Ko Te ʼu Tali Ki ʼa Kotou ʼu Fehuʼi

◼ ʼE lelei koa ke toe fai te ʼu tohi ʼa te Sosiete ke feala ai hona tufa?

Lolotoga te ʼu taʼu, neʼe ta e te Sosiete te ʼu tuʼuga tohi kehekehe ʼe palalau ai ki te ʼu faʼahi kehekehe ʼo te mālama faka tohi-tapu. Ko nātou ʼaē neʼe nātou hoki ʼiloʼi atu pe te moʼoni ʼe nātou fakahemala foki koteʼuhi ʼe mole nātou maʼu te ʼu tohi ʼaē ʼe mole kei ta e te Sosiete. Ko ʼihi ʼe faigataʼa tanatou maʼu pea ko ʼihi neʼe nātou fakatuʼutuʼu ke nātou toe fai, pea nātou tufa ko ʼihi neʼe nātou fai ʼaki te pepa peʼe ʼaki te olotinatea. ʼI ʼihi faʼahi, ko te meʼa ʼaia ʼe ko he kumiʼaga falā.

Ko te “tagata kaugana” agatonu ʼe ina ʼiloʼi lelei te ʼu meʼa fakalaumālie ʼe ʼaoga kia tatou pea ʼe ina foaki “ ʼi tona lakaga totonu”. (Mat. 24:45.) Ka ʼe ʼaoga ke toe ta he ʼu tohi ʼāfea, ʼe fai e te Sosiete he ʼu fakatuʼutuʼu moʼo fakahoko ʼo te faʼahi ʼaia. Koia ʼaē, ʼe ina toe ta ʼi te temi nei te ʼu volumes reliés ʼo Te Tule Leʼo pea ʼe feala ke toʼo e te hahaʼi fuli. Kae, kapau pe ʼe kita loto takitokotahi, ke kita toe fai te ʼu tohi ʼaia pea mo toe tufa te ʼu tohi ʼa te Sosiete, ko he ʼu fihifihia mole hona ʼaoga ʼe feala anai ke tupu mai ai.

Ko te toe fai pea mo te tufa ʼo te ʼu tohi faka tohi-tapu ke maʼu ai he falā ʼe hoko ai he ʼu fihifihia mole lelei. ʼO ʼuhiga mo te meʼa ʼaia, koʼeni te meʼa neʼe tala ʼi te Service du Royaume ʼo sepetepeli 1977 ʼi te alatike ʼaē Ko te ʼu tali ki ʼa kotou ʼu fehuʼi: “ ʼE lelei ia ke ʼaua naʼa fakaʼaoga ʼi te ʼu fono, peʼe fai ʼi te ʼu Fale ʼo te Puleʼaga, peʼe ko te ʼu ako tohi peʼe ko te ʼu fakatahi ʼa te hahaʼi ʼa Sehova, moʼo fai fakatau peʼe moʼo fai fakahāhā ʼo he gāue fakakoloa. ʼI te faʼahi ʼaia, ʼe tou foaki anai ki te ʼu meʼa fakalaumālie te fakasiosio ʼe ʼaoga, pea ʼe tou tuku anai te ʼu gāue fakakoloa ki te faʼahi ʼe ʼaoga ki ai.” ʼE maʼuhiga ia ko te fia fai falā ʼe mole ina uga tatou ke tou fakatau te Folafola ʼa te ʼAtua peʼe ko ni tohi ʼe fakatafito kiai.