“Te ʼUluaki Fakatuʼuake”—ʼE Lolotoga Nei!

“Ko nātou ʼaē neʼe mamate ʼo tahi mo Kilisito ʼe natou ʼuluaki tutuʼuake anai.”—1 Tesalonika 4:⁠16.

1, 2. (a) Koteā te ʼamanaki kiā nātou ʼaē kua mamate? (b) ʼE fakatafito kiteā takotou tui ki te fakatuʼuake? (Vakaʼi te kiʼi nota ʼi te lalo pāsina.)

“KO TE kau māʼuʼuli ʼe natou ʼiloʼi ʼe natou mamate anai.” Talu mai te agahala ʼa Atama, kua tou ʼiloʼi te moʼoni ʼo te manatu faka Tohi-Tapu ʼaia. ʼI te lolotoga ʼo te hisitolia, ko te hahaʼi fuli ʼaē ʼe tutupu ake ʼe natou ʼiloʼi ʼe natou mamate anai, pea tokolahi ʼe natou fai te fehuʼi ʼaenī: ‘Koteā ʼaē kā hoko ʼi te hili ʼo te mate? ʼE feafeaʼi te ʼaluʼaga ʼo te kau mate?’ ʼE tali fēnei mai ʼi te Tohi-Tapu: “Kae ko te kau mate, ʼe mole kei natou ʼiloʼi he meʼa.”​—Tagata Tānaki 9:⁠5.

² Kae ʼe ʼi ai koa he ʼamanaki kiā nātou ʼaē kua mamate? ʼEī. ʼE tonu ke ʼi ai he ʼamanaki maʼa te kau mate, mo kapau ko te ʼuluaki fakatuʼutuʼu ʼa te ʼAtua maʼa te mālamanei ʼe tonu ke fakahoko. Lolotoga te ʼu sēkulō, neʼe haga tui ia te ʼu kaugana agatonu ʼa te ʼAtua ki te fakapapau ʼa Sehova ʼo ʼuhiga mo he Hako ʼe ina fakaʼauha anai ia Satana pea mo te molehi te ʼu mamahi ʼaē neʼe ina fakatupu. (Senesi 3:15) Kua mamate lā ia te tokolahi iā nātou ʼaia. Kapau ʼe tonu ke natou sisio ki te fakahoko ʼo te fakapapau ʼaia pea mo ʼihi age ʼu fakapapau neʼe fai e Sehova, pea ʼe tonu foki ke fakatuʼuake ia nātou mai te mate. (Hepeleo 11:13) ʼE lava koa ke hoko he meʼa feiā? ʼEī, ʼe lava hoko he meʼa feiā. Neʼe ʼui fēnei e te ʼapositolo ko Paulo: “ ʼE ʼi ai anai he fakatuʼuake ʼo te kau faitotonu pea mo te kau heʼe faitotonu.” (Gaue 24:​15, MN ) ʼI te tahi ʼaho neʼe fakatuʼuake e Paulo ia te tama kei tūpulaga, pea neʼe higoa ko Etuko, neʼe tō ifo ʼi te matapā faka mālama mai te laufata tolu pea neʼe “lagai ake kua mate.” ʼE ko te fakatuʼuake fakamuli ʼaia ʼe kau ki te ʼu fakatuʼuake e hiva, ʼaē ʼe fakamatala ʼi te Tohi-Tapu.​—Gaue 20:​7-12.a

3. Koteā te fakaloto fīmālie ʼe kotou maʼu takitokotahi ʼi te ʼu palalau ʼa Sesu ʼaē ʼe fakamatala iā Soane 5:​28, 29, pea koteā tona tupuʼaga?

