Kotou Faiga Fakamālotoloto Ke Haofaki Tokotou Maʼuli Fakataumātuʼa

“Kia natou ae kua ohoana, e au fakatotonu, e mole ko au, kae ko te Aliki.”—1 KO. 7:10.

ʼE FEALA KOA HAKOTOU FAKAMAHINO?

Koteā te fakaʼuhiga ʼo te ʼui ʼaē neʼe haʼi e Sehova te taumātuʼa ʼi te ʼohoana?

ʼE lava tokoni feafeaʼi te kau tagata ʼāfea kiā nātou ʼaē ʼe fetaulaki mo he ʼu faigataʼaʼia ʼi tonatou maʼuli fakataumātuʼa?

ʼE tonu ke feafeaʼi tatatou manatu ʼo ʼuhiga mo te nofo ʼohoana?

1. Koteā te manatu ʼa te kau Kilisitiano ʼo ʼuhiga mo te ʼohoana, pea koteā tona tupuʼaga?

ʼE FAI e he taumātuʼa Kilisitiano he fakapapau iā muʼa ʼo te ʼAtua ʼi te ʼaho ʼo tonā ʼohoana. ʼE ko he maʼua ʼe mole tonu ke nā meʼa noaʼi. (Ekl. 5:4-6) Neʼe “hai” nāua e Sehova ʼi te ʼohoana heʼe ko ia te Tupuʼaga ʼo te ʼohoana. (Mko. 10:9) ʼI ʼihi temi, ʼe mole tatau te ʼu lao ʼo te fenua pea mo te ʼu lao ʼi te Tohi-Tapu ʼo ʼuhiga mo te nofo ʼohoana. Kae ʼe tonu ke maʼu e te kau Kilisitiano te manatu ʼa Sehova ʼo ʼuhiga mo te fakapapau ʼaē neʼe natou fai ʼi tonatou ʼaho ʼohoana, tatau aipē pe neʼe mole natou tauhi kiā Sehova ʼi te temi ʼaia.

2. Koteā te ʼu fehuʼi ʼaē kā tou vakaʼi anai ʼi te ʼalatike ʼaenī?

² Ko he ʼohoana ʼe mālohi mo tologa ʼe fakafiafia. Kae koteā ʼaē ʼe feala ke fai e he taumātuʼa mo kapau ʼe nā fetokakoviʼaki? ʼE feala koa ke nā toe felōgoi lelei? Ko te ʼu tokoni fea ʼe feala ke nā maʼu?

ʼE LILIU ANAI KOA KO HE FIAFIAʼAGA PEʼE KO HE LOTOMAMAHI?

3, 4. Koteā ʼaē ʼe feala ke hoko mo kapau ʼe mole fakapotopoto te tonu ʼaē ʼe fai e he tahi ʼi tana filifili hona ʼohoana?

³ Kā ʼe mālohi pea mo tologa te ʼu taumātuʼa Kilisitiano, ʼe fakafiafia pea mo fakakolōlia kiā Sehova. Kae kapau ʼe natou māvete peʼe natou tahi nofo, pea ʼe natou lotomamahi pea mo fua kovi ki ʼamuli. Ko he Kilisitiano selipatea ʼe fia ʼohoana ʼe feala ke kamata lelei tona maʼuli fakataumātuʼa mo kapau ʼe mulimuli ki te takitaki ʼa te ʼAtua. Kae kapau ʼe mole fakapotopoto te tonu ʼaē ʼe fai e he tahi ʼi tana filifili hona ʼohoana pea ʼe maʼu anai ʼi tonā maʼuli te ʼita mo te lotomamahi. Ohagē lā, ʼe kamata fakatahi ʼihi tūpulaga kae mole heʼeki popoto ʼi te fakahoko ia te ʼu maʼua ʼo te maʼuli fakataumātuʼa. Ko ʼihi ʼe natou maʼu tonatou ʼohoana ʼi te Neti pea mo ʼohoana atu aipē, kae ʼe mole natou fiafia ki muli age. Pea ko ʼihi neʼe natou agahala lolotoga tanatou fakatahi, ʼo mole kei natou fefakaʼapaʼapaʼaki. Kapau ʼe natou ʼohoana, pea ʼe mole he kamataʼaga lelei ʼo tanatou nofo ʼohoana.

