Ko Te ʼu Fono Gāue ʼo Sanualio
Vāhaʼa ʼo te ʼaho 4 ʼo Sanualio
Katiko 36
10 min: Te ʼu logo ki te kokelekasio. Te ʼu Tonu.
15 min: “Koutou Fakaʼaogaʼi Te ʼu Kaupepa Moʼo Fakahā Takotou ʼAmanaki ʼo ʼUhiga Mo Te Puleʼaga.” ʼO fai ʼaki he ʼu fehuʼi pea mo he ʼu tali. Fakahā te ʼu kaupepa ʼaē ʼe feala ke tufa ʼi te telituale. Fakahā he ʼu puani lelei ʼo te ʼu nusipepa ʼaia, pea mo fakamahino peʼe lava feafeaʼi hatatou fakahā ki te hahaʼi. Fakaloto mālohiʼi ia nātou fuli ʼaē ʼi te fono ke nātou tufa te ʼu nusipepa ʼi te telituale pea mokā nātou fagonogono faigamālie ʼi te māhina ʼo Sanualio. Fai mo te kiʼi faʼifaʼitaki nounou pea mo faigafua.
20 min: Tou Teuteu Nei Ke Tou Fakaʼapaʼapa Ki Te Lao ʼa Te ʼAtua ʼo ʼUhiga Mo Te Toto. Ko te tagata ʼāfea faiva ʼe talanoa ki te maʼuhiga ʼaē ke tou tohi te kiʼi kate “Attestation prévisionelle.” ʼE hā mai ʼi te manatu ʼaē ʼe tuʼu ia Pesalemo 19:7, ko te fakatotonu ʼo Gāue 15:28, 29 ʼe haʼu mai te lao haohaoa ʼa Sehova ʼo ʼuhiga mo te toto. Ko te hahaʼi tauhi agatonu ʼe nātou faiga ke nātou fakalogo ki te lao ʼaia. ʼE fakahā e te kiʼi pepa ʼaia takotou fakatotonu ʼaē ke koutou fai te faʼahi ʼaia, pea ʼe palalau anai maʼa koutou mokā mole feala anai ke koutou fai te faʼahi ʼaia. (Vakaʼi ia Tāʼaga Lea 22:3.) Kapau ʼe koutou fakafoʼou takotou kiʼi kate, pea ʼe koutou fakahā ai ʼe koutou fakafisi tuʼumaʼu ki te toto. ʼI te ʼosi ʼo te fono, ʼe tufa anai ki te ʼu tēhina mo tuagaʼane kua papitema ʼaē ʼe nātou fakafoʼou tanatou kate, pea ko nātou ʼaē ʼe maʼu fānau ka mole heʼeki papitema, ʼe tufa anai kia nātou te ʼu kiʼi kate dʼidentité. ʼE tonu ke tohi fakalelei te ʼu kiʼi kate ʼaia. ʼE takitaki anai e te kau tagata ʼāfea pea tāfito te ʼu tēhina taupau ʼo te ʼu ako tohi, te sinie pea mo te tohi ʼo te ʼaho ʼo te ʼu kiʼi kate ʼaia. ʼAki te faʼahi ʼaia, ko nātou fuli ʼaē ʼe fia fakalogo ki te fakatotonu ʼo ʼuhiga mo te toto ʼe nātou maʼu anai te ʼu tokoni ʼaē ʼe ʼaoga kia nātou. Ko nātou ʼaē neʼe mole kau ʼi te fono ʼaia kae nātou fia tohi pea mo sinie hanatou kiʼi kate, ʼe tokoni anai kia nātou te tēhina ʼaē ʼe ina takitaki tanatou ako tohi pe ko he tagata ʼāfea ʼi te fono gāue ʼi te vāhaʼa ʼaē ʼe hoa kiai, ʼo aʼu ki te kua tohi e te ʼu kaugā fai faka mafola fuli tanatou ʼu kate. (Vakaʼi te tohi ʼaē neʼe momoli atu ʼi te ʼaho 5 ʼo Novepeli 1997.) ʼE feala ki te ʼu kaugā fai faka mafola ʼaē ʼe mole heʼeki papitema, ke nātou hiki ki he moʼi pepa te ʼu meʼa ʼaē ʼe tohi ʼi te kate ʼaia, ʼo mulimuli ki tanatou ʼu ʼaluʼaga pea mo te ʼu meʼa ʼaē ʼe nātou tui kiai, ʼo tohi ʼi he pepa te ʼu meʼa ʼaē ʼe nātou loto ke fai kia nātou pea mo tanatou fānau.
Katiko 33 pea mo te faikole fakaʼosi.
Vāhaʼa ʼo te ʼaho 11 ʼo Sanualio
Katiko 103
10 min: Te ʼu logo ki te kokelekasio. Lau ʼo te falā.
