He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 1 ʼo Fepualio

“ ʼE ʼui ʼi te Tohi-Tapu ʼe foaki mai e te ʼAtua ia te fealagia ke tou maʼu ia te ‘maʼuli heʼegata.’ ʼE ke tui ki te taʼi fakapapau ʼaia? [Tuku ke fai mai hana tali. Pea kotou lau age ia Soane 6:40.] Koteā ʼapē ʼaē neʼe ina uga ia ia ke ina foaki mai ia te ʼamanaki ʼaia?” Fakahā age te ʼalatike ʼaē ʼe kamata ʼi te pāsina 25.

Réveillez-vous! ʼo Fepualio

“Ko ʼihi hahaʼi ʼe natou ʼui ʼe ʼi ai te Tupuʼaga ʼo te ʼu meʼa fuli, kae ko ʼihi ʼi tanatou manatu ko te ʼu taʼi akonaki ʼaia ʼe mole fakapotopoto ia pea ʼe mole fakamoʼoni kiai ia te poto fakatagata. Koteā tau manatu ki te faʼahi ʼaia? [Tuku ke fai mai hana tali.] ʼE akoʼi mai ʼi te Tohi-Tapu, ko te tui moʼoni ʼe fakatafito ki he meʼa ʼe moʼoni. [Lau age ia Hepeleo 11:1.] ʼE fakahā ʼi te ʼalatike ʼaenī ia te ʼu fakamoʼoni ʼe ʼi ai te Tupuʼaga.” Fakahā age te ʼalatike ʼaē ʼe kamata ʼi te pāsina 22.

Te Tule Leʼo ʼaho 1 ʼo Malesio

“Tokolahi te hahaʼi ʼe natou fakaʼamu ke natou ʼolo ki selō mokā natou mamate. ʼE ke fakaʼamu mo koe ki te faʼahi ʼaia [Tuku ke fai mai hana tali.] Ke ke fakatokagaʼi age muʼa peʼe koteā ʼaē ʼe ʼui ʼi te Tohi-Tapu ʼo ʼuhiga mo te fakapale ʼaē ʼe maʼu e te hahaʼi tokolahi ʼe agalelei. [Lau age ia Pesalemo 37:29.] ʼE fakahāhā ʼi te nusipepa ʼaenī ia te manatu ʼa te Tohi-Tapu ʼo ʼuhiga mo nātou ʼaē kā ʼolo anai ki selō pea mo te meʼa anai kā natou fai.”

Réveillez-vous! ʼo Malesio

“ ʼE lagi ke hagē pē ko te hahaʼi tokolahi, ʼe ke leleiʼia ia te matalelei ʼo te nātulā. ʼE ke toe manatu tahi koa mo te ʼui ʼaē ʼe ʼi ai te fakatuʼutuʼu fakapotopoto ʼo te nātulā? [Tuku ke fai mai hana tali. Pea kotou lau age ia Pesalemo 104:24.] ʼE fakahā ʼi te nusipepa ʼaenī ia te ʼu mātaga maʼuhiga ʼo te fakatuʼutuʼu ʼaē ʼe maʼu ʼi te nātulā pea mo ina fakamatalatala mai te ʼu ako ʼaē ʼe tou maʼu mai ai.”