³ Ko te ʼu fakatuʼuake ʼaia e hiva, ʼe ko he fakatafitoʼaga ke tou tui ki te ʼu palalau ʼaē neʼe fai e Paulo. ʼAki te ʼu fakatuʼuake ʼaia neʼe hoko, ʼe tou falala mālohi ai ki te fakapapau ʼaenī ʼa Sesu: “[ʼE] hoko mai te hola e fakalogo anai [ki te] leo [ʼo Sesu] e natou [“fuli,” MN ] i te u faitoka.” (Soane 5:​28, 29) ʼE ko he ʼu palalau fakaloto fīmālie! Pea ko he meʼa fakafiafia ki te kau mamate e toko lauʼi miliona ʼaē neʼe tou ʼoʼofa ai!

4, 5. Ko te ʼu faʼahiga fakatuʼuake feafeaʼi ʼaē ʼe talanoa kiai ʼi te Tohi-Tapu, pea ko te fakatuʼuake fea ʼaē kā tou talanoa anai kiai ʼi te ʼalatike ʼaenī?

⁴ Ko te tokolahi ʼaē kā fakatuʼuake, ʼe fakatuʼuake anai ʼi he kele kua tokalelei ʼe takitaki e te Puleʼaga ʼo te ʼAtua. (Pesalemo 37:​10, 11, 29; Isaia 11:​6-9; 35:​5, 6; 65:​21-23) Kae ʼe tonu ke fakatuʼuake ʼihi ʼi muʼa ʼo te fakatuʼuake ʼaia. ʼUluaki, neʼe tonu muʼa foki ke fakatuʼuake ia Sesu moʼo foaki ia te maʼuhiga ʼo tona sākilifisio ki te ʼAtua maʼa tātou. Neʼe mate ia Sesu pea neʼe fakatuʼuake ʼi te taʼu 33 ʼo totatou temi.

⁵ ʼOsi ʼaia, ko te kau fakanofo ʼo “te Iselaele a te Atua” ʼe tonu ke fakatahi mo te ʼAliki ko Sesu Kilisito ʼi te kolōlia ʼi selō, ʼaē kā natou “nonofo [ai] anai mo te Aliki o talu ai.” (Gaue 6:16; 1 Tesalonika 4:17) Ko te meʼa ʼaia ʼe higoaʼi ko “te fakatuʼuake . . . ʼo te kau mate ʼaē ʼe kamata tautonu” peʼe ko “te ʼuluaki fakatuʼuake.” (Filipe 3:​10, 11, MN; Apokalipesi 20:​6, MN ) Kā ʼosi anai te fakatuʼuake ʼaia, pea ʼe hoko mai leva te temi ʼaē kā fakatuʼuake ai anai te toko lauʼi miliona hahaʼi ʼaki te ʼamanaki ʼaē ke natou maʼu ia te maʼuli heʼegata ʼi te Palatiso ʼi te kele. Koia, peʼe tou ʼamanaki ke tou māʼuʼuli ʼi te lagi peʼe ʼi te kele, kae ʼe tou fia ʼiloʼi “te ʼuluaki fakatuʼuake.” ʼE feafeaʼi te fakatuʼuake ʼaia? ʼE hoko anai ʼāfea?

“Ko Te Faʼahiga Sino Feafeaʼi?”

6, 7. (a) ʼI muʼa ʼo te ʼolo ʼa te kau Kilisitiano fakanofo ki te lagi, koteā ʼaē ʼe tonu ke hoko? (b) ʼE fakatuʼuake anai nātou ʼaki te faʼahiga sino feafeaʼi?

⁶ ʼI tana ʼuluaki tohi ki te kau Kolonito, neʼe lagaʼi e Paulo ia te fehuʼi ʼo ʼuhiga mo te ʼuluaki fakatuʼuake: “ ʼE feafeaʼi anai te fakatuʼuake ʼa te kau mate? ʼEī Ko te faʼahiga sino feafeaʼi ʼaē ʼe ʼomai mo nātou?” ʼE ina tali fēnei ki te fehuʼi: “ ʼE hoki maʼuli te pulapula ʼaē ʼe ke tō mo kapau ʼe mate muʼa . . . kae ko te ʼAtua e ina foaki kiai he sino ʼo mulimuli ki tona loto . . . ʼE kehe pē te kolōlia ʼo te u sino ʼi te lagi, pea kehe pē te kolōlia ʼo te ʼu sino ʼi te kele.”​—1 Kolonito 15:​35-40.

