ʼE Nātou Foaki Ia Nātou Totonu
“KO TAU hahaʼi ʼe nātou foaki fakamalotoloto anai ia nātou.” (Pesalemo 110:3) Ko te ʼu palalau ʼaia ʼe ʼi ai tona ʼuhiga makehe maʼa te toko 46 kau ako ʼo te 118 Kalasi ʼo Te Faleako Faka Tohi-Tapu ʼo Kileate ʼo te Watchtower. Koteā ʼaē neʼe nātou fai ke feala hanatou kau ki te ako ʼaia, ʼaē ʼe ina akoako te kau misionea ke nātou tōkakaga ki te ʼu meʼa fakalaumālie ʼaē ʼe ʼaoga ki te hahaʼi ʼo te tahi ʼu fenua? Neʼe fakamahino fēnei e Mike mo Stacie ʼaē neʼe ʼi te 118 kalasi: “Ko tamā fakatotonu ʼaē ke mā maʼuli faigafua neʼe tokoni mai kiā māua ke mā fakasiʼisiʼi tomā ʼu temi fakafiafia kae ke mā tōkakaga tāfito ki te ʼu meʼa fakalaumālie. Neʼe mā fakatotonu ke ʼaua naʼa mā tuku tomā maʼuli fīmālie ʼi te faʼahi fakasino ke ina taʼomia tamā ʼu fakatuʼutuʼu fakalaumālie.” Ohage ko Mike mo Stacie, ko te tahi kau ako ʼo te kalasi ʼaia neʼe nātou foaki ia nātou totonu, pea ʼi te temi nei ʼe nātou faka mafola ia te Puleʼaga ʼi te ʼu fenua e fā.
ʼI te Moeaki ʼaho 12 ʼo Malesio 2005, neʼe ko te toko 6 843 hahaʼi neʼe nātou fiafia ʼi te fagono ki te polokalama ʼo te tufa ʼo te ʼu pepa ako. Ko Theodore Jaracz, ʼaē ʼe kau ki te Kolesi Pule, ko ia ʼaē neʼe pelesita ʼi te fono ʼaia. ʼI tana ʼosi fai ia tana ʼu fakamālo moʼo fakatalitali ki te kau fakaafe ʼaē neʼe kau ki te fono ʼaia mai te ʼu fenua kehekehe e 28, neʼe ina fakatokagaʼi age te maʼuhiga ʼo te ako faka Tohi-Tapu. Neʼe fakaʼaogaʼi e te tēhina faiakonaki ʼaia, ia te ʼu palalau ʼa te tagata faitohi Amelika ko William Lyon Phelps ʼaē neʼe ina ʼui fēnei: “ ʼE feala hakita ʼui ko te tagata fuape ʼaē ʼe ina maʼu he ʼatamai mālama loloto ʼo te Tohi-Tapu ʼe ko he tahi ʼe ʼatamai moʼoni.” Logope te ʼaoga ʼo te ako fakamālama, kae ʼe maʼuhiga age te ako ʼo te Tohi-Tapu. ʼE tokoni ki te hahaʼi ke nātou maʼu te ʼatamai mālama ki te ʼAtua, ʼaē ʼe ina taki ki te maʼuli heʼegata. (Soane 17:3) Neʼe vikiʼi e te Tēhina ko Jaracz ia te kau maʼu pepa ki tanatou lotolelei ke lahi age hanatou kau ki te polokalama ako faka Tohi-Tapu ʼaē ʼe fakahoko ʼi te malamanei ʼi te ʼu kokelekasio e 98 000 ʼo te kau Fakamoʼoni ʼa Sehova.
