“Koutou Faʼa Kātaki”
1 ʼI tatatou sio ki te ōvi mai ʼo te fakaʼosi ʼo te tuʼu ʼaenī ʼa Satana, koia ʼe maʼuhiga ʼaupito ke tou “faʼa kātaki” ʼi tatatou talitali ki te ʼaho ʼaē ka hāofaki ai tatou e Sehova. Tāfito ʼi te temi fakaʼosi ʼaenī, ʼe faiga mālohi te kau fakafeagai agakovi ke nātou fakahēʼi tatou mai te faʼahi maʼuhiga tāfito ʼaē ko te pule faʼitaliha ʼa Sehova, pea ʼe nātou fakahalaʼi tatou ke tou faiga ki he ʼu fakatuʼutuʼu fakatagata. Ohage la, ʼe feala ke fakahalaʼi tatou e Satana mo kapau ʼe tou tuku peʼe tou fakasiʼisiʼi tatatou gāue fai faka mafola. (Sake 5:7, 8; Mateo 24:13, 14) Koteā te ʼu ʼaluʼaga ʼaē ʼe feala ai ke tou fakahā te faʼa kātaki?
2 Tou Lotoʼutaki: Ka tou felāveʼi mo he ʼu hahaʼi ʼe mole fia logo peʼe nātou fakafeagai kia tatou ʼi totatou minisitelio, ko te lotoʼutaki ʼe tokoni anai kia tatou ke hoko atu tatatou gāue. ʼE mole tou hoko mataku anai peʼe lotomamahi anai mokā fai mai e te hahaʼi he ʼu palalau fefeka peʼe mole nātou agalelei mai kia tatou. (1 Pet. 2:23) Ko te mālohi ʼaia ʼaē ʼe ʼi totatou loto, ʼe feala ke tokoni kia tatou ke ʼaua naʼa tou fai he ʼu palalau kovi ʼo ʼuhiga mo te hahaʼi ʼo totatou telituale ʼaē ʼe mole nātou fia logo peʼe nātou fakafeagai ki tatatou gāue, heʼe tou ʼiloʼi, kapau ʼe tou fai he ʼu palalau feiā, pea ʼe feala ke fakatupu vaivai kia tatou totonu pea mo nātou ʼaē ʼe nātou gāue fakatahi mo tatou.
3 Tou Faʼa Kātaki Fualoa: ʼE feala ke ʼahiʼahiʼi tatatou faʼa kātaki mokā tou fai palalau lelei mo he tahi ʼi te telituale, kae mole feala hatatou toe maʼu ia ia ki muli age. ʼE toe moʼoni te faʼahi ʼaia mokā mole faʼa tuputupu ia nātou ʼaē ʼe tou fai tanatou ako, peʼe fualoa hanatou fakatotonu ke nātou lagolago ki te moʼoni. Kae ʼi te agamāhani ʼe maʼu he ʼu fakapale mokā tou faʼa kātaki fualoa. (Kal. 6:9) Neʼe tau ʼaʼahi e te tuagaʼane he fafine, ʼi muʼa ʼo tana kamata moʼoni tana ako Tohi-Tapu. ʼI tana ʼu ʼuluaki ʼaʼahi e nima, neʼe maʼumaʼua tuʼumaʼu te fafine. ʼI tana ono ʼaʼahi ia te fafine ʼaia, neʼe palapala ʼosi te tuagaʼane ʼi te toe ʼua lahi, pea neʼe mole he tahi ʼi te ʼapi. Kae ʼi tana fakatotonu ʼaē ke ina fakahā te logo lelei ki te fafine ʼaia, neʼe ina toe ʼaʼahi, pea neʼe tali e te fafine ke fai hana ako Tohi-Tapu. Talu mai te lakaga ʼaia, neʼe tuputupu te fafine ʼi te faʼahi fakalaumālie, pea neʼe mole tuai pea ina foaki tona maʼuli kia Sehova.
4 ʼE tou ʼiloʼi ʼe mole tauhala mai anai te ʼaho ʼo Sehova. Koia ʼe tou talitali ki te temi ʼaē ka ina fakatokatoka anai te ʼu meʼa fuli, ʼi tatatou ʼiloʼi ʼaē, ʼe tou maʼu anai he ʼu fua lelei ʼo tatatou faʼa kātaki. (Hap. 2:3; 2 Pet. 3:9-15) ʼE tonu ke tou faʼa kātaki ohage ko Sehova, pea ke ʼaua naʼa tou tuku totatou minisitelio. “ ʼAki te tui pea mo te faʼa kātaki,” koutou falala ʼe fakapale anai koutou e Sehova ʼuhi ko takotou gāue kinakina.—Hep. 6:10-12.