ʼE Tonu Ke Tou Liliu Ko He Kau Faiako, Kae Mole Ko He Kau Fai Faka Mafola Pe
1 ʼE ʼui fēnei: “Ko te kau Fakamoʼoni ʼa Sehova kua nātou fakafonu te kele katoa ʼaki tanatou fai faka mafola.” Neʼe lava feafeaʼi te fakahoko ʼo te faʼahi ʼaia? Neʼe mole fakahoko ʼaki te mālohi fakatagata, kae ʼaki te gāue ʼa te laumālie ʼo te ʼAtua ki tana ʼu kaugana, ʼi tanatou fakaʼaogaʼi te ʼu meʼa kehekehe moʼo fakahoko te fakatotonu ʼaē ke nātou fai faka mafola pea mo faiako.—Sakl. 4:6; Gāue 1:8.
2 Ko te nusipepa ʼe ko he meʼa gāue lelei moʼo fakahoko tatatou gāue fai faka mafola. Lolotoga ni ʼu taʼu, ko te ʼu tuʼuga tohi, mo te ʼu kaupepa lalahi, mo te ʼu nusipepa, pea mo te ʼu kiʼi pepa lotu neʼe tā pea mo tufa e te kau Fakamoʼoni ʼa Sehova moʼo lagolago ki te fakahā ʼo te logo lelei ʼo te Puleʼaga. ʼE fakahā e te ʼu tānaki ʼo te Annuaire 1997, neʼe lahi ʼaupito te ʼu tohi ʼaē neʼe tā. ʼO kaku ki te temi nei, neʼe tā te ʼu Tohi-Tapu e 91 miliona tupu ʼo te Traduction du monde nouveau. ʼI te taʼu e tahi, ko te tā ʼo Te Tule Leʼo pea mo te Réveillez-vous! neʼe tuputupu ʼi te 7,1 ʼi te teau ʼi Amelika. ʼI Siamani, neʼe tuputupu te tā ʼo te ʼu nusipepa ʼi te 35 ʼi te teau. Pea ʼi te fenua pe ʼaia, neʼe ko vahe e tolu ʼo te ʼu nusipepa ʼaia neʼe tā ki te lea faka Lusia.
3 He koʼe koa ʼe ʼaoga te ʼu tuʼuga nusipepa ʼaia? ʼI te malamanei katoa, ko te tokolahi neʼe nātou tali ki te fakaloto mālohi ʼaē neʼe fai mai kia tatou ke tou faka mafola ki te hahaʼi ʼi te ʼu potu fuli pe ʼaē ʼe feala ke tou maʼu ai nātou. Tokolahi ia tatou neʼe nātou fakalahi tanatou gāue fai faka mafola—ʼi te ʼu koga meʼa ʼaē ʼe kaugamālie ai te hahaʼi, ʼi te ʼu ala, pea ʼi te ʼu matani gāue—pea neʼe lahi ai te ʼu tohi neʼe tou tufa ki te hahaʼi ʼaē neʼe nātou fia ʼiloʼi te moʼoni. Tokolahi ia nātou ʼaia, ʼi muʼa atu, neʼe tahitahiga peʼe neʼe mole hanatou fealagia ke nātou fagono ki te logo ʼo te Puleʼaga. Moʼo tali ki te ʼu faʼahi ʼaia, ʼe maʼu ʼi te ʼu kokelekasio te ʼu tohi kehekehe ke fakaʼaogaʼi ki te ʼu faʼahi fuli ʼo te gāue fai faka mafola.