Ko He Fakaloto Mālohi ʼAoga Ki Te Kau Maʼu Pepa
ʼI te hili ʼo te ʼuluaki ʼakonaki ʼa te pelesita, neʼe palalau leva ia William Samuelson ki te akonaki ko tona kupu tāfito ʼaenī, “Peʼe Feafeaʼi Hakotou Hage Ko He Fuʼu Oliveto Matalelei ʼi Te ʼApi ʼo Te ʼAtua,” ʼo fakatafito kiā Pesalemo 52:8. Neʼe ina fakahā ko te fuʼu oliveto ʼe fakaʼaogaʼi fakatā ʼi te Tohi-Tapu moʼo fakatātā ia te fua, mo te matalelei pea mo te ʼalikisia. (Selemia 11:16) ʼI te fakatatau e te tēhina faiakonaki ia te kau ako ki te ʼu fuʼu oliveto, neʼe ina ʼui fēnei: “ ʼE tokagaʼi anai e Sehova tokotou matalelei mo tokotou ʼalikisia, ʼi takotou fakahoko fakalelei takotou faka mafola ia te Puleʼaga ʼi tokotou ʼu telituale misionea.” Ohage ko te fuʼu oliveto ʼaē ʼe ʼaoga ke mafola tona ʼu aka ke tologa tona maʼuli ʼi te ʼu temi ʼo te taʼi laʼā, ʼo feiā mo te kau ako ʼe tonu ke nātou fakamālohiʼi tonatou ʼu aka fakalaumālie ke nātou lava kātakiʼi te mole tokagaʼi ʼo tanatou gāue, mo te ʼu fakafeagai, pea mo te tahi ʼu ʼahiʼahi ka hoko kiā nātou ʼi tanatou gāue ʼi tonatou telituale.—Mateo 13:21; Kolose 2:6, 7.
Ko John E. Barr, ʼaē ʼe kau ki te Kolesi Pule pea neʼe kau ki te fono, neʼe fēnei te kupu tāfito ʼo tana akonaki, “Ko Koutou Ko Te Māsima ʼo Te Kele.” (Mateo 5:13, MN ) Neʼe ina ʼui ko te māsima ʼe ina fakatologa te meʼa kai ke ʼaua naʼa pala, pea ʼe feiā mo te fai faka mafola ʼa te kau misionea ʼo ʼuhiga mo te Puleʼaga ʼo te ʼAtua, ʼe ina hāofaki anai te hahaʼi ʼaē ʼe fagono, mo puipui ia nātou mai te pala fakalaumālie pea mo te ʼu aga heʼeʼaoga. Pea neʼe tokoniʼi e te Tēhina ko Barr te kau ako ke nātou “nofo fe’tokaleleiʼaki.” (Maleko 9:50) Neʼe tokoni fēnei e te tēhina faiakonaki: “Koutou maʼuliʼi te fua ʼo te laumālie, pea ke koutou fai tuʼumaʼu he ʼu aga mo he ʼu palalau fakaʼapaʼapa.”
Ko Wallace Liverance, ʼaē ʼe kau ki te ʼu tēhina faiako ʼo Kileate, neʼe ina fai tana akonaki ko tona kupu tāfito ʼaenī, “Koutou Nonofo Maʼu ʼi Te Loto Vaka ʼi Takotou Fagona ʼi Te ʼu Vai Loloto.” Ohage ko he sitima ʼe fagona ʼi te moana ʼe lava aʼu ki tona tauʼaga totonu, ʼe feiā mo te mahino ki “te [ʼu] mea loloto o te Atua”—ʼaē ko te ʼu moʼoni ʼo ʼuhiga mo te fakatuʼutuʼu ʼo te ʼAtua pea mo tona faʼahiga fakahoko—ʼe lava tokoni ki he tahi ke tuputupu ʼi te faʼahi fakalaumālie. (1 Kolonito 2:10) Ko te nofo ʼi te ʼu vai ʼaē ʼe mole faʼa loloto, ʼo fakafeauga pe ki “te ʼu ʼuluaki akonaki ʼo te ʼu folafola taputapu ʼo te ʼAtua,” ʼe ina tāʼofi tatatou tuputupu peʼe ina fakatupu anai tatatou “tūkia ʼo ʼuhiga mo [tatatou] tui.” (Hepeleo 5:12, 13, MN; 1 Timoteo 1:19, MN ) Neʼe fakaʼosi fēnei e te Tēhina ko Liverance, “ ʼofa pe ke lagolago atu kiā koutou ʼi tokotou telituale, ia ‘te loloto ʼo te koloāʼia, mo te poto, pea mo te ʼatamai mālama ʼo te ʼAtua.’ ”—Loma 11:33.
