Neʼe toe malave foki kia tatou te ʼu palalau ʼa te ʼu tēhina mo tuagaʼane ʼaē neʼe nātou fakaʼaogaʼi te ʼu faigamālie fuli moʼo tauhi ki te hahaʼi.
Koʼeni te kupu tāfito ʼo te tolu akonaki koga tolu “Ke ʼAoga Kia Tatou Te Ako Faka Teokalatike.” Neʼe talanoa tāfito te ʼuluaki tagata faiakonaki ki te maʼuhiga ʼaē ke tou fakatuputupu totatou temi ʼaē ʼe tou metitasio ai. Moʼo fai te faʼahi ʼaia, ʼe feala ke tou kamata ʼaki he ʼu akoako takitokotahi kae nounou pea tou faigaʼi leva hona fakaloaloa atu. Neʼe ina fakaloto mālohiʼi foki te hahaʼi fuli ʼo te fakatahi, ke nātou kumi te ʼu vaega faka Tohi-Tapu pea mo tohi he ʼu nota lolotoga te ʼu fono. Neʼe fakatokaga mai e te lua tēhina faiakonaki ʼe tonu ke tou pipiki maʼu ki “te faʼifaʼitaki ʼo te ʼu folafola ʼo te maʼuli.” (2 Timoteo 1:13, 14, MN ) Moʼo puipui ʼo tatou mai te ʼu meʼa heʼeʼaoga ʼaē ʼe fakahā mai ʼi te televisio mo te ʼu sulunale, mo te ʼu filosofia fakatagata, mo te ʼu hahaʼi ʼaē ʼe nātou faka lākahalaʼi te Tohi-Tapu, pea mo te ʼu akonaki ʼa te kau ʼaposita, ʼe tonu ke tou fakaʼaogaʼi lelei totatou temi ʼaki te ako takitokotahi pea mo te kau ki te ʼu fono. (Efeso 5:15, 16) Neʼe fakaʼiloga lelei e te tagata faiakonaki fakaʼosi te ʼaoga ʼaē ke tou maʼuliʼi te ʼu meʼa ʼaē neʼe tou ako, ke ʼaoga katoa ai kia tatou te ako faka teokalatike.—Filipe 4:9.
Neʼe tou fiafia ʼi tatatou fakalogo ki te akonaki “Ko He ʼu Fakatuʼutuʼu Foʼou Ki Tatatou Lakalaka Fakalaumālie”! Neʼe tou fiafia ʼi tatatou logo ki te ʼamanaki tā ʼo te tohi foʼou Tirez profit de l’École du ministère théocratique. Neʼe lahi ʼaupito tatatou fiafia ʼi tatatou maʼu te tohi ʼaē neʼe fakahāhā e te tagata faiakonaki. ʼE ʼi ai te koga ʼo te tohi ʼe maʼu ai te ʼu tokoni ʼo ʼuhiga mo te fai akonaki, neʼe ina ʼui fēnei: “Ko te ʼu puani e 53 ʼo te tohi foʼou ʼaenī, ʼe mole fakatafito ia ki he poto fakamālama ʼo ʼuhiga mo te lautohi fakalelei, mo te fai palalau, pea mo te fai akonaki. ʼE fakatafito ia ki te ʼu pelesepeto faka Tohi-Tapu.” ʼE fakahā anai e te tohi pe neʼe fakaʼaogaʼi feafeaʼi e te kau polofeta, mo Sesu pea mo tana ʼu tisipulo tonatou ʼu faiva faiakonaki. Ei, ko te tohi ʼaia pea mo te agaaga foʼou ʼo te Ako ʼo Te Minisitelio Faka Teokalatike, ʼe tokoni moʼoni anai kia tatou ke tou liliu ko he ʼu tagata faiako faiva ʼo te Folafola ʼa te ʼAtua.
Tolu ʼAho—Koutou Liliu Ko He Kau Faiako ʼo Koutou Tokagaʼi Te Temi
ʼI te ʼosi fai palalau ki te koga tohi ʼo te ʼaho fakaʼosi, neʼe tou fakalogo fakalelei fuli ki te akonaki fakaʼosi ʼaē ʼe koga tolu ʼo te fakatahi, “ ʼE Teuteuʼi Tatou e Te Lea Faka Polofeta ʼa Malakia Ki Te ʼAho ʼo Sehova.” Neʼe fai fakakikite ia Malakia lagi hili te ʼu taʼu e teau ʼi te ʼosi liliu mai ʼa te kau Sutea mai Papiloni. Neʼe nātou toe higa ki te ʼapositasia pea mo te agakovi, ʼo nātou fakalainoaʼi te huafa ʼo Sehova pea mo meʼa noaʼi tana ʼu lao faitotonu pea mo sakilifisioʼi te ʼu manu ʼe kivi, mo māʼimoa pea mo mahahaki. Pea tahi ʼaē meʼa, neʼe nātou mavete mo tonatou ʼu ʼohoana ʼo tonatou temi tūpulaga, ʼo lagi nātou ʼohoanaʼi he ʼu fafine matāpule.