⁷ ʼE hā mai ʼi te ʼu palalau ʼa Paulo, ko te kau Kilisitiano fakanofo e te laumālie māʼoniʼoni, ʼe tonu muʼa ke natou mamate pea hoki natou maʼu leva ia te fakapale ki selō. ʼI tanatou mate, ʼe toe liliu ʼonatou sino ki te efu. (Senesi 3:19) ʼI te temi fakakatofa ʼo te ʼAtua, ʼe fakatuʼuake ia natou ʼaki he faʼahiga sino ʼe tuha mo te maʼuli ʼaē ʼe ʼi selō. (1 Soane 3:2) ʼE toe foaki age e te ʼAtua ia te maʼuli tuputupua. ʼE mole ko he meʼa ʼe natou maʼu talu mai tanatou tutupu ake, ohagē leva neʼe pupuhi kiā nātou ia he nefesi tuputupua. ʼE ʼui fēnei e Paulo: “[Ko] te natula mate ke ina kofu anai te heegata.” Ko te maʼuli tuputupua ʼe ko he meʼa ʼofa mai te ʼAtua, pea ʼe “kofu” e nātou ʼaē ʼe kau ki te ʼuluaki fakatuʼuake.​—1 Kolonito 15:​50, 53; Senesi 2:7; 2 Kolonito 5:​1, 2, 8.

8. ʼE tou ʼiloʼi feafeaʼi ko te ʼAtua neʼe mole ina filifili ia te toko 144 000 mai he ʼu lotu kehekehe?

⁸ ʼE ko te toko 144 000 pē ʼaē ʼe natou kau ki te ʼuluaki fakatuʼuake. Pea neʼe kamata filifili nātou ʼaia e Sehova ʼi te Penikosite ʼo te taʼu 33 ʼo totatou temi, mole faʼa fualoa ki tana ʼosi fakatuʼuake ʼo Sesu. Ko nātou fuli ʼaia ʼe tohi te “higoa [ʼo Sesu] mo te higoa o tana Tamai, . . . i onatou lae.” (Apokalipesi 14:​1, 3) Koia, neʼe mole filifili nātou mai he ʼu lotu kehekehe. Ko nātou fuli ko te kau Kilisitiano, pea ʼe natou fiameʼameʼa ʼi tanatou fua ia te huafa ʼo te Tamai​—ʼaē ko Sehova. ʼI te temi ʼaē kā fakatuʼuake ai ia nātou, ʼe foaki age kiā natou ia te gāue ʼi te lagi. Ko te ʼamanaki ke natou tauhi fakahagatonu ki te ʼAtua ʼe ko he meʼa fakafiafia kiā nātou.

ʼE Lolotoga Nei Koa?

9. ʼE tokoni feafeaʼi mai ia Apokalipesi 12:7 pea mo te Apokalipesi 17:14 ke tou ʼiloʼi ia te temi ʼaē neʼe kamata ai te ʼuluaki fakatuʼuake?