Ko Mark Noumair, te tahi tēhina faiako ʼo Kileate, neʼe ina fai tana akonaki ko tona kupu tāfito ʼaenī, “ ʼE ʼAlutahi Anai Koa Tokotou Maʼuli Mo Tokotou Tofiʼa?” Lolotoga taʼu e 60 tupu, kua faka tui te hahaʼi ki te lelei ʼo te Faleako Faka Tohi-Tapu ʼo Kileate pea kua fakaʼapaʼapaʼi ʼuhi ko ‘te ʼu fakamoʼoni lelei’ ʼaē neʼe fai e te kau maʼu pepa ʼo te faleako ʼaia. (Senesi 31:48) Ko te tofiʼa ʼaia ʼo Kileate kua foaki ki te kau ako ʼo te 118 kalasi. Neʼe fakalotomālohiʼi e te Tēhina ko Noumair ia te kau ako ke nātou faʼifaʼitakiʼi te kau Tekoite ʼo te temi ʼo Nehemia, mo nātou gāue fakatahi ʼaki te agavaivai mo te kokelekasio ʼo te fenua pea mo te kau misionea ʼaē ʼe nonofo ai. Neʼe tokoniʼi ia nātou ke ʼaua naʼa nātou maʼu te aga ʼa te kau “pule” fiatuʼu ʼaē neʼe palalau kiai ia Nehemia, pea ke nātou lotolelei ke nātou gāue ʼi te tokalelei pea ke ʼaua naʼa nātou fiahā.—Nehemia 3:5.
Ko Te ʼu Fakamatala ʼAoga Pea Mo Te ʼu Fakafehufehuʼi
Neʼe hoko atu te fono ʼaki te akonaki ko tona kupu tāfito ʼaenī “Neʼe Mafola Te Folafola ʼa Te ʼAtua.” (Gaue 6:7) Ko te akonaki ʼaia neʼe fai e te tahi tēhina faiako ʼo Kileate ko Lawrence Bowen, ʼaē neʼe fakamatalatala ai e te kau ako tanatou gāue fai faka mafola lolotoga tonatou temi ako ʼi Kileate. Neʼe ʼiloga ʼi te ʼu fakamatala ko te kau ako neʼe nātou faʼafai ʼi te Folafola ʼa te ʼAtua pea neʼe tapuakina e Sehova tanatou ʼu faiga.
Neʼe fakafehufehuʼi e Richard Ashe ia te kau Petelite neʼe gāue tahi mo te kalasi ʼaia. Neʼe ʼiloga ʼi tanatou ʼu fakamatala, neʼe lagolago lelei te famili ʼo te Petele ki te kau ako ʼo Kileate ke fakaʼaoga kātoa te ʼu lelei ʼo te ako. Pea neʼe fai palalau leva ia Geoffrey Jackson mo te kau maʼu pepa ʼāfea ʼo Kileate. Neʼe nātou fakahāhā lelei te ʼu tuʼuga faigamālie ʼe maʼu e te kau misionea ke nātou fakavikiviki pea mo faka maʼuhigaʼi ia Sehova. Neʼe ʼui fēnei e te tahi ia nātou: “Ko te hahaʼi ʼe nātou sioʼi te ʼu meʼa fuli ʼaē ʼe koutou fai e koutou kau misionea. ʼE nātou fagono, mo sio pea mo nātou manatuʼi.” Koia neʼe fakaloto mālohiʼi te kau ako ke nātou mahino ki te maʼuhiga ʼaē ke nātou tuku he faʼifaʼitaki lelei ʼi te temi fuli. ʼE mahino ia ʼe ʼaoga anai te tokoni maʼuhiga ʼaia ki ʼamuli.