4 Koteā Tatatou Fakatuʼutuʼu ʼi Tatatou Tufa Te ʼu Tohi? Ko tatatou fakatuʼutuʼu ʼe mole gata pe ʼi te tufa ʼo te ʼu tohi. Ko totatou maʼua ʼaē ke tou fai ʼo ni ʼu tisipulo ʼe kau kiai te ʼu faʼahi e lua: te fai faka mafola pea mo te faiako. ʼUluaki, ʼe tou maʼu te pilivilesio ʼaē ko te faka mafola te logo lelei ʼo te Puleʼaga, ke ʼiloʼi e te hahaʼi ʼe ko te ʼamanaki pe ʼaia e tahi ki te malamanei. (Mateo 10:7; 24:14) Ko tatatou ʼu tohi ʼaē ʼe fakatafito ki te Tohi-Tapu ʼe ko he ʼu tohi kua ʼahiʼahiʼi, pea ʼe lelei moʼo uga te fia logo ʼa te hahaʼi pea mo faka mafola ki te hahaʼi te ʼatamai mālama ʼo ʼuhiga mo te Puleʼaga.
5 Lua, kapau ʼe tonu ke tou fai he ʼu tisipulo, pea ʼe tonu ke tou akoʼi kia nātou te ʼu meʼa fuli ʼaē neʼe fakatotonu mai e Sesu. (Mateo 11:1; 28:19, 20) ʼO toe feiā aipe, ʼe ʼaoga ʼaupito te ʼu tohi ʼi tatatou akoʼi te moʼoni ke lave ki te loto ʼo nātou ʼaē ʼe ako, mo tokoni kia nātou ke nātou liliu ko he ʼu tisipulo.
6 Ko nātou ʼaē ʼe nātou tali te ʼu tohi ʼe lagi ko he ʼu hahaʼi ʼe nātou ‘fagono ki te folafola,’ kae ʼe mole nātou liliu anai ko he ʼu hahaʼi ʼe nātou maʼuliʼi te folafola mo kapau ʼe mole tou tokoni age kia nātou. (Sake 1:22-25) Ko te tokosiʼi ʼe nātou liliu anai ko he kau tisipulo gata pe mo kapau ʼe takitaki nātou e he tahi. (Gāue 8:30, 31) ʼE ʼaoga kia nātou he tahi ʼe faiako, moʼo tokoni kia nātou ke nātou ʼiloʼi papau te moʼoni ʼaē ʼe maʼu ʼi te Tohi-Tapu. (Gāue 17:2, 3) ʼE tonu ke tou fakatuʼutuʼu ke tou tokoni kia nātou ke nātou tuputupu ʼo aʼu ki tanatou foaki tonatou maʼuli kia Sehova pea mo nātou papitema, pea mo akoʼi nātou ke nātou liliu ko he ʼu hahaʼi ʼe nātou popoto anai ʼi te akoʼi ʼo ʼihi.—2 Tim. 2:2.
7 ʼE ʼAoga ʼAupito Ke Kaugamālie Te Kau Faiako: ʼI tatatou fai faka mafola, ʼe tou tala te logo lelei ia muʼa ʼo te hahaʼi. Kae ko te faka ʼuhiga ʼo te faiako, ko te akoʼi māmālie ʼo he tahi. Ko te fai faka mafola ʼe ina uga te hahaʼi ke nātou fia ʼiloʼi te logo ʼo te Puleʼaga, kae ko te ako ʼe tokoni ki te hahaʼi ke nātou tali te logo lelei pea mo nātou maʼuliʼi. (Luka 8:15) Ko ia ʼaē ʼe faiako ʼe mole gata ʼaki pe tana tala ʼo te logo lelei; kae ʼe ina fakamahino, pea ʼaki tana ʼu palalau ʼe ina uga te hahaʼi ke nātou fakakaukauʼi, mo ina fakahā he ʼu fakamoʼoni pea mo fakalotoʼi nātou.