⁹ Ko te temi fea ʼaē kā hoko ai anai te ʼuluaki fakatuʼuake? ʼE ko te temi nei ʼaē ʼe lolotoga nei te fakatuʼuake ʼaia. Ohagē lā, tou fakatatau te ʼu kāpite e lua ʼo Apokalipesi. ʼUluaki, tou lau ia Apokalipesi kāpite 12. ʼE tou lau ai ko Sesu Kilisito ʼaē neʼe hoki fakanofo atu pē, pea mo tana kau ʼāselo māʼoniʼoni, neʼe natou tau mo Satana pea mo tana kau temonio. (Apokalipesi 12:​7-9) ʼI te nusipepa ʼaenī, ʼe tautau fakahā ko te tau ʼaia neʼe kamata ʼi te taʼu 1914.b Kae tou fakatokagaʼi, ʼe mole ʼui ʼe ʼi ai he tahi ʼi te kau tisipulo fakanofo ʼa Kilisito ʼe fakatahi mo Sesu ʼi te tau ʼaia neʼe hoko ʼi selō. Tou lau leva ʼi te temi nei, ia Apokalipesi kāpite 17. ʼE tou lau ʼi te ʼosi ʼo te fakaʼauha ʼo “Papiloni Lahi,” ko te ʼAkeno ʼe mālo anai ʼi te ʼu puleʼaga. ʼOsi ʼaia, ʼe toe ʼui fēnei: “Mo nātou ʼaē ʼe fakatahi mo ia ʼaē neʼe pāuiʼi, mo fili pea mo agatonu.” (Apokalipesi 17:​5, 14, MN ) Ko te hahaʼi ʼaē “neʼe pāuiʼi, mo fili pea mo agatonu” kapau ʼe tonu ke natou kau mo Sesu ki te fakaʼauha fakaʼosi ʼo te mālama ʼa Satana, ʼe tonu muʼa ke fakatuʼuake nātou. Koia ʼe mata tonu ai, ko te kau fakanofo ʼaē ʼe natou mamate ʼi muʼa ʼo Halamaketone, ʼe fakatuʼuake nātou ʼi te vaha ʼo te taʼu 1914 ʼo aʼu ki Halamaketone.

10, 11. (a) Ko ai koa te toko 24 kau tagata ʼāfea, pea koteā ʼaē ʼe fakahā e te tahi tagata ʼāfea iā nātou kiā Soane? (b) Koteā ʼaē ʼe tou lava ʼui ʼo ʼuhiga mo te faʼahi ʼaenī?

¹⁰ ʼE feala koa ke tou ʼiloʼi papau te temi ʼaē neʼe kamata ai te ʼuluaki fakatuʼuake? ʼE tou maʼu ia te fakamoʼoni iā Apokalipesi 7:​9-15, ko te ʼapositolo ko Soane neʼe sio ki “[“te toe hahaʼi tokolahi,” MN ] nee mole he tahi nee ina malau.” ʼE fakahā kiā Soane pe ko ai te toe hahaʼi tokolahi ʼaia e te tahi ʼi te kau tagata ʼāfea e toko 24, pea ko te kau tagata ʼāfea ʼaia ʼe ko te toko 144 000 kau maʼu tofiʼa mo Kilisito ʼi tonatou tuʼulaga faka kolōlia ʼi selō.c (Luka 22:​28-30; Apokalipesi 4:4) Neʼe ko te ʼamanaki ʼa Soane ke maʼuli ʼi selō; kae neʼe kei maʼuli pē ia ʼi te kele ʼi te temi ʼaē neʼe palalau age te tagata ʼāfea kiā te ia, koia ʼi te meʼa ʼaē neʼe sio kiai Soane, neʼe lagi ina fakatātā te kau fakanofo ʼi tanatou kei māʼuʼuli ʼi te kele ʼaē mole heʼeki natou maʼu tonatou fakapale ʼaē ʼe ʼi selō.

