Te ʼu Fehuʼi ʼa Te Kau Lautohi

ʼE kei ʼaoga koa ʼi te temi nei, te ʼu tapu ʼaē neʼe fai ʼi te Lao ʼa Moisese, ʼo ʼuhiga mo he ʼohoana ʼo he ʼu kāiga?

ʼO ʼuhiga mo te ʼu naunau ʼo te fai ʼohoana pea mo tona faʼahiga fai, ʼe mole lahi he ʼu meʼa ʼe tuʼu ʼi te Lao ʼaē neʼe foaki e Sehova ki te puleʼaga ʼo Iselaele. Kae ʼe tuʼu ai te ʼu tapu ʼo ʼihi faʼahiga fai ʼohoana. Ohage la, ia Levitike 18:6-20, ʼe tou maʼu ai te lisi ʼo te ʼu felāveʼi ʼaē ʼe mole tonu ke fai e he ʼu “kāiga totonu.” ʼE fakahāhā lelei e te vaega ʼaia ia te tapu ʼo he felāveʼi fakasino ʼo he ʼu kāiga totonu. ʼE moʼoni, ʼe mole kei mulimuli te kau Kilisitiano ki te Lao ʼa Moisese. (Efeso 2:15; Kolose 2:14) Kae ʼe mole faka ʼuhiga ʼaki ai ʼe mole tokagaʼi e te kau Kilisitiano te ʼaluʼaga ʼaia mokā nātou filifili honatou ʼohoana. ʼE lahi tona ʼu tupuʼaga.

ʼUluaki, ʼe ʼi ai te ʼu lao faka puleʼaga ʼo ʼuhiga mo te ʼohoana ʼo he ʼu kāiga totonu, pea ʼe tonu ki te kau Kilisitiano ke nātou fakalogo ki te ʼu lao ʼo te fenua ʼaē ʼe nātou nonofo ai. (Mateo 22:21; Loma 13:1) ʼE tahi ʼalu pe te fenua mo tana ʼu lao. ʼE lahi te ʼu lao ʼo te temi nei ʼe fai tāfito moʼo fakatokaga ki te hahaʼi ʼo ʼuhiga mo te ʼu agaaga ʼo te toto. Ko te meʼa kua ʼiloʼi papau, ko te ʼohoana ʼo he ʼu kāiga totonu ʼe lava tupu ai he ʼu fānau ʼe māʼimoa peʼe mahamahaki. Koia ko te kau Kilisitiano ʼaē ʼe nātou fia ʼohoana ʼe nātou fakalogo ki te lao ʼo ʼuhiga mo te fai ʼohoana, ʼuhi ko te faʼahi ʼaia pea mo tanatou “fakalogo ki te ʼu pule māʼoluga, MN.”

Pea ʼe ʼi ai mo te faʼahi ʼaē ʼe tali peʼe mole tali ʼi te koga meʼa ʼe tou nonofo ai. Teitei pe ko te ʼu lanu fuli ʼe ʼi ai tanatou ʼu lekula pea mo te ʼu agaʼi fenua ʼe nātou fakatūʼa te ʼohoana ʼo he ʼu hahaʼi ʼe kāiga totonu, heʼe faka ʼuhiga te taʼi fakatahi ʼaia ko he meʼa heʼe ʼaoga pea mo tapu. Logope ʼe lagi kehekehe ʼaupito te ʼu agaʼi fenua ʼo ʼuhiga mo he faʼahiga felogoi, kae ʼe ʼui fēnei e te tohi, The Encyclopædia Britannica: “ ʼI tona fakahagatonu, ʼe tapu mamafa pea mo kovi ʼaupito te felāveʼi fakasino ʼa he ʼu hahaʼi ʼe nā kāiga totonu.” Koia, tatau aipe peʼe mole ko he fakatahi ʼa he ʼu kāiga totonu ʼosi, kae ʼe mole fia fai e te kau Kilisitiano he aga ʼe mole ina tokagaʼi he agaʼi fenua peʼe ko te meʼa ʼaē ʼe logoʼi e te hahaʼi, naʼa ʼulihi ai te kokelekasio faka Kilisitiano peʼe ko te huafa ʼo te ʼAtua.—2 Kolonito 6:3.

