ʼAua Naʼa Tou Fiu ʼi Te Fai ʼo Te Meʼa ʼAē ʼe Lelei
NEʼE tokoni fēnei te ʼapositolo ko Petelo: “Koutou mau he aga taulekaleka i te lotolotoga o [“te ʼu puleʼaga,” MN ].” (1 Petelo 2:12) Ko te kupu faka Keleka ʼaē neʼe fakaliliu ʼaki te kupu “taulekaleka” ʼe faka ʼuhiga ki he meʼa ʼe “matalelei, mo maʼuhiga, mo lelei.” Ia ʼaho nei, ʼe mata faigataʼa te fakaʼamu ke aga taulekaleka ia te hahaʼi. Kae ki te hahaʼi ʼa Sehova, ʼe nātou lava muliʼi lelei te fakaloto mālohi ʼaia ʼa Petelo. ʼI tona fakahagatonu, ʼe ʼiloa ia nātou ʼi te malamanei kātoa ʼi tanatou aga ʼaē ʼe lelei.
ʼE maʼuhiga tāfito mokā tou tokagaʼi te ʼu fihifihia pea mo te ʼu tuʼania ʼaē ʼe tau mo tatou ʼi “te ʼu temi maʼuhiga ʼaupito mo faigataʼa” ʼaenī. (2 Timoteo 3:1, MN) ʼE tou tau mo te ʼu ʼahiʼahi ʼi te ʼaho fuli, pea ko te fakafeagai ki totatou maʼuli faka Kilisitiano ʼe ko he meʼa kua hoko māhani. Pea tahi ʼaē meʼa, kapau ʼe ʼi ai ʼihi ʼahiʼahi ʼe mole hoko fualoa, kae ko ʼihi ʼahiʼahi ʼe loaloaga peʼe lēsili tuputupu. Kae neʼe tokoni fēnei mai te ʼapositolo ko Paulo: “Aua naa tou lotovaivai i te fai o te lelei, koteuhi e tou utu anai moka hoko mai tona temi, kapau foki e mole tou lotovaivai.” (Kalate 6:9) E feafeaʼi hatatou lava fai—pea mo hoko atu tona fai—te meʼa ʼaē ʼe lelei mo kapau ʼe tou tau mo he ʼu ʼahiʼahi fakatupu mamahi ʼaupito pea mo he ʼu fihifihia ʼe hoko tuʼumaʼu?
Ko He ʼu Puleʼaki ʼe Tokoni Mai Ki Te Fai ʼo Te Meʼa ʼAē ʼe Lelei
Ko te “matalelei, mo maʼuhiga, mo lelei” ʼe ko he ʼu kalitātē ʼo totatou ʼuhiga ʼi loto, totatou loto. Koia ko te taupau ʼo he aga ʼe lelei mokā tou tau mo he ʼu ʼahiʼahi peʼe ko he ʼu faigataʼaʼia, ʼe mole ko he aga ʼe kita fai pe ʼi he temi kua kita fakatuʼutuʼu kiai, kae ʼe kita fai ʼi te ʼaho fuli pea mo te ʼu ʼaluʼaga fuli, heʼe kita mulimuli pea mo maʼuliʼi te ʼu pelesepeto faka Tohi-Tapu. Koteā he ʼu meʼa ʼe lava tokoni mai kiā tatou ʼi te faʼahi ʼaia? Tou vakaʼi te ʼu manatu ʼaenī ʼe fakahoahoa.
Tou maʼu te manatu ʼa Kilisito. ʼE ʼaoga ke tou agavaivai ke tou kātakiʼi he aga ʼe hage ʼe heʼe faitotonu. Ko he tahi ʼe manatu ʼe maʼuhiga ʼe mole ina tali anai ke gaohi koviʼi ia ia. Kae ko Sesu “nee fakavaivai ifo, o liliu o fakalogo o kaku ki te mate.” (Filipe 2:5, 8) ʼI tatatou faʼifaʼitakiʼi ia ia, ʼe mole tou ‘fiu anai peʼe tou vaivavai anai’ ʼi tatatou tauhi taputapu. (Hepeleo 12:2, 3) Tou fakalogo ʼaki te agavaivai ʼo tou lagolago lelei kiā nātou ʼaē ʼe nātou takitaki tatatou kokelekasio. (Hepeleo 13:17) Tou ako te tokagaʼi ʼo te hahaʼi ohage ʼe nātou “maolugaʼage” ia tatou, ʼo tou fakamuʼamuʼa te ʼu meʼa ʼaē ʼe lelei kiā nātou kae mole ko te ʼu meʼa ʼaē ʼe lelei kiā tatou totonu.—Filipe 2:3, 4.
Tou manatuʼi ko Sehova ʼe ʼofa ia tatou. ʼE tonu ke tou ʼiloʼi papau ko Sehova “ko ia ʼaē ʼe ina fakapale ia nātou ʼaē ʼe nātou kumi moʼoni ia ia.” (Hepeleo 11:6, MN) ʼE tokaga moʼoni kiā tatou pea ʼe ina loto ke tou maʼu te maʼuli heʼegata. (1 Timoteo 2:4; 1 Petelo 5:7) ʼE tou haga kātaki anai ʼi te ʼu temi ʼo te ʼahiʼahi, mo kapau ʼe tou manatuʼi ʼe mole ʼi ai he meʼa ʼe feala ke ina tāʼofi te ʼofa ʼo te ʼAtua kiā tatou.—Loma 8:38, 39.