20 min: “Tou Fakatotonu Ke Tou Haga Haʼele ʼi Te Ala ʼa Te ʼAtua ʼAē ʼe Ina Taki Ki Te Maʼuli.” Ko te akonaki. Koutou fakaloto mālohiʼi ia nātou fuli ʼaē ʼi te fono ke nātou kau tuʼumaʼu ki te ʼu fono e nima ʼo te kokelekasio ʼaē ʼe fai ʼi te vāhaʼa fuli.
15 min: “Koutou Faʼa Kātaki.” Ko he fai palalau ʼa he famili. ʼE nātou vakaʼi he ʼu ʼaluʼaga ʼe feala ke nātou fakahā ai te faʼa kātaki ʼi tonatou minisitelio. Koutou fakaʼaogaʼi mo Te Tule Leʼo ʼo te ʼaho 15 ʼo Sūnio 1995, ʼi te pasina 12.
Katiko 135 pea mo te faikole fakaʼosi.
Vāhaʼa ʼo te ʼaho 18 ʼo Sanualio
Katiko 181
5 min: Te ʼu logo ki te kokelekasio.
10 min: Te ʼu Logo ʼAē ʼe ʼAoga Ki Te Kokelekasio.
15 min: “Te ʼu Tagata Taupau ʼe Ko He ʼu Faʼifaʼitaki—Te ʼu Tēhina ʼAē ʼe Nātou Takitaki Te ʼu Ako Tohi ʼo Te Kokelekasio.” Ko te akonaki ʼe fai e te tēhina takitaki ʼo he ako Tohi-Tapu ʼe ina tuku he faʼifaʼitaki ʼe lelei, pea ʼe ina vakaʼi tana ʼu maʼua ʼo ʼuhiga mo te faʼahi ʼaia. ʼE ina fakahā peʼe tokoni feafeaʼi tana gāue ke tuputupu te kokelekasio ʼi te faʼahi fakalaumālie. Fakaʼaogaʼi mo te ʼu tokoni mai te tohi Organisés pour bien remplir notre ministère, ʼi te pasina 43 ki te 45, pea mo te 75 ki te 77.
15 min: “Koutou Haga Tuputupu ʼi Te Faʼahi Fakalaumālie.” Ko te akonaki ʼe fakatafito ki Te Tule Leʼo ʼo te ʼaho 1 ʼo ʼOketopeli 1998, ʼi te pasina 28 ki te 31.
Katiko 165 pea mo te faikole fakaʼosi.
Vāhaʼa ʼo te ʼaho 25 ʼo Sanualio
Katiko 201
10 min: Te ʼu logo ki te kokelekasio.
15 min: Ko He Fetogi ʼi Te ʼu Hola ʼAē ʼe Fakamaʼua Ki Te Kau Pionie. Ko te akonaki ʼe fai e te tagata ʼāfea. Koutou fakamālo ki te kau pionie ʼo te kokelekasio, pea mo fakaloto mālohiʼi te kau fai faka mafola ke nātou toʼo te selevisi pionie vaeluaʼi temi peʼe pionie katoa, ʼi tanatou manatuʼi ʼe tonu ke makehe tatatou fai faka mafola ʼi Malesio, mo ʼApelili pea mo Maio. Koutou fakaʼaogaʼi mo te ʼu manatu ʼe toʼo mai te ʼu pepa ʼaē ʼe ʼalutahi mo Te Minisitelio ʼo Te Puleʼaga ʼo Fepualio 1997 pea mo Sūlio 1998.
20 min: ʼE koutou vakaʼi koa te Tohi-Tapu ʼi te ʼaho fuli? Ko te akonaki pea mo te fai palalau mo nātou ʼaē ʼi te fono. ʼI te taʼu fuli, ʼe foaki mai e te Sosiete te kiʼi tohi Tou Vakaʼi Te Tohi-Tapu ʼi Te ʼAho Fuli. ʼE koutou fakaʼaogaʼi fakalelei koa te kiʼi tohi, ʼo koutou vakaʼi takitokotahi peʼe koutou fai faka famili? Fakahā te ʼu tupuʼaga lelei ke tou vakaʼi te vaega faka Tohi-Tapu ʼi te ʼaho fuli. Vakaʼi mo he ʼu manatu lelei ʼe maʼu ʼi te ʼuluaki palalau ʼo te tohi Tou Vakaʼi Te Tohi-Tapu ʼi Te ʼAho Fuli—1999, ʼi te pasina 3 ki te 4. (Kapau mole heʼeki maʼu, pea koutou fakaʼaogaʼi te kiʼi tohi ʼo te taʼu 1998) Fakaafe te kau fai faka mafola ke nātou fakamatala te ʼu faiga ʼe nātou fai ke nātou vakaʼi takitokotahi peʼe vakaʼi faka famili te vaega Tohi-Tapu ʼo te ʼaho pea mo tona talanoa.
Katiko 114 pea mo te faikole fakaʼosi.