8 ʼO mulimuli ki tatatou ʼu fealagia, ko te tokolahi ia tatou ʼe tonu ke tou liliu ko he kau faiako, kae mole tou fai faka mafola pe. (Hep. 5:12a) Ko te tufa ʼo te ʼu tohi ʼe ko he koga maʼuhiga ʼo tatatou gāue, kae ʼe fakalogo te fakahoko ʼo te lua fakatuʼutuʼu ʼo totatou minisitelio ki te meʼa ʼaē ʼe tou fai ʼi totatou ʼuhiga kau faiako. Logope la ʼe ko he meʼa fakafiafia mokā tou tuku he tohi, kae ke fakahoko katoa tatatou minisitelio, ʼe mole tonu ke gata aipe. (2 Tim. 4:5) Ko te ʼu tohi ʼaē ʼe tou tufa ʼe ko he faigamālie ʼaia moʼo akoʼi te moʼoni ki te hahaʼi.
9 Tou Fai He ʼu ʼAʼahi Moʼo Kamata He ʼu Ako Tohi-Tapu: ʼE mahino ia, ko tatou fuli neʼe tou tufa te ʼu tohi, mo te ʼu kaupepa lalahi, pea mo te ʼu nusipepa, ʼo tou maʼu ai tatatou ʼu tuʼuga ʼaʼahi. ʼE tonu ke tou fakatuʼutuʼu he temi ke tou toe liliu ai moʼo uga te fia logo ʼa te hahaʼi ʼaia. Ko tatatou fakatuʼutuʼu tāfito ʼi tatatou fai te ʼu ʼaʼahi, ʼe mole ko te tufa pe ʼo he tahi ʼu tohi, kae ko te fakaloto mālohiʼi ia te hahaʼi ke nātou lau pea ke ʼaoga kia nātou te ʼu tohi ʼaē kua nātou ʼosi maʼu. Neʼe feala koa ke tou tuputupu ʼi te faʼahi fakalaumālie mo kanapaula neʼe mole he tahi neʼe ina ʼaʼahi putuputu tatou moʼo tokoni mai ke tou maʼu te ʼatamai mālama totonu?—Soane 17:3.
10 Tou taupau te fia logo fuli ʼa te hahaʼi ʼaki te fakatuʼutuʼu ʼaē ke tou kamata he ako Tohi-Tapu ʼaki te kaupepa lahi Koteā ʼAē ʼe Fakamaʼua Mai e Te ʼAtua Kia Tatou? peʼe ko te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. ʼE fakahā e te ʼu tohi ʼaia e lua te logo lelei ʼo te Puleʼaga ʼi he ʼaluʼaga ʼe faigafua hatatou mahino kiai. ʼE maʼu ʼi te kaupepa lahi Fakamaʼua he ako ʼe katoa, pea ʼe talanoa ki te ʼu akonaki tāfito ʼo te Tohi-Tapu. ʼE feala ʼaki te tohi Te ʼAtamai Mālama, ke akoʼi fakalelei te moʼoni ki te hahaʼi, ʼi he ʼaluʼaga faigafua, mo matala lelei, pea mo nounou.
11 Ko te polokalama faigafua ʼo te faiako, ohage ko tona fakamahino ʼi te pepa ʼaē ʼe ʼalutahi mo Te Minisitelio ʼo Te Puleʼaga ʼo Sūnio 1996, ʼe faigafua ai kia ia ʼaē ʼe ina fai te ako pea mo mahino gafua kia ia ʼaē ʼe ako. Koutou taupau te pepa ʼaia, ke feala ke koutou toe vakaʼi te ʼu faʼahiga fai ʼaē ʼe lelei ki te ako. ʼE maʼu ai he ʼu tokoni ʼo ʼuhiga mo te faʼahiga tokaga ʼaē ʼe tonu ke tou maʼu kia ia ʼaē ʼe ako, ko palakalafe e fia ʼe tonu ke fai ʼi te hola e tahi, te meʼa ʼaē ʼe tonu ke tou fai mo kapau ʼe fai mai he ʼu fehuʼi ʼe mole ʼalutahi mo te ako, pea ʼe lava feafeaʼi kia ia ʼaē ʼe faiako pea mo ia ʼaē ʼe ako, ke nā teuteuʼi fakatomuʼa te ako, pea mo te faʼahiga fai ʼaē moʼo taki ia ia ki te kautahi ʼa Sehova. Kapau ʼe tou mulimuli ki te ʼu tokoni ʼaia, tokolahi ia tatou, ʼo kau kiai mo nātou ʼaē ʼe foʼofoʼou mai, ʼe feala anai ke tou fai he ʼu ako ʼe tuputupu.
