Ko Te ʼu Fono Gāue ʼo Sanualio

Vāhaʼa ʼe Kamata ʼi Te 6 Sanualio

Katiko 72

10 min: Ko te ʼu logo ʼo te kokelekasio. Te ʼu Tonu ʼo Te Minisitelio ʼo Te Puleʼaga. Talanoa ki te tānaki gāue ʼo te kokelekasio ʼo te māhina ʼo ʼOketopeli.

20 min: Tou fakaʼaogaʼi fakalelei totatou temi ʼi te temi vela ʼaenī. Ko he akonaki pea mo he fai palalau ʼe fai e te sikalaipe ʼo te kokelekasio. Fakahā kia nātou ʼi te fono ʼe maʼuhiga te fakatahitahi mo he kokelekasio ʼi te ʼu temi mālōlō lolotoga te ʼu māhina vevela. Ko te kau ki te ʼu fono pea mo te gāue fai faka mafola mo he tahi kokelekasio ʼe feala ke lelei ʼaupito. Ko te faʼahi ʼaia ʼe tonu ke fakatuʼutuʼu fakatomuʼa, ohage pe ko tatatou fai ʼo ʼuhiga mo te tahi ʼu gāue ʼi te temi vela. Tahi ʼaē meʼa, ʼe tou faiga anai ke tou maʼu he ʼu faigamālie moʼo fai ʼo te fagonogono faigamālie. Kapau ko he kaugā faka mafola ʼe mavae ʼi tana kokelekasio lolotoga ni ʼu vāhaʼa, pea ʼe tonu anai ke ina fakatuʼutuʼu fakatomuʼa mo he tahi kaugā faka mafola ke ina fai tana ʼu ako Tohi-Tapu. Ko te ʼu kaugā faka mafola fuli ʼaē ʼe ʼolo ʼi te fakaʼosi ʼo te māhina ʼe nātou tokakaga anai ke nātou foaki tanatou pepa tānaki gāue ki te sikalaipe ʼo te kokelekasio. Fai he tahi ʼu fakamanatu ʼo mulimuli ki te ʼu meʼa ʼe ʼaoga ki te kokelekasio. Vakaʼi “Te ʼu Fakamanatu ʼo ʼUhiga Mo Te ʼu Temi Mālōlō” ʼo Te Minisitelio ʼo Te Puleʼaga, ʼo Tesepeli 1995, pasina 7.

15 min: “ ʼE Tou Maʼu Te ʼu Fealagia Pea Mo Te ʼu Meʼa ʼAē ʼe ʼAoga Moʼo Akoʼi ʼo Te Hahaʼi.” (Palakalafe 1-6) Fai he ʼu fakamatala nounou ʼo te palakalafe 1 ki te 2, ʼo fakahā ʼe maʼuhiga tatatou falala, ʼe fua lelei anai tatatou akoʼi te hahaʼi mo kapau ʼe tokoni mai ia Sehova kia tatou. Fai he ʼu faʼifaʼitaki e lua ʼo mulimuli ki te ʼu manatu ʼaē ʼe tuʼu ʼi te palakalafe 3 ki te 6, ʼo fakahā ai peʼe feafeaʼi te kamata ʼo te ʼuluaki fai palalau pea mo te fai ʼo he ʼaʼahi.

Katiko 14 pea mo te faikole fakaʼosi.

Vāhaʼa ʼe Kamata ʼi Te 13 Sanualio

Katiko 16

13 min: Ko te ʼu logo ʼo te kokelekasio. Lau ʼo te falā. Talanoa ki he ʼu puani ʼi te ʼu nusipepa foʼou. Fakahā he ʼu tokoni ʼo ʼuhiga mo tatatou ʼu palalau ʼaē ʼe tonu ke fai mokā tou fai fagonogono faigamālie. Fakaafe ia nātou fuli ʼi te fale fono ke nātou fakahā pe ko te ʼu ʼuluaki palalau fea ʼaē ʼe nātou fakaʼaogaʼi ʼi tanatou palalau ki te hahaʼi ʼi te ʼu koloā, ʼi te ala, ʼi te lotoʼā, ʼi te ʼu kā, pea mo te tahi age faʼahi.

15 min: “ ʼE Tou Maʼu Te ʼu Fealagia Pea Mo Te ʼu Meʼa ʼAē ʼe ʼAoga Moʼo Akoʼi ʼo Te Hahaʼi.” (Palakalafe 7-9) Fakamatala te meʼa ʼaē neʼe hoko ʼo ʼuhiga mo te fai ʼo te ʼaʼahi ʼi te Annuaire 1995 pasina 45, ʼo fakatokagaʼi te maʼuhiga ʼo te ʼaʼahi ʼo he tahi neʼe ina fakahā tana fia logo ki te moʼoni. Ko he kaugā fai faka mafola kua māhani ʼe ina fai he faʼifaʼitaki ʼi te palakalafe 7 ki te 8. Logope la ʼe tou tufa te ʼu tohi ʼi te kamataʼaga, kae ʼe tonu ke tou faiga ki muli age ke tou fai he ʼu ako Tohi-Tapu ʼaki te tohi Te ʼAtamai Mālama. Fakaloto mālohiʼi te ʼu kaugā fai faka mafola fuli ke nātou fakatuʼutuʼu he temi lolotoga te vāhaʼa ka haʼu moʼo fai ʼo te ʼu ʼaʼahi.