Tou falala kātoa kiā Sehova. ʼE maʼuhiga te falala kiā Sehova, tāfito la mokā hage te ʼu ʼahiʼahi ʼe mole gata ia ʼi he temi. ʼE tonu ke tou falala kātoa ʼe mole tuku mai anai e Sehova ia he ʼahiʼahi ‘ ʼe mole tou lava tali,’ kae ʼe ina ‘tuku tuʼumaʼu mai anai he faigamālie ke tou hāo.’ (1 Kolonito 10:13) Māʼia mokā fakamatakuʼi mai ʼe matehi anai tatou, ʼe feala ke tou kātakiʼi ʼaki te lotomālohi mo kapau ʼe tou falala kiā Sehova.—2 Kolonito 1:8, 9.
Koutou kātaki tuʼumaʼu ʼi te faikole. ʼE maʼuhiga te faikole fakamalotoloto. (Loma 12:12) Ko te faikole fakamalotoloto ʼe kau ki te ʼu puleʼaki ʼaē ʼe ina fakaōvi tatou kiā Sehova. (Sakopo 4:8) ʼAki te ʼu meʼa kua hoko tonu kiā tatou, ʼe tou ako ai “pe koteā he meʼa ʼe tou kole . . . ʼe fagono ia kiā tatou.” (1 Soane 5:14, MN ) Kapau ʼe tuku e Sehova ke hoholo atu te ʼahiʼahiʼi ʼo tatatou agatonu, tou faikole ke tokoni mai ke tou kātakiʼi. (Luka 22:41-43) ʼAki te faikole ʼe mahino kiā tatou ʼe mole tou tokotahi, ko Sehova ʼe kau mo tatou, pea ʼe tou mālo tuʼumaʼu anai.—Loma 8:31, 37.
Te ʼu Gāue Lelei—‘Ko He Meʼa Ke Vikiʼi Mo Faka Maʼuhigaʼi’
ʼE ko he meʼa ʼe hoko putuputu ki te kau Kilisitiano fuli tanatou “tali mamahi i te u faahiga ahiahi kehekehe.” Kae ‘ ʼaua naʼa tou fiu ʼi te fai ʼo te meʼa ʼaē ʼe lelei.’ Ka tou tuʼania, tou lotomālohi heʼe tou ʼiloʼi ko tatatou agatonu ʼe ko ‘he meʼa ke vikiʼi mo faka kolōliaʼi pea mo faka maʼuhigaʼi.’ (1 Petelo 1:6, 7) Tou fakaʼaogaʼi kātoa te ʼu meʼa ʼaē ʼe foaki mai e Sehova moʼo fakamālohiʼi tatatou tui. Kapau ʼe ʼaoga ke tokoni he tahi kiā koutou, koutou ʼolo ki te ʼu tēhina ʼaē ʼe tauhi ki te kokelekasio, mo te kau faiako, pea mo nātou ʼe fai tokoni ʼi te kokelekasio. (Gaue 20:28) Tou kau tuʼumaʼu ki te ʼu fono, ʼaē ʼe nātou ‘uga ia tatou ki te ʼofa mo te ʼu gāue lelei.’ (Hepeleo 10:24) Ko he polokalama lautohi pea mo he ako takitokotahi ʼo te Tohi-Tapu ʼi te ʼaho fuli, ʼe tokoni mai anai ke tou nonofo ʼalaʼala, pea mo mālohi ʼi te faʼahi fakalaumālie; ʼe tou toe mālolohi foki anai ʼi te faʼahi fakalaumālie mokā tou kau tuʼumaʼu ʼi te minisitelio faka Kilisitiano.—Pesalemo 1:1-3; Mateo 24:14.
Ka tou fakaʼaogaʼi lahi te ʼofa ʼo Sehova mo tana tokaga kiā tatou, ʼe tuputupu anai mo totatou loto ʼaē ke tou “faʼafai i te u gaue lelei.” (Tito 2:14) Tou manatuʼi “ko ae e kataki anai ki te gataʼaga, e mauli anai.” (Mateo 24:13) Koia tou faiga mālohi ke ‘ ʼaua naʼa tou fiu ʼi te fai ʼo te meʼa ʼaē ʼe lelei’!
[Talanoa ʼo te pasina 29]
ʼE tonu ke tou falala kātoa ʼe mole tuku mai anai e Sehova ia he ʼahiʼahi ‘ ʼe mole tou lava tali,’ kae ʼe ina ‘tuku tuʼumaʼu mai anai he faigamālie ke tou hāo’
[Paki ʼo te pasina 30]
Ko te maʼumaʼua ʼi te ʼu gāue faka teokalatike ʼe lava tokoni mai kiā tatou ke tou kātakiʼi te ʼu ʼahiʼahi