Te Ako ʼo Te Minisitelio Faka Teokalatike Ki Te Taʼu 2002
1 Maʼa te tokolahi ʼe mole faʼa maʼuhiga te fealagia ʼo te palalau. Kae ko te palalau ʼe ko he meʼa ʼofa mai ia Sehova. ʼE ina faka fealagia kia tatou ke tou palalau mo te hahaʼi, pea mo tou fakahā tatatou ʼu manatu pea mo te ʼu meʼa ʼo totatou loto. Kae tāfito, ʼaki te palalau ʼe feala hatatou fakavikiviki ki totatou ʼAtua.—Pes. 22:22; 1 Ko. 1:4-7.
2 Ko nātou tagata, mo nātou fafine, pea mo nātou liliki, ʼe akoʼi nātou ʼi te Ako ʼo Te Minisitelio Faka Teokalatike moʼo kalagaʼi te huafa ʼo Sehova. (Pes. 148:12, 13) Ko te polokalama ʼo te ako ki te taʼu 2002 ʼe lahi tana ʼu akonaki faka Tohi-Tapu ʼe ʼaoga anai kia tatou, pea mo tou fakaʼaogaʼi anai ʼi te minisitelio. Kapau ʼe tou teuteuʼi te ako pea mo tou kau kiai, ʼe feala anai hatatou fakatuputupu tatatou ʼatamai mālama, pea mo tatatou poto ʼi te akoʼi ʼo te Folafola ʼa te ʼAtua.—Pes. 45:1.
3 Koutou Lau Te Tohi-Tapu ʼi Te ʼAho Fuli: Kapau ʼe tou nofo tuʼumaʼu mo hatatou Tohi-Tapu, pea ʼe faigafua hatatou lau ʼi he temi pe ʼe tou ava ai. Ko te tokolahi ia tatou ʼe tou maʼu he ʼu kiʼi minuta ʼi te ʼaho fuli moʼo lau te Tohi-Tapu. ʼE ko he meʼa lelei hakita lau he pasina e tahi ʼi te ʼaho fuli, heʼe feʼauga moʼo mulimuli lelei ki te polokalama lau Tohi-Tapu ʼaē ʼe tuʼu ʼi te polokalama ʼo te ako!—Pes. 1:1-3.
4 Ko te fealagia ke kita lau lelei te Tohi-Tapu, ʼe lava tokoni mai ke malave tatatou ʼu palalau ki te loto ʼo te hahaʼi ʼaē ʼe nātou fakalogo mai, pea mo tou uga nātou ke nātou fakavikiviki kia Sehova. Ko te ʼu tēhina ʼaē ʼe nātou fai te ʼu akonaki numelo 2, ʼe tonu ke nātou gāueʼi tuʼumaʼu tanatou lau leʼolahi ʼo tanatou lautohi. Ko te tagata taupau ʼo te ako, ʼe ina fakaloto mālohiʼi anai pea mo foaki he ʼu tokoni moʼo hikihiki te lautohi.
5 Koutou Fakaʼaogaʼi Te Tohi ʼo Te ʼu Hisitolia Faka Tohi-Tapu: Ko te ʼu akonaki ʼo te numelo 3 mo te numelo 4 ʼe fakatafito ki Te Tohi ʼo Te ʼu Hisitolia Faka Tohi-Tapu. ʼE tonu ki te ʼu tuagaʼane ke nātou filifili he ʼu ʼaluʼaga ʼo te fai palalau ʼe ʼaoga ki te telituale. Ko te tagata taupau ʼo te ako ʼe tonu ke tokaga tāfito peʼe feafeaʼi tanatou faiako, pea ke nātou fakaʼaogaʼi te Tohi-Tapu.
6 ʼOfa pe ke tokoni te Ako ʼo Te Minisitelio Faka Teokalatike kia tatou fuli, ke tou haga fakaʼaogaʼi tatatou fealagia mai te ʼAtua ʼaē ko te palalau, moʼo tala te logo lelei pea mo fakavikiviki ki totatou ʼAtua lahi ko Sehova!—Pes. 34:1; Ef. 6:19.