17 min: Ko Te Temi Moʼo Fakafoʼou ʼo Te ʼu Kate Instructions médicales/Pas de sang. Ko he tagata ʼāfea kua māhani ʼe talanoa ki te maʼuhiga ʼo te tohi fakalelei ʼo te kate pea ke tou ʼave tuʼumaʼu. Ko te pepa ʼaia ʼe palalau anai maʼa koutou mo kapau ʼe mole feala hakotou palalau mokā hoko he tuʼutāmaki. (Vakaʼi ia Tāʼaga Lea 22:3.) ʼE tonu ke tohi he kate foʼou ʼi te taʼu fuli, ʼo fakahā ai takotou manatu ʼo ʼuhiga mo tatatou fakafisi ki te toto, koteʼuhi ko ʼihi tōketā pea mo ʼihi hahaʼi ʼe nātou ʼui ko te ʼu pepa ʼaē neʼe fai ʼo fakalaka ʼi he taʼu katoa ʼe mole feala ke ina fakahā te tui foʼou ʼo ia ʼaē ʼe mahaki. ʼI te hili ʼo te fono, ʼe foaki anai kia nātou fuli ʼaē kua papitema te kate Instructions médicales/Pas de sang, pea ko te ʼu tamaliki liliki ʼaē ʼe mole heʼeki papitema ʼe foaki anai kia nātou takitokotahi te kate dʼidentité. Fakamahino kia nātou ko te ʼu kate ʼaia ʼe tonu ke tohi fakalelei ʼi tonatou ʼapi pea mo sinie. Ko nātou fuli ʼaē kua papitema ʼe tonu anai ke nātou tohi fakalelei tanatou ʼu kate pea ke sinie. (Toe vakaʼi te ʼu tohi ʼo te ʼaho 15 ʼo Tesepeli 1991 pea mo te ʼaho 10 ʼo Sanualio 1996.) ʼE feala ke faʼifaʼitakiʼi e te ʼu kaugā fagona, te ʼu meʼa ʼaē ʼe tohi ʼi te kate ʼaia, ʼo tohi ʼi he pepa maʼa nātou pea mo tanatou ʼu tamaliki, ia tonatou ʼu ʼaluʼaga mo kapau ʼe nātou loto kiai. ʼE tou maʼu anai he ʼu tapuakina mai ia Sehova, mo kapau ʼe tou tokakaga ʼo fai fakalelei te ʼu meʼa ʼaia.​—Taag. 16:⁠20.

Katiko 15 pea mo te faikole fakaʼosi.

Vāhaʼa ʼe Kamata ʼi Te 20 Sanualio

Katiko 129

10 min: Ko te ʼu logo ʼo te kokelekasio.

15 min: “ ʼE Hāofaki Anai Te Faʼahiga Hahaʼi Fuli Pe.” ʼO fai ʼaki te ʼu fehuʼi pea mo te ʼu tali. Fakaafe ia nātou ʼi te fono ke nātou fakahā fakanounou pe neʼe feafeaʼi tonatou tali leleiʼi e te hahaʼi kehekehe tonatou ʼu ʼaluʼaga takitokotahi.

20 min: Tou Tuku He Faʼifaʼitaki Lelei ʼAki Tatatou Aga. Ko he tagata ʼāfea ʼe fai palalau mo he ʼu tūpulaga e lua peʼe tolu. Ko tanatou fai palalau ʼe fakatafito ki Te Tule Leʼo ʼo te ʼaho 15 ʼo ʼAukusito 1987 ʼi te pasina 10 ki te 20. ʼO fakapipiki kiai mo he fakamatala ʼo he ʼu meʼa neʼe hoko ʼi te telituale, ʼe hā ai pe neʼe malave feafeaʼi ki te hahaʼi te aga ʼa te ʼu tūpulaga Kilisitiano.

Katiko 121 pea mo te faikole fakaʼosi.

Vāhaʼa ʼe Kamata ʼi Te 27 Sanualio

Katiko 181

5 min: Ko te ʼu logo ʼo te kokelekasio.

10 min: Vakaʼi te alatike Te Tali Ki ʼAkotou ʼu Fehuʼi, ʼo fai e te sikalaipe.

15 min: “ ʼE Tou ‘Faka Mafola Te Folafola.’ ” ʼO fai ʼaki te ʼu fehuʼi pea mo te ʼu tali. ʼO fakapipiki kiai mo he ʼu fakamatala ʼe fakahā ai pe koʼe ʼe tou leleiʼia tāfito te maʼuhiga ʼo te Folafola ʼa te ʼAtua.​—Vakaʼi te Réveillez-vous! ʼo te ʼaho 22 ʼo Sūnio 1984 pasina 10 ki te 12.

15 min: Toe Vakaʼi Te Tohi ʼAē ʼe Tou Tufa ʼi Fepualio. Fakahā te ʼu agaaga ʼo te tohi ʼaē ʼe lelei, ohage: (1) Te ʼu kupu tāfito ʼo te ʼu kapite, (2) te matalelei ʼo te ʼu paki, (3) te ʼu talanoa, pea mo (4) te ʼu fehuʼi ʼaē ʼe tuʼu ʼi ai. ʼO mulimuli ki te koga ʼo te fono kua hili, ʼe fakaloto mālohiʼi te ʼu kaugā fai faka mafola ke nātou fakaʼaogaʼi te ʼu vaega faka Tohi-Tapu ʼi te faʼifaʼitaki. Fakamanatuʼi ki te ʼu kaugā fai faka mafola ke nātou toʼo he ʼu tohi moʼo tufa ʼi te vāhaʼa ʼaia.

Katiko 26 pea mo te faikole fakaʼosi.