ʼE Maʼuli Te Folafola ʼa Sehova
Ko He ʼu Puani ʼAoga ʼo Te Tohi ʼa Malakia
NEʼE laga iā taʼu e 70 te fale lotu ʼi Selusalemi. ʼI te ʼalu ʼo te temi, neʼe fakahaʼuhaʼu ʼo vaivai ia te ʼu felōgoi fakalaumālie ʼa te kau Sutea pea mo Sehova. Māʼiapē lā mo te kau pelepitelō neʼe kua natou fai te ʼu aga ʼe kovi. Ko ai anai ʼaē kā ina fakahā age anai kiā nātou ia tonatou ʼaluʼaga moʼoni, pea mo tokoni age ke natou toe mālolohi ʼi te faʼahi fakalaumālie? Ko te gāue ʼaia neʼe tuku age e Sehova ki te polofetā ko Malakia.
Ko te ʼu palalau mālohi ʼaē neʼe fai e Malakia ʼi te tohi fakaʼosi ʼo te ʼu Tohi Faka Hepeleo, ʼe tou maʼu ai te ʼu lea faka polofetā mai te ʼAtua. Kapau ʼe tou vakavakaʼi fakalelei ia te lea faka polofetā ʼa Malakia, pea ʼe feala ai ke ina teuteuʼi tātou ki “te ʼaho lahi pea mo fakamataku ʼo Sehova,” mokā hoko mai anai ia te fakaʼauha ʼo te ʼu faʼahiga meʼa ʼo te tuʼu agakovi ʼaenī.—Malakia 4:5.
KO TE KAU PELEPITELŌ NEʼE NATOU “FAKA TŪKIA IA TE TOKOLAHI”
Neʼe fakahā e Sehova tona loto ʼo ʼuhiga mo Iselaele, ʼo ʼui māʼana: “Neʼe au ʼofa kiā koutou.” Kae ko te kau pelepitelō neʼe natou moamoagaʼi ia te huafa ʼo te ʼAtua. ʼO feafeaʼi? ‘ ʼI tanatou momoli ʼi tona ʼaletale ia te pane heʼemaʼa,’ pea mo tanatou mōlagaʼi “he manu ʼe ketu peʼe mahaki” ke sākilifisioʼi.—Malakia 1:2, 6-8.
Ko te kau pelepitelō neʼe natou “faka tūkia ia te tokolahi ʼi te lao.” Ko te hahaʼi neʼe natou “aga fekākāʼaki.” Ko ʼihi Sutea neʼe natou ʼohoana mo te ʼu fafine pagani. Ko ʼihi neʼe natou aga fakakākā ki ʼonatou ‘ ʼohoana ʼo tonatou temi tūpulaga.’—Malakia 2:8, 10, 11, 14-16.
Te ʼu Tali Ki Te ʼu Fehuʼi Faka Tohi-Tapu:
2:2—Neʼe feafeaʼi te fakaliliu e Sehova ia ‘te ʼu tapuakina ʼa te kau pelepitelō agatuʼu ko he malaʼia’? Neʼe fai e te ʼAtua ia te faʼahi ʼaia ʼi tana fakaliliu ʼaē ko he malaʼia ia te tapuakina ʼaē neʼe fai e te kau pelepitelō.
2:3—Koteā te faka ʼuhiga ʼo te “laku ʼo te ʼu faifekauʼi [manu]” ki te ʼu fofoga ʼo te kau pelepitelō? ʼI te Lao, ko te ʼu manu ʼaē neʼe sākilifisioʼi neʼe laku tonatou ʼu faifekau ki tuʼa atu ʼo te nofoʼaga pea neʼe tutu. (Levitike 16:27) Neʼe faka ʼuhiga te laku ʼo te ʼu faifekauʼi manu ki te fofoga ʼo te kau pelepitelō, ki te situʼa ʼa Sehova ki te ʼu sākilifisio pea mo tana situʼa kiā nātou ʼaē neʼe natou fai ia te ʼu mōlaga ʼaia ʼaē neʼe fakalialia ki ai ia Sehova.