¹¹ Koteā ʼaē ʼe tou lava ʼui ki te fakahā ʼaē kiā Soane e te tahi ʼo te toko 24 kau tagata ʼāfea, pe ko ai ia te toe hahaʼi tokolahi? ʼE ʼiloga mai ʼe lagi kau ia te kau fakatuʼuake ʼo te kūtuga ʼa te kau tagata ʼāfea e toko 24 ki te fakahā ʼo te ʼu moʼoni fakaʼatua ʼaē iā ʼaho nei. He koʼē ʼe maʼuhiga ia te faʼahi ʼaia? He neʼe fakahā ʼi te taʼu 1935 ki te ʼu kaugana fakanofo ʼa te ʼAtua ʼi te kele pe ko ai te toe hahaʼi tokolahi. Kapau neʼe ko he tagata ʼāfea ʼi te kau tagata ʼāfea e toko 24 ʼaē neʼe ina tala te moʼoni maʼuhiga ʼaia, neʼe lagi kua fakatuʼuake ia ki te lagi ʼi te taʼu 1935 peʼe ʼi muʼa atu. Ko tona faka ʼuhiga neʼe lagi kamata te ʼuluaki fakatuʼuake ʼi te vaha ʼo te taʼu 1914 pea mo te taʼu 1935. ʼE feala koa ke tou ʼiloʼi papau tona temi totonu ʼaē neʼe hoko ai?

12. Kotou fakamahino pe koʼē ʼe feala ke ʼui ko te fasiga taʼu mātala ʼo te taʼu 1918 neʼe kamata ai te ʼuluaki fakatuʼuake.

¹² ʼI tatatou kua kaku mai ki te puani ʼaenī ʼo tatatou ako, ʼe lagi lelei ke tou vakaʼi tona ʼu fakahoko faka Tohi-Tapu. ʼI te fasiga taʼu fakatō lau ʼo te taʼu 29 ʼo totatou temi neʼe kua fakanofo ia Sesu Kilisito ko ia kā Hau ʼi te Puleʼaga ʼo te ʼAtua. Hili taʼu e tolu vaelua, ʼi te fasiga taʼu mātala ʼo te taʼu 33 ʼo totatou temi, neʼe fakatuʼuake ia ia ko he laumālie mālohi. Koia, ʼe feala koa ke tou manatu talu mai te fakanofo ʼo Sesu ʼi te fasiga taʼu fakatō lau ʼo te taʼu 1914, ko te fakatuʼuake ʼo tana ʼu tisipulo fakanofo agatonu neʼe kamata hili taʼu e tolu vaelua ʼi te fasiga taʼu ʼo te taʼu mātala ʼo te taʼu 1918? Ko he faʼahi neʼe feala ke hoko ʼi te taʼu ʼaia. Logolā ko te faʼahi ʼaia ʼe mole feala ke fakamoʼoni fakahagatonu mai ʼi te Tohi-Tapu, kae ko ʼihi vaega faka Tohi-Tapu ʼe tou lau ʼe ʼui ai neʼe hoko te ʼuluaki fakatuʼuake ʼi te ʼosi ʼo te kamata ʼi henī ʼa Kilisito.

13. ʼE fakahā feafeaʼi mai iā 1 Tesalonika 4:​15-17 ko te ʼuluaki fakatuʼuake neʼe hoko ʼi te kamataʼaga ʼo te ʼi henī ʼa Kilisito?