ʼE fakamoʼoni mai e te ʼuluaki kapite ʼo te lea faka polofeta ʼa Malakia ia te ʼofa ʼa Sehova ki tana hahaʼi. ʼE ina fakaʼiloga lelei te ʼaoga ʼaē ke tou manavasiʼi pea mo fakaʼapaʼapa ki te ʼAtua, pea mo tou leleiʼia te ʼu meʼa taputapu. ʼE fakaʼamu e Sehova ke tou foaki age kia te ia te meʼa ʼaē ʼe lelei ʼaupito ia tatou, pea ke tou tauhi kia te ia ʼaki he ʼofa katoa. ʼE mole tonu ia ke hage tatatou tauhi taputapu ko he meʼa kua fai māhani pe, pea ʼe tonu ke tou huʼi maʼua ki te ʼAtua.
ʼI tana faka ʼalutahi te lua kapite ʼo Malakia mo totatou temi, neʼe fehuʼi fēnei e te lua tēhina faiakonaki: “ ʼE koutou tokakaga koa ke ‘ ʼaua naʼa maʼu he ʼu palalau heʼe faitotonu ʼi tokotou ʼu laugutu?’ ” (Malakia 2:6) ʼE tonu ke ʼiloʼi papau e te ʼu tēhina takitaki ko te meʼa ʼaē ʼe nātou ʼui ʼe fakatafito ki te Folafola ʼa te ʼAtua. ʼE tonu ke tou fehihiʼa ki te kākā ʼaē ko te faigaʼi ke tali he ʼu mavete ʼohoana kae ʼe heʼe faitotonu.—Malakia 2:14-16.
ʼI tana palalau ki te kupu tāfito “Ko Ai Anai Ka Hāo ʼi Te ʼAho ʼo Sehova?” neʼe tokoni mai te tagata faiakonaki fakaʼosi ke tou nofo teuteu ki te ʼaho ʼo Sehova. Neʼe tala fēnei e te tēhina faiakonaki: “ ʼE ko he meʼa fakaloto fīmālie ki te kau kaugana ʼa Sehova hanatou mahino ko Malakia kapite 3, vaega 17, ʼe lolotoga hoko nei kia nātou! ʼE ʼui fēnei ai: ‘ “ ʼE mahino papau ia, ʼe nātou liliu anai ko haku hahaʼi,” ko te ʼui ʼaia ʼa Sehova ʼo te kautau, “ ʼi te ʼaho ʼaē ka ʼau fakatupu anai he koloā makehe. Pea ʼe ʼau manavaʼofa anai kia nātou ohage ko he tagata ʼe manavaʼofa ki tona foha ʼaē ʼe tauhi kia te ia.” ’ ”
Ko he tahi koga maʼuhiga ʼo te ʼu fakatahi neʼe ko te kiʼi gaoʼi, ko tona kupu tāfito “Tou Fakaʼapaʼapa Ki Te Pule ʼa Sehova,” ʼaē neʼe fakahā ai te ʼu foha ʼo Kole. Logope te agatuʼu ʼo tanatou tāmai kia Moisese mo Alone, kae neʼe agatonu aipe te ʼu foha ʼo Kole kia Sehova pea mo tana kau fakafofoga. Ko Kole pea mo te ʼu hahaʼi ʼaē neʼe nātou muliʼi ia ia neʼe nātou mamate, kae neʼe hāo te ʼu foha ʼo Kole. Ko te akonaki ʼaē neʼe hoa kiai, ko tona kupu tāfito “Tou Lagolago Fakalelei Ki Te Pule ʼa Te ʼAtua,” neʼe ina fakapipiki te meʼa ʼaē neʼe hoko ʼi te gaoʼi kia tatou takitokotahi. Neʼe fakatokagaʼi mai e te tēhina faiakonaki te ʼu faʼahi e ono neʼe higa ai ia Kole mo te ʼu hahaʼi ʼaē neʼe nātou muliʼi ia ia: ko te mole lagolago fakalelei ki te pule ʼa Sehova; tanatou fialahi, mo fia hā, pea mo maheka; tanatou sioʼi te ʼu hala ʼo nātou ʼaē neʼe fakanofo e Sehova; tanatou loto meomeo; tanatou mole feʼaugaʼia te ʼu pilivilesio gāue ʼaē neʼe nātou maʼu; pea mo tanatou fakamuʼamuʼa te vāhaʼa faka kaumeʼa peʼe faka famili kae nātou tuku ki muli te agatonu ʼaē kia Sehova.