2:13—ʼA ai te ʼu loʼimata ʼaē neʼe ʼaofi ʼaki ia te ʼaletale ʼo Sehova? Neʼe ko te ʼu loʼimata ʼo te ʼu fafine ʼohoana ʼaē neʼe ʼomai ki te sagatualio ʼo fetāgihi kiā Sehova. Koteā te tupuʼaga ʼo tanatou lotomamahi ʼaia? Koteʼuhi ko tonatou ʼu ʼohoana Sutea neʼe natou māvete mo nātou pea mo liʼaki nātou ʼuhi ko he ʼu faʼahi ʼe mole tuʼu ʼi te lao, ke feala hanatou ʼohoanaʼi ni ʼu fafine pagani ʼe kei finemui age.
Te ʼu Puani ʼe Tou Lava Tāʼofi:
1:10. Neʼe mole leleiʼia e Sehova ia te ʼu mōlaga ʼa te kau pelepitelō loto mānumānu ʼaia, ʼaē neʼe natou fakamaʼua ke totogi nātou, logolā neʼe ko he ʼu kihiʼi gāue ʼaē neʼe natou fai, ohagē ko te pupunu ʼo te ʼu matapā peʼe ko te tutu ʼo te ʼu afi ʼo te ʼaletale. ʼE maʼuhiga ʼi te ʼu gāue ʼaē ʼe tou fai ʼi te tauhi, ohagē lā ko tatatou minisitelio, ke tou fai ʼaki he loto kātoa maʼa te ʼAtua pea mo totatou tatau, kae ke ʼaua naʼa tou fai ke totogi ai tātou!—Mateo 22:37-39; 2 Kolonito 11:7.
1:14; 2:17. ʼE mole tali e Sehova ia te aga faka mālualoi.
2:7-9. Ko nātou ʼaē neʼe tuku ki ai ia te pilivilēsio ʼaē ke natou faiakonaki ʼi te kōkelekāsio, ʼe tonu ke natou tōkakaga ʼo ʼuhiga mo te ʼu meʼa ʼaē ʼe natou akoʼi ki te nofoʼaki, ke ʼalutahi mo te Folafola ʼa te ʼAtua, ia te Tohi-Tapu, pea mo te ʼu tohi faka Tohi-Tapu ʼaē ʼe tā e “te tagata tauhi ʼapi agatonu.”—Luka 12:42; Sake 3:11.
2:10, 11. ʼE loto e Sehova ki tana hahaʼi tauhi, ke natou fakalogo ki te tokoni ʼaē ke natou ʼohoana “ ʼi te ʼAliki pē.”—1 Kolonito 7:39.
2:15, 16. ʼE tonu kiā nātou tagata ʼaē ʼe natou ʼatolasio kiā Sehova, ke natou fakaʼapaʼapa lahi ki te fakapapau ʼaē neʼe natou fai mo tonatou ʼohoana ʼi tonatou temi tūpulaga.
‘ ʼE HAʼU ANAI IA TE ʼALIKI MOʼONI KI TONA FALE LOTU’
“Fokifā pē, ʼe haʼu anai ki Tona fale lotu ia te ʼAliki moʼoni [ia Sehova ʼAtua]” pea mo “te tagata ʼave logo ʼo te fuakava [ia Sesu Kilisito].” Ko te ʼAtua ʼe “fakaovi atu anai kiā koutou moʼo fai ʼo te fakamāu” pea ʼe liliu anai ko he fakamoʼoni ʼe gāue fakavilivili moʼo fakafeagai ki te hahaʼi agakovi fuli. Tahi ʼaē, neʼe fai he “tohi fakamanatu” maʼa nātou ʼaē ʼe manavasiʼi kiā Sehova.—Malakia 3:1, 3, 5, 16.
Ko te ʼaho ʼaia ʼaē “ ʼe vela ohagē ko he gutuʼumu,” ʼe hoko mai anai pea ʼe ina fakaʼauha anai ia te hahaʼi agakovi fuli. ʼI muʼa ʼo te hoko mai ʼo te ʼaho ʼaia, ʼe fekauʼi mai anai he polofetā moʼo “fakatafoki mai te loto ʼo te ʼu tamai ki te ʼu foha pea mo te loto ʼo te ʼu foha ki te ʼu tamai.”—Malakia 4:1, 5, 6.