ʼE mole tou meʼa noaʼi totatou leʼo ʼo loto ʼaē neʼe foaki mai e te ʼAtua. ʼE tutupu ake te hahaʼi fuli ʼaki te fealagia ʼaē ke nātou ʼiloʼi te meʼa ʼaē ʼe tonu ke fai pea mo te meʼa ʼaē ʼe mole tonu ke fai, mo te meʼa ʼaē ʼe lelei pea mo te meʼa ʼaē ʼe kovi. (Loma 2:15) ʼE ʼui age e tonatou leʼo ʼo loto te meʼa ʼaē ʼe lelei ke fai pea mo mata feʼauga, pea ʼe ina toe ʼui age foki mo te meʼa ʼaē ʼe mole tonu ke fai pea mo te meʼa ʼaē ʼe heʼe ʼaoga kia mata ʼa te hahaʼi, kae ʼe mole feala anai te faʼahi ʼaia mo kapau kua kovi tonatou leʼo ʼo loto peʼe kua māhani ki te ʼu aga heʼeʼaoga. Neʼe palalau ia Sehova ki te faʼahi ʼaia ʼi tana fakatoʼo tana lao ki te kau Iselaele ʼo ʼuhiga mo he fai ʼohoana ʼo he ʼu kāiga totonu. ʼE tou lau fēnei: “ ʼE mole tonu ke koutou fai ohage ko te fenua ʼo Esipito ʼaē neʼe koutou nonofo ai; pea ʼe mole tonu anai ke koutou fai he meʼa ke tatau mo te fenua ʼo Kanaane ʼaē ʼe ʼau fakahū koutou kiai; ʼe mole tonu ke koutou mulimuli ki ʼanatou lao.” (Levitike 18:3) ʼE faka maʼuhigaʼi e te kau Kilisitiano tonatou leʼo ʼo loto ʼaē ʼe fakatafito ki te Tohi-Tapu, pea ʼe mole nātou tuku ke kākāʼi e te manatu hala ʼo te ʼu puleʼaga ʼo ʼuhiga mo te ʼu meʼa ʼaē ʼe lelei pea mo te ʼu meʼa ʼaē ʼe kovi.—Efeso 4:17-19.

Koteā ʼaē kua tou mahino kiai? Logope ʼe mole kei mulimuli te kau Kilisitiano ki te Lao ʼa Moisese, kae ʼe ʼui fakalelei age e tonatou leʼo ʼo loto ko te ʼohoana ʼo he ʼu kāiga totonu—ohage ko he tāmai mo tona ʼofafine, ko te faʼe mo tana tama, peʼe ko he tautuagaʼane—ʼe ko he meʼa ia ʼe mole feala ke tali ʼi te kautahi faka Kilisitiano.a ʼI te hoko atu ʼo te fakaʼapaʼapa ki te vāhaʼa faka kāiga, ʼe mahino te kau Kilisitiano ʼe ʼi ai te ʼu lao ʼe nātou fakaʼaluʼalu te ʼu fai ʼohoana, pea ʼe ʼi ai te ʼu pelesepeto ʼe tali ʼi te maʼuli tahi mo te hahaʼi pea mo te agaʼi fenua. ʼE tonu ke tokagaʼi fakalelei te ʼu ʼaluʼaga ʼaia ke feala hatatou mulimuli ki te lekula faka Tohi-Tapu ʼaenī: “Ke faka maʼuhigaʼi e te hahaʼi fuli te nofo ʼohoana.”—Hepeleo 13:4, MN.

[Kiʼi nota]