⁴ Ko ʼihi Kilisitiano ʼe mole natou ʼohoana “i te Aliki” pea natou mamahi heʼe natou maʼuli ʼi he loto fale ʼe mole lotu tahi. (1 Ko. 7:39) Kapau ʼe kotou tau mo te faʼahi ʼaia, kotou kole ki te ʼAtua ke ina fakamolemole atu pea ke tokoni atu. ʼE mole ina pulihi te ʼu faigataʼaʼia ʼaē ʼe tau mo he tahi ʼuhi ko te ʼu hala neʼe ina fai ʼi muʼa atu, kae ʼe tokoni anai kiā ia ʼaē ʼe fakahemala ke ina tauʼi ʼona faigataʼaʼia. (Pes. 130:1-4) Kotou faiga fakamālotoloto ke kotou fakafiafia tona loto ʼi te temi nei ʼo talu ai, pea “ko te fiafia o te Eteleno [ʼe] ko tokotou malohiaga [anai].”—Nee. 8:10.

MOKĀ TOKAKOVI TE TAUMĀTUʼA

5. Koteā te ʼu faʼahiga manatu ʼe tonu ke tekeʼi e te ʼu taumātuʼa ʼaē ʼe mole kei maʼu te fiafia ʼi tonatou maʼuli?

⁵ Ko nātou ʼaē ʼe lotomamahi ʼi tonatou maʼuli fakataumātuʼa ʼe lagi natou fakakaukau fēnei: ʼE mole kei maʼu te fiafia ʼi tomā maʼuli koia ʼe ʼaoga koa ke au haofaki tomā maʼuli fakataumātuʼa? Kana neʼe feala lā haku toe selipatea ke feala haku toe ʼohoana mo he tahi age! ʼE lagi natou fakaʼamu ke natou māvete, ʼo natou manatu fēnei: ʼI meʼa lelei foki mo kapau ʼe au toe ʼāteaina! ʼE feala pē haku māvete mo toku ʼohoana, pea tatau aipē peʼe mole hona tupuʼaga Fakatohi-tapu, kae ʼe feala haku mavae ia ia ke au toe maʼu te fiafia. ʼE mole tonu ke fakakaukau fēia te kau Kilisitiano peʼe ke natou fakaʼamu ke kehe age tonatou maʼuli. ʼE lelei age hanatou faiga ke fakatokatoka te ʼaluʼaga ʼaia, mo kumi ia te takitaki ʼa te ʼAtua pea mo natou mulimuli kiai.

6. Kotou fakamahino te ʼu palalau ʼa Sesu iā Mateo 19:9.

⁶ Kapau neʼe tonu ke māvete he Kilisitiano, pea ʼo mulimuli ki te Tohi-Tapu ʼe feala anai peʼe kailoa hana toe ʼohoana. Neʼe ʼui fēnei e Sesu: “Ko ae e ina fakamavae tona ohona, gata pe ki te faiaga, pea e toe ohoana ia ia mo he tahi age fafine, e ina fai he tono.” (Mat. 19:9) ʼI te vaega ʼaenī, ko te kupu Fakakeleka ʼaē neʼe fakaliliu ʼaki te kupu “faiaga” ʼe kau kiai te tono ʼaē ko te hala ki tuʼa pea mo te tahi age ʼu agahala mamafa ʼi te ʼu felāveʼi fakasino. Koia ʼe maʼuhiga ai ke faikole pea mo fakakaukauʼi lelei he tahi ʼe fia māvete kae neʼe mole heʼeki fai e tona ʼohoana he aga heʼeʼaoga ʼi te ʼu felāveʼi fakasino.

7. Koteā ʼaē ʼe feala ke manatu kiai te hahaʼi mo kapau ʼe māvete he taumātuʼa Kilisitiano?

⁷ Kā māvete he taumātuʼa peʼe nā tahi nofo, ʼe lagi ʼe ʼi ai he tahi iā nāua ʼe vaivai ʼi te faʼahi fakalaumālie. Neʼe lagaʼi e te ʼapositolo ko Paulo ia te fehuʼi maʼuhiga ʼaenī: “He kapau e mole iloi e he tahi te takitaki o tona fale totonu, pe e feafeai anai tana tokaga ki te Ekelesia o te Atua?” (1 Tim. 3:5) Kapau ko he taumātuʼa ʼe nā ʼui ʼe nā Kilisitiano kae nā māvete, pea ʼe feala pē ke manatu te hahaʼi ʼe mole nā maʼuliʼi moʼoni te ʼu meʼa ʼaē ʼe nā fakamafola.—Loma 2:21-24.