Te ʼu Tali Ki Te ʼu Fehuʼi Faka Tohi-Tapu:
3:1-3—Ko te temi fea ʼaē neʼe haʼu ai “te ʼAliki moʼoni” pea mo “te tagata ʼave logo ʼo te fuakava” ki te fale lotu, pea ko ai ʼaē neʼe fekauʼi fakatomuʼa mai ʼi ʼonā muʼa? ʼI hona ʼaluʼaga fakatātā neʼe haʼu ia Sehova ʼo fakamaʼa ia tona fale lotu ʼi te māhina ʼo Nisani ʼo te taʼu 33 ʼo totatou temi. Neʼe hoko te faʼahi ʼaia ʼi te temi ʼaē neʼe hū ai ia Sesu ki te fale lotu, ʼo ina kapu mai ki tuʼa ia te hahaʼi ʼaē neʼe natou faifakatau ai. (Maleko 11:15) Ko te faʼahi ʼaia neʼe hoko hili kiai taʼu e tolu vaelua ʼi tona ʼosi filifili ke Hau. Neʼe lagi hoko te faʼahi fēia, ʼi te hili ʼo taʼu e tolu vaelua ʼi te ʼosi fakanofo Hau ʼo Sesu ʼi selō, he neʼe kaugā ʼolo mo Sehova ki te fale lotu fakalaumālie pea neʼe nā fakatokagaʼi neʼe ʼaoga ke fakamaʼa ia te hahaʼi ʼo te ʼAtua. ʼI te ʼuluaki sēkulō, neʼe fekauʼi fakatomuʼa ia Soane Patita ke ʼalu ʼo teuteuʼi ia te kau Sutea ki te haʼu ʼa Sesu Kilisito. ʼI totatou temi, neʼe fekauʼi ia te tagata ʼave logo moʼo tofa ia te ala ki te haʼu ʼa Sehova ki tona fale lotu fakalaumālie. ʼI te kamataʼaga pē ʼo te ʼu taʼu 1880, ko te kau Ako Tohi-Tapu neʼe natou kamata ako ia te Tohi-Tapu moʼo fakahā ki te hahaʼi fakamālotoloto ia te ʼu moʼoni tāfito ʼo te Tohi-Tapu.
3:10—ʼE fakatātā koa te ʼaumai ʼo “te ʼu vahe hogofulu fuli” peʼe ko te time ki te foaki ʼo totatou ʼu koloa fuli kiā Sehova? Neʼe fakagata ia te Lao ʼa Moisese ʼi te temi ʼaē neʼe mate ai ia Sesu, koia ʼe mole kei fakamaʼua ia he time faka paʼaga. Kae neʼe ʼi ai te faka ʼuhiga fakatātā ʼo te time. (Efesi 2:15) ʼE mole fakatātā ki te foaki ʼo totatou ʼu koloa fuli. Neʼe foaki e te kau Iselaele ia te vahe hogofulu ʼo te ʼu koloa ʼi te taʼu fuli, kae ko tātou ʼe tou foaki tuʼa tahi pē ia meʼa fuli kiā Sehova ʼi te temi ʼaē ʼe tou foaki ai totatou maʼuli kiā te ia pea mo tou fakahā ia te faʼahi ʼaia ʼi te temi ʼaē ʼe tou papitema ai. ʼO kamata mai te temi ʼaia, ko meʼa fuli ʼaē ʼe tou maʼu, ʼe ʼa Sehova. Kae ʼi te tahi faʼahi, ʼe ina tuku mai ke tou filifili he vahe ʼi totatou ʼu koloa—peʼe ko he time fakatātā—ke tou fakaʼaogaʼi ki tana tauhi. ʼO fakalogo tona fakaʼaogaʼi, ki totatou ʼu fealagia pea mo te lahi ʼaē ʼo totatou ʼofa. Ko te ʼu mōlaga ʼaē ʼe tou foaki kiā Sehova, ʼe ko totatou temi, totatou mālohi, pea mo totatou ʼu koloa ʼaē ʼe tou fakaʼaogaʼi ki te faka mafola ʼo te logo lelei ʼo te Puleʼaga pea mo te fai ʼo ni ʼu tisipulo. ʼE toe kau kiai mo tatatou lagolago ki te ʼu fono, mo te ʼu vākai mahaki pea mo te ʼaʼahi ʼo totatou ʼu tehina mo tuagaʼane ʼaē kua mātutuʼa, pea mo tatatou lagolago ʼi te faʼahi faka paʼaga ki te tauhi moʼoni.
