“ ʼE Feafeaʼi Hatatou Lau Ia Te ʼu Hola Gāue ʼo Te Fai Fakamafola?”

Kua kotou fai koa te fehuʼi ʼaenī? ʼE tou maʼu te ʼu fakatuʼutuʼu māhani ʼi te ʼu pāsina 86-87 ʼo te tohi Organisés. ʼI ʼihi temi ʼe foaki mai he tahi ʼu fakatuʼutuʼu, ohagē ko tona fakahā ʼi Te Tali Ki ʼAkotou ʼu Fehuʼi ʼi Te Minisitelio ʼo Te Puleʼaga ʼo Sepetepeli 2008. ʼE mole tou fai he lisi loaloaga ʼo te ʼu lēkula ʼaē ʼe tonu ke tou mulimuli kiai, heʼe fakalogo pē ki te ʼu ʼaluʼaga ʼaē ʼe hoko. Koia ʼe mole feala ki te kau tagata ʼāfea peʼe ko ʼihi atu ke natou fai he tahi ʼu fakatuʼutuʼu ʼo ʼuhiga mo te lau ʼo te ʼu hola.

Kapau ʼe tou lagaʼi he fehuʼi kae heʼeki tou maʼu he fakamahino kiai, ʼe fakalogo pē ki te ʼu kaugā fagona takitokotahi tanatou vakaʼi te faʼahi ʼaia: Ko te temi koa ʼaia neʼe au fakaʼaogaʼi kātoa ʼi te minisitelio? Pe neʼe au fakaʼaogaʼi koa te temi ʼaia ki he tahi gāue ʼe mole hona pikipikiga mo te fai fakamafola? Ko te meʼa ʼaē ʼe tou tohi ki tatatou pepa tānaki ʼi te māhina fuli, ʼe tonu ke tou fiafia ai kae mole tonu ke vevele ai totatou leʼo ʼo loto. (Gāue 23:1) ʼE moʼoni ia, ʼe mole tou tōkakaga tāfito ki te lau ʼo te ʼu hola gāue, kae ʼe tou faigaʼi tāfito ke tou fakaʼaogaʼi fakalelei totatou temi ʼi te minisitelio.—Hep. 6:11.