¹³ Ohagē lā, neʼe tohi fēnei e Paulo: “Ko tātou, ʼaē ko te kau maʼuli, ʼaē ʼe māʼuʼuli ʼo aʼu ki te temi ʼafio ʼo te ʼAliki [ʼe mole ko te fakaʼosi ʼo tana ʼi henī], e mole feala anai ke tou mumuʼa ia nātou ʼaē kua momoe ʼi te mate; heʼe ko te ʼAliki totonu, ʼaki he pāui faka pule, ʼaki he leʼo faka alekaselo pea mo te fakatagi pupuhi ʼa te ʼAtua, ʼe hifo anai mai te lagi, pea ko nātou ʼaē neʼe mamate ʼo tahi mo Kilisito ʼe natou ʼuluaki tutuʼuake anai. Ki muli age leva, ko tātou ʼaē kei māʼuʼuli, ʼo fakatahi mo nātou ʼaia, ʼe toʼo anai tātou ʼi te ʼu ʼao ʼo fakafetaulaki mo te ʼAliki ʼi te ʼaele.” (1 Tesalonika 4:​15-17, MN ) Koia, ko te kau Kilisitiano fakanofo ʼaē neʼe mamate ʼi muʼa ʼo te ʼi henī ʼa Kilisito, neʼe muʼa tonatou fakatuʼuake ki te maʼuli ʼi selō iā nātou ʼaē neʼe kei māʼuʼuli lolotoga ʼo te ʼi henī ʼa Kilisito. Ko tona faka ʼuhiga, neʼe lagi kamata te ʼuluaki fakatuʼuake ʼi te kamataʼaga ʼo te ʼi henī ʼa Kilisito, pea kei fai pē “lolotoga ʼo tana ʼafio.” (1 Kolonito 15:​23, MN ) ʼE mole fakatuʼuake te kau mate fuli ʼi he lakaga e tahi, ʼe tonu muʼa ke kamata ʼaki te ʼuluaki fakatuʼuake.

“Neʼe Foaki Age Te Kofu Hina Kiā Nātou Takitokotahi”

14. (a) Ko te temi fea ʼaē ʼe hoko ai te ʼu meʼa ʼaē neʼe hā pea ʼe fakamatala ʼi te tohi ʼo Apokalipesi kāpite 6? (b) Koteā ʼaē ʼe fakamatalatala iā Apokalipesi 6:⁠9?

¹⁴ Kotou toe vakaʼi foki mo te fakamoʼoni ʼaē ʼe tuʼu iā Apokalipesi kāpite 6. ʼE tou sio ai ko Sesu ʼe heka ʼi te hōsi ko he Hau ʼe mālo. (Apokalipesi 6:2) Ko te ʼu puleʼaga ʼe natou kau ki te tau lahi. (Apokalipesi 6:4) ʼE ʼi ai te hoge lahi. (Apokalipesi 6:​5, 6) ʼE fakaʼauha te mālamanei e te ʼu tautea fakamataku. (Apokalipesi 6:8) Ko te ʼu meʼa fuli ʼaia ʼaē neʼe fakakikite, ʼe ʼalutahi mo te ʼu ʼaluʼaga ʼo te mālamanei talu mai te taʼu 1914. Kae neʼe hoko te tahi age meʼa. ʼE fakatokagaʼi tātou ʼo ʼuhiga mo he ʼaletale ʼo te sākilifisio. ʼI te vaʼe ʼaletale ʼaia, ʼe ʼi ai “te u laumalie o natou nee tamatei uhi ko te folafola a te Atua pea mo te fakamooni nee natou fai.” (Apokalipesi 6:9) Mai tona ʼaluʼaga ʼaē ko “te maʼuli ʼo te kakano ʼe maʼu ʼi te toto,” ko te meʼa ʼaē ʼe ina fakatātā moʼoni ʼi te vaʼe ʼaletale, ʼe ko te toto ʼa te ʼu kaugana agatonu ʼa Sesu ʼaē neʼe tāmateʼi ʼuhi ko tanatou fai faka mafola mo tonatou lototoʼa pea tanatou faʼafai.​—Levitike 17:⁠11.

15, 16. Kotou fakamahino pe koʼē ʼe faka ʼuhigaʼi ki te ʼuluaki fakatuʼuake ia te ʼu palalau ʼaē iā Apokalipesi 6:​10, 11.