8. Ko te faʼahi fea ʼaē ʼe tōtō ai he taumātuʼa Kilisitiano mo kapau ʼe nā fakatuʼutuʼu ke nā tahi nofo peʼe nā māvete?

⁸ Mokā fakatuʼutuʼu e he taumātuʼa kua papitema ke nā tahi nofo peʼe nā māvete kae neʼe mole hoko te faʼahi ʼaē ʼe talanoa kiai te Tohi-Tapu, ʼe mahino ia ʼe lagi nā tōtō ʼi te faʼahi fakalaumālie. ʼE lagi mole maʼuliʼi e he tahi te ʼu pelesepeto Fakatohi-tapu peʼe lagi ko nāua tokolua. Kapau ʼe nā falala kiā Sehova ʼaki tonā loto kātoa, pea ʼe feala ke nā haofaki ai tonā maʼuli fakataumātuʼa.—Lau ia Taaga Lea 3:5, 6.

9. Neʼe fua lelei feafeaʼi ki ʼihi Kilisitiano ia tanatou kātakiʼi tonatou maʼuli fakataumātuʼa?

⁹ Tokolahi te ʼu taumātuʼa neʼe ʼamanaki ke māvete kae ʼaki te temi, neʼe natou toe maʼu te fiafia. ʼI te agamāhani, ko te kau Kilisitiano ʼaē ʼe natou kātakiʼi te faigataʼa ʼo tonatou maʼuli fakataumātuʼa, ʼe fua lelei pē anai kiā nātou. Tou vakaʼi pe koteā ʼaē ʼe feala ke hoko ʼi he loto fale ʼe mole lotu tahi. Neʼe tohi fēnei e te ʼapositolo ko Petelo: “Fafine ohoana, kotou fakamalalo i te u mea fuli ki okotou ohoana, koteuhi, kapau e mole fakalogo ni ihi ki te folafola, ke aumai natou ki te tui e te aga a te fafine, hala folafola, i tanatou sisio ki tokotou mauli maa mo fakaapaapa.” (1 Pet. 3:1, 2) ʼE feala pē ke liliu he tahi ko he Kilisitiano ʼuhi ko te faʼifaʼitaki lelei ʼo tona ʼohoana. Ko te taumātuʼa ʼaia ʼaē neʼe mole māvete ʼe nā fakakolōliaʼi te ʼAtua pea ʼe feala ke fiafia lahi ai tonā kiʼi foʼi fāmili.

10, 11. Koteā te ʼu fihifihia neʼe mole kita ʼamanaki kiai ʼe feala ke hoko ʼi te nofo ʼohoana, kae koteā ʼaē ʼe feala ke tui papau kiai he Kilisitiano?

¹⁰ Tokolahi te kau Kilisitiano selipatea ʼe natou filifili ke natou ʼohoana mo he tahi kua papitema heʼe natou fia fakafiafia te loto ʼo Sehova. Kae ʼe feala pē ke hoko he ʼu ʼaluʼaga neʼe mole natou ʼamanaki kiai. Ohagē lā ʼi ʼihi temi ʼe feala ke liliu he tahi iā nāua ʼo puli tona ʼatamai. Peʼe lagi hili tanā ʼohoana, ʼe mole kei fai fakamafola he tahi iā nāua. Ko te faʼahi ʼaia neʼe hoko kiā Linda,a ko he Kilisitiano faʼafai ʼi te fai fakamafola pea mo tokaga lelei ki tana fānau. Neʼe mole kei ina ʼiloʼi he puleʼaki ke ina fai ʼi te temi ʼaē neʼe kamata fai ai ʼe tona ʼohoana he ʼu aga ʼe kovi. Neʼe mole fakahemala pea neʼe fakamavae. Koteā ʼaē ʼe tonu ke fai e he Kilisitiano mo kapau ʼe hagē ʼe mole kei feala ke ina haofaki tona maʼuli fakataumātuʼa ʼuhi ko ni ʼaluʼaga fēia?