Ko Stephen Lett, ʼe kau ʼi te Kolesi Pule, neʼe ina fai te akonaki fakaʼosi, ko tona kupu tāfito ʼaenī “Koutou ʼOlo, Ia Koutou ʼe Koutou Fetuku ‘Te Vai Mauli.’ ” (Soane 7:38) Neʼe fakamatala e te tēhina, lolotoga te ʼu māhina e nima kua hili neʼe fakaʼaogaʼi lahi e te kau ako ia te Folafola moʼoni ʼa te ʼAtua. Kae koteā anai ka fai e te kau misionea foʼou mo te ʼu fakamahino ʼaē neʼe fai kiā nātou? Neʼe fakaloto mālohiʼi e te Tēhina ko Lett ia te kau maʼu pepa ke nātou vaevae lahi ki te hahaʼi ia te ʼu vai fakalaumālie ke liliu “ko te matapuna e mapuhi ake ki te mauli heegata.” (Soane 4:14) Neʼe ʼui fēnei e te tēhina faiakonaki: “Ke ʼaua naʼa galo ia koutou te faka maʼuhigaʼi pea mo fai te fakavikiviki ʼaē ʼe tāu mo Sehova, ia ‘te matapuna ʼo te vai maʼuli.’ Koutou faʼa kātaki mokā koutou faiako kiā nātou ʼaē kua mavae mai Papiloni Lahi, ʼaē ka ʼamanaki fakaʼauha.” (Selemia 2:13) Neʼe fakaʼosi e te Tēhina ko Lett ia tana akonaki, ʼo ina fakaloto mālohiʼi te kau maʼu pepa ke nātou faʼifaʼitakiʼi mālohi ia te laumālie pea mo te fafine ʼohoana pea mo nātou haga ʼui: “ ‘Haʼu!’ Pea ko ʼaē ʼe fia ʼinu ke haʼu; ko ʼaē ʼe loto kiai, ke ina toʼo . . . te vai ʼo te maʼuli [ʼaē ʼe mole totogi].”—Apokalipesi 22:17, MN.
Neʼe fakaʼosi e te Tēhina ko Jaracz te fono ʼo ina fakahā te ʼu fakaʼalofa mai te ʼu fenua kehekehe. Neʼe hoa kiai te lau ʼo te tohi fakamālo e te tēhina ʼe kau ʼi te kau maʼu pepa.
ʼE koutou lava foaki koa ia koutou totonu ke koutou gāue ʼi he koga meʼa ʼe ʼaoga kiai he kau gāue fai faka mafola? Kapau koia ʼaia, pea koutou haga faiga ʼi te ʼu fakatuʼutuʼu fakalaumālie, ohage ko tona fai e te kau maʼu pepa ʼaenī. Koutou maʼu ai te fiafia ʼaē ʼe logoʼi e he tahi mokā ʼe ina foaki ia ia totonu ke tauhi ki te ʼAtua—peʼe gāue misionea ʼi he tahi fenua peʼe gāue fai faka mafola ʼi tona fenua.
[Talanoa ʼo te pasina 13]
KO TE ʼU AGAAGA ʼO TE KALASI
ʼE nātou ʼōmai mai te ʼu fenua e: 8
ʼE nātou ʼolo ki te ʼu fenua e: 19
Ko te kau ako e: 46
Te fakafuafua ʼo tonatou ʼu taʼu: 33
Te fakafuafua ʼo tanatou ʼu taʼu ʼi te moʼoni: 16,5
Te fakafuafua ʼo tonatou ʼu taʼu ʼi te gāue temi kātoa: 12,9
[Paki ʼo te pasina 15]
Ko Te 118 Kalasi ʼo Te Faleako Faka Tohi-Tapu ʼo Kileate ʼo Te Sosiete Watchtower
ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.
(1) Brockmeyer, A. ; Moloney, S. ; Symonds, N. ; Lopez, Y. ; Howard, C. (2) Jastrzebski, T. ; Brown, D. ; Hernandez, H. ; Malagón, I. ; Jones, A. ; Connell, L. (3) Howard, J. ; Lareau, E. ; Shams, B. ; Hayes, S. ; Brown, O. (4) Burrell, J. ; Hammer, M. ; Mayer, A. ; Kim, K. ; Stanley, R. ; Rainey, R. (5) Jastrzebski, P. ; Zilavetz, K. ; Ferris, S. ; Torres, B. ; Torres, F. (6) Connell, J. ; Hernandez, R. ; Moloney, M. ; Malagón, J. ; Shams, R. ; Hayes, J. (7) Ferris, A. ; Hammer, J. ; Stanley, G. ; Kim, C. ; Symonds, S. ; Lopez, D. ; Burrell, D. (8) Brockmeyer, D. ; Mayer, J. ; Rainey, S. ; Zilavetz, S. ; Jones, R. ; Lareau, J.