¹⁵ Ohagē ko te toto ʼo te tagata agatonu ko Apele, ko te toto ʼo te kau Kilisitiano maletile ʼaia ʼe kalaga ki te faitotonu. (Senesi 4:10) “Neʼe natou kalaga leʼo mālohi, ʼo ʼui maʼa nātou: ‘ ʼE aʼu ki ʼāfea, Tuʼi ʼAliki māʼoniʼoni pea mo moʼoni, tau tāʼofi ia koe ke ke fakamāuʼi pea mo fakatotogi tomatou toto kiā nātou ʼaē ʼe nonofo ʼi te kele?’ ” Koteā ʼaē kā hoko? “Neʼe foaki age te kofu hina kiā nātou takitokotahi; pea neʼe ʼui age kiā nātou ke natou toe mālōlō atu pē ʼi he moʼi temi nounou, ʼo aʼu foki ki te kātoa ʼo tonatou ʼu kaugā pōpula pea mo tonatou ʼu tehina ʼaia neʼe ʼamanaki ke tāmateʼi ohagē pē ko te tāmateʼi ʼo nātou.”​—Apokalipesi 6:​10, 11, MN.

¹⁶ Ko te ʼu kofu hina ʼaia ʼe tuku koa ʼi he taʼataʼa ʼi te vaʼe ʼaletale? Kailoa ia! Neʼe foaki te ʼu kofu ʼaia ki te hahaʼi ʼaē neʼe liligi tonatou taʼataʼa, ohagē pē neʼe liligi ʼi te ʼaletale. Neʼe natou sākilifisioʼi tonatou maʼuli ʼi te huafa ʼo Sesu pea ʼi te temi nei kua fakatuʼuake nātou ko he kau laumālie. ʼE tou ʼiloʼi feafeaʼi te faʼahi ʼaia? ʼI te kamataʼaga ʼo te tohi ʼo Apokalipesi, ʼe tou lau fēnei: “ ʼE kofuʼi feiā anai ia ia ʼaē kā mālo, ʼaki te ʼu kofu . . . hina; pea ʼe mole au molehi anai tona higoa ʼi te tohi ʼo te maʼuli.” Kotou toe manatuʼi foki, ko te toko 24 kau tagata ʼāfea neʼe natou “kofuʼi te ʼu kofu . . . hina, pea ʼai ʼi ʼonatou ʼulu te ʼu kolona ʼaulo.” (Apokalipesi 3:5; 4:4) Koia ʼi te ʼosi fakaʼauha ʼo te kele e te tau, mo te hoge, mo te taʼi mahaki, ko te toko 144 000 ʼaē kua mamate, ʼaē neʼe fakatātā e te taʼataʼa ʼi te vaʼe ʼaletale, ʼe fakatuʼuake leva nātou ki te maʼuli ʼi selō pea mo natou kofu tonatou ʼu kofu hina fakatātā.

17. ʼE faka ʼuhiga feafeaʼi te ʼui ʼaē ko nātou ʼaē ʼe natou maʼu te ʼu kofu hina ʼe tonu muʼa ke natou “mālōlō”?

¹⁷ Ko te kau fakatuʼuake ʼaia ʼaē ʼe mole heʼeki faʼa fualoa, ʼe tonu muʼa ke natou “mālōlō.” ʼE tonu ke natou faʼa kātaki ʼo fakatalitali ki te ʼaho lagavaka ʼo te ʼAtua. Ko tonatou ʼu “kauga-gaue,” te kau Kilisitiano fakanofo ʼaē kei māʼuʼuli ʼi te kele, ʼe kei tonu muʼa ke natou fakahā tanatou agatonu ʼi te ʼu ʼahiʼahi. Mokā hoko mai leva te fakaʼauha ʼa te ʼAtua, pea ʼe ʼosi anai te “mālōlō” ʼaia. (Apokalipesi 7:3) ʼI te temi ʼaia, ko te kau fakatuʼuake ʼaia pea mo te ʼAliki ko Sesu Kilisito ʼe natou fakaʼauha anai te kau agakovi, ʼo kau ai ia nātou ʼaē neʼe natou matehi te kau Kilisitiano.​—2 Tesalonika 1:​7-10.

