Tou Fakahā Peʼe Feafeaʼi Te Fakatuʼu e Te ʼAtua Te Tokalelei Pea Mo Te Maʼuli Fīmālie
1 Neʼe fai e te tagata he ʼu fakatuʼutuʼu moʼo faka fealagia ʼo te tokalelei pea mo te maʼuli fīmālie, kae mole he tahi ʼe feala tana foaki mai te ʼu meʼa ʼe ʼaoga tāfito ki te hahaʼi ʼi te kele katoa. Logope la ko te ʼu fehiʼa faka lotu, peʼe ʼuhi ko te lanu, pea ko te ʼu meʼa faka nasionalisi, ʼo feiā foki ki te holi pea mo te fia fai fakavale ki he ʼu meʼa ʼi te mālama faka politike, ʼe hage ʼe ko te ʼu meʼa ʼaia ʼe fakatutuʼu ki te tokalelei pea mo te maʼuli fīmālie, ʼe ʼiloʼi e te kau kilisitiano moʼoni ko te ʼu faigataʼaʼia ʼo te malamanei ʼe haʼu ia mai te fakafisi ʼa te tagata ʼo mole fia fakalogo kia Sehova ʼAtua, pea mo te talatuʼu ʼa Satana te Tevolo. — Pes. 127:1; Sel. 8:9; 1 Soane 5:19.
2 ʼI sanualio, ʼe tou faiga anai ʼo fakamahino ki ʼotatou kāiga ko te te meʼa pe e tahi ʼe feala ke ina fakatuʼu te tokalelei pea mo te maʼuli fīmālie, ʼe ko te faʼahi ʼaē neʼe fakatuʼutuʼu e te ʼAtua, pea ko Sehova ʼaē ʼe nofo mo te tonu fakaʼosi ʼo ʼuhiga mo te ʼu faigataʼaʼia ʼo te malamanei.
3 Tou fakaʼaogaʼi te ʼu kiʼi pepa lotu foʼou: Moʼo faka mafola te logo fakaloto mālohi ʼaia, ʼe ʼi ai te ʼu kiʼi pepa lotu foʼou ʼaē neʼe fakahā ʼi te fakatahi faka tisitilike “Hahaʼi toʼo mālama”. Ko he faʼifaʼitaki neʼe fakahā mai ai peʼe feafeaʼi te fakaʼaogaʼi ʼo te kiʼi pepa lotu n° 19, Ko te malamanei ʼo te temi ʼaenī ʼe hāo anai koa? moʼo kamata ʼo he fai palalau pea mo kamata ʼaki ai he ako faka tohi-tapu. Tokolahi ʼe lagi ʼe nātou puna’maʼuli anai ʼi tanatou sio peʼe feafeaʼi te fakahoko ʼo te lea faka polofeta ʼa Sesu ʼo ʼuhiga mo te fakaʼosi.
4 Ko te ʼu hahaʼi ʼe lauʼi miliona ia ʼaho nei ʼe lotovaivai pea ʼe nātou holi ki he fakamālōlō pea mo he mālama tokalelei, he maʼuli fimālie. Ko te kiʼi pepa lotu n° 20, Te fakafimālie ʼo ʼuhiga mo te kau lotovaivai, ʼe ko he fakaloto mālohi ʼaia ki te hahaʼi e tokolahi.
5 Ko te kiʼi pepa lotu n° 21, Fiafia ʼi he maʼuli faka famili, ʼe ina foaki mai he ʼu tokoni lelei moʼo fakahaʼele ai ki muʼa te maʼuli faka famili, ʼo talitali ai ki he temi fakatalakitupua ka haʼu ʼi te mālama foʼou neʼe fakapapau mai e te ʼAtua.
6 Ko te kiʼi pepa lotu n° 22 ʼe tali fakahagatonu ki te fehuʼi ʼaē Ko ai koa te ʼu pule ʼo te malamanei? ʼE ina fakamahino pe koʼe ʼe fakaʼaogaʼi e te tagata te ʼu faʼahiga meʼa fakalialia moʼo fakamamahiʼi ʼonatou pea mo nātou fematematehiʼaki, kae ʼe tokolahi te hahaʼi ʼe fakaʼamu ke nātou maʼuli ʼi te tokalelei pea mo te maʼuli fīmālie. Ko te ʼu mālohi fakalaumālie agakovi ʼe maʼuli ʼi te lagi, kae ko te kākā ʼaē ʼe fakaʼaoga e Satana ko tana faigaʼi ni hahaʼi ke nātou ʼui ʼe mole maʼuli ia ʼo feiā aipe mo tana kau temonio.
7 Tou kamata he ʼu ako faka tohi-tapu: ʼE feala ke kamata he ako faka tohi-tapu ʼaki he kiʼi pepa lotu, he kaupepa, he nusipepa peʼe ko he tohi. Kapau kua ʼi ai he tohi ʼa ia ʼaē ʼe fai palalau mo koutou, fakahā fakapotopoto age ki ai peʼe feafeaʼi tona fakaʼaogaʼi moʼo ako ʼo te Tohi-Tapu. Ko te ʼu kiʼi pepa lotu foʼou pea mo te kaupepa ʼE tokaga moʼoni koa te ʼAtua kia tatou? ʼe ko he ʼu meʼa gāue lelei ʼaia moʼo kamata ʼo he fai palalau mo ia ʼaē ʼe fakalogo mai pea mo kamata ʼaki ai he ʼu ako faka tohi-tapu. ʼE tou fakahā anai te ʼu kaupepa lalahi ki te hahaʼi fuli ʼe felāveʼi anai mo tatou.
8 Gata pe ki totatou Tupuʼaga, ia Sehova ʼAtua, ʼe feala tana foaki mai te maʼuli fimālie moʼoni. Ko totatou loto ke tokolahi te hahaʼi ʼaē ʼe avahi tonatou loto pea mo tanatou fakakaukau ki te moʼoni ʼaē ʼe tuʼu ʼi te Folafola ʼa te ʼAtua pea mo nātou vaevae te ʼamanaki ʼe ina fakahā mai. Tou fakaʼaogaʼi fakalelei te ʼu meʼa gāue ʼaia ʼe ia tatou moʼo akoʼi, pea ke tou fakahā pe ʼe feafeaʼi te fakatuʼu e te ʼAtua te tokalelei pea mo te maʼuli fīmālie. — Is. 2:3, 4.