12 Te ʼu Fakamatala ʼo Te ʼu Fua Lelei ʼi Te Telituale: Kua ʼiloʼi papau ko te kaupepa lahi Fakamaʼua pea mo te tohi Te ʼAtamai Mālama, ko he ʼu tokoni ʼaoga moʼo fakatuputupu vave te fai ʼo he ʼu tisipulo. ʼI tana maʼu te kaupepa lahi Fakamaʼua, neʼe foimo fakaʼaogaʼi atu aipe e te tēhina ʼi Polivia moʼo kamata te ako mo te tagata. Hili māhina e fā, ʼi te fakatahi faka tisitilike, neʼe kau te tagata ʼaia ʼi te hahaʼi fiafia ʼaē neʼe papitema!
13 Ko te tokolahi neʼe uga nātou e tonatou loto ke nātou foaki tonatou maʼuli kia Sehova, ʼi tanatou ʼosi ako katoa te tohi Te ʼAtamai Mālama. ʼI te kokelekasio ʼi Angola, neʼe tuputupu te lahi ʼo te ʼu ako Tohi-Tapu ʼo te ʼu kaugā fai faka mafola mai te toko 190 ki te toko 260, pea neʼe tuʼa lua te tuputupu ʼo te lahi ʼo te hahaʼi ʼaē neʼe kau ki te ʼu fono mai te toko 180 ki te toko 360 ia māhina pe e fā, ʼi te kua kamata fakaʼaogaʼi ʼo te tohi Te ʼAtamai Mālama ʼi te fenua ʼaia. ʼO mole fualoa, pea neʼe maʼua ke fakatuʼu he tahi kokelekasio.
14 ʼI tana ʼosi kamata tana ʼuluaki ako Tohi-Tapu ʼi te tohi Te ʼAtamai Mālama, neʼe ʼui e te tēhina, ko te fai ʼo te ako “ ʼe faigafua mo kapau ʼe fai pe te ʼu fehuʼi, mo lau te ʼu vaega ʼaē ʼe ʼalutahi mo te fehuʼi, pea mo ʼiloʼi papau pe kua mahino kiai ia ia ʼaē ʼe ako.” Logope la neʼe manatu tuʼumaʼu e te tēhina ʼaia neʼe gata pe ki te ʼu kaugā fai faka mafola faiva te fealagia ʼaē ke nātou fai he ʼu ako Tohi-Tapu ʼe tuputupu, kae mole feala anai kia ia, neʼe ina ʼiloʼi papau ai leva ʼe feala ke ina fai te meʼa ʼaia, ʼo ina ʼui fēnei: “Kapau ʼe feala ke ʼau fai, pea ʼe feala pe ki te hahaʼi fuli.”
15 Kapau ʼi tatatou minisitelio ʼe tou fai he ʼu ako Tohi-Tapu, pea ʼe tou fakahoko anai te fakatuʼutuʼu ʼaē ko te fai ʼo he ʼu tisipulo. Ko nātou ʼaē kua popoto ʼi te faʼahi ʼaia ʼo te minisitelio, ʼe nātou fakatokagaʼi ʼe ko he meʼa fakafiafia moʼoni pea ʼe lahi te ʼu tapuakina ʼaē ʼe kita maʼu ai. Tou fakaʼamu ke ʼui ʼo ʼuhiga mo tatou, neʼe tou ‘toe faka mafola fakahagatonu foki te puleʼaga ʼo te ʼAtua . . . pea mo akoʼi te ʼu meʼa ʼaē ʼo ʼuhiga mo te ʼAliki ko Sesu Kilisito.’—Gāue 28:31.