Te Tali Ki ʼAkotou ʼu Fehuʼi
◼ He koʼe koa ʼe tonu ke tou fai fakavilivili tatatou pepa tānaki gāue ʼi te māhina fuli?
ʼE tou fiafia fuli ʼi tatatou logo ki te ʼu meʼa lelei ʼaē ʼe fakahoko ʼi te faka mafola ʼo te logo ʼo te Puleʼaga. (Vakaʼi ia Tāʼaga Lea 25:25.) Ia Gāue 2:41 ʼe fakamatala ai te akonaki fakaloto mālohi ʼa Petelo ʼi te ʼaho ʼo te Penikosite, ʼo “teitei ko nefesi e tolu afe neʼe hilifaki” kiai. Mole tuai, pea ko te kaugamālie ʼaia neʼe tuputupu ʼo aʼu ki te “nima afe.” (Gāue 4:4) ʼE fakafiafia te ʼu tānaki ʼo te gāue ʼa te ʼu Kilisitiano ʼo te ʼuluaki sēkulō! ʼE tou toe fiafia mo tatou ʼi te ʼu tānaki fakaloto mālohi ia ʼaho nei. ʼE tou fiafia mokā tou logo ki te ʼu fua lelei ʼo te faka mafola ʼo te logo lelei ʼo totatou ʼu tēhina ʼi te malamanei katoa.
Mai tona ʼaluʼaga ʼaē ʼe lahi te temi ʼaē ʼe tonu ke fakaʼaogaʼi kiai pea mo te ʼu faiga moʼo fakahoko ʼo te gāue ʼaia, koia ʼe maʼuhiga ai ke kau fuli kiai te ʼu kaugā fai faka mafola. ʼE maʼuhiga koa kia koutou te foimo fai ʼo takotou pepa tānaki ʼi te māhina fuli?
ʼE tou fiafia ʼaupito mokā tou logo ki te tuputupu ʼo te gāue. Tahi ʼaē meʼa, ko te ʼu pepa tānaki gāue ʼe tokoni ki te Sosiete ke ina fakatokagaʼi te tuputupu ʼo te gāue ʼi te malamanei katoa. ʼE fai te ʼu puleʼaki moʼo tokoni ki te ʼu fenua pe ko te ʼu motu ʼaē ʼe ʼaoga kiai he tokoni, pe ko te fakalahi ʼo te ʼu tohi ʼaē ʼe tonu ke tā. ʼE fakaʼaogaʼi e te ʼu tagata ʼāfea ʼo te ʼu kokelekasio fuli te ʼu pepa tānaki gāue ke nātou ʼiloʼi ai pe ko te ʼu faʼahi fea ʼaē ʼe tonu ke hikihiki ai te gāue. ʼE ko he meʼa fakaloto mālohi mo kapau neʼe lelei te gāue, heʼe ina uga ai tatou ke tou vakavakaʼi totatou minisitelio ke feala ai hatatou hikihiki tatatou gāue.
ʼE tonu ke ʼiloʼi e te ʼu kaugā fai faka mafola fuli tonatou maʼua ʼaē ko te foaki fakavilivili ʼo tanatou pepa tānaki gāue ʼi te māhina fuli. Ko te ʼu tēhina ʼaē ʼe nātou fai te ʼu Ako Tohi ʼo te Kokelekasio, ʼe feala ke nātou fakamanatuʼi ki te ʼu kaugā fai faka mafola tonatou maʼua ʼaia, heʼe toe maʼua foki ke nātou tokoni kia nātou ʼaē ʼe lagi faigataʼa tanatou kau tuʼumaʼu ki te faka mafola ʼi te māhina fuli. Ko te meʼa ʼaia ʼe feala ke fakamanatuʼi ki te ʼu kaugā fai faka mafola ʼo te ako tohi fakaʼosi ʼo te māhina fuli, peʼe fakamanatuʼi ʼi he tahi temi faigamālie. Kapau ʼe mole maʼu he faigamālie ke foaki ai te pepa tānaki ʼi te Fale ʼo te Puleʼaga, pea ʼe feala ke tae e te tēhina ʼaē ʼe ina fai te Ako Tohi, te ʼu kiʼi pepa ʼaia, pea ke ina foaki tautonu ki te sikalaipe, ke fakahū ki te pepa tānaki gāue ʼa te kokelekasio ʼaē ʼe fai ʼi te māhina fuli, pea mo fakamomoli ki te Sosiete.
Ko tatatou tokakaga ʼo foaki fakavilivili tatatou pepa tānaki gāue ʼi te fai faka mafola, ʼe fakamaʼamaʼa ai te gāue ʼa nātou ʼaē ʼe tokakaga ki te lelei ʼo totatou maʼuli fakalaumālie.