Koʼeni te kupu tāfito ʼo te akonaki ʼaē neʼe fai maʼa te hahaʼi fuli “Ko Ai ʼAē ʼe Ina Akoʼi Te Moʼoni Ki Te ʼu Puleʼaga Fuli?” Neʼe mole talanoa ia ko te moʼoni ʼi tona faka ʼuhiga māhani, kae neʼe palalau ki te moʼoni ʼo ʼuhiga mo te fakatuʼutuʼu ʼa Sehova ʼaē neʼe fagonogono e Sesu Kilisito. Neʼe palalau te tagata faiakonaki ki te moʼoni ʼo ʼuhiga mo te ʼu akonaki, te moʼoni ʼo ʼuhiga mo te faʼahiga tauhi, pea mo te moʼoni ʼo ʼuhiga mo te aga ʼa tatou takitokotahi. ʼAki te fakatatau ʼaia ʼo te kau Kilisitiano ʼo te ʼuluaki sēkulō mo te kau Fakamoʼoni ʼa Sehova ʼo te temi nei, neʼe fakamālohiʼi tatatou tui papau ʼaē ‘ ʼe nofo moʼoni te ʼAtua ʼi te lotolotoiga ʼo tatou.’—1 Kolonito 14:25.
ʼI te ʼosi fakamatala fakanounou ʼo te alatike ako ʼo Te Tule Leʼo ʼo te vāhaʼa, ko te akonaki fakaʼosi mo tona kupu tāfito “Tou Foimo Fakahoko Totatou Maʼua ʼAē Ko Te Akoʼi Te Hahaʼi,” neʼe ina uga te kau faiako ʼo te Folafola ʼa te ʼAtua ke nātou fakahā ʼaki he ʼu gāue. Neʼe fakaʼiloga e te toe fakamanatu ʼo te polokalama te maʼuhiga ʼaē ke fakaʼaogaʼi te Tohi-Tapu ʼi te ʼu faiako, mo te ʼu faʼahiga fai ke tou liliu ai ko he kau faiako faiva, pea mo te ʼaoga ʼaē ke tou falala ki te ʼu moʼoni ʼaē ʼe tou akoʼi ki te hahaʼi. Neʼe tokoniʼi tatou e te tagata fai akonaki ke tou faiga ‘ke hā lelei tatatou lakalaka ki muʼa’ pea mo tou ‘tokakaga kia tatou totonu pea mo tatatou faiakonaki.’—1 Timoteo 4:15, 16.
Neʼe ko he toe kātoaga fakalaumālie ʼaē neʼe tou kau kiai ʼi te Fakatahi Faka Tisitilike “Te Kau Faiako ʼo te Folafola ʼa te ʼAtua.” ʼOfa pe ke tou faʼifaʼitaki ki totatou Faiako Lahi, ia Sehova, pea mo totatou Tagata Faiakonaki Lahi ko Sesu Kilisito, ʼo tou ako ki niʼihi ia te Folafola ʼa te ʼAtua.
[Talanoa ʼo te pasina 28]
Ko He ʼu Tohi Foʼou ʼAoga
Ko nātou ʼaē neʼe kau ki te ʼu Fakatahi faka Tisitilike “Te Kau Faiako ʼo Te Folafola ʼa Te ʼAtua” neʼe nātou tali fakafiafia te ʼu tohi e lua ʼe lahi anai tona ʼaoga moʼo akoʼi ʼo te ʼu moʼoni faka Tohi-Tapu ki te hahaʼi ʼi te malamanei. Ko te kiʼi pepa lotu ʼaē ko tona kupu tāfito ʼE ʼi Ai Koa Hokotou Laumālie Tuputupua? ʼe ko he meʼa gāue ʼaoga anai moʼo kamata he ʼu fai palalau mo te ʼu hahaʼi ʼe mole fakakehekeheʼi ʼi tanatou lea te “nefesi” mo te “laumālie.” ʼE fakahā fakalelei e te kiʼi pepa lotu foʼou ʼaia te kehekehe ʼo te mālohi ʼo te maʼuli mo he laumālie, pea ʼe mole liliu te hahaʼi ʼaē kua mamate ko he ʼu laumālie.
Ko te kaupepa Une vie pleinement satisfaisante : Comment ? neʼe tufa ʼi te fakaʼosi ʼo te lua ʼaho ʼo te fakatahi. Neʼe teuteuʼi te kaupepa ʼaia moʼo kamata ʼo he ʼu ako Tohi-Tapu mo nātou ʼaē ʼe mole nātou mahino ki he Tupuʼaga ʼe ʼi ai tona agaaga pea mo te tohi ʼaē ʼe haʼu mai ia ia. Kua koutou fakaʼaogaʼi koa te ʼu tohi foʼou ʼaia ʼi tokotou minisitelio?
[Paki ʼo te pasina 26]
ʼI Milan, ʼi Italia, pea mo te ʼu fakatahi lalahi ʼaē neʼe fai ʼi te malamanei katoa neʼe papitema ai te toko teau tupu
[Paki ʼo te pasina 29]
Neʼe malave ki te loto ʼo te kau fono ia te gaoʼi “Tou Fakaʼapaʼapa Ki Te Pule ʼa Sehova”