4:3—ʼE ‘molomoloki feafeaʼi anai e te kau ʼatolasio ʼa Sehova ia te kau agakovi’? Ko te ʼu kaugana ʼa te ʼAtua ʼaē ʼe māʼuʼuli ʼi te kele ʼe mole natou “molomoloki [moʼoni] anai ia te kau agakovi,” kae ʼe natou lagolago anai ki te fakahoko e Sehova tana ʼu tautea ʼaē kiā nātou. Ko tona faka ʼuhiga ko te ʼu kaugana ʼa Sehova ʼaē ʼe māʼuʼuli ʼi te kele, ʼe natou lagolago anai ʼaki he loto kātoa ki te mālo ʼaē kā hoko ʼi te ʼosi fakaʼauha ʼo te mālama ʼa Satana.—Pesalemo 145:20; Fakahā 20:1-3.
4:4—He koʼē ʼe tonu ke tou “manatuʼi ia te Lao ʼa Moisese”? ʼE mole kei fakamaʼua ki te kau Kilisitiano ke natou fakalogo ki te Lao ʼaia, logolā neʼe ko “he ʼata ʼo te ʼu meʼa lelei kā haʼu.” (Hepeleo 10:1) Koia, kapau ʼe tou tokagaʼi ia te Lao ʼa Moisese, pea ʼe feala anai hatatou mahino peʼe hoko feafeaʼi ia te ʼu meʼa ʼaē neʼe tohi ai. (Luka 24:44, 45) Tahi ʼaē, ʼe maʼu ʼi te Lao ia “te ʼu fakatā ʼo te ʼu meʼa ʼaē ʼi te lagi.” Ko te ako ʼo te Lao ʼe maʼuhiga mo kapau ʼe tou fia mahino ki te ʼu akonaki pea mo te aga faka Kilisitiano.—Hepeleo 9:23.
4:5, 6—Ko ai ʼaē ʼe fakatātā e ‘te polofetā ko Elia’? Neʼe fakakikite ko “Elia” ʼe ina teuteuʼi anai te loto ʼo te hahaʼi, ke natou toe felogoi lelei mo te ʼAtua. ʼI te ʼuluaki sēkulō, neʼe ʼui e Sesu Kilisito ko Soane Patita neʼe ko “Elia.” (Mateo 11:12-14; Maleko 9:11-13) Ko ia ʼaē ʼe ina fakatātā ia Elia ʼi totatou temi, ʼe fekauʼi mai “ ʼi muʼa ʼo te hoko mai ʼo te ʼaho lahi pea mo fakamataku ʼo Sehova.” ʼI te temi nei ko Elia ʼe fakatātā e “te tagata kaugana agatonu mo poto.” (Mateo 24:45) Ko te kau Kilisitiano fakanofo ʼaia, ʼe natou gāue mālohi moʼo tokoni ki te hahaʼi ke natou toe felōgoi lelei mo te ʼAtua.
Te ʼu Puani ʼe Tou Lava Tāʼofi:
3:10. Kapau ʼe mole tou foaki kātoa ia tātou kiā Sehova, pea ʼe mole tou maʼu anai ia tana ʼu tapuakina.
3:14, 15. ʼUhi ko te faʼifaʼitaki kovi ʼa te kau pelepitelō, neʼe kua meʼa noaʼi e te kau Sutea ia te tauhi ʼaē ki te ʼAtua. Koia, ʼe tonu ki te ʼu tehina takitaki ʼo te kōkelekāsio ke natou tōkakaga mo nātou ki te faʼahi ʼaia.—1 Petelo 5:1-3.
3:16. Ko Sehova ʼe ina tohi ki hana tohi fakamanatu ia nātou ʼaē ʼe manavasiʼi kiā te ia pea mo nonofo agatonu. ʼE ina manatuʼi nātou pea ʼe ina puipui anai ia nātou ʼi te temi ʼaē kā ina fakaʼauha ai anai ia te mālama agakovi ʼa Satana. Koia, tou haga taupau mālohi tatatou agatonu ʼaē ki te ʼAtua.—Sopo 27:5.
4:1. ʼI te ʼaho ʼaē kā tou huʼi maʼua ai kiā Sehova, ko te “aka” pea mo te “vaʼa” ʼe nā iku anai ki te meʼa e tahi—ko tona faka ʼuhiga, ko te ʼu fānau ʼe tauteaʼi anai nātou ohagē pē ko tanatou ʼu mātuʼa. ʼE ko he toe gāue ʼaē ʼe tonu ke fakahoko e te ʼu mātuʼa ki tanatou fānau! Ko te ʼu mātuʼa Kilisitiano ʼe tonu ke natou gāue kinakina ke natou felōgoi lelei mo te ʼAtua pea mo nonofo agatonu kiā te ia.—1 Kolonito 7:14.
“Manavasiʼi Ki Te ʼAtua Moʼoni”
Ko ai ʼaē kā hao anai ʼi “te ʼaho lahi pea mo fakamataku ʼo Sehova”? (Malakia 4:5) “Kiā koutou ʼaē ʼe manavasiʼi ki toku huafa,” ʼe ʼui fēnei e Sehova: “ ʼE mahino papau ia ʼe hopo ake anai ia te laʼā ʼo te faitotonu, mo te mālōlō ʼi tona ʼu kapakau; pea ʼe kotou hū moʼoni anai ki tuʼa pea mo kotou molomoloki anai ia te kele ʼaki tokotou ʼu vaʼē ohagē ko he ʼu pipi mui ʼe gako lelei.”—Malakia 4:2.
ʼE ko Sesu Kilisito ia “te laʼā ʼo te faitotonu,” ʼe gigila kiā nātou ʼaē ʼe fakaʼapaʼapa ki te huafa ʼo te ʼAtua, pea ʼe tapuakinaʼi nātou e Sehova. (Soane 8:12) Kiā nātou ʼaia, ʼe ʼi ai mo he “mālōlō ʼi tona ʼu kapakau”—ʼe ko he mālōlō fakalaumālie ʼi te temi nei pea mo he mālōlō kātoa ʼi te faʼahi fakasino, mo te ʼatamai, pea mo te loto ʼi te mālama foʼou ʼaē kā fakatuʼu e te ʼAtua. (Fakahā 22:1, 2) ʼE natou “[hagē] ko he ʼu pipi mui ʼe gako lelei” ʼuhi ko tanatou fiafia. ʼAki ia te ʼu tapuakina ʼaia ʼi te kā haʼu, tou fakalogo lelei ki te fakaloto mālohi ʼaenī ʼa te Hau ko Salomone: “Manavasiʼi ki te ʼAtua moʼoni pea mo taupau tana ʼu fakatotonu. Heʼe koʼenā ia te maʼua kātoa ʼo te tagata.”—Tagata Tānaki 12:13.
[Paki ʼo te pasina 28]
Ko te polofetā ko Malakia, neʼe ko he kaugana faʼafai pea mo agatonu ʼa te ʼAtua
[Paki ʼo te pasina 31]
ʼE tonu ke ʼalutahi mo te Tohi-Tapu ia te ʼu manatu ʼaē ʼe tou akoʼi ki te hahaʼi
[Paki ʼo te pasina 31]
ʼE fakaʼapaʼapa ia te ʼu kaugana ʼa Sehova ki te fakapapau ʼaē neʼe natou fai ʼo ʼuhiga mo te ʼohoana