¹¹ ʼE lagi kotou manatu fēnei: ʼE tonu koa ke hoko atu taku faiga ke haofaki toku maʼuli fakataumātuʼa? ʼE mole feala ke fai e he tahi he tonu maʼa koutou. Kae ʼe ʼi ai te ʼu tupuʼaga lelei ke mole kotou māvete ai. ʼE maʼuhiga ki te ʼAtua ia te Kilisitiano ʼaē ʼe ina kātakiʼi te ʼu faigataʼaʼia ʼo tona maʼuli fakataumātuʼa heʼe ina fia taupau he leʼo ʼo loto ʼe tokalelei. (Lau ia 1 Petelo 2:19, 20.) ʼAki tana Folafola pea mo tona laumālie, ʼe tokoni anai Sehova ki he Kilisitiano ʼe faiga fakamālotoloto ke ina haofaki tona maʼuli fakataumātuʼa.

ʼE NATOU FIA TOKONI ATU

12. ʼE feafeaʼi anai te manatu ʼa te kau tagata ʼāfea mo kapau ʼe tou kumi tokoni kiā nātou?

¹² Kapau ʼe kotou tau mo ni faigataʼaʼia fakataumātuʼa, ʼaua naʼa kotou tuʼania ʼi te kole tokoni ki te kau Kilisitiano ʼe mālolohi ʼi te faʼahi fakalaumālie. ʼE ko te maʼua ʼa te kau tagata ʼāfea ke natou tokaga ki te faga ovi, koia ʼe natou fiafia ʼi te fakahā atu te ʼu tokoni ʼaē ʼe tuʼu ʼi te Tohi-Tapu. (Gaue 20:28; Sakp. 5:14, 15) ʼAua naʼa kotou ʼui ʼe kovi anai te faʼahiga sio ʼa te kau tagata ʼāfea ʼo ʼuhiga mo koutou, mo kapau ʼe kotou fakahā age ʼakotou faigataʼaʼia fakataumātuʼa pea mo kotou kumi tokoni kiā nātou. Kae ʼe lahi age tonatou ʼofa pea mo fakaʼapaʼapa ʼaē kiā koutou heʼe natou tokagaʼi ʼe kotou fia fakafiafia moʼoni ia te ʼAtua.

13. Koteā te tokoni ʼaē ʼe tuʼu iā 1 Kolonito 7:10-16?

¹³ Kā fai tokoni te kau tagata ʼāfea ki te kau Kilisitiano ʼaē ʼe māʼuʼuli ʼi he loto fale ʼe mole lotu tahi, ʼe feala ke natou fakaʼaogaʼi te ʼu tokoni ʼaenī neʼe fai e Paulo: “Kia natou ae kua ohoana, e au fakatotonu, e mole ko au, kae ko te Aliki, ke aua naa mavae te fafine mai tona ohoana, kae kapau kua mavae te fafine aia, pea ke nofo feia kae aua naa toe ohoana, pe ke toe fakatokatoka mo tona ohoana, pea ke aua naa mavae te tagata mai tona ohoana. . . . Koteuhi e ke iloi feafeai, fafine, pe e ke haofaki anai tou ohoana? Pea e ke iloi feafeai, tagata, pe e ke haofaki anai tou ohoana?” (1 Ko. 7:10-16) ʼE ko he meʼa fakafiafia ia mokā liliu he tahi ko he kaugana ʼa Sehova!

14, 15. Ko te ʼu ʼaluʼaga fea ʼaē ʼe lagi fia mavae ai he fafine Kilisitiano mai tona ʼohoana, kae he koʼē ʼe maʼuhiga ke faikole pea mo fakakaukau lelei ki te faʼahi ʼaia?

¹⁴ ʼE ʼi ai te ʼu ʼaluʼaga ʼe lagi fia “mavae” ai he fafine Kilisitiano mai tona ʼohoana. Ohagē lā, ʼe mavae ʼihi heʼe mole tokaga ia te tagata ʼohoana ʼo taupau te maʼuli fakasino ʼo te fāmili. Peʼe ʼuhi heʼe agamālohi tona ʼohoana peʼe tuʼutāmaki ia tona maʼuli fakalaumālie.