Koteā Tona Faka ʼUhiga Kiā Tātou

18, 19. (a) Ko te ʼu tupuʼaga fea ʼaē ʼe feala ke kotou ʼui ai ko te ʼuluaki fakatuʼuake ʼe kua lolotoga nei? (b) ʼE kotou feafeaʼi ʼi takotou ʼiloʼi ʼaē kua hoko te ʼuluaki fakatuʼuake?

¹⁸ ʼE mole fakahā totonu ʼi te Folafola ʼa te ʼAtua te ʼaho pea mo te hola ʼo te ʼuluaki fakatuʼuake, kae ʼe ina fakahā pē, te agaaga ʼo te temi ʼaē kā hoko ai, ʼi te henī ʼa Kilisito. Ko nātou ʼaē kā ʼuluaki fakatuʼuake, ʼe ko te kau Kilisitiano fakanofo ʼaē neʼe mamate ʼi muʼa ʼo te kamata ʼo te ʼi henī ʼa Kilisito. Lolotoga ʼo te ʼi henī ʼa Kilisito, ko te kau Kilisitiano fakanofo ʼaē neʼe nofo agatonu ʼo aʼu ki te fakaʼosi ʼo tanatou lele ʼi te kele, ʼe fetogi anai nātou ohagē “ko te kemo o te mata” ko he ʼu laumālie fakapulipuli mālohi. (1 Kolonito 15:52) ʼE ko te kau fakanofo fuli koa ʼaē kā natou maʼu tonatou fakapale ʼi selō ʼi muʼa ʼo te tau ʼo Halamaketone? ʼE mole tou ʼiloʼi te faʼahi ʼaia. Kae ko te meʼa ʼaē ʼe tou ʼiloʼi, ʼi te temi ʼaē kua fakakatofa e te ʼAtua, ko te toko 144 000 ʼe natou tutuʼu fuli anai ʼi te Moʼuga ʼo Sione ʼaē ʼe ʼi selō.

¹⁹ Ko te meʼa ʼaē kua tou ʼiloʼi, ko te tokolahi ʼo te toko 144 000 kua natou fakatahi nei mo Kilisito. ʼE ko te kiʼi tokosiʼi pē ʼe kei māʼuʼuli ʼi te kele. ʼI meʼa lelei hata ʼiloʼi kua vave mai te temi ʼo te tautea ʼa te ʼAtua! Kua vave fakaʼauha ia te mālama kātoa ʼa Satana. ʼE lī anai ia Satana ki te vanu. ʼOsi ʼaia, pea kamata leva te fakatuʼuake ʼaē ki te kele ʼa te hahaʼi, pea ko te kau agatonu ʼe feala leva ʼaki te sākilifisio faitotogi ʼa Sesu ke fakatuʼuake ki te maʼuli haohaoa ohagē ko ʼaē neʼe pulihi e Atama. Ko te lea faka polofeta ʼa Sehova ʼaē ʼe tuʼu iā Senesi 3:15 ʼe lolotoga hoko lelei ʼosi ia. ʼI pilivilesio lahi hata māʼuʼuli ʼi te ʼu temi ʼaenī!

[Kiʼi nota]

ʼE Feala Koa Hakotou Fakamahino?

ʼE tokoni feafeaʼi mai te Tohi-Tapu ke tou ʼiloʼi te temi ʼo “te ʼuluaki fakatuʼuake”?

• Iā Apokalipesi 12:7; 17:⁠14

• Iā Apokalipesi 7:​13, 14

• Iā 1 Kolonito 15:23; 1 Tesalonika 4:​15-17

• Iā Apokalipesi 6:​2, 9-11

[Paki ʼo te pasina 24]

Ko te fakatuʼuake fea ʼaē kā hoko ʼi muʼa ʼo te fakatuʼuake ʼo te hahaʼi ke natou māʼuʼuli ʼi te kele?

[Paki ʼo te pasina 27]

Koteā te faka ʼuhiga ʼo te foaki ʼo he kofu hina kiā natou ʼaē kua mamate?