¹⁵ Peʼe kita mavae peʼe kailoa, ʼe ʼa kita totonu pē tona filifili. Kae ko ia ʼaē kua papitema ʼe tonu ke faikole pea mo fakakaukauʼi lelei te tonu ʼaē kā ina fai. Ohagē lā ʼe feala ke ina fai te ʼu fehuʼi ʼaenī: ʼE tuʼutāmaki pē koa toku maʼuli fakalaumālie heʼe tāʼofi au e toku ʼohoana ke au tauhi kiā Sehova? Peʼe lagi neʼe ʼi ai pē he ʼu faʼahi neʼe au tōtō ai ʼo ʼuhiga mo taku ako te Tohi-Tapu, mo taku kau ki te ʼu fono pea mo te fai fakamafola?

16. He koʼē ʼe mole tonu ke fai fakavilivili e te kau Kilisitiano te tonu ʼaē ke natou māvete?

¹⁶ ʼE maʼuhiga kiā tātou ʼatatou felōgoi ʼaē mo te ʼAtua pea ʼe tou fakafetaʼi ki tana meʼa ʼofa ʼaē ko te ʼohoana. Koia ʼe mole tonu ai ke tou fai fakavilivili te tonu ʼaē ke tou māvete. Ko tātou ko te ʼu kaugana ʼa Sehova pea ʼe tou tokaga ʼo fakatapuhā tona huafa māʼoniʼoni. Koia ʼe mole tonu ke tou fai he ʼu fakatuʼutuʼu kākā ke feala ai hatatou māvete mo totatou ʼohoana pea mo tou toe ʼohoana mo he tahi age.—Sel. 17:9; Mala. 2:13-16.

17. Koteā te fakaʼuhiga ʼo te ʼu palalau ʼaenī: “Nee paui tatou e te Atua ke tou mauli i te tokalelei”?

¹⁷ Ko te Kilisitiano ʼaē ʼe ʼohoana mo he tahi ʼe mole tui, ʼe tonu ke faiga fakamālotoloto ke mālohi tonā maʼuli fakataumātuʼa. Pea kapau leva, logolā ʼana faiga ʼaē ke nā fakatokatoka kae ʼe fia mavae pē tona ʼohoana ʼaē ʼe mole tui, pea ʼe mole tonu ia ke vevele tona leʼo ʼo loto. Neʼe tohi fēnei e Paulo: “Kapau e mavae ia ia e mole tui, ke mavae ia. E mole hai anai te tehina pe ko te tuagaane i te mea aia. Nee paui tatou e te Atua ke tou mauli i te tokalelei.”—1 Ko. 7:15.b

FALALA KIĀ SEHOVA

18. Tatau aipē peʼe mole feala hakotou haofaki tokotou maʼuli fakataumātuʼa, kae ʼe iku kiteā ʼakotou faiga?

¹⁸ Kapau ʼe tou tau mo he faigataʼaʼia fakataumātuʼa, tou kole kiā Sehova ke ina foaki mai te lotomālohi pea mo tou falala tuʼumaʼu kiā te ia. (Lau ia Pesalemo 27:14.) Tou vakaʼi te faʼahi neʼe hoko kiā Linda ʼaē neʼe tou talanoa ki ai ʼi muʼa atu. Logolā tana faiga lolotoga ni taʼu ke ina haofaki tonā maʼuli fakataumātuʼa, kae neʼe nā māvete aipē. ʼE manatu koa neʼe puli tona temi? ʼE ina ʼui fēnei: “Kailoa ia. Neʼe au tuku he faʼifaʼitaki lelei ki te hahaʼi. ʼE fīmālie toku leʼo ʼo loto. Pea neʼe toe tokoni lahi foki ki tamā taʼahine ke mālohi ʼi te moʼoni. Neʼe liliu leva ki muli age ko he Fakamoʼoni ʼa Sehova ʼe faʼafai ʼi te fai fakamafola.”

19. Koteā ʼaē ʼe feala ke hoko mokā tou faiga ke tou haofaki totatou maʼuli fakataumātuʼa?

¹⁹ Ko te fafine Kilisitiano ko Marilyn kua fiafia ʼi te temi nei he neʼe falala ki te ʼAtua pea neʼe faiga lahi ke ina haofaki tona maʼuli fakataumātuʼa. ʼE ina ʼui fēnei: “Neʼe au fia mavae mai toku ʼohoana he neʼe mole kei ina taupau toku maʼuli fakasino pea neʼe tuʼutāmakiʼia toku maʼuli fakalaumālie. Ko toku ʼohoana neʼe ko te tagata ʼāfea kae ki muli age neʼe kau ki he ʼu gāue neʼe fakamulimuli ʼo tō kovi. Neʼe kamata tōtō ʼi te ʼu fono, pea neʼe mole kei mā felōgoi. Neʼe lahi ʼaupitō toku mataku ʼi te fakahoko agatuʼu ʼaē neʼe fai ʼi tomā kolo, pea neʼe tupu ai taku mole kei fia fakatahi mo ʼihi. Neʼe au mahino leva neʼe au toe hala mo au ʼi te ʼaluʼaga ʼo tomā maʼuli fakataumātuʼa pea neʼe ʼaoga ke au fai he ʼu fetogi. Neʼe mā toe kamata felōgoi lelei, mo toe fai tamā ako fakafāmili, pea mo kau ki te ʼu fono. Neʼe agalelei te kau tagata ʼāfea pea neʼe natou tokoni mai. Neʼe mā toe maʼu ai te fiafia ʼi tomā maʼuli fakataumātuʼa. ʼAki te temi, neʼe toe maʼu e toku ʼohoana ʼana pilivilēsio ʼi te kōkelekāsio. Neʼe mā fetaulaki mo te ʼu ʼaluʼaga faigataʼa kae neʼe iku lelei.”

20, 21. ʼO ʼuhiga mo te nofo ʼohoana, koteā te faʼahi ʼaē ʼe tou fakatotonu ke tou fai?

²⁰ Peʼe tou selipatea peʼe kua tou ʼohoana, tou lotomālohi tuʼumaʼu pē pea mo falala kiā Sehova. Kapau ʼe tou fetaulaki mo he ʼu faigataʼaʼia ʼi totatou maʼuli fakataumātuʼa, ʼe tonu ke tou faiga fakamālotoloto ke tou fakatokatoka, ʼo tou manatuʼi ko nātou ʼaē kua fakatahi ʼi te nofo ʼohoana “e mole kei na toko lua, kae kua na liliu ko he kakano e tahi.” (Mat. 19:6) Pea tou manatuʼi kapau ʼe tou haga kātakiʼi te ʼu faigataʼaʼia ʼo he loto fale ʼe mole lotu tahi, ʼe lagi tou fiafia anai ʼi te liliu ʼo totatou ʼohoana ko he kaugana ʼa Sehova.

²¹ Tatau aipē he ʼaluʼaga ʼe tou tau mo ia, kae ʼe tou fia tuku he faʼifaʼitaki lelei ki te hahaʼi ʼaē ʼe mole tauhi kiā Sehova. Kapau ʼe tokakovi totatou maʼuli fakataumātuʼa, tou faikole fakamālotoloto, mo tou vakavakaʼi te tupuʼaga ʼo tatatou fia mavae ʼi totatou ʼohoana, mo tou fakakaukau lelei ki he ʼu vaega ʼi te Tohi-Tapu pea mo kumi te tokoni fakalaumālie ʼa te kau tagata ʼāfea. Kae ko te faʼahi ʼaē ʼe maʼuhiga tāfito, ke tou fakatotonu ke tou fakafiafia ia Sehova ʼAtua iā meʼa fuli pē ʼaē ʼe tou fai pea mo tou fakahā totatou fakafetaʼi moʼoni ki tana meʼa ʼofa ʼaē ko te ʼohoana.

[ʼU nota]

[Fakamatala ʼo te pāsina 16]

ʼI te agamāhani, ko te kau Kilisitiano ʼaē ʼe natou kātakiʼi te faigataʼa ʼo tonatou maʼuli fakataumātuʼa, ʼe fua lelei pē kiā nātou

[Fakamatala ʼo te pāsina 18]

Kotou falala tuʼumaʼu kiā Sehova pea mo kole ke ina foaki atu te lotomālohi

[Paki ʼo te pāsina 15]

ʼE tapuakina e Sehova te kau Kilisitiano ʼaē ʼe natou faiga ke natou haofaki tonatou maʼuli fakataumātuʼa

[Paki ʼo te pāsina 17]

ʼE feala ke foaki e te kōkelekāsio he fakalotofīmālie pea mo he